Kabu ai nhtoi ...

27.6.2008


23 ning hpring ai June 17, 2008 ya hta EBC family ni galaw ya ai rung kata na birhtday party. Maigan mungdan du ai ten shangai nhtoi ang ai shaloi ndai zawn galaw ya ai majaw grai kabu ai re. Kalang marang gaw ndai zawn ngwi pyaw ai nhtoi mung nga ra ai law. :)

Dai shani email sa nna shangai nhtoi masat akyu hpyi ya ai, card ni sa ya ai manang yawng hpe chyeju dum sai law.

Shooting hte Ngai

27.6.2008
Jahpawt hkying 6:05 sha naw raitim, wan hkut hte hpring nga sai Metro Manila.

Myit lawm hkum lawm madat nga ai jawngma ni. (Nkau chyawm yup nga taw nga ai.)

Gayet sa ga hkau. Shingna la su...

Daini gaw jawng langai kaw film sa dem ai. Jawngma ni a Grupyin hte seng ai Seminar galaw ai lamang hpe re. Plastic lang ai a n kaja ai lam ni, namhpun galaw ai ladat ni. Gara gaw bai mai jai lang ai (recycle), gara gaw n mai ai ngu ai hpe sanglang bawngban ai lamang hpe sa dem ai re.

Ndai lamang hpe gaw Philippines Channel 13 kaw na shapoi na re.

Jawngma ni gaw asak 13 grupyin ram rai ma ai. Ram ram zet tsang ai hpe mu ai. Sumla dem yang ma mani dan ai hte hkrang amyu myu galaw dan ai. Shanhte na matu gaw hkau taw nga sai arung arai ni re majaw re. Ndai kaw ang ai shaloi, kalang mi Sara Palawng Naw Tawng tsun ga ai. Shi gaw Lashi krung de sa ai shaloi ma kasha langai hpe sumla dem dat ai da. Dai she, dai ma kasha na kawoi dwi gaw jaji ja gang hkrap let nye kashu hpe hkum la mat wa. Bai jaw rit ngu tsun ai da. N re, nang gaw sumla dem ai she re ngu nna camera kaw na sumla hpe madun yang numla la mat ai bai ngu da! Camera ngu ai n mu ga ai anhte amyu ni grai naw law ai re. Ndai mabyin zawn re ai hpe hpang na ban prat hta n kam byin shangun sai.

Plastic a lam bawng ban ai shaloi grai myit lawm na hpan re. Ma kasha ni wa grai chye ... grai chye... Shayawm lang yang gaw mai ai. N lang yang gaw gara hku di na? Grai akyu rawng ai she re gaw. Hpa hpa nya nya grai jahta ma ai.

Manang nkau ni zawn manu dan ai post ni mara mayu tim, n lu myit shi ai hte, n dang myit lu ai hte amu kyin ai hte, madu a computer n lu ai hte re majaw ka matsing laika buk zawn sha ka taw nga ai rai!

Jinghpaw Mung Tai-hmu nnan kadai rai?

27.6.2008

Jinghpaw mung de htawt wa na tai-hmu nnan kadai ta?
Ya lu ai shiga hku nga yang gaw Soe Win nga ai wa re da.
Ndai kaw na mai hti ai. Myen hku ka da ai re.

Myitru ten ...

26.6.2008

Laika gaw grai ka mayu ai wa. Bawnu kaw na n pru hkraw nga ai. Hka loi jaw dat ra sam ai. Hkru taw nga ai wan ni zim mat hkra...

Huuuuuu... n loi la ai shinggyim prat ...

N mani na rai yang she ndai npu kaw na vedio hpe yu na matu saw lajin mayu ai.

Myitru nga ai.

23.6.2008

Hpakant kaw hka kaba taw nga ai shiga re. Akyu hpyi ya ga.

Hpakant ngu ai gaw Jinghpaw Wunpawng amyu a prat hpe galai dat ya ai shara ma re. Ndai Hpakant marang e, anhte kunghpan wa ai, Lusu wa ai, Htenza mat ai, amyu myu re.

Ndai kaw mai hti ai.

Manila Bay hte ngai

23.6.2008

Manila Bay, Philippines

Manila Bay gaw panglai hkinggau makau kaw re. Dai kaw lam hkawm na matu grai kaja ai shara rai nga. Lusha seng ni mung grai law ai. Filipino lusha seng ni hte Korea, Japan lusha seng ni ma nga ai. Nkau seng ni kaw gaw yungwi hte ma shapyaw ya ai. Nkau kaw gaw mahkawn hpaw let ka na Robot zawn sa ai masha langai hte shangwi shapyaw ya ai.

Daina maga de Thai kaw na officers ni du nna bawngban jahta ai lam ni galaw ai. Ngut ai hpang Manila bay de sa ai. Dai kaw shana shat sa sha ai re.

Anhte shana shat sha ai kaw panglai lusha nau n sha ai ngu na gaw Ngai Jinghpaw ngaw de sha rai nga ai.

1. N ra sha ai majaw.

2. Nkau malu masha ni hpe yu na pyi hkrit ai majaw.

3. Jin wa sai majaw.

Sha ngut ai hpang gaw South Africa kaw na tsawm shachyang langai, Thai kaw na tsawm shayi langai hte lam hkawm chyai ai. Shadang sha lahkawng kaw na ngai grau tsawm na sam ai. Ngai gaw A net nu yawng nsam re majaw. O ra wa gaw ngai hta grau chyang ai ngu kau sa ga. :)

Masha tsawm ra law ai kaw na, malawng gaw Korean ni rai ma ai. Ndai Phiilippines kaw Korean masha ni grai nga ai re. Shanhte gaw laiksan nga ma ai. Gumhpraw lu ai ni chyu malawng ai. Makau kaw na Korean shayi, shadang marai 6 daram hte mu ai. Shanhte gaw manu mana branglang ai hte grai zet tsang ai hpe mu lu ai. Shada shala hkat, sumla dem, jawng lam tsun, shawnglam jahta re grai yu htuk ai law. Tsawm ma tsawm ma ai. Jinghpaw shayi ni zawn sha re.

Shanhte na asak gaw 19, 20,22 grupyin sha rai ma ai. Shanhte nkau gaw amu galaw let jawng lung ai re nga chye lu ai.Shanhte shada nga yang Korean ga hte sha shaga ai. Shanhte a Kanu Kawa ni grai shakut ya lai wa sai majaw ndai madang du ai re ngu maram ai.

Hu..... Jinghpaw ma ni a shawnglam gaw gara hku ta? Anhte a Kanu Kawa ni gaw majan prat hpe lai di ra ai nhtawm me grai yak hkak ai hte shakut wa sai. Dai hta malawng gaw Hpaji chye ai gaw bai n rai ai. Raitim, anhte a Kanu Kawa ni gaw shanhte chye machye hte anhte hpe shalat wa sai re.

Gai... anhte a prat bai rai wa sai. Ram daw chye ai ram gaw chye sai. Nkau nga jang madang tsaw ai hpaji ni grai chye sai. Anhte a Kashu Kasha ni hpe gara hku shalat na ta? Shanhte a matu tsawm htap ai grupyin gara hku gawde ya na ta?

Anhte a kashu kasha ni ma ndai zawn ahkaw ahkang n lu ging ai i?

Anhte a lit grai law wa sai lo. Mungkan shara shagu hkan chyam bra nga ai Hpu nau ni e, ...

Anhte hpa baw lu jaw da na ta? Ndai hpe ma myit ga. Anhte a Amyu, anhte a Mungdan matu, dai hta n-ga anhte nga pra ai ndai Mungkan ntsa anhte hpa baw lu jaw da na ta?

Nang ngai yawng lit lu nga ai law. Kadai wa sa jaw da ai lit mung n re. Labau jaw ai lit she re.

Rawt ga! Bai gawgap ga.

Anhte a prat hta she rawt ga. Bai run kau ga n byin hkra shakut ga law.

Jawng sara

23.6.2008
Pasig, Metro Manila
Philippines

2003 ning, Dakkasu jawng lung taw nga ai aten, nta buga hte ma grai tsan taw nga ai aten, dai aten gaw cassette prat rai nga ai. CD ni pru wa sai raitim, nau popular n byin shi ai.
Dai aten gaw Myitkyina na Miwa Sengke ni lawu ga de manu mana htaw dut taw nga ai aten rai nga.

Dai aten hta jawng sara ngu ai namchyim n chye shi ai. Kalang ma n galaw ga ai re. Jinghpaw ga hpe ma jaji bai hkaja taw nga ai aten rai nga!

Dakkasu laika dum kaw na Myen hpyendap labau ni hpe hti nga ai aten, rawt malan majan pa hta, mayan hkan, pajau hkan, etc, myu tsaw hpyenla ni hkrat sum mat ai lam ni ka da yang myiprwi si ni hkrat wa ai du hkra hkam sha sai.

Jawng sara ngu ai mahkawn hpe madat yu ga. Malawng gaw chye na re ngu kam ai. Mahkawn ka sara Ah Tang a mahkawn re. Tinang n galaw ga shi tim hkam sha yu ga. Tinang galaw ga sai, mu ga sai ni ma bai hkam sha yu ga. Shawng de gara hku galaw shakut mat na hpe ma myit yu ga. Youtube kaw Jawng sara mahkawn mara da ya ai Sumlut Gon Maw hpe grai chyeju dum sai law.

Nau nna ai aten hta gaw Bum ga de loi hkawm chyai yu ga sai. Shawng ningnan lang re. Ngai mu wa sai. Nye amyu gaw hpa ta? Ngai hpa galaw ra na hpe sawn hkrup wa ai aten re. Nye prat hta ndai aten daram yup n mai, sha n shang ai aten n nga sai.
Ngai daw dan dat sai. Nye amyu a matu hpa sha pyi n lu galaw ya tim, hpaji lam hte anhte a laili laika lam hpe rawt jat gan ga wa hkra shakut na ngu.

Karai Kasang e ... Anhte amyu sha ni hpe hpaji jaw rit law. Matsan dum rit. Hpaji chye nna chye chyang kung hpan wa na amyu tai shangun rit.

Jinghpaw Wunpawng shayi sha langai British Hkringman Daju hte hkrum shaga

Grai shakut u yaw.
Myit mada nga nngai.
Ndai kaw mai hti ai.

Typhoon in Philippines

22.6.2008
Quezon city, Philippines
Mana gaw anhte ni hpawtde akyu hpyi na matu hkyen lajang nga ai re. Wa pu, Wa shinglet ni kashin, ra mara galaw ngut ai hpang Beyond the Rangoon ngu ai sumla hpe jawm yu ai. Dai hpe youtube kaw tam nna mai yu ai re. Daw 13 garan nna mara da ai re. '88 na mabyin ni hte American num langai a mahkrun madup ni hpe gayet da ai re. Comlumbia sumla shapraw company kaw na lajang ai re. Rambo sumla hte gaw shai ai. Hkrak ai ngu tsun mayu ai. Dai yu ngut ai hpang manang ni gaw yup mat wa sai.

Ngai gaw net matut lang nga ai. Nbung bung wa ai. A ga... grai katsi pyaw la a hka. Chyinghka makau kaw mau let bungshi ni hpe pyi naw hkam sha dat ai.

Net matut lang nga yang makau gawk na ga shaga ai nsen, lagaw nsen ni na wa sai. Kalang ta, nbung bung ai nsen gaw hkrit na zawn rai wa ai. Nau nna yang marang htu wa ai. Jahpawt hkying 4 daram rai sai. Ngai gaw Nargis hpe hkrum sha lai wa ai ni wa gara hku she hkam sha na hpe ma myit hkrup ai.

Jahpawt hta gaw grupyin yawng hka hkrai hkrai re. Magyi ram du ai. Gau ngwi ngwi hte sha yawm mat ai wa shana nsin sin yang she tsep kawp yawm mat ai re. Mawdaw yawng n lai mat ai. Nkau shara hkan gaw myihkrap wan n lu mat ai. Manang nta kaw mung net hten mat ai. Masha 150 daram si ai nga BBC kaw na na lu ai. 23 ya shani mung bai typhoon lai na nga na lu ai.

Public, Security and Cyber Crime

20.6.2008
Ateneo University,
Philippines

Ndai Dakkasu gaw Philippines kaw na hkrak dik ai dakkasu ma re. Gumhpraw ma grai ma hkam ra ai. Lusu hkun mi ni sha lung ai dakkasu ma re.
Madung gaw security hte cyber crime a lam bawngban ai re.
Dai sha re law. Matut ka yang mung masa ni lawm wa sa na. :)

Udi hte ready made chyu n sha na sadi jaw shadum ya ai manang hpe grai chyeju dum sai. Ya, dai nau n sha ai sha Bread bai matut taw sai. :)

Si Pa grai sha mayu taw nga ai kaw Si Pa nga ai de du mat ai. Du yang gaw Jinghpaw Sipa n re ai sha SEAPA rai taw nga ai. South East Asia Press Association re. Mana law. Editor wa mung hkau soi gaw n jaw sha. Grai dwi ai shanhte a lusha sha jaw sha ai.

Scholarships ni ...

More Scholarships
Scholarship for Humanities or social sciences study at Seoul National University (New)
Ph.D Scholarships at Zhejiang University (New)
Teaching Scholarships for PhD candidates at University of York (New)
UNU-IAS PhD and Postdoctoral fellowships (New)
Endeavour Awards for Research, Postgraduate study or research, Vocational education and training, Professional Development and Student Exchanges (New)
MS/PhD scholarships at SEARCA (New)
International Master of Advanced Studies in Development Studies Scholarship
Master scholarship at Chulalongkorn University (New)
Robert S. McNamara (RSM) Fellowships (New)
IRCSET Scholarship for Master and Doctorate (New)
The POSCO Asia Fellowship at Seoul National University (New)
6 PhD fellowships at the University of Roma La Sapienza (New)
Scholarships from the Belgian government (New)
PhD scholarship at University of Aarhus (New)
Fujitsu Scholarship (New)
Ambassadorial Scholarships (New)
Masters in Sustainable Forest and Nature Management scholarship (New)
Masters in Sustainable Tropical Forestry Scholarship (New)
Scholarship at University of Leeds (New)
MERIT / ERASMUS-MUNDUS Scholarship (New)
International Scholarship at the Royal Schools of Music in the UK (New)
MTCP Scholarship for Masters and PhD
Malaysian International Scholarship for Masters and PhD
MBA scholarships at Queensland University of Technology
The ENS Lyon scholarships for Master
Eiffel Scholarship for Master and PhD
PhD Research Scholarships, NUS
Ph.D at The Life Science Zurich Graduate School
AUN/SEED-Net Scholarship for Doctoral Degree Sandwich Program (New)
AUN/SEED-Net Scholarship for Master (New)
ASEAN Research Scholars
ASEAN Foundation - AIT Scholarship (New)
The Netherlands Fellowship for Master
Doctor of Philosophy Scholarship
Master in Public Administration Scholarship
Master in Public Policy Scholarship
e8 Masters and Post-Doctoral Program Scholarship
Scholarship at The University of Melbourne
Japan Scholarship
Japan/World Bank Scholarship
Ford Foundation Fellowships
Scholarship and Job are posted at http://cambodiajobs.blogspot.com/

Ndai ni hpe sa ya ai Sara Nu Kyang (AIT) hpe chyeju kaba sai law.

Michael Buble a HOME mahkawn

18.6.2008
Pasig, Metro Manila
Philippines

Daini klosayhtoo a blog de sa yu ai shaloi shi mara da ai mahkawn hpe madat hkrup ai. Grai ra mat ai. Ya she madat ga ai re. Dai hte rau nye myit ni Buga de bai du mat ai...

Michael Buble a HOME mahkawn gaw myit ni hpe nta de woi ma mat ai.

Nta ... shingnrai Buga ... ya ten gara hku ta?
Gara hku ta ngu ai hta Mung masa, Sut masa, Hpaji lam, Hkam ja lam, Matut mahkai lam yawng re.

Tsan tsan kaw na marit nga let ...

17.6.2008
Philippines

Jeepney ... (snr) Filipino ni a kumla







Manila du nna shawng nnan mu lu ai Shata jan.







Nbung n san ai majaw ...


Udi mung langai sha nga sai.









Ready made mung jin wa sai.



Kashin ra ai mung sumpum taw nga sai.










Laika ka na mung grai lagawn ai. Kaja nga yang laika buk ni gaw ayai aya she re. Sumla dem na rai na loi htuk manu hkra shara dat ai re.

June 17, 2008
Arrr.... asak mung 23 ning hpring sai.
Bungli gaw hpa n lu galaw shi nga ai le.

Ah Nu e... Chyeju dum ai law. Karai Kasang hpe a chyeju shakawn ai. Lama dai Motor bawm she kapaw wa yang gaw ya aten ndai zawn laika pyi n lu ka sa na re. Hkri tung kaw nna shakram kau da ra sai.

Kawa nhtoi hta nawku jawng sa ai.

15.6.2008
Pasig, Metro Manila
Philippines

Daini Philippines kaw na Hkalup hpung nawku jawng de sa ai. Roman Catholic grai law ai. Hkalup hpung gaw nau (nau) n law ai.
Mying gaw... Palayan Baptist Church re.
Dai gaw nawku jawng kachyi sha law rai nna masha ma nau n law ai.
Dum shapyaw ai arung arai ni gaw hkum ai. Band langai hte ramma ni dum ai re.
Ndai gaw Pasig city kaw na nawku jawng re.
Nawku ngut ai ten, hpung masha ni shat sha shaga ai kaw na, Kiyu Kim a nta de shani shat sa sha ai.
Ngai na matu gaw lai wa sai 12 ning laman Kawa nhtoi hta nawku jawng sa ai rai sai.
Wa n nga mat wa ai kaw na nawku jawng n sa mat ai wa... 12 ning rai yang she nawku jawng bai sa byin ai.
Ya na zawn re Kawa nhtoi hta ... myit gaw loi n pyaw ai.
Wa, chyeju dum ai wa. Grau nna laika buk ni grai law hkra annau ni na matu ngam da ya ai majaw ma grai chyeju dum ai.
Camera gaw film prat n rai mat sai majaw n kam lang sai. Lahpawt lama gaw re.
Wa ... nang tsun dan lai wa ai ga ni hpe galoi mung matsing da let amu galaw na re.
Ya, ngai shakut nga ai. Wa tsun ai hku, anhte gaw la mat na hta jaw da ra ai ngu ai ga hpe hkan shatup lu hkra galaw nga ai.
Nang tsawra ai Buga hpe ngai ma grai chye tsawra sai.
Nang ra marin ai shanglawt hpe ngai ma ra marin ai.
Nang tsawra ai grupyin nam maling ni hpe ngai ma chye tsawra sai.

"Hpaji n chye yang anhte Jinghpaw ni gaw prat tup mayam zawn, lawu tsang amu galaw ra ai ni zawn, Mungdan n lu ai ni, n lu uphkang ai ni byin na ra ai. Dai majaw hpaji chye hkra galaw ra ai."

Wa tsun ai ga hte maren hpaji chye hkra hkaja nga sai.
Wa, nang n nga mat tim, grau dik ai chyeju hku nna ngai hkam la ai gaw Ah Nu re.
Ah Nu... Chyeju kaba sai.

Grai dum ai myit hte...

Jinghpaw Jawng kaji laika ... n re...

1, 2
anhte yawng ...

3, 4
anhte ni ...

5, 6
jawm gamu ...

7, 8
jit she tat ...

9, 10
si hkra di ...

Ndai gaw Myitkyina mare, Zi-un lawk kaw na manang urgent sharin ya dat ai re...

Ngai hpe hkum dum yaw... Maji Bum, Hugawng Pa ... e... Daw Lahkawng

2 ya yup, 3 ya hkawm ngut ai hpang gaw Maji Bum de du sai. Shawng nnan du ai mare gaw Gawlun mare re.

Moi, Gawlu Ma Nawng de da ai mare re nga tsun ai. Dai mare gaw htinggaw 19 nga ai. Nawku jawng kasha nga ai. Jawng gaw n nga ai. Danai yang mare de sa lung ra ai.

Tau hkrau na da sai re majaw shara ni lawan ladan hkyen jaw ma ai. Anhte gaw Dumbang Edin hpung up sara Rev. Labya Bawk La hte arau sa ai re majaw grau manu mat ai. Mare masha ni a hpungup sara hpe hkungga ai myit gaw manu mana re. Rev. Bawk La gaw poi daw jaw na matu Maji bum de lung wa ai re. Shi hte rau Hpt. Lagwi Bawm Ying, Dumbang ramma ni ma lawm ai.

Hkrunlam ting hta dai ramma ni sha garum wa ai re. Dakkasu jawngma ni gaw alu tsu hkawm sa wa ai ngu mai tsun ai.

Anhte ni Gawlun mare hta du ai shana gaw kahkrang hte, hpaji lam ni, hkamja lam ni hkaw tsun dan ai. Ka hkrang gaw chyum jawng ma ni na zawn hkrak hkra gaw n rai tim, grai shakut da sai gaw re.

Alu n hta ai majaw mau ma ai. Re, anhte gaw alu hta na matu n re. Anhte kaw lawm sa ai ni hpe jaw da na matu she sa wa ai re lam sanglang dan ai. Dai shana anhte chye ai lam ni hpe tsun dan ai.

Ya bai myit yu yang, ngai tsun ai gaw Computer hte Animation lam rai taw nga ai. Kaya dik ai. Teng sha nga yang dai shingra hte htuk manu ai hpaji ni hpe lu tsun yang grau nna akyu rawng na re ngu myit hkrup ai.

Dai hte rau kalang ta, Jinghpaw mung na NGO nkau mi hpe myit hkrup ai. Nkau NGO ni gaw amu n awng dang ai. Mare masha ni hpa baw ra nga ai hpe n sagawn ai sha, madu la sa wa ai tau hkyen da ai masing (Package Plan) a majaw rai na re. Mare masha ni hte htuk manu yang gaw amyu mi.

Hpang jahpawt gaw tsi ni tsi ya, Jawngma ni hpe kumhpa ni jaw, mare kata gawan hkawm ai. Tsi tsi ya ai shaloi nnan daw gaw masha nau n sa ai. Tsi sarama yan gaw la she la... shawng nnan ma kasha ba da ai nu num langai sa wa ai. Hkali bu bu re ai nga ai majaw pressure jep, tsi gawn lajang ya ai hpang gumhpraw jaw wa ai. Gumhpraw n la ai. Majoi tsi ya ai re. Nga yang myi prwi si she wai wa ai. Anhte ni yawng myit n pyaw ai. Kalang bai ndau ai. Sa wa marit.. tsi majoi tsi ya ai re. Nanhte hpe tsi ya mayu ai majaw ndai daram pu ba hkam nna gun wa ai re. Prat tup n gun ga ai re.

Nau nna yang she ngai hpang ngai du sa wa ma lu ai. Nkau gaw chyeju dum dik nna namsi, bum ga na kumhpa ni jaw ma ai. Dai aten na myit hta hkam sha ai mabyin gaw gara hku tsun na n chye ai. Hkrap mung mayu ai. Pawt mung pawt mayu ai. Anhte Jinghpaw ni a prat wa ndai hku hte htum mat sa na i? ngu nna grai yawn hkrup ai. Anhte bawngban ai, anhte hpa baw lu jaw na ta?

Mare masha ni gaw hkai lu hkai sha, nam kaw na dusat gap sha re nga ai da. Moi gaw Kani ma hkai ai nga ai. Ya hpang de gaw, shanglawt ni mung dan kau ya, prat mung kani hkai na n loi wa ai majaw ja gumhpraw yak hkak wa ai lam tsun dan ai. Malawng gaw kani hpe n hkai mat sai nga tsun ai. Ja htu, shan gap nna madu a kasha ni hpe Dumbang, Lawa mare hkan jawng shalun ma ai.

Dai jahpawt hta, hpawmi langai hpe gwi gawa ai. Moi ya tawng, dai gwi hpe gayet nna gwi gaw bai matai htang ai re nga tsun ai. Mau hpa langai gaw, Gawlun mare na gwi ni gaw masha hta pyi grau hpun ai. Hkanghkyi hte pyi bung ai. Gwi yawng dai zawn re. Hkanghkyi hte grai bung ai.

Ndai mare hta, asak 107 ning rai sai (ya nga yang 108 ram) Ah dwi hpe mu wa ai. Shi mying gaw Maji Lu Ja nga ai. Dai Ah Dwi gaw loi jahkru nna kalang marang hkali bu ai nga tsun ai. Ya, du hkra nawku jawng sa ai hte, sara jaw ai poidaw hkam la ai re.

Majap hpe manu mana sha ai bu ni she rai nga. Anhte shawng du ai shana gaw myi prwi si she hkrat hkra sha kau sai. Kabu nna n re. Majap grai jap ai majaw re. Dai pyi shayawm da ai da.

Anhte gaw Manmaw kaw na Labang Bawk Mai hpe "Nang rai nga dai shat shadu ai Ni Ba hpe Internet Email lam sa tsun nna rai nga" ngu shala hkat ai.

Dai kaw na ma kasha ni gaw bawnu grai zet ai hpe mu lu ai. Jahkring laman sharin ya ai English ga hpe bai lu tsun nna lachyum hpe ma matsing ai. Grai bai myit yu ga. Anhte Jinghpaw ni ma hkaja na, sharin la na grupyin hkrak hkrak lu yang gaw ???

Shana maga du wa sai. Jawngma nkau mi hkum n pyaw wa ai. Jan ja taw nga tim "wa sai yaw... Gawlun bu ni e... anhte bai sa wa na..." N ja n hpra hte shakram let... Danai Yang mare de bai rawt wa sai...

Danai Yang mare gaw ya ten Shanglawt dap dung 20 jung ai shara re. Gawlun mare kaw na minute 45 daram hkawm ra ai. Danai yang mare de du sai. Grai lawan ai i?

Bai matut na...

Manang wa... lama na nang ndai laika hpe hti hkrup ai rai yang comment jaw da ya rit.

Tsawm shayi shingjawng poi

Hkau Myitung Naw Ja

Nang hte n hkrum ai ma grai na sai i? Nang Malaysia mungdan de sa mat ai hpang kaw na re. Gara hku ta? Kaja nga ai i? Galoi bai wa na ta? Dai ning rai yang nang na myit hkrum laika hpring sai re nga chye lu ai. Jinghpaw mung bai wa na amu galaw na i? Bungli n lu ai Jinghpaw ramma ni grai law ai. Nang arang gumhpraw hte wa nna amu galaw hpang yang gaw ramma ni hpe amu lu jaw na re ngu kam ai. Nang ma chye ai hte maren Jinghpaw mung na mabyin ni, Hkau e, nang machyu nga ai Dukahtawng mung grai tsang ra ai madang de rai sai lo.
Moi... Masha maigan amyu ni shang pyi n mai ai Dukahtawng ngu ai lawk gaw ya Maigan amyu ni she lamu ga ni grai mari wa/hkyen wa nga ai.
Dai hta Hkau e, nang hpe naw san mayu ai. Malaysia nga ai Jinghpaw Wunpawng amyu sha ni gaw Tsawm shayi lata na ja ji hkyen nga ai hpe na lu ai. N myit mada ai sha www.shanglawt.blogspot.com kaw na shagun laika langai hti lu ai. Dai laika gaw ngai hpe bawnu ginchyai shangun nna, n mai yup ai shana ni jaw mat ai. Gara hku masing masa hte dai lamang hpe galaw na re kun?
Ngai chye mayu la ai.
Jinghpaw ni hta hpa mung hpa nan n nga shi ai ngu kam ai. Gawgap ra ai grai law ai. Myit masa lam, hpaji lam, laili laika, uphkang masa (Capacity Building). Nau law nna ngai n ka sai.
Dai lam ni gawgap na matu arang bang yang grau mai na nhten ngu myit lu ai. Tsawm shayi lata dat, tsa pyi lu dat, manau nau dat re sha galaw taw nga yang gaw hpang na ban prat na matu grai tsang ra ai madang re.
Naw hkring na law. Ngai mung nau chye nna gaw n re. Nang hte ningmu htai lai mayu nna re law.
Myit dum let,
Dakkasu na manang
(Ya, Philippines hta ngaw de hkawm nga ai wa)

Hpa n hten... manang langai tsun ai hpa Jinghpaw Export gaw SHAYI re nga ga hpe ninghkap mayu ai wa.

Jinghpaw lam lawm ai India na Seminar

Ndai link kaw na laika ma hti yu ga.

http://www.india-seminar.com/2005/550/550%20karin%20dean.htm

Jinghpaw website ni yawng daram Nargis lam hpe madung shalun ma.

8.6.2008
Puerto Princesa city
Philippines

Ndai laman na Jinghpaw website ni malawng gaw Cyclone Nargis a lam hpe madung shalun ai hpe mu lu ai. Shawoi hkan laga amyu sha ni a lam nau (nau) nang n ka ai KNG zawn re ai web pyi Nargis shiga hkrai hkrai...
Anhte Jinghpaw ni gaw ow ra kaw da nga yang dai kaw sa yu, dai kaw lo ngu yang dai de chyawm re ai myit jasat kun ngu myit yu hkrup ai.
Hpa majaw nga yang tinang hte seng ai shiga ni hpe tawng marang mi n ka mat nna dai Nargis lam sha kaw ta nga ai majaw re..
Ndai hku tsun nna ngai hku nna Nargis lam hpe n chye mayu ai n re. Hkrit kajawng nna grai ma matsan dum ai re.
Ngu mayu ai gaw madu a madung magam bungli hpe ma n mai dumhprut ai sha laga amu bungli hpe ma galaw yang grau kaja na re ngu myit yu ai re.
Tang madun ai myit san san hte sha
(Ningmu mai htai lai ai)

Daini Lapu hkrang zinlawng de sa

7.6.2008
Palawan
Philippines

Daini Lapu hkrang zinlawng de sa chyai.
Mawdaw shawng jawn nna jak li bai jawn ai.
Grupyin yawng gaw hka chyu rai nna ... panglai kaw na zinlawng kasha re..
Ndai kaw na masha ni gaw grupyin hte seng nna grai chye na ma ai.
Hka ni ma grai san ai.
Ma kasha kaw na hkawt grai chye ai. Maza hpe shara shagu n kabai ai hte hka kata hkan na maza ni hpe hkali hte sa nna sai la ai.
Ndai zinlawng kasha kaw na Philippines mungdan a sut masa lam 11 percent hpe lu tam ya lu nga ai.
Laning mi yawn dik shang ai gaw US$ Billion mi jan ai re.
Manila kaw na nbungli jawn yang hkying hkum mi hte minute 10 daram jawn yang du ai.
Grai tsawm ai hte mungkan ga hpe grai tsawra ai Mayor up ai re.
Shi up ai 15 ning laman n kam na zawn re ai shang gumhpraw ni hte nam maling ni jat wa nna amu bungli grai lu jaw wa ai re.
Sumla ni hpe gaw hpang de she shalun sa na re.
Grai yup mayu wa sai.

Ah Dau nang hpa she galaw taw nga ai rai?

Ah Dau
Nang hpa galaw taw nga ai ta? Shiga ni hti lu ai gaw myit n pyaw re nga ai.
Ndai hku she nga yang gaw nang na hkauna galaw sha ai lam hta jamjau sai i?
Hkau e... gara hku n chye di ai gaw.. Shat lit hpai nna mung n mai sai.
Gara hku di na ta? Ndai zawn re ai mabyin ni, tsinyam ni anhte kade naw hkam sharang ra na ta? Hkau e, anhte sharai ra sai. Shada shatan taw nga ai hpe hkring nna galaw nan galaw ra ai hpe myit yu sa ga.
Nanhte ni a matu ngai ya galaw ya lu ai gaw akyu hpyi ya ai sha nga ai law.
Aten gaw du wa na re law. Gara prat tim, shan kata kaw na byep ni gaw nga ai sha re.
Hkau, ramma ni hpe zinlum nna galai shai ai lama mi gaw galaw ra sai.
Anhte myit yu ga.
Galoi mi she ...
Raitim, hkau e, hkum myit htum. Anhte ramma ni n galaw yang kadai galaw na ta?
Jamjau ai hpe hkrum sai majaw hpa galaw ra na, gara hku galaw na hpe madung dat nna myit sa ga.
Nang hpe myit dum let,
Nbwisam

Daini Underground River de sa chyai.

6.6.2008
Palawan
Duluyon Hotel
Daini Palawan zinlawng na panglai hkinggau de sa ai.
Mungkan hta hti hkum 6 shang taw nga ai World Heritage re ai Underground River de sa chyai ai re. Mau hpa re. Yesu a baw (Sai lwi taw nga ai zawn), Mari lungpu ni, Namsi namsaw ni, Dainosaw, lapu, masha chyawm taw nga ai zawn re ai ni grai law ai. Yawng gaw mara re. Masha galaw da ai n lawm ai.
Daina maga gaw Mayor Edward S. Hagedorn daw ai shana shat sha nna presentation hte ndai hku tsit tsawm wa hkra galaw wa ai lam madun dan ai. Ngut nna htunghking mahkawn ni, kahkrang ni hte shangwi shapyaw ai. Nkau hpun palawng ni gaw Jinghpaw maka hte grai nan bung ai hpe mu lu ai.
Jahtum gaw yawng hpe kumhpa jaw ai. Shamu dat yang marang htu ai zawn ngoi wa ai kawa hpe jaw ai. Kata kaw nlung kasha ni bang da sam ai.
Ndai ginra hpe grau chye mayu yang gaw... http://www.puerto-undergroundriver.com/ hte http://www.new7wonders.com/ de mai sa yu ai re.
Sumla ni gaw ndai net seng kaw upload n lu galaw ai majaw hpang de she shalun sa na re.

Daini Palawan de du

Palawan
Pouerto Princesa
Philippines
Daini Palawan de du.
Hka zinlawng kasha re nna grai tsawm ai shara re. Maigan manam ni grai sa chyai ma ai.
Daina maga gaw Mungkan grupyin nhtoi masat poi hpe shanglawm nna Mayor daw ai dinner sha sai. Ndai kaw na masha ni gaw grupyin hpe makawp maga na grai myit lawm ma ai hte hpang na ban prat a matu grai galaw da ya mayu ai ni re.
Sumla ni hpe gaw hpang de she upload galaw sa na.

Mungdan Mahkawn hpe dum da ai re... Ga si gaw n lawm ai.

http://kachin.vox.com/library/audio/6a00d09e7627c3be2b00e398ce0efd0002.html

Ndai hpe Kachin Denmark kaw na la ai re.
Chyeju kaba sai law..
Madat ai hte nshung si she rung nga myit rawt wa ai.

Blogger ni a matu laika buk

http://www.rsf.org/rubrique.php3?id_rubrique=542

Ndai kaw na mai download galaw la mai ai.

Ndai hkringdat hpe Yawhan Aung blogkaw na la ai re.

Mungdan Mahkawn

Majoi shingra
Wunpawng ningpawt rai nga
Ginru ginsa wunpawng mung majing rai nga
Jiwoi ni ... a wunli
Manu dan sut hpring tsup ai...
Anhte mung
Anhte ga
Anhte tsaw
Anhte ra
N htum n mat hkra makawp
Mungkan htum dingsa tut grin nga lu na.

Ndai kaw dip na mai madat ai. Ga si gaw n lawm ai.

Jose Rizal hpe hkam sha yu ai lam...

30.5.2008
Manila
Fort Santiago

Philippines a hero Jose Rizal hpe hkyuk da lai wa sai Spain ni a Fort Santiago de sa chyai ai. Dai kata de shang nna nau nna yang lagaw hkang ni hpe hpri hte bai kaup da ai majaw lagaw hkang ni gaw adan aleng rai nga ai. Dai gaw Rizal hpe sat na shaloi hkyuk kaw na shapraw wa ai shaloi na shi lagaw hkang re.
Ndai Fort Santiago de maigan manam ni grai sa chyai ma nna malawng gaw Korean ni re.
Fort Santiago kaw na bai wa ai ten, Rizal a lagaw hkang ni hpe kabye let ngai tsawra let myit dum nga ai Mungdan hpe shingran let ... ...
For more information...
http://www.philippines-travel-guide.com/fort-santiago-photos.html

Ngai hpe hkum dum yaw... Maji Bum, Hugawng Pa ... e...

"Moi... ... dai kaw rai nga anhte ni hpaw lam gat sha lai wa ai. " Mare dingsa hpe madi madun let tsun dan taw nga ai Tsaba a myiman gaw htu hkyen ai marang zawn... Ya, aten hta Hugawng pa, Danai hka hku maga de nang sa yu yang mare dingsa ni nang mu na re. "Awng dang hkra, jat wa hkra ngu nna Awng Jat, Sut Awng, Seng Nan nga nna mare mying ni hpe dai hku sha mying wa sai.

"Moi gaw lam grai kaja ai rai nga. Du kaba Pan Awng gaw masha lai lam kaja hkra ayan galaw shangun ai. Mare masha ni hkum hkrit myit nga ai Du kaba a ga na yang yawng shimlam lu ai zawn..."

"Dai aten rai nga... Ledo lam nmaw hkan na shanglawt dap ni hpa galaw taw nga ai kun? marit nwai ai myiman hte..."

"Dai... Gauri bum nga ai re.. Myen ni htu lung wa ai shara rai nga..." Nbungli pyi n mu ga ai shanglawt hpyenla ni ... hkrat sum mat wa ai shara rai nga.

"Ndai gaw Hkang gap shara re. Myen dap (Hkang hpyenla) ni htu lung wa ai ten shanglawt hpyenla ni hkap gap abre da ai shara rai nga.
Mare kahtawng ni mat mat ai, hten za mat ai, wan nat katut ai, nnan bai de ai mare ni mung n grin... Shanhte a myi man ni, Buga masha ni a myiman ni, ngai n gwi yu ai. Nye salum na myiprwi ni, myu tsaw sai ni kapaw wa ai.

"Nkau gaw grai lagawn ai gaw... Kani sha hkai, pyawng sha lu nna nga mayu ai." pawt nsam hte Tsaba tsun wa ai. Moi gaw kani yi hkrai re, ya hpang de shanglawt hpyenla ni dan kau ya ai majaw nau n hkai mat ai. Tim, nkau gaw galaw dingyang re. N galaw yang ma sha na n nga, laga ma n chye galaw... Nkau gaw Ja htu let kashu kasha ni hpe Lawa hkan, Dumbang hkan jawng shalun ma ai."

Machyi makaw re yang gaw taw... Tsaba?

"Dai hku sha rai nga ai... grupyin na tsi mawan ni hte tsi, makhkalawng hkut, sai baw, akyu hpyi let sha rai nga. Malawng gaw mungchying masat n nga ai majaw hkawm sa hkawm wa yak nngai. Ahkyak ai gumhpraw mung n lu goi!"

Bai matut na....

Munghpawn Mungdan kyit hkai rung sa ai mahkrum madup

30.5.2008
Munghpawn Mungdan a kyit hkai rung sa ai mahkrum madup gaw n lu malap na zawn she re.
Alum ala hkalum la ai lam n nga ai sha, ga ja hte shachyen shaga wa ai. Myen i ngu san yang Ngai gaw Jinghpaw re ngu tsun dat ai hte kalang ta myiman nsam mung shai mat nna ga grau ja wa ai. Maisau langai kaw madu a mying, hkringdat ka shangun, ta masat ka shangun nna bai wa shangun ai.
Manang ni hpe san yu yang Myen ni pyi dai kyit hkai rung de passport nnan galaw na hte passport aten jat la na hta lai nna galoi n sa ai lam chye lu ai. Shanhte tsun wa ai gaw dai masha ni gaw gumhpraw sha ma ai lam na lu ai.
Ngai Jinghpaw tai ai hpa byin a ta?
Hpang na anhte a kashu kasha, shu mashi shu masha ni tinang mungdan a kyit hkai rung de sa yang madu a aga hte alum ala hkalum la lu na matu shakut ra sai.
Mungkan mungdan shara shagu hta Chyit Chyai kumla, hkyeng, tist nsam re ai dawnghkawn hte Wunpawng sha ni hpe hkap tau la mayu ai.
Mungkan htum du hkra tut grin nga lu hkra ... ... ...
Mungdan e ... ... ...