Maran Chaw Ti a shangai nhtoi ...

31.7.2008

Myit daw ten n-gun jaw ya ai manang

N chye ai hpe sharin ya ai manang

Myit galu hkra hpaji jaw ya ai manang

Ra ai lam hta aput angut n nga

Garum ya ai manang

Aten hpe hkungga hkra lam madun ai manang

Myu tsaw myit hpe ta tut madun ai manang

Ygn kaw nga ai law tim

Jinghpaw mung na Bum shagawng ni yawng daram lung ga sai manang

Shut ai lam hpe hkam la gwi ai

Mara raw ya lu ai

Sum nung ai

Chye na ya ai

Garum ya ai

Na shangai nhtoi hta

Na Nu yen Wa hpe

Chyeju dum ga tsun u yaw

Na manang ni (Ja Gwan ni) hpe

chyeju dum ga tsun u yaw

Ngai hpe gaw muk ni sa ya rit...

Nang na shangai nhtoi hta

ndai ni hpe mung hkum malap yaw

Nang lung ga sai

Hkahku mung hte Nog Mung

Nang du garum ga sai Danai

Nang myiprwi si hkrat ga sai Putao

Na Salum chyen mi ngam da sai Pajau

Kalang marang sha pyi gaw myit dum let

Akyu hpyi ya rit yaw...

Atsam shaw let bai gawgap lawm rit yaw...

Galoi mung Karai Kasang tut nawng

Bau sin makawp maga ya u ga ngu...

Sumtsan na manang

nbwisam

Jinghpaw laika sharin hkaja bawngban ai lamang hpaw sa na re.

31.7.2008

O ra de chyan yu... le ra de mada yu let nbwisam langai dawdan dat sai. Daini kaw na shayi sha tsawm tsawm re yawng hpe myi she malawk hkra yu na .... aw chye ... n re.

Du na bat kaw na gaw Jinghpaw laika sharin hkaja bawngban ai lam ni hpe tang madun mat na re. Dai lamang hta madu n chye ai rai yang sharin la (Sharin) ... chye ai rai yang hpaji jaw da (Hkaja) ... myit hta ai n nawn ai gasi ni hpe jahkrup sharai la (Bawngban) ... sa wa ga ngu ga saw mayu ai re.

Myit lawm ai ni lama nga yang Comment kaw rai rai ... Cbox hta rai rai shana da ya marit ngu ...

Shang lawm na shayi sha ni gaw manu jahpu hpa n jaw ra ai re. (FREE) re. Shadang sha ni chyawm gaw Beer hte shanju la sa wa marit ngu akoi anoi hpyi nem dat ai.
(Hkum bai kapya nga ai wa)

Mungkan ntsa hta Jinghpaw laika n mat hkra ... jut shara mi kaw na ... gasat taw nga ai nbwisam.

Shuk shak dik ai nhtoi ni ...

29.7.2008

Ndai lahkawng ya laman gaw ja ji kyin ai hku re.
Mani gaw ndai Manila kaw masha mun kaba shang lawm ai n-gun madun poi galaw ai re. Mungdan a gumsan magam Mrs. Arroyo hku nna SONA hpe ndau dat ai majaw re.

Pyada hte shawa ni manu mana law ai. Lam ni yawng pat mat ai.
Sumla ni gaw hpang she mara sa na re.

Daini gaw saw shaga hkrum ai majaw moi 9/11 shaloi na New York Mayor Mr. Rudy Guiliani a hkaw tsun hpawng de sa ai re. Shi tsun ai lam gaw yak hkak taw nga ai aten hta na hparan lajang ai lam ni re. Shimlam nau htap la ai majaw ga shaga na ahkang n lu dat ai. Sanglang ai aten hta mung loi hpang hkrat mat ai majaw gawk kata de n mai shang mat ai. Shi sawk masha ni hte minute 30 hkrum shaga ai re.

Dai aten kata n lu shang mat ai. Hpa majaw nga yang ambush reporter ni hpe n ra na da. Ambush reporter ngu ai gaw seng ang ai n re ai sha sa yu hpaji la na manam ni hku nna ga san san wa ai lam hpe tsun ai re.

Mani ma daini ma gaw grai pu ba sai re.
Jan gaw kahtet ai hte... Shat gaw kaw si ai hte...

Mana gaw shana hkying 9 jan du hkra Shi laika dap langai hta jahta n ma rai taw ai. Grai kawsi taw ai aten hta "saw... shinggan pru na lama ma sa sha ga, ngai daw na" nga manang wa tsun ai majaw grai kabu taw yang .... Lusha seng n re sha .. Beer seng rai taw nga ai.

Myit n pyaw ai sha lu dat ai wa kade na mat ai pyi n dum ai. Beer n lu ga ai mung ram ram gaw na sai re. Jaw prat kaw na n lu ga ai zawn lu dat ai wa nta galoi du na galoi yup mat ai pyi nau n dum mat sai. :P

Shiga ni hti yu yang mung madu a baw hte shakum hte adawt dat na zawn sha rai taw ai. Anhte shawa ni mung hpung sara ni a matu akyu hpyi ya ga. Mara kata wa me...

Nu a maumwi hta na buga

27.7.2008

Dum shai ai myit hte... Sumla langai galaw mara dat ai.

Myit hta mung ra ra nga taw ...
Loi ma tsa-up taw ...
Garen gari mung nga taw ...
Dum shai ai lam mung degree htum hkra tsaw taw ...
Tsit ai pyi she mut hkra tsit taw ...

Tsit tsawm ai bum ni n ka-up mat sai ...
N hprang sut rai ni n hpring mat sai ...

Prat tup maroi nni ai law ...
ngu na mung
N kam madai taw nga sai ...
Shawng de gara hku ngu ai ...
myit let sha
shanang sa na nngai ...

Nu a maumwi ten hpe gaw bai n du mayu sai ...
Nu a maumwi ten na zawn byin hkra she
bai shakut mayu sai ...

Nu tsun dan ai Maumwi hta na Buga

27.7.2008

Nu ngai hpe maumwi ni tsun dan lai wa ai i?

Asuya mugun masha re ai Nu gaw ngai hpe shangai ngut ai hpang posting ang ai Hpakant de bai rawt sai.

Laning mi hpring sai ngai hpe ba let, Wa hte rau Hpakant de sa sai re. Dai aten Hpakant hta Asuya lahkawng nga ai aten re. Tsun mayu ai hpe chye na na re ngu kam ai.

Tsi saranum (Nurse)* re ai majaw gara gate hta raitim, aloi ali lu lai ai. Tsi gawn lajang ya na masha grai taw ai majaw re. Dai zawn grai kyin ai aten re majaw Nu gaw ngai hpe aten tup chyu jaw na aten nau n lu ai.

Lak lak lai lai hku na ngai gaw makau hkan na jinghku jingyu ni, Nu a manang ni a chyu chyu lai wa sai re. Marai kade re kun gaw n dum sai. Ga mung loi galu taw nga ai.

Tsun mayu ai gaw ... dai zawn re masa a majaw Nu gaw ngai hpe maumwi grai law hkra n tsun dan wa ai. Loi li gaw tsun dan wa ai. Ngai hpe maumwi ni grau nna tsun dan ai gaw Ah Dwi re. Maning n nga mat sai.

Ah Dwi gaw Sam mung, Kutkai, Tamonye mare na Zi Lahpai kasha re. Ah Dwi a marang e maumwi ni grai lu madat wa ai re. Maumwi mausa lam ni hte hku hkau wa ai re.

Tsit lali ai nam maling, san tsawm ai hkashi hkawan, bum pa layang ngu ai ga si ni gaw maumwi shagu ram lawm ai.

Shanhte ni hkringhtawng jaw da ya ai. Dai hkringhtawng hpe anhte ban prat hta n lu dagraw mat sai. Masa lamyan amyu myu a marang e ... myiprwi si hte numhtet ga sha ngam da let htingbu mungdan de buhtawt mat ai Hpun ni...

Mawdaw ntsa mara, hpri sumri hte gyit nna htaw mat ai Hpun ni,

Hpun shaw ai hta n-ga ... mu n mu yawng hpe ma kumhpa hku la mat ai lam ni ...

Ka na pyi n chye sai ...

Anhte a kashu kasha prat hta maumwi hku she tsun dan ra sa na i?

Makawp maga, bai tsawm htap wa hkra galaw shakut na i?

Ngai madat ... ngai ra ai mahkawn re. Rebacca Win mahkawn da ai re. Shalat ai wa a mying hpe gaw n matsing mat sai. Hpyi nem dat ai.

Nu a maumwi hta na buga

* Ya prat na Nurse n re. Ma shangai ya ai hpan saranum re. Dai aten Myitkyina hta Nurse jawng n hpaw shi yang ma shangai ya ai saranum jawng shawng hpaw ai re. Myen hku gaw n ka sai.

Blog nnan ...

27.7.2008

Loi bai ndau mayu ai law ...

Manaw manang ni hpang de ...

Blogger langai bai jat wa sai re.

Ra ai lam ni hpe mung garum ya ga. Garum ya rit ngu na mung saw lajin mayu ai.

http://simsamyit.blogspot.com

Sa chyai ga.

Ra mara ndau ai lam

25.7.2008

Loi ndau na nngai.

N chye shi ai ni a matu yaw shada ai re.

www.yjh1979.com

Ndai gaw Yangon Jinghpaw Wunpawng Hkalup Hpung a website re. Ndai hkringdat hpe Ygn na manang shagun da ya ai gaw Bat lahkawng ram rai sai. Malap taw na.

Ya, Internet connection loi lanyan shi ai shara kaw an file ni hpe lawan ai hku shagun na matu gaw ....

www.send6.com

Ndai website hpe lang yang loi masan sa ai re.

25.7.2008

Daini gaw rung kaw na Dulce na shangai nhtoi re majaw prat tup n sha ga ai lusha ni grai sha kau sai hku re. Ya aten hta gaw kan nau tit taw na laika ka ai pyi loi yup nga mayu ai.

Nbwisam a sumla mara yang gaw ... ndai blog sa yu ai ni download galaw la!

Print shaw!

Nta de yu jahkrit na matu la mat na tsang ai majaw manang ni na sumla sha mara dat sai.

Ram ram zen ai nbwisam she rai nga ... :)

Dulce (Philippines) hte Quinton Mtyala (South Africa, Cape Town)

Ngwi Pyaw Ai Shangai Nhtoi Rai U Ga.

Myit ru nga ai...

24.7.2008

De, manang ni

Chyeju hte chye yang naw tsun dan marit.

Ngai na gmail hack katut taw sam ai. Kalang marang ngai n ka ai laika ni le wa ai.

Manang nkau mung ... moi ya shaga ai shaloi nang grai zai ai nga tsun ai. Dai shi tsun ai shani gaw ngai gtalk n shang ai.

Gara hku she rai taw ai kun? Ngai na secondary email mung kadai nau n chye na hpan re wa.

Myitru nga ai. Chye ai ni hpaji naw jaw marit.

Dau Ze e, shanglawt galoi lu na kun i?

23.7.2008

Daini hti hkrup ai laika ngau kadun a majaw nye myit ni ... ngai tsawra ai mungdan de poi lawm mat ai.

Dau Ze e, shanglawt galoi lu na kun i? Ngu ai laika hpe n hti shi yang lawan click dip nna hti dat na matu saw lajin mayu ai.

Yupmang, yupmang ngu ai kadai kaw tim nga ndai! Yupmang hpan grai law ai. N bung hkat ai. Dau Ze hte Hkawng Lum a yupmang gaw shanglawt re.

Na a yupmang gaw hpa rai?

Na yupmang hpe hkrang lu shapraw na matu shakut nga ai i?

Malap taw sai i?

Gan hkring da ai i?

Kabai kau sai i?

Galaw nga dingyang i?

Ps. Comment jaw let ningmu jaw da ai ladat lang sa wa ga.

Genghis Khan

23.7.2008

Genghis Khan ngu ai Hkawhkam hpe yawng na ga na ndai. Ndai Hkawhkam a lam hpe dem da ai sumla hkrung ni kaw na langai hpe madun mayu ai.

Anhte gaw Mongolyoid ni ngu tsun ma ai hte maren Jinghpaw Wunpawng amyu sha ni gara kaw na re ngu ai hpe sawn matut la ga.

Ya aten du hkra gaw mahtai atsawm n lu madi madun shi ai. Sara kaba naku hte ramma nkau ma gaw grai shakut tam taw nga ai re.

Ndai kaw dip nna mai yu ai. Shawng nnan episode yawng hpe download (Save) galaw na yu yang she masan sa na re. Kalang ta Open galaw na yu yang gaw hkring mat hkring mat re nna yu ai nau ai n nga ai. Miwa ga shaga ai rai nna English laika subtitle re.

Hpang kalang gaw Mongol ngu ai sumla hpe bai shalai ya na nngai. Dai Mongol sumla hkrung hpe gaw maning yu hkrup ai re. Internet kaw gara kaw mai yu ai mu yang bai tsun dan na nngai.

Dai Mongol sumla hta Jinghpaw maka hte grai bung ai ni ma mu lu ai. Genghis Khan a prat hpe madung dat na dem da ai re.

Shana mayu ai lam

22.7.2008

Majaw a majaw Cbox hpe jahkring mi gan yen da ai. Tsun mayu ai nga yang Comment hta ka da ya marit....

Anhte Jinghpaw Blogger ni mung Comment jaw ai ladat hpe jai lang wa sa ga ngu saw lajin mayu ai.

Jinghpaw ga si ni hpe manu shadan, sadi sahka hte tut nawng lang nna laili laika hpe madang shatsaw ga.

Ngwi Pyaw Nga U Ga.

Shawng nnan shadu ai simai...

21.7.2008

Chye ai hte maren, Jinghpaw la ni lagawn gawn ai gaw ... simai mung n chye shadu. Shat pyi rice cooker hte re majaw.. Raitim, ready made sha sha na gaw n mai ai yaw nga ai manang wa (manang gaw ang ai kun) a comment a majaw ngai nbwisam shakut shaja sai. Atsam dat sai.

Yaw sai, Wa shat!!!

Shawng nnan shapre hpe tawk, shakau hpraw hte shakau hkyeng nyen, shanam ahkut. Gai ngut sai.

Sau di dun, sau hkut ai hpe la. Nau la kau na arau nga ai manang gawk kaw na she pru mat ai du hkra... sama grai mawng wa na.

Ah Nu shadu ai mu ga ai hte maren, shakau hpe shawng gangau dai ai. Ngut ai hpang o ra bang ... le ra bang hte jahtum gaw ndai zawn ...

Grai hpyi nem dat ai. Jum bang na malap kau ai. :)

Nai hte sunhtang jahkraw mung n nga ai majaw ... (Nga sutdek)

Gai... sha saga. Shat gaw bai shalum da ai re majaw loi ja taw ai. Wa ni grai naw ja ai re majaw maya na re. Sumla kaw mu lu ai hta na grau sha ai re lam ... grau nna mayu kasha ni hpe ndau dat ai. Loi sha jin ai wa re.

A ga... grai she tit mat sai law... Grai mu ai. (Madu shadu madu sha)

Comment hta ready made sha sha yang n kaja ai lam sadi jaw ya ai manang hpe grai chyeju dum sai law.

Ya hpang de mung, aten lu yang lu ai hku ... Udi hte yangyi hpe gara hku gangau sha na. Udi hpe gara hku ga na. Yangyi hpe gara hku sep na lam ni hpe matut nna tsun dan mat na re lam tau hkrau ndau dat nngai.

Lama mi ra ra nga ai hte o ... ra .... le ... ra

21.7.2008

Jahpawt rung de du ai hte Computer hpaw, gtalk shang, Blog hpaw, KNG hpaw, shiga hti re ai wa ... Shanglawt blog gaw jahkring hkring mat, KNG gaw shiga nnan n mara da re ai majaw myit hta ai gaw n nga ai.

Shiga n lu hti tim, Janpan sha gaw madat na re ngu na madat sai. Shinggan pru wa ai shaloi Janpan CD malap da ai majaw grai pawt mayu sai wa re.

KNG mara da ya ai mahkawn buk 4 lu madat ai majaw grai chyeju kaba sai. Kadai kaw wa dai Janpan mahkawn yawng nga na kun? Naw madat shangun marit lo. Chyeju hte ...

Shiga ka ai Blog ni naw nga ai majaw loi li tsamai sai. :)

Ya laman gaw ra ra hkrai nga taw ai majaw loi ra ra re sha ka sa na re...


Mabyin Langai (Mani hpa ngu shamying yang n mani ra na tasng na re)

Lang mi na shana maga aten hta, Hugawng pa shara mi na Nta langai kaw re. Kanu gaw kasha alat Madut a matu Nga (Baluk kun?) gangau ya taw ai hku re.

Dai aten she n myit mada ai sha, manam du wa ai da. Dinghku a ningshawng Kawa a veto hte rau Nga shatmai gaw shat sha saboi ntsa kaw htit!

Madut (Dut Dut) gaw myi lap lap hte grai tsang taw nga sai hku rai nga. Nu, nga simai naw she ngam na kun i? nga san yang... Kanu gaw Ma e, manam ngu ai gaw ma hkra n sha ai gaw. Hpa n tsang ra ai yaw.

Dut Dut gaw grai tsang ai myit hte chyinghka makau na azi yu nga ai da. Manam wa mung sha let, sha let, sha let... nga chyen mi ma mat ai hku rai nga. Dai aten Dut Dut a myi gaw myi n grip yang sumtsaw mahtai jaw na nga tsun katut ai shabrang hpa ... ja ji nan yu taw nga ai aten !!!

Manam wa gaw Nga hpe g a u n g w i sha lam re na, shan naw ngam ai maga sha hkyen sai aten ... NU E... NGA GALAU TAW NGA SAI... NGA GALAU TAW NGA SAI.

Ndai gaw Hugawng pa na mying kaba ai mani hpa re. Ya aten Hugawng pa, Danai kawn hkawt nga grai taw mat sai re.

Moi gaw Danai hka hta hka ja yang Nga nau law na shingna hte shawng gayet jahprawng kau ra tim, ya aten hta Maumwi tai hkyen sai re.

Aten naw dep ai. Anhte hpa baw naw lu galaw na. Hpang na ban prat a matu ...

Hugawng pa zawn maumwi tai hkyen sai mabyin ni Jinghpaw mung hta grai law nga ai. Madu a Buga, grupyin ... hpang de n mu lu mat nna maumwi kaw sha na lu ai mabyin n byin hkra shakut ga.

Nang kung wa, hpan wa, lu tsap wa ai shani ... Lam shagu hta htum pa du hkra hpang hkrat nga ai anhte amyu a matu ... garum rit. Lam woi rit. Hpyi nem dat ai.

Nang lawan hkamja wa u ga.

20.7.2008

Dai hpawt shanglawt blog de shang yu ai shaloi shi myi machyi nna blog ka ai jahkring hkring na nga ai majaw myit n pyaw ai.

Hkau, Nang lawan hkamja wa u ga.

Myit dum let...

nbwisam

SHANGAI NHTOI HTA NGWI PYAW NGA U GA ...

17.7.2008

21 ning hpring ai nhtoi kaw na hti n dang ai shangai nhtoi ni tut nawng gu u ga ngu sumtsan kaw na Ah Ba akyu hpyi dat ya ai yaw.

Nang gaw July 17,
Ngai gaw June 17,
2 ning hte shata mi grau kaji ai.

Myit nau n su shi ai,
shayi sha.

Sunday school sarama galaw nga tim,
grai naw sharin la ra ai.

Amyu a shawng lam hpe myit lawm tim,
shakya ai maga de ma n shayawm ai.

Ah Nu tsun yang she
dunye ye ai. (Ya gaw n rai sai) :)

Mahkawn hkawn myit lawm tim,
nsen naw shaman ra ai.

Tsang 4 kaw na Kawa n lu mat tim,
Kanu kaja lu ai.

Grai gaw shakut mayu tim,
loi naw lagawn ai.

Kahpu gaw hpa kumhpa n chye jaw tim,
Kahpu hpe galoi mung kumhpa jaw jaw re ai.

Sumla dem ai myit lawm tim,
Camera n nga shi ai. (Kawa sai lawm sam ai)

Design grai kam galaw tim,
Photoshop nau n chye lang shi ai.

Masha ni hpe garum mayu tim,
madu hta hpa n nga shi ai.

Matut ka na n chye wa sai. Shawng de grau myitsu kangka maka kap ai shayi sha byin hkra shakut u yaw. Htawm hpang de na a marang e Amyu hte Mungdan rawt jat nna mai kaja ai de lam madun lu u ga.

Nang naw matsing ai kun? Ah Wa n nga mat ai ten, nang gaw Ah Nu hpe "Nu, hpa hkum myit kaji... Ah Tawng shapre kabaw dut nna bau na" nga tsun ai. Ah Nu gaw mani she mani. Myi prwi si hte mani ai rai na sam sai.

Raitim, nang gaw shaman chyeju grai lu ai re. Ya aten nang Ah Nu hte rau nga lu ai. Ah Ba gaw shingtai machyi nga let.. Ah Ze a Dum dik ai Nu mahkawn hpe sha madat nga ai.

Ngut nna nang hta grai kaja ai Katsa, Kani ni grai law lu ai. Tsa ni, Ni ni gaw nang hpe ayen garum ya ai. Dai gaw Karai Kasang jaw ai shaman chyeju ma rai sai. Nang grau myit su ra sai yaw.

Nang na shangai nhtoi hta design tsawm tsawm re n lu galaw ya ai majaw myit n pyaw ai. Ah Ba Computer n lu shi ai hte, rung na jak kaw Photoshop n nga ai majaw re. Dai majaw web kaw na sumla sha bang dat ya ai.

Gumhpraw lu yang laika buk mari hti na hte nawku jawng kaji ni, Sama boarder zawn re ai boarder ni hpe alu jaw na matu htet dat mayu ai.

Ah Ba bai wa yang Gauri sa ga. Hpakant de ma bai du ga.

Daini July 17 hta shangai nhtoi bai du ai Kanau Nbwi Seng Tawng hpang de ...

21 ning hpring ai na shangai nhtoi hta nang machyi taw nga ai nga na lu ai majaw Ah Ba myit n pyaw ai. Sumtsan ga na nang hpe dum taw nga ai hte na shangai nhtoi hpe ma n malap ai lam tsun mayu ai.

Lahta na sumla zawn nang na shangai nhtoi hta shakut na ka taw ai re. Rung hta gaw tinggyeng lang na ahkang n jaw ai majaw re.

Hpyi nem dat ai.

Blog a htum pa de AW LE LE hte AONG LAR (SOUL) na album shalun da ai.

Ngai n chye galaw shi na lahkawng yen shi hkrai play taw nga ai.

Lama sa chyai hkrup yang ... langai hpe stop dip kau na madat ya marit.

AW LE LE

16.7.2008
Pasig, Philippines

Aw le le ngu ai gaw SOUL Music kaw na shakut shapraw dat ai album re. Hip hop hte R&B ni gayau da ai.

Ndai Aw le le album hta mahkawn ai ni gaw Aong Lar, Gu Gu, Maw Maw, J.S. Lu ni rai ma ai. Mahkawn ka ai ni gaw Maran Jaw Gun, Aong Lar, Maw Maw hte (Ngam ai ni n matsing mat sai.)

Ndai album gaw tsam mari tsam mara makan na pru wa ai album re. Ndai mara da ai kaw mahkawn gabaw (title) ni shut yang gaw ngai na mara she rai sai.

Ngai mung Kcbloggerhelpdesk kaw na mahkawn shalun na lam chye la ai hte woi ma-un si lu ai hpa she rai sai. :)

Mahkawn shalun ai lam ... hte o ra le ra

15.6.2008
Pasig, Philippines

Daini gaw Kcbloggershelpdesk kaw na hpaji jaw ai hte maren mahkawn shalun yu sai. Galaw yu ai lu mat ai. Dai majaw KCbloggershelpdesk hpe chyeju dum ai lam shana dat ai law.
Ngai na Blog naw gram ra ai majaw mahkawn hpe htum pa de she tawn da ai re.

Ndai mahkawn hkawn ai wa gaw Aong Lar (SOUL) ngu ai ramma langai re.
Myitkyina mare hpung (Geis) kaw na rai nna, Nhkum kasha re. Tsit hkum re majaw tsi tai ai. Dama (Dauma) ang ai shayi sha na lawan matut mahkai ga.
Shi na mahkawn ni hpe ngai na Blog kaw mara dat ai.
Mahkawn madu hpe gaw ahkang n hpyi shi ai. Hpang de she ahkang hpyi sa na re. Shi mahkawn yawng gaw n hkum shi ai.

Laika nnan ni shani shagu mara mayu tim, ndai July hta gaw kru ya laban pyi n rau taw nga ai majaw re. Rau ai aten shana rai yang gaw Internet bai n lu.

Ndai shata hta bat mi jan machyi mat ai majaw ram ram gaw garen ai ga re. Nta hpe mung dum ai. Kanau hpe ma dum ai. Shi shangai nhtoi mung du wa sai. Manang ni hpe mung dum ai. Shi hpe mung dum ai. Dum ai hkrai hkrai law...

Nbung bung ai maga de ashun nga ai... shingkang rawng ai... nshung si hprwi shangun ai... ngai tsawra ai... nye salum hpe sai, myiprwi pru shangun ai...
chyitchyai kumla hte ...


Amyu sha dawnghkawn

Blog ni sa chyai nna myit lu ai lam ni law law kaw na langai ....

12.7.2008
Pasig, Philippines

Blog ni sa chyai ai shaloi grai n-gun lu ai ni hpe mu ai zawn, matsa bun na zawn re ma mu ai.
Shanghtin a blog sa yu nna... shi a ningmu hpe myit lawm ai. Shi galaw ai zawn lama ma jaw da hkra shakut na ngu myit taw nga ai.

Ndai bat gaw naw myit yu na re. Masha ni hpe hpa baw jaw mai na kun ngu?
Raitim, hpa mung lak lak lai lai n chye ai majaw .... hummm... myit ru ai law...

Myi dam nna du wa ai myitsu ni gaw hpa baw lam ni chye mayu ma ai kun?
(Gai wa gai wa.... hpa gaw chye ai n rai... ndai nbwisam gaw...!! :) )

Tsi gawk hte ngai ...

9.7.2008
Pasig, Philippines



July shata gaw ngai na matu amu grai kyin ai shata nan re. Bat kru ya shani pyi n rau ai. 8 ya shani gaw jahpawt hkying 5 daram kaw rawt na amu galaw ra sai.

Shana yup n hkru ai majaw rawt wa ai aten hta a san a bran n rai taw nga ai. Camera charging hpring na la taw ai hte rau... rau nga ai Africa manang wa gaw shi sumtsaw du wa ai majaw sumtsaw shada ahtuk ahtak atek nga ai majaw ma re.

Shooting kaw na bai wa ai aten kaw na gaw nau nga n pyaw sai. Rung de du yang Tagalog ga sharin sara du taw nga sai. Laika sharin ten myit n lawm sai. Baw grai sin wa nna nga n pyaw wa sai. Marang loi madit mat na rai sam ai. Manila gaw grai kahtet ai.

Dai shana kaw na gaw machyi re sai. Saw shaga da hkrum ai Dinner mung tat mat. Malate ngu ai shara na Cafe Havana ngu ai seng kaw re wa. Dai seng gaw Spanish hkrang hte rai nna manu ma grai laja ai seng re. (Mana law)
Jinghpaw ni a tsi rai nga ai Paracetamol hpe nyawp di kau nna yupra kaw galeng taw nga ai. Umm.. nga manga manang ni hpe sms naw sa na re ngu myit lu let, sms sa let sha aten shalai taw nga ai. Dai shaloi manang Seng Pan gaw tsi jahpan nkau mi tsun dan ai. Dai tsi ni sa mari na lu ai hpang salat grai pru nna grai nga pyaw mat ai.

Hpang jahpawt gaw baw sin nna nyep naw pru taw nga ai. Rung n lu sa ai. Rung na staff langai nta de sa wa nna tsi gawk woi sa ai. Tsi gawk mung laksan gawn lajang ai tsi gawk mung n rai tim, manu gari laja ai. $ 60 daram jaw kau ra ai. Tsi loi mi hte hpa hpa nya nya gawn lajang ai hpe sha wa... Ndai hku tsun yang hpaji hpe manu n shadan ai bai nga sa na. Dai hku gaw n re. Ngai na matu grai law ai manu re ai majaw loi gaw myit yu ai ga re... Raitim, rung na ni sha jaw ai re majaw ... hu... Praise the Lord.

Machyi taw nga ten ... shawng nnan myit dum ai gaw dum nta de re. Hkau soi mung grai sha mayu wa ai.

Langai mi myit dum ai gaw... Ndai zawn sumtsan ga hta machyi makaw hkrum yang garum na kadai n nga, shakut shaja amu galaw taw nga ai Jinghpaw ni hpe myit dum nga ai.

Ya hpang de gaw machyi pyi n machyi gwi na hku re. YMCA kaw na sara wa tsun ai hku machyi gwi yang machyi yu. Aye Thu Hka, Myat Mon (Laksan gumhpraw la tisgawk) de du yang shang ai hte mun lahkawng ram gaw sun sha re yaw. Ah ga... prat prat wa mung...

Jinghpaw ni e... hkamja zet let ai amyu tai ra sa ga ai. Gumhpraw grai lu ai shaloi she machyi sa ga.

Salat gyit ai aten ...

3.7.2008

Hpawtde gaw June shata mi na matu report, narrative story, special events in June, ndai laika ni grai law ka shangut ra ai ngu yang she rung na ngai lang ai computer gaw maja wa hten mat wa ai. Window nan n lung mat wa ai. Alak mi hpa website mung n hpaw ai wa. gmail, shanglawt blog, ngai na blog hte irrawaddy sha hpaw ai wa.

N byin sai ngu na net seng de lagat nhtawm laika jaji gayet ra sai goi. Net seng kaw mung game hte kapyawn nna hpaw ai hkrai re majaw, garu gaji hte ma kasha ni ma sumpum jawng la ai. Makau kaw na sa yu, sa a htawk ai majaw ma grai myit n gut let laika gayet taw ra ai.

Hpa mi nga tim, ndai net seng kaw gaw microsoft ni lang shangun ai majaw shaman chyeju she rai sai. Download ma mai galaw ai majaw grai nan chyeju shakawn kau sai. Ndai kaw na net seng malawng gaw download galaw na ahkang lu ai majaw...

Hu.... grai myit ba kau sai.