31 October, 2008

Namchyim n rawng mat ai shat da mi

31.10.2008

Shawoi sha sha re ai shat da mi...
(Ndai shat hkyep ni a hpang hta
n mu lu ai myiprwi si ni kade nga na kun?)


Seng madu kaw na hkyen lajang nga ai hkausoi (Hong Kong Noodle) hpe azi yu let ala dingda nga ai nye myi ni gaw galang zawn ... Dai aten hta makau kaw sa tsap let ...

"kan grai kawsi ai majaw shat mari sha na gumhpraw loi jaw rit"

ngu sa hpyi ai nsen na dat yang ... yin rai nna yu dat ai hte rau ma kasha langai hpe mu ai.

Lasi kyip kyip, myiman hta gaw hpa zawn nawn ai lam n nga, madu galaw nga ai amu bungli galaw ai hpa nyau nyau re tsap let lata galam na hpyi taw ai.

"kan grai kawsi taw ai majaw gumhpraw ayoi loi jaw rit law ... hpu ba e..."
"hpu ba ..."
" Kan grai kawsi na re law..."

Shi a myit hta n dang hkam wa ai. Raitim, gumhpraw gaw jaw na n myit da ai majaw Siomai (Pawk si) kaji langai mari na jaw dat ai.

"Ngai gumhpraw n lu jaw ai. Maw... ndai muk sha u. " ngu na jaw dat ai.

Chyeju dum ga pyi n tsun ai sha dai ma kasha ... lam re lagat mat wa ai.

Minute mi na ai aten hta ma kasha langai bai du wa sai. Dai aten ngai gaw hkausoi hpe ja ji sha taw nga sai re. Mu tim n mu tim kawsi taw nga ai majaw grai sha mu ai re. Dai aten hta ...

"Hpu ba ... kan kaw si ai majaw gumhpraw ayoi loi jaw rit ..."

Yu dat yang ma kasha langai makau kaw tsap let gumhpraw sa hpyi taw ai re. Ma kasha nga tim loi gaw kaba sa na re. Asak 10 ning ram rai sai. Ndai ni gaw wupung hte rai nna marai langai lu hpyi ai hte ngam ai ni yawng ma jumdwi de yen sa wa ai gagyin ni zawn sa wa chye ma ai.

Myit hta gaw un un nga nna ... nang tsun ai ngai n chye na ai ngu nna sha tsun bun kau dat ai. Loi marawn ai nsen hte re majaw dai ma kasha ma kajawng nna kahtap n hpyi sai sha angwi sha hkawm mat ai.

Sha mayu taw ai hkausoi hpe lu sha dat ai majaw grai myit dik let nye a lagaw lahkam ni gaw internet seng de ...

******************************

Email jep, laika ni ka, shiga ni hti, manaw manang nkau hte shaga ngut ai hpang shana shat sha na matu lusha seng de sa wa ai.

Myit hta sha mayu ai zawn nawn ai lusha ni htet la ngut ai hpang gaw ... shawng htet da ai ice-cream hpe shawng sha dat ai. Dai ngut ai hpang gaw wa shan hte ga-ngau da ai shat sha na matu hkyen dat ai.
Malu masha a matu chyeju shakawn ngut ai hpang sha na hkyen dat ai aten ...

N myit mada ai sha, mi yet na gumhpraw sa hpyi ai ma kasha hpe myit dum dat ai. Myit hta dung nga nna byin mat ai.Shi kade kaw si taw nga na kun? Nta n nga ai kun? Kadai ni hte nga ai kun? Shani shagu hpa galaw na she sha ai kun?

Jawng gaw lu lung na re kun?
Shi a shawnglam gaw hpa kun?
....................... Kun?
....................... Kun?
....................... Kun?
....................... Kun?

Nye myit hta grai n pyaw mat ai. Lama na dai Siomai (Pawk si kaji) sha pyi jaw sha dat yang wa ... ... ...!!!

Dai Siomai langai gaw lap 3 sha re. Lama na dai hpan masha marai 5 ram sa wa na gumhpraw sa hpyi yang pyi siomai langai hpra jaw dat yang 3x5 = 15 sha ang na. Nye a shat da mi gaw yawm dik 100 peso grupyin du ai re. Ntsa lam 80-120 peso ram nga ai. Lani mi jai taw ai gumhpraw a htam shi pyi n nga ai hpe gaw grai chye sawn ai zawn rai sai. Amu law nna pu ba yang lu na matu Beer mari na gaw n lahpawt re nga ai.

Dai shana maga de ma kasha 2 sha sa hpyi ai re. Muk langai hpra jaw dat yang lap 6 sha ma na re. Shani shagu jaw ai ma n re. Shanhte ma kan hkru hkra gaw n raitim, loi gaw tsa mai na re. Kalang marang sha re majaw ...!

Hpa majaw ta? Nye a myit hta matsan mayen ni hpe jaw na myit ni n nga mat na kun? Shing n rai ndai ma kasha ni, dai hku sha hpyi sha taw yang akyang lawm mat na bungli galaw na myit n nga mat na tsang na kun?

N rai na re. Dai aten hta nye a myit hta dai ni gaw rawng ai kun? Madu sha taw nga ai lusha hpe sha, sha taw na grupyin kaw na kaw si hpang gara hkrum taw nga ai ni hpe shingdu tawn da ai rai mat sai kun?

Jahpawt manap rawt, akyu hpyi, Chyum laika hti ... raitim, tatut hta hkan nang hkan sa ai lam n nga ... tinggyeng myit hte hpring chyat taw ai nye a kraw kata na myit, masha shawng kaw makoi da ai myit, kaji ai kaw na angwi ngwi mahkawng wa ai myit hpe dai shana maga de a kajawng sha mu dat ai.

Madu Yesu tsun ai tsawra myit ni, Kanu sharin ya ai masha ni hpe garum ra ai lam ni ... gara de mat mat sa ta? ngu nna nye hkum ngai san-htai galaw nga let ...

******************************

27 October, 2008

Los Banos, Philippines

27.10.2008

Tacloban kaw na bai wa nhtawm kru ya hte laban hkring ngut ai hpang daini bat langai ya hta gaw Los Banos ngu ai de du nga sai.

Grai tsawm ai shara rai nna, katsi pyaw ai re. Sha-it (Hot Spring) ma pru ai majaw manam grai sa ai. Korea ni grai law ai. Nta ni mari da, hotel gap na sut hpaga ga ma ai.

Ndai kaw na dakkasu ni hta ma Korea ni grai law dik ai. Madung gaw langai sha re. English sa sharin na matu re. Jawng ni, gat seng ni hpe filipino laika ni pyi n ka ai sha, shanhte a laika hte sha ka da ma ai.

Jinghpaw nkau ma ndai mare kaw nga ai lam chye lu ai. Mare hte loi tsan ai kaw na UP (University of Philippines Los Banos) hta nga ai lam na lu ai. Ngai ma dai UP Los Banos kaw 3 ya nga na re majaw hkrum lu na ngu myit mada ai.

Hpa majaw ngu yang maigan ga de du sai ten hta madu amyu ni hte hkrum lu yang n dang tsun hkra kabu ai. Myit hta alum ala nga ai. Grai shim lum ai zawn hkam sha ai.
Ngut nna madu a aga hte shaga lu ai majaw grai kabu dik ai.

Bu hkawm brang ngai ... hkawm tik tik.

26 October, 2008

Nye hkum ngai ...

26.10.2008

Nye hkum ngai n chye na
Ngai hpa galaw taw nga sa ta?

Nye hkum ngai myit n dik
Ngai hpa galaw da sa ta?

Nye hkum ngai n hkap la
Ngai hpa galaw shut nga a ta?

Nye hkum ngai n tsawra
Amyu hpe shamyit sa na kun?

Nye hkum ngai arawng n la
Majoi shalai sa na kun?

Nye hkum ngai grai gawngba
Hkrat sum ai de yawng sai kun?

Nye hkum ngai ... gaw re gaw re kun law ???

Bri mat sai.

Mahtai n chye ai sawnhpan hpe dinglik ai zawn
Nsa kaba shaw let
Myit ba nga nngai ...

25 October, 2008

Tacloban hkrunlam hte sawn hkrup, mu hkrup ai lam ni

25.10.2008

Mare kahtawng ni de sa yang grai myit pyaw ai lam langai gaw alum ala hkalum la ai majaw re. Nga ai hte sha pyi grai hku hku hkau hkau ...

Lai wa sai bat hta sa du da, hpaji garan da, hpaji sharin la wa, ganawn mazum da ai shara kaw na sumla nkau mara dat ai.

Panglai lusha ni re. Moi gaw panglai lu sha rai jang madu hte n seng ai ngu sha chye na wa ai. Ya ya gaw namlap rai jang ngai hte n seng nga ai hpan rai mat sai. Ndai mung na ni namlap n chye sha ma ai law...
Moi gaw lagaw lahkam mi panglai de lup ai hte nga ni, katsu ni mai rim sai. Ya gaw ...
Mangrove ngu ai hpun ni. Myen ni gaw La Mu Taw ngu shaga ai.
Nbung laru ni, hka hpungla kaba ni kaw na makawp maga ya ai.
Nga ni, Katsu ni, Shell fish ngu ai ni grai pyaw ai shara re.

Maraming Salamat po.
Grai chyeju kaba sai yaw.
Ndai gaw hpang shani sa ai shara ... nam maling byin hkra bai shakut taw ai ni ...
Anhte hpaji nau n chye na, gara hku hkai na n chye ga ai.
(Hpun kasha chyen mi daram si mat ai.)

Lu ai, sha ai hta n shayawm ai sha Jinghpaw atsam madun da sai. :P

Ford ngu ai Amerikan jak gumra hte sara shara mi kaw ...

Pu tsawm nga ai nampan hpe mada yu... n grin ai lam hpe mung mu lu ...
Pu tsawm taw ai ten hta na a manam pyaw ai sama ni shabra ya u. Na a tsawm htap ai hte masha ni hpe myit shalan rit.


Ya aten hta grupyin hte nhprang sut rai ni hpe grai jai lang kau sai majaw mungkan hta n ru n ra, moi n hkrum ga ai ni grai hkrum katut wa sai re. Dai majaw, mungdan nkau gaw dai hpe bai hkang zing na shakut wa masai.

Ndai lahta na sumla ni gaw madu a buga ginra ni hpe grai bai makawp maga, sharawt na hkyen taw nga ai ni re. Dang lu ai maran madu a grupyin hta n-ga, madu a kashu kasha ni a matu ma yaw shada let grai shakut nga ma ai.
Ya gaw shanhte shakut ai majaw kashu kasha ni a matu hta n-ga shanhte pyi akyu hkam sha taw sai re.

Panglai makau kaw Mangrove hpun ni hkai ai majaw, nga, katsu, hte laga panglai na dusat ni grai law wa ai. Grai lu rim nna madu a kan jahpring lu ai hta n-ga jan ai hpe dut, kashu kasha ni hpe jawng lung jarik lu madi shadaw wa ai.

Sut masa kaja wa ai hte rau, hkam ja lam, hpaji lam, matut mahkai lam ni grau kaja wa ai hte n-ga wuhpung kata na manghkang ni ma grai yawm wa ai re. Ga shadawn; shada sat hkat, nat hkat ai crime ni ...

Mungkan hta langai hte langai gaw matut mahkai ai chyu re majaw lai lai jan jan jahten ai zawn, jai lang ai zawn n mai galaw ai. Dai hte maren, tsep kawp n jai lang, akyu n jashawn ai mung n mai galaw ai re.

Ya anhte myu sha ni hkrum katut nga ai mabyin ni hpe mung sawn ding lik yu nhtawm mai kaja dik ai mahtai shapraw let shawng de shanang sa wa ga law.

Salum pyi n shang mat hkra hkam sha ai ni hpe mai kaja ai amu, akyu rawng ai lam ni galaw let gam maka nnan hpe hkrang shapraw ga.

Tacloban hkrunlam hta na Nampan sumla nkau ...

25.10.2008

Tacloban ngu ai gaw Leyte ngu ai zinlawng na mare daju re. Leyte ngu ai zinlawng gaw Philippines lapran kaw nga ai.

Dai mare de sa chyai ai shaloi dem wa ai nampan sumla nkau re. Nkau nampan ni gaw mu ga ai, chye ai nampan ni chyu re. Madu dem, madu ra ai sumla nkau mara dat ai.

 
Gawdin nampan

 
Wa madai pan hpan mi

 
Wa madai pan hpan mi

 
Mying n chye ai. Chye ai ni nga jang comment kaw tsun da ya rit.
 
Mying n chye ai. Chye ai ni nga jang comment kaw tsun da ya rit.
 
Numri pan mung abung alang. Bum tsaw shayi zawn ...

22 October, 2008

I have returned. (Gen. Douglas MacArthur)

22.10.2008

Du daju Douglas MacArthur gaw American mungdan na du daju re. Shi gaw Philippines mung de du da nna Japan ni shang wa ai aten jahkring gan yen mat ai.

Raitim, shi gaw Ngai bai sa wa na re nga tsun da ai hte maren ... Shi bai du sa wa ai. Dai gaw ndai Leyte ngu ai zinlawng re. Sumla nkau shakut mara dat ai.

(Hka kata kaw lam hkawm taw ai sumla re. Lagaw gaw n lawm mat sai. Npu kaw na dem mayu ai majaw)

Du daju Douglas MacArthur a arawng aya ni

Ningrum ningtau hte rau

Labau shang sumla
Ndai Leyte ngu ai zinlawng kaw na masha ni gaw American ni a ga sadi hpe grai kam ma ai. Ga shaga yang pyi American nsen pru hkra shakut shaga ma ai. Hpa majaw ta nga yang ... No II mungkan majan hta Japan ni Philippines de shang wa ai shaloi American ni gan yen mat ai.
Ga sadi jaw da ai hte maren shi bai du sa wa nna Japan ni hpe woi awn gasat wa ai. Masha langai a ga sadi dung nna amu galaw dan ai marang e, mungdan ting hpe grai kam hpa mat ai. Daini du hkra American hte Philippines ni manghkang loi li gaw nga tim, ngang grin ai ganawn mazum lam lu la taw ai re.
American mungdan masha n re ai American Marine hpyenla ngu na gaw ndai Filipino ni sha nga ai.
Ga sadi dung ai marang e, daini na Jinghpaw nkau gaw grai shut sai nga nna tsun ma ai. Ngai ma grai shut ai ngu nna grai lang sawn yu ai. Raitim, ya aten hta gaw shut ai mabyin kaw na hpaji la nna sharin la ai lam de yawng sai re.
Wuhpung wuhpawng kata hta shawu ai chyu law taw ai rai nna, tatut galaw ai masha n law yang dai wuhpung wuhpawng a shawnglam gaw tsep kawp manu n dan sai. Angwi ngwi hte hkrat sum nhtawm amyu ting mat mat ai marang e shakre na re.

19 October, 2008

Tacloban hkrunlam sumla nkau

19.10.2008

Sumla nkau mara dat ai. Loi lata kajam da ai re.

Sumla hpe kade shakut na mara yu tim yak taw ai majaw nta bai du yang she bai shalun na re. Mare kaji re. Raitim, Dakkasu nga ai. Bank ni nga ai.

Shana hkying 9 ram rai jang lam nmaw de masha nau n mu mat sai. Daini gaw laban shani re majaw masha malawng gaw nawku jawng sa ma ai. Jahpawt jau jau kaw na re. Malawng gaw Roman Catholic ni rai ma ai.

Gara kaw raitim, ma hkum hte kanu ni nga nhtawm, ma kasha ni gaw manu mana law dik ai.
 Panglai lusha grai hkyem sa nna dumsu shan grai manu hpu dik ai.

17 October, 2008

Hkrun lam ntsa bu hkawm brang ngai ...

17.10.2008

Tacloban ngu ai de hkawm na re.

Philippines lapran kaw nga ai zinlawng re ai. Zinlawng mying gaw Leyte nga ai.

Ndai mungdan hta mung amyu grai law dik ai majaw kata lam byin ai manghkang ni hpe sa sagawn yu na hkrun lam re. Ngut nna Nu Num ni a hpun hkai ai hte makawp maga ai wuhpawng hte ma sa hkrum na re.

Bat mi hkrun lam re.

Masha ni a mungdan hta gaw madu hkawm  mayu ai de mai hkawm ai. Gumhparw she nga jang gaw...
Madu a mungdan hta gaw yak yak hkak hkak ...

Wanleng lekmat lu mari na matu shana yuptung kaw na dung sin ra ai prat... Dut ai aten gaw hkying 8 nga tim, hkying 8 minute 10 nga ai hte yawng nyawp rap re nna ma mat sai. Mungkan hta lawan dik ai lekmat dut ladat re. Katsi la mu.

Madu a mungdan kata hkawm yu ai shaloi she, hkrum lam hkawm na matu sakse maisau n nga na gara n mai sa. Ndai kaw shangai, ndai kaw kaba, ndai kaw si.

Ndai hku hte sha htum na gaw n mai sai.

14 October, 2008

Jinghpaw wunpawng ramma hte grupyin ... Daw masum

14.10.2008


Ramma hte nawku hpung


Ramma hte nawku hpung ni a kanawn mazum lam hpe sawn yu yang malawng gaw hkrak ai ngu mai tsun ai. Nawku hpung kaw na ramma ni a matu hpa galaw ya a ta?
Ndai ga san hpe gaw htai na loi yak ai. Nawku hpung malawng gaw ramma ni a matu alak mi galaw ya ai lam n nga ai. Nkau nawku hpung ni gaw ja gumhpraw yak nna, nkau nawku hpung ni gaw galaw ya ra ai hpan re ngu n chye nna, nkau nawku hpung ni gaw galaw ya na malap taw ai rai sam ai.

Nawku hpung hku nna "Ramma ni gaw htawm hpang na ningbaw ni re, lahpa galai na ni re" nga nna ramma ni hpe n-gun jaw ai. Ramma ni rawt jat na lam hpe garum ai. Ramma ni bawngring wa na matu garum ya ai.
Bawnu machye machyang kung hpan wa na matu laika dum ni hpaw ya ai. Ramma ni hpe shatsaw ya na matu shakut taw ai buga hpung ni shau la ai. (SHAU DIK AI.)

Nkau nawku hpung hkan gaw ramma laika dum a matu nawku hpung kaw na budget lap mi pyi n jaw ai ni, sip si garum ai ni ram sha nga ai. Tinggyeng hku garum ai hpe gaw nawku hpung hku nna n sawn la sai.
Sakkung ni a nawku hpawng ni, La hpawng, Num hpawng hkan mung "Ramma lam" jahta ai nau nan n na yu ga ai.
La hpawng, Num hpawng nga ai majaw ramma lam gaw n seng na rai sam ai.

Prat masa a majaw nawku hpung kaw na mung ramma ni hpe shalat na, garum ya na, hpaji byengnya hkaja sawk sagawn mai ai grupyin grin shalat ya na matu lit nga ai.
Prat masa a majaw ramma ni kaw na hpaji hkaja na shara, bawngring ganga na shara, shingbyi na myitdik shara gaw nawku hpung rai ra ai. Brang, Hkawn Ji ten hta ramma ni nawku jawng hta n shingbyi ai sha shinggan de du mat yang grai tsang ra ai.
Mai kaja ai shara de du yang gaw amyu mi ... n rai yang gaw shawng lam, amyu sha ting a shingran katsi wa ai.

Ya ndai laika hti nga ai myitsu wa gaw nawku hpung a lit nga ai, Hpung up, hpungtau, hpung sara, ramma lithkam lama rai yang ... ramma ni a matu laika dum ram sha pyi galaw ya na myit ga ai kun?
Laika dum nga sai buga hpung na rai yang ... ramma ni laika dum de sa hti nga ma ai i? Gara hku shalat ya yang mai kaja na hpe i sawn ga a ni? Myit yu ga a ni?

Anhte ramma ni ma madu a nawku hpung kata na ramma ni hte nau nna ai aten hta kaba wa na ma kasha ni a matu mai kaja ai lam ni gaw galaw da ya ra sai.


Ramma hte ramma lithkam

Ramma ni hte ramma lithkam ni shada ningmu n bung ai grai law wa ai. Shara shagu du hkawm ai, ningmu hkum ai ramma ni hpe woi awn na ma gaw n loi ai.
Raitim, ramma ni a ningmu hpe hkungga ai myit, sawn jahkrup ai lam n nga ai sha, dawdan mai ai ahkang aya nga ai majaw madu myit ra ai hku sha dawdan galaw shanang nga ai ramma lithkam ni nga ai.
Ramma ni a ningmu hpe n hkungga ai.

Nawku hpung hte ramma lapran ningmu n bung hkat ai rai yang, ramma lithkam gaw ramma maga na tsap ya ra ai. Ngut na she htuk manu myit dik hkra hparan lajang ya ra ai.
Dai zawn n re ai sha, ramma lithkam rai nga ninelen ramma maga de n tsap ya yang dai ramma lithkam gaw wa sai...

Madu ra ai hpe chyu atik anang shanang galaw ai ramma lithkam nkau a majaw ma ramma hpawng hta masha grai yawm mat ai.

Ramma ni hte rau ningmu htai lai let amu galaw ai nawku hpung ni hta gaw awng dang masan sa ai lam hpe adan aleng mu lu nga ai.


Nawku hpung a shinggan na ramma ni a masa

Prat dep wa ai hta hkan nna, shachyut ra ai lam ni grai law wa ai. Gumlau ai lam ni hpe n lu ningdang ai majaw tsa chyaru, kani lam hta len nga ai.
Amu bungli n lu ai. Amu bungli n lu jaw ai. Amu bungli jaw na daram hpaji n chye ai. Shang gumhpraw n nga shi ai majaw Kanu Kawa ni kaw na sha ai.


Majan prat hta yak hkak ai, hpaji n lu sharin ai majaw tinang a kashu kasha ni hpe hpaji grai chye shangun mayu ai gaw ya prat na Kanu Kawa ni a sindai kaw na myit nan rai sai.
Raitim, amu bungli ngu ai gaw htum mat ai lam n nga ai.

Kanu pungjaw jaw yang kasha pung jaw jaw ai nga ai hte maren, hkringhtawng hpe atsawm sha dagraw na kashu kasha ni hpe mai kaja ai hkringhtawng jaw da ya ra ai.

Matut jaw ra ai.
Ya, ya ndai aten na ramma ni, ndai ban na ramma ni gaw grai ahkyak nga ai. Kataw n mai ai.
Lahta kaw dingyang ka wa ai hpe yu nna ramma ni ra rawng ai lam n nga ai ngu hkum shadu yaw.
Ramma ni hta ra rawng gawng kya ia lam tsun n ma nga ai. Dai gaw myitsu salang ni madi madun, mahtai shaw garum, hpaji jaw yang she grau mai na re,

13 October, 2008

Ma kasha ni a gasan ni

13.10.2008

"Jawng sa mayu ai Nu."
"Laika sharin mayu ai Wa ngu nna tsun taw ai ma kasha ni anhte mungdan hta kade nga na kun?"

Wanleng ngu ai hpa re n chye ai. IT prat? Computer ngu yang type gayet ai hpan hte sumla yu ai TV re ngu ram sha chye ai ni ...

Myit dat yu yang grai hkam sha dik ai. Ya ante, anhte amyu ting hta rawt jat ai lam hta gawng kya ai lam grau law nga ai.

Hkrum ga ai, na ga ai, mu ga ai nkau mi hpe laika si hte ka dat mayu ai.

Nu, dai laika buk mari ya rit. Hti mayu ai. Ma nang, sha na pyi hpa n nga yang ... nga nna ahkre katut ai ma kasha kade nga ai kun?

Madu a kasha ni laika hti mayu, shakut mayu tim n lu madi shadaw ya nna yupra shang ten lagu hkrap nga ai Kanu, Kawa kade nga ai kun?

Nu, jawng sa mayu ai.
Hpa jawng sa na. Hkauna pa sa ra ai. Daini nli gat na re. Mam dan na re. Mam rin na re.

Wa, Ingalik ni gara kaw nga ai rai?
Wa, Japan ni gaw kadun ai i?
Wa, Myen ni hpa majaw n kaja ai.
Wa, Wa, Wa, Wa, ...

Ma nang ga san grai law la ai. Ngai wat ... shingna katut mayu sai i?

Nu, ngai kaba wa yang tsi saranum galaw na yaw. Buga hpe bai tsi tsi ya na. Anhte mare hta mak hkalawng hte hkali ana grai byin la ai.
E, Nu sha grai myit su ai. Nu sha laika hpaji sha shakut u. AnNu Wa ni gaw hpaji hkringhtawng sha jaw na nga ai.

Ma Gaw, nye matu tsa sa mari su. Lawan wa law ...
Ningnu, tsa mai loi galaw yu.

Yehowa gaw hpaji byengnya a npawt rai nga ai. Gai ... daina na hkum tsup akyu hpyi kadai rai? Ma Roi i? Chyum laika kadai hti na.

Lang mi du hkawm da yu ga sai Maji Bum Hugawng Pa Tarung ga hpe grai dum ai myit hte ...

11 October, 2008

Hkam sha lam ni ...

11.10.2008

Lusha seng shawng kaw, beer seng shawng kaw nampan dut nga ai ni hta hkam sha lam n nga ai i?
Lam makau na seng (Junk food seng) shingdu nsin nmun hta shakau nyen taw ai dinggai hta hkam sha lam n nga ai i?
Jawng lung palawng ni hte jawng sa taw ai jawngma ni hpe yu let, gat dut nga ai, dunye ye nga ai ma kasha hta hkam sha lam n nga ai i?
Myi n mu let lam mazup (Intersection) hkan hpyi sha nga ai masha ni hta hkam sha lam n nga ai i?

Amu n lu ai majaw myitru let salik dung lu nna shi shawng hta hkawm lai nga ai masha panglai hpe yu taw ai wa hta hkam sha lam n nga ai i?
Adip arip hkrum nna prat tup hkrit myit ni hte kaba wa ai ma kasha ni hta hkam sha lam n nga ai i?
Manu mana lauban nna gumhpraw tawn shara pyi n nga ai masha ni hta hkam sha lawm n nga ai i?

Lam shagu hta, grau nna hpaji lam hte sut masa lam hta hpang hkrat nga ai Jinghpaw Wunpawng amyu sha ni hpe myit dum let hkrap let, madai let, shawng lam a matu masing ka nga ai ramma langai hta gaw ... hkam sha lam n nga ai i?
Sumtsan kaw nga ai kasha alat a matu akyu hpyi let aten shagu myit dum nga ai Chyinghkai Nu hta hkam sha lam n nga ai i?

Madu a lamu ga na krin mat ai hpun maling ni, hkyet mat ai hkashi hkawan ni hpe yu nna mau mahka nga ai Jinghpaw mung hta hkam sha lam n nga ai i?
Roi rip hkrum let sat kau hkrum ai shayi sha ni a dinghku masha ni hta hkam sha lam n nga ai i?
Madu n-gun ja ai nga nna lahta tsang kaw na nga taw ai masha ni hta hkam sha lam n nga ai i?
Masha ma n law tim, buga hpe a si a htan marit let, madu a amyu, htunghking, aga hpe makawp maga mayu ai Jinghpaw la langai hta hkam sha lam n nga ai i?

Nbung hkat ai hkam sha lam ni hpe n chye tsun dan taw nga ma ai. Hkam sha lam gaw ahkyak ai zawn, chye hkang ra ai. N chye hkang jang n myit mada da ai lam ni byin pru wa nhtawm madu hkum hta n-ga, madu a grupyin hte mungkan ting hpe akyu jaw ai masha tai ai zawn, jahten jaza kau ai masha mung tai chye ai.

Masha ni a hkam sha lam gaw hkan myit hkawm nna, nye hkam sha lawm gaw hpa ta?

Ngai pyi atsawm n chye wa nga ai le...

Aw ... prat ... prat ...

08 October, 2008

Malut shing n rai Tobacco

8.10.2008

Blog post ni mara na hkyen yang she, n myit mada ai sha Executive Director wa maja du shang wa ai majaw ... email jep ai zawn zawn, google tam ai zawn zawn galaw dat ai.

Moi gaw rung ten hta n blog ai law. Raitim, nta kaw internet n lu ai majaw net cafe hpe alu jaw ai ma law wa sai majaw ... majaw a majaw le ... Hkau Shanghtin e, chye na ya rit ... n zim ai yaw ... grai gaju galim re. :P
Nta kaw Internet access shakap na ngu she, nta madu wa a bank statement nga kun ra ai majaw shata 3 na tim connection n lu shi ga ai. Ndai mungdan a amu galaw lanyen ai gaw Jinghpaw ni hta grau ai.

Mungkan a channel shagu ram lu yu ai Cable box mung shata 2 ram du wa tim bai n sa shakap ya shi ai. Shanhte shakap na bat mi pyi n rai shi yang hten mat ai. Bai gram da ai wa ... ya du hkra n lu shi ai.

Ya, tsun na pyi gara du mat ai kun? Ndai mungdan a service ni hpe ka-un shajat tsun taw na gaw ...

Daini sa du ai shara gaw Malut ninghkap ai lamang hte tut nawng ngang grin ai rawt jat galu kaba lam re.
English hku gaw ... Regional Workshop on Tobacco Control and Sustainable Development re. Control nga tim, ninghkap na lam chyu tsun nga ai majaw ... ninghkap ai lamang ngu na ga galai dat ai.



Ong Bak ngu ai Thai sumla hkrung yu ga ai kun? Dai kaw na dingla langai gaw yuhkraw hte ga shaga ai hpe mu na re. Dai gaw hpa majaw ta?
Malut (Salik) a majaw re. De a majaw jahtum hkye la n mai sai majaw, dai hpa ga nhtawm gram lajang dat ra ai.

Dai kaw na gaw n-gup hte ga n mai shaga mat sai. Yuhkraw hte sha ga shaga ra mat ai. Dai hku nsen pru na matu jak rai lama mi mung bai ra ai. Hkre di ngu nna nam mare hkan shaga ai (Torch) zawn san ai hpan jak rai hte shaga ra ai.
Dai n rai yang gaw nbung sha pru ai re. Dai jak rai hte shaga yang she ga nsen ni le wa ai.

 
(Lata shamu ai shaloi dem dat na. Shi gaw n-gup hte n mai shaga mat sai.)


Shi nan hkaw tsun ai sumla hpe madun dat ai. Jawngma ni, shawa masha ni hpe ma nau nna shi ai aten kaw na hkaw tsun hpaji jaw nga sai. Hpa majaw nga yang ASEAN mungdan hta malut lu ai masha wan 125 nga ai kaw na Philippines kaw law dik re.
Mungkan ting hta gaw masha 1.2 billions nga ai. ASEAN kaw na gaw htam 10% garum jaw ya nga ai hku re. Malut company ni hpe le ... (Jinghpaw hku Billion hpe ri kun? ra kun? malap sai majaw hpang de she bai ka na. Jinghpaw hti hkum kaw ma Billion hta jan hkra nga ai. Anhte hpang na ban prat ni nau n lang ai majaw mat hkyen nga ai.)

Sumla ni ... nau gaw n san ai. Dai shi sawk dem masha ni gaw tsan tsan kaw na pat galu law ai hpan wan htim hte dem taw ma ai. Nbwisam gaw kahti gari mari da ai SONY camera kasha hte ni ai hta ni hkra htep la nna (Kaja nga yang ganaw nna ...) dem da ai majaw re.
Shakut na she yu ya marit ...

 
Anhte mare ting malut n hkai na dawdan sai ...
Ndai gaw tatut hkai ai hkauna la wa re. Ya shanhte mare ting malut lap hkai ai hpe dawm kau sai. Lu su wa ai lam n nga ai hta n-ga mungkan ga hte shinggyim masha ni hpe akyu n jaw ai majaw re da. 

 
Sumla hpe dip na yu yang she grau mu lu na re.

 
Malut lu let si mat ai lam hkrang shala da ai ...
Ndai bat laman laika nnan ni bai mara na re. Sa hti ai ni hpe chyeju kaba sai.

EU-ASEAN DAT KASA NHTOI

8.10.2009

Dum dik ai uma shagawng ... hkahku mung hkrun lam ntsa ngu ai ... UMA BUM mahkawn hpe madat let, ndai laika ka nga ai.

30.9.2008 shani du da ai EU-ASEAN AMBASSADORS' DAY shaloi dem da ai sumla nkau mara dat ai.
Dai kaw EU hte ASEAN na dat kasa ni sa du ai. Shara gaw ASEAN CENTRE FOR BIODIVERSITY re. Dai gaw La Banos ngu ai mare a University of Philippines jawng wang kaba kaw na Forestry College a npu kaw nga ai.

Dai shani hta du sa ai mungdan shagu na dat kasa ni gaw hpun langai hpra hkai ma nna ASEAN kata na bio species ni hpe matut makawp maga mat wa na lam hpe bawngban jahta ma ai.

Ndai ASEAN CENTRE FOR BIODIVERSITY hpe EU kaw na ja gumhpraw madi shadaw ya ai re.
Masha zup sai nga ai hte dai centre kaw na hpun hkai na shara de BMW, Mercedes ni hte sa wa ai. Ngai gaw n lawm ai. Dat kasa ni hkrai le. Myen mung na dat kasa gaw Mercedes jawn ai.

Hpun hkai na shara hte centre gaw lagaw lam hte hkawm yang 60 seconds (minute mi) ting ting hkawm ra ai majaw dat kasa ni pu ba na tsang nhtawm mawdaw hte sa ai re.

Jahta ai shaloi gaw n shayawm ai sha, carbon jai lang ai shayawm ra sai lam ni ja ji gaw jahta sai re. :P

Hpun hkai nga ai sumla nkau mara dat ai.

Nye a Executive Director ... hpun hkai nga yang ..

Munghpawm Myen mung na dat kasa wa ...

Masat masa sumla (Lu ai shara kaw na dem dat ai. Nau ganaw ra na)
Nampan ...

Htawm hpang na anhte kashu kasha ni a matu ... ndai zawn ... dai zawn ... (Press conference)


Hpun hkai ngut ai hte shanhte seng ang ai ni woi madun ai de chya pa nang let yu hkawm sai. Dat kasa ni mung grai myit lawm ai nsam hte yu hkawm ma ai.
Hpun law malawng gaw asak 40 ram sha naw rai nna, Jinghpaw mung hta shara shagu mu lu na daram re ai hpun ni re. Raitim, bai myit dat yu yang gaw anhte gaw n hkang zing lu ai. Shanhte gaw hkang zing taw nga ai.
Dai majaw du na shaning hkan, kadai ni gaw hpun grau law lu nna katsi pyaw ai grupyin, hkashi n taw ai lamu ga tai na hpe tsun n ra sa na re.

Philippine Eagle ngu ai Langji u hpe ma ganaw let dem wa ai. Ram ram gaw kaba ai lo... Ni ni htep htep ya she mu ga ai re. U hkai kasha hkum tsun, U kaba law ni hpe pyi lu magra garawt pyen mat na re. Sumla hpe yu dat u.


Philippine Eagle ...

Loi tsan ai kaw na dem da ai majaw nau gaw n sam ai.

Langji n raitim, laga u kasha ni a madai nna ngoi nga ai ... nga ... nga ... nga ... ngu ai nsen ni a majaw, ngai hta n-ga dat kasa ni pyi myiman n tsawm mat ma ai.
Yawng na myit hta hkam sha taw na zawn san ai. U kasha ni a buga, nam maling de marit maroi ngoi ai nsen wa ... salum hpe magra ashun nga nngai oi...

Htingbu mungdan de hprawng mat ai Jinghpaw mung na dusat ni mung, marit maroi madai nna ngoi taw nga na kun?
Naw la rit yaw ... anhte hpaji n chye, n chye sawn sumru, ahkaw ahkang n lu shi ai majaw re ...
Nau nna ai aten hta nanhte hpe bai tau na re. Hkik hkam ai kumhpa ni hte rau bai tau na re...

Hpun ni, Dusat ni hpe yu chyai ngut ai hpang gaw lagaw ma tsu sai. Shani shat sha na centre de bai wa sai. Dat kasa ni hpe BMW, Mercedes ni sa tau ma ai. Ngai mung lagaw ram ram tsu sai majaw (45 minutes ram hkawm ngut sai gaw)
anhte hpe hkan sin ya ai pyada mawdaw kaw kap nang let hkan wa ai. Pyada ni, hpyenla ni hte manang zawn, jinghku zawn lu ganawn mazum ai majaw namchyim nnan hpe lu hkam sha ai. Moi me dai hpan n hkam sha ga ai gaw ... i?

Shani shat sha ten hta gaw Germany, Romania, Indonesia dat kasa ni, dai jawng na sarama Professor langai, laksan manam hpaw mi langai hte rau shat sha sai.

Dai sarama hte laksan manam hpaw mi gaw Filipino ni rai nna, ngam ai ni gaw sakkung La marai 3 hte, tsawm htap ai ramma nbwisam ni rai nga ai. Shayi sha ni hti hkrup yang hkum pawt mu ... Nbwisam promotion galaw nga ai re.

German dat kasa gaw masha mung majoi she galu kaba, shat mung lahkawng lang bang sha ai. Grai lu sha ai she rai nga ... Hpaw mi lahkawng a shapre hte sha ai lam gaw n tsun na sai. Myit dum dat shagu mani mayu nna ...

Jinghpaw mung hta byin nga ai nam maling a lam ni, dusat dumyang lam ni hpe English ga adaw achyen hte gawut dat ya sai. German dat kasa wa a ga hpe sha matsing da sai. Dai gaw ...
"Tinang a mungdan a matu tinang mung masha ni sha grau lu galaw na re."

Mercedes jawn ai myen dat kasa wa hte gaw ga hkaw mi pyi n shaga dat sai. Shaga na ngu she, Jinghpaw nhpye hpye da ai ngai hpe n chye masu su taw ai majaw ... Ndai kaw na dat kasa rung de sa ai lam hpe ndai post kaw mai hti ai.

Laika mung Shanglawt hkrunlam hpa grai galu wa sai. Hkau shanglawt wa ndai laika sa hti hkrup yang moi ya na zawn myi bai machyi taw nhtawm tsit ai namlap hte tsit nsam hpun da ai shayi sha ni hpe ja ji bai hkan yu taw na ra ai.

Dai majaw n kam tim, ndai kaw nye a mungga hpe ... aw chye ... post hpe jahkring na sai. (Maroi nni dik ai nsen hte ... )

05 October, 2008

IRRI (Internation Rice Research Institute)

5.10.2009

IRRI de sa du da ai. Mungkan ting na n-gu hpan ni, gara amyu re, gara hpan laikyang nga ai. Gara kaw mai hkai ai. Gara hku hkang zing da ra ai. Dai lam ni hpe galaw nga ai dakkasu re.

Laika gaw nau n ka sai. N-gu, mam ni hte seng ai gasi ni nau n chye ai hte seng ang ai hpung tang mying ni ma n chye ai majaw ... Madu tak nna ka yang mung n mai ai. Sumla mara dat ai. Langai mi sadi hkrup ai gaw, dai IRRI kaw na masha kaba ni gaw maigan shanhpraw ... shat n sha ai amyu ni rai taw ai hpe re.

Mam nli tum ni hpe tawn da ai gawk shagu shang yu da ai. -29 degree du hkra katsi ai gawk langai hta lai nna ngam ai yawng shang yu da ai. 

 
Shang wa ai shara kaw ...
  
Mungkan ting na n-gu tum alu jaw ai mungdan ni 
  
Mungkan ting na masha jahpan ... 
Madu a asak hpe click dip yang tinang shangai ai aten 
Ndai mungkan hta masha kade nga pra taw ai hpe
ntsa lam chye lu ai.
Nbwisam shangai ai aten hta gaw mungkan hta masha
8, 556, 877, 928 re da.
Ya aten hta gaw masha yawng 
6, 707, 752, 995 re da.
  
Mungkan hta galu dik ai mam hpun (Thailand)
  
Gara kaw na n-gu ni gaw gara hku ...
  
Jinghpaw mung na mam (n-gu tum) gaw ndai ...
  
Mahkawn album hkan Bonus Track ngu nna bang ai zawn
ndai ma bonus sumla ngu ga.
Hpa hpun re hpe n san hkrup sai. 
Dai jawng shawng kaw hkai da ai re.
Grau nna hti mayu yang ...
www.irri.org de shang hti rit.

03 October, 2008

Jinghpaw wunpawng ramma hte grupyin ... Daw Lahkawng

Jinghpaw Wunpawng Ramma hte Nawku hpung

Ndai laika ni gaw nbwisam a grupyin hta mu ai ni hpe lakap nna sawn shachyaw ai. Hkum tsup ai n rai. Myit yu sawn yu na lam lama ma pru wa yang kabu sai. Galaw u, hkum galaw ngu tsun ai n rai... ningmu garan ai sha re.

Daini na ramma hte nawku hpung (Mare kaba hkan na nawku hpung ni)

Ramma shagu nawku jawng na ramma hpawng sa ga ai malawng re. Lama na madu a buga hte tsan ai shara du tim, ni nawn ai buga hpung de nawku sa lawm, ramma hpawng hta shang lawm ai ramma law ai.

Ramma hpawng de sa, nawku ku, kanawn mazum, fellowship ship ma ai ngu sa ga. Yawng kabu ai. Shayi shadang mahkawn shabrang ni myi hte matut mahkai hkat let salum kahprap hkrup ai aten ni, tsawm htap ai aten rai nna sakkung wa tim pyi n lu malap na namchyim ni jaw ya ai aten re. Choir rau mahkawn, hpung gawan, nawku hpung, seng ang ai ginwang a lamang ni hkan zet zet ja ja shamu shamawt ai.

Raitim, daini na ramma hpawng ni hta ma kaba hte mau na zawn re hkra ramma n nga taw ai. Ramma marai 10, 20 pyi n du ai sha ramma hpawng hpe asak matut taw nga ai.
Lasu su poi, hkungran poi, nta dingshawn shang hkan mung ramma ni sa garum ai ram ram shau mat ai. Ya na sakkung ni pyi shamying da ma ai. Amen shakait ramma ni da.

Gai, dai ramma ni gara de du mat ai rai? Amu bungli hta ahkang n lu ai majaw n lu du ai kun? Lagawn na kun? N rau na kun? N kam sa na kun? Hpa majaw kun?

Myitkyina mare hpung (Geis) hpe yawng ngu na daram na ga na re. Geis ramma ni a hkik hkam wa ai ten ni grai law sai. Mungdaw mungdan hpe woi awn ai ningbaw ni pru wa sai.
Geis ramma nga ai hte rau zinlum ai, atsam ningja rawng ai, garum ai, lusha sha ai lam hta ningtawn ai, shatan ai lam hta mung n shayawm ai, yungwi hta mung zeng re, ginsup hta mung ninggang law law lu da ai.

2002 ning hpang de, Miwa mawdaw sengke ni grai shang wa sai. Myitkyina ga de mawdaw sengke hte hpring! Mawdaw sengke hte ramma hpawng hte hpa seng a ni?
Mawdaw sengke hpe aloi ali lu mari jawn ai hpang nta shagu ngu na daram gaw sengke mari jawn ma ai. Dai hte maren ramma ni hta mung sengke jawn ai grai law wa ai.
Ramma hpawng ngut ai hte o ra de sa ga, fellowship sa ga nga ai aten ni hta moi jawn wa ai wuyang, bawng tuk, pheasant sport lagaw leng ni a shara kaw miwa gumra gaw ze re le wa sai.

Sengke langai sha nga ai nta kaw na ramma gaw hpang de yet yet sha ramma hpawng n sa mat sai. Hpa majaw ta? Yawng gaw sengke hte rai taw sai majaw madu a lagawn leng hte n manu mat ai.
Gang la, dun la mung n rai? Sengke lang ga nga tim Nu yen Wa mung dinghku nawku hte ra mara bai lang ra ai. Dai zawn ...

Jahtum mahtai gaw ... Geis zawn re ai nawku jawng a ramma hpawng hta ramma marai 5, marai 10 ram hte sha ramma hpawng hpe kahti gari matut taw nga ai.


Ramma ni sa nga ai ramma hpawng hpe myit yu ga. Ramma hpawng sa na. Akyu hpyi, chyum laika hti, mahkawn hkawn, alu bang, nta bai wa. Dai zawn rai taw ai.
Nau pyi n na shi ai 1998 a hpang na ramma ni hte grai shai mat sai. Shai na nga le, prat mung shai sai gaw ngu mai tsun ai. Tim, namchyim n bung ai hku shai mat ai.

Dai aten na ramma ni gaw shada grai zinlum ai. Ramma ni a matu hkaja na, ginsup na, shada ganawn mazum na, jahta chyai na, rawt jat lam galaw na matu nawku jawng kaw zup ai.
Nawku jawng mung ramma ni a matu grai kaja ai shara re. Nawku hpung langai hte langai kanawn mazum lam mung grai lu galaw ai. Makyit sumri ngang ai.

Daini na ramma ni a prat hta bai yu yang ... nawku hpung hta ramma ni nga pyaw na, ginsup na, hkaja na matu hkrak ai shara n rai wa ai. Dai majaw ginsup mayu ai ni, hpaji hkaja mayu ai ni gaw shi myit dik na shara de htawt sai.

Ramma hpawng hpe yu ga. Shani ka-ang Jinghpaw hpawng nawku lamang hte alak mi shai ai lam n nga ai re majaw aten nau n lu jaw ai ni gaw nawku hpawng sa nna ramma hpawng n sa mat sai.

Ramma ni a shawng lam jahta ai, bawngban ai, hpaji jaw ai, ramma hpawng ni grai taw mat sai. Ramma ni gara hku shamu shamawt na, shat simai shadu dut na, fund tam na lam ni hte sha hpring chyat nga ai ramma hpawng ni nga wa ai.

Prat dep hpaji lam jahta na, amyu sha lamyan jahta na, shawng lam shingran bawngban na ngu ai gaw yup mang zawn ...

Nawku hpung ni hpe woi awn nga ai KBC kaw na ndai lam hpe atsawm sha bai myit yu yang kaja sai. KBC na ramma lit nga ai myitsu sara ni kaw na ramma hpawng ni de sa du gawan yu let ra rawng ai lam ni sagawn yu ra ai re.

Rung gawk kaw dung taw na gaw n mai sai. Ramma ni htenza nga ai ngu marawn taw nga ai hta tatut sa yu nhtawm mahtai shapraw yang she "Anhte a shingran masan sa na re."

Philippines Congress de kalang mi ...

 3.5.2009

29.9.2008 shani gaw Philippines Congress de sa byin ai. N myit mada ai sha saw shaga hkrum nna du mat ai re. Dai gaw Tara rap ra lam hte uphkang lam, jawng sara ni a shata shabrai lam ni hpe bawngban ai lamang de re. Anhte du ai aten hta jawng sara/num ni manu mana hpawng chyawm taw nna shang na chyinghka mung pat mat ai majaw laga chyinghka kaw na she shang ra ai. Philippines hta jawng sara langai gaw shata mi Peso 8200/- lu ai. Dai shani aging agang bawngban matsa marawn hkat ngut ai hpang gaw Peso 10000/- de shatsaw ya na matu dawdan sai. Ya aten na gumhpraw galai ai manu gaw US$ 1= Peso 46 re. House of representatives ngu ai rung kata de shang ai kaw dem da ai sumla ni re.

 Jawng sara/num ni
 Bawngban ai Congress gawk kata kaw 
(Jinghpaw nhpye hpe mu na re. Nbwisam dung nga ai shara kaw na re)


 
Labau shang sumla nkau


Nbwisam a sumla gaw n mara sai. Loi hking shayi sha ni chye mat na tsang nna ... (Myit kata kaw gaw grai chye shangun mayu ai ... :P)

Ndai House of Representatives ngu ai rung hpe loi sanglang dan mayu ai. Ndai House of Representatives hta Congress man 240 nga ai. Dai Congress man yawng a matu "8" ngu ai mawdaw plate number 5 hpra jaw da ai. Dai majaw Congress man langai gaw plate number "8" kap ai mawdaw 5 lu mai ai. Ngut nna Congress man yawng a matu rung gawk langai hpra lu ai. Rung gawk langai hta mu gun masha 6 nga ai. Congress man 1 kun? 3 kun? gaw shi rung gawk a matu mu gun 4 sha tawn ai. Ngam ai yawng daram gaw mu gun masha 6 hpra hpra re. Rung gawk kata hta Num amu gun masha law ai gawk gaw grai san seng ai hpe mu lu ai.

Congress man 3 a rung gawk de sa chyai da ai. Boxing mungkan hta grai mying kaba dik ai Mammy Pacquio mung Congress man shara shingjawng sai. Raitim, asak 27 re ai shayi sha hpe sum mat ai. Dai shaloi Pacquio gaw Philippines gumhpraw Peso wan 300 (300 Million) jai sai. Dai shayi sha gaw Peso 20 Million sha lang ai.
Ndai mungdan hta Congress man ni, Mayor ni byin tai hkra hpa majaw gumhpraw dai daram ram ma hkam hkra shingjawng ma ai ta?

A san sha re. Congress man malawng gaw lusu ai lauban ni rai nhtawm ahkaw ahkang nga yang gumhpraw mung grai shang wa ai majaw re. Ngut nna ndai gaw Political Dynasty ngu ai lam rai nga ai. Kawa Congress man galaw ngut jang kasha bai galaw ai. Kasha ngut jang kashu ... tut nawng dai hku byin hkra shakut nga ai. Congress man langai gaw kade lang mung mai lata hkrum ai. Congress man kaw na Mayor (Mare up Duwa) de mung mai lahkam ai. Mayor kaw na aya hkrat mat yang Congress man bai shingjawng ai. Dai kaw na Mayor bai lata shingjawng ai. Dai hku hte dau yin nga ai re.

Dai majaw gumhpraw n lu ai ni, hpaji n chye ai ni gaw htum pa de kap ai hta grau kap mat sai.

Ndai Philippines Congress kaw na bai wa ai aten nye a myit hta myit yu sawn yu na grai lawm wa ai. Hkaja la hpa, katsi la hpa ni grai law mu wa ai zawn, kabai kau ra ai, sharai ra ai ladat ni ma grai mu wa ai.

Aw... hkawm ra ai lam grai naw tsan nga a hka !!!

Matsing... Myit lawm yang hti shangun mayu ai ni gaw ... Political Dynasty hte Meritocracy re. 
Nbwisam ka da ai gaw n hkum n tsup ai re majaw ...