31 January, 2009

Clark hte Subic hkrunlam

30 January 2009

Clark nbungli daru gaw 1903 kaw na 1991 du hkra American a dap jung ai shara shatai wa ai. No.II Mungkan majan hta grai ahkrak ai hpyen masa daju rai wa nhtawm 1975 ning, Vietnam majan a matu htaw wa htaw sa galaw wa ai shara ma re.

No. II Mungkan majan hta gaw Clark nbungli daru hte hpyen wang hpe Japan ni zing kau sai re. Majan ngut ai hpang she American ni bai zing la ai.

Shaning 90 ning daram ting, American hpyen dap a shara rai wa ai majaw-hpyen la ni hpe shangwi shapyaw ai magam bungli mung grai kaba ai sut masa langai zawn tai lai wa ai. Ya aten du hkra shara shagu hta dai pyaw len ginra ni matut na naw nga taw ai re. Maigan masha ni ma sa chayi tik tik rai nga ai.

Nkau gaw madu a kaji kawoi ni hpyen la galaw lai wa ai shara re majaw ...
Nkau gaw grai tsawm ai shingra tara hte manu hkyem sa ai majaw hte shangwi shapyaw ya na shayi sha ni grai law ai majaw ...
Nkau gaw labau shang shara re majaw sa du ma ai.

Dai Clark mare hpe bum kaba hte shinggrup da ai. Bum gaw langai sha n re sha langai hte langai matut taw ai bum layang re.Dai bum a mying hpe Pinatubo nga ai. 1991 June shata 10 hta dai bum kapaw wa nhtawm grupyin na mare du hkra, American hpyen dap yawng hpe dap (wan dap/ Ash) ni hte ka-up mat sai re. Masha ni mung si, lamu hta mung numhpu hte dap ni hkrai hkrai re. Bum layang yawng kaw na kapaw ai majaw dingdung de Manila ni hta n-ga New Zealand daram du hkra lamu ntsa hta wan hkut ni, numhpu dap ni hpring mat ai nga chye lu ai.

Ngai gaw?
Ngai gaw bungli hte seng na re. :)
Bungli hte sa ai hta n-ga Director ma lawm ai majaw Malaysia hkrunlam zawn wanglu wanglang gaw n lu hkawm ai rai nga ai.

Clark kaw ngut ai hpang gaw Subic Bay de matut sa ai. Subic ngu ai mare gaw panglai n-gup kaw nga nna lai wa sai aten hta American ni a hka dap jung wa ai shara re. Subic American Navy nga ai. Grai tsawm ai shara re. Dai Subic bay hpe ya aten hta gaw sut masa ginra shatai taw sai re.

Dolphin ni, Sea Lion ni, Shark ni du hkra rem da na-sharin achyin da ai hte maren shawa masha hpe shangwi shapyaw ai lam hte ma shang gumhpraw grai lu ma ai. Ngai na matu gaw shawng nnan lang yu ga ai re majaw grai mau let, yu mahka la mat sai re.



Dai hpang gaw shana shat sha la na, yup na shara tam sai. Hotel ni law law wa booking hte hpring mat sai majaw anhte 4 gaw nyau nyau re sha, o ra de shang dat, san dat re hte kyin sai re. Karai Kasang a shaman chyeju a majaw resort hotel langai mi kaw shara lu na ya aten ndai post ka ngut ai hpang bunghkum machyu sa na re. Hpawtde jahpawt hkying 6 hta "hundred islands" ngu ai shara de sa na re majaw ...

Google kaw na "hundred islands" ngu na tam hti yu yang mau nan san ai hpe mu lu na re. Mungkan hta mau hpa langai hku na masat da ai.

29 January, 2009

Clark American Nbungli dap hte Subic Bay

29 January 2009

Philippines dingdung de ... (I)

Dai hpawt kahprup katup rawt na hka shin la let, rai ni baw la na taw ai. Jahpawt 8:30 ram kaw na Metro Manila kaw na mare langai mi re ai Pasig city kaw na rawt wa sai. Mawdaw nau chyat ai majaw mare shinggan de du hkra hkying hkum mi daram na hkra gau kau ra ai. Mawdaw n law jang gaw minutes 15 sha re.

Hkying hkum 2 ram gau ngut ai hpang gaw Clark Angeles ngu ai mare de du sai. Ndai mare gaw nau nna shi ai aten hta American hpyen dap jung wa ai hta n-ga, pyaw hpa, len hpa shara ni hpring kabrap wa ai shara re.
Dai mare hta nkau American ni gaw ya du hkra nga taw nga ma ai. Dinghku de mat sai re majaw ma re. Ngut na daw chyen amyu ni ma grai law nga ai. Shanhpraw hte Filipino, Shanchyang hte Filipino, Japan hte Filipino ni ma ram ram law nga ai.

Dai Ari base hta marai 2 jawn nbungli, 4 jawn nbungli ni ma grai law mu wa ai. Helicopter ni ma grai she law nga ai.

Dai kaw Philippines mungdan ting na amyu masha ni a htunghking ni, nta ni hpe yawng chyawm na madun da ai Nayong Philippines ngu ai de shawng du da ai.

Bai matut na ...

28 January, 2009

Philippines dingdung de hkawm na ...

28 January 2009

Laika ni mung ka na, ka na ... na kaw hkring mat re nga ai. Lata de n du lu mat ai. Dai majaw na taw ai re. (Nsen nem tsaw hpe atsawm jai lang na hti ra na re.)

Gai, ya kalang mi bai hkawm na re. Dingdung daw de ... Manila kaw na angwi ngwi lung mat na. Labau shang shara ni, myit lawm hpa shara ni de sa na re. Grau nna tsun ga nga yang nau nna ai aten hta Communist ni n-gun ja lai wa sai shara ni de sa na re.

Hkrunlam mahkyen gaw ndai zawn:

1. Clark air base in Pampanga
(American ni dap jung wa ai shara)




2. Subic in zambales
(American ni dap jung wa ai shara)


 

3. Alaminos in pangasinan

 

4. Vigan in ilocos sur

 

5. Laoag in ilocos norte
(Hpyen masa hte uphkang wa ai Ferdinand Marcos a mare. Ya du hkra shi si mat tim, n lup kau shi ai sha tsi tsing let tawn da ai. Shi kasha alat gaw dai mare a Mayor re.)


 

6. Banawe rice terraces
(Mungkan hta mau hpa No. 7 kaw lawm ai.)


 

7. Baguio city
(Grai katsi ai mare re. Ya aten 6* C nga ai.)


 

8. Isabela

 
Ndai hkrunlam yawng hkawm ngut jang gaw Philippines dingdung daw gaw yawng chyam sa na re. Raitim mung masat da ai shara yawng de du lu na matu gaw n lu tsun shi ai. Yawng lu du hkra gaw sa na re. Hpa majaw nga yang lamu ga gaw grai wa n dam ai majaw, shara langai mi hte langai mi gaw aloi ali sa du mai ai re.
Ndai hkrunlam kaw na Baguio mare gaw kalang du ga sai. Dai shaloi gaw htuk-htang sha re.


Del sur = dingda
Norte = dingdung. Ndai ni gaw Spain ga re.

25 January, 2009

I Believe, King-Obama tribute and R. Kelly

25 January 2009





Ndai post n hti shi yang, lapai maga de mara da ai I Believe ngu ai mahkawn (langai hpang langai) hpe shawng hpaw, madat let hti ga. Raiyang she, myi hte bawnu sha bungli galaw ai n re sha, na hte salum a hkam sha lam ni mung bungli galaw na re.

Yupmang langai nga ai ngu na Martin Luther King Jr. gaw tsun wa ai.

Daini ...
Ya jang jang nang yu dat yang ...
Kaja nan shi yup mang ni hkrang shala taw nga sai.

Yupmang ngu ai gaw n mai si ai ... Mai kaja ai lam de madun nga ai, mungkan hpe rawt jat shangun ai yupmang ni hpe atsawm lanu lahku ra ai.

Daini na ten, shi mu wa ai yupmang hte maren ... ndai mungdan hta shan hpraw, shan chyang ni yawng saboi langai hta shat rau sha taw sai. Grau dan dawng nga ai gaw ya dai mungdan hta kaba dik ai magam lit, mungkan ting hta ahkyak ai magam lit hpe gun hpai taw sai wa mung shan chyang rai nga ai.

Shingran yupmang!

Jiwoi Jiwa ni shingran yupmang nga wa ai hte de a matu gasat wa ai. Shakut wa ya sai re. Dai hte maren prut pru nga ai ramma ni, ban hte ban shakut wa ai. Shakut wa ai marang e, ya daini hkai ai hte maren nsi naisi ni lu di sha sai re.

Ndai gaw Amerika mung kaw na shan chyang ni a hkrunlam kadun mi rai nga ai.

Jinghpaw ni gaw taw?
Ngai ka yang hkum tsup na n re. Madu a ningmu hte hkap la hkan sa ai lam hta hkan na sawn dinglik yu ga law ...

Anhte a Jiwoi Jiwa ni a yupmang shingran ni hpe ma sawn yu ga.

Masha law law chye ai yupmang ni nga ai zawn ni nawn ai grupyin sha chye ai yupmang ni ma nga na re.

Masha law law chye ai yupmang ngu ai gaw, ga shadawn; shalawt ya na matu shanglawt hpung hpaw ninghtan let gasat wa ai. Mungdan bai gaw gap na matu shakut wa ai/ nga ai.

Raitim mung, anhte amyu sha ni gaw dai yupmang langai hte sha n mai myit dik nga ai. Shingran yupmang ni law law nga ra nga ai. Lam shagu hta hpang hkrat taw ai majaw re.

Nkau gaw shanglawt shingran mu wa sai. Nkau hkan shatup shakut nga ai. Dai hte rau, nkau gaw media yupmang mung mu ra nga ai. Nkau gaw prat dep hpaji a matu shingran nga ra nga ai. Nkau gaw mungkan gawdin ninggang kashun poi hta Jinghpaw ni awng padang lu na yupmang mu ra nga ai. Kachyi sha law ai amu kaw na, kaba dik ai magam du hkra yupmang mu ra nga ai.

Yupmang mu ai hte sha n-ga, tatut hkrang shala yang she htawm hpang de masan sa na re. Ya aten shakut shaja taw nga ai Kachinland shiga dap ni ... nau nna ai aten hta CNN ni zawn tai wa hkra shingran mu ra nga ai. Shingran mu let galaw ai ma rai na re. Hkai ai hte maren lu dan hkra shakut ra nga ai. (Akoi... hpaji ni sa jaw hkrup sai. Shalai na she hti dat nu yaw.)

Naw hkring na re. Matut ka yang Hkau Shanghtin ni, AP ni mung lawm wa sa na. Dai zawn rai sai, ngai na post ni gaw gara de mung n jau jau re mat ai. Sa hti nna myit tsu, myit ru mat jang mung grai hpyi nem sai law.

Link: http://www.speedyshare.com/708501797.html
Link: http://www.6lyrics.com/music/r_kelly/lyrics/i_believe_obama_tribute.aspx
Photos: www.images.google.com kaw na tam la ai.

23 January, 2009

Ndai hkringdat ni de sa du yu ga ai kun?

23 January 2009

Daini youtube yu let n myit mada ai sha hkringdat nkau mi de matut manoi du mat ai. Dai hkringdat ni de sa yu ga ai kun? Lama na n hpaw yu ga ai rai yang hpaw yu na matu tsun mayu ai.

http://sleepinginthemountains.blogspot.com

http://pulitzercenter.org/showproject.cfm?id=84

www.pulitzercenter.org kaw hpaw yu nhtawm kachin ngu gayet bang na tam dat yang mu na re.

Dai kaw link ni ma nga ai majaw langai hpang langai dip let mai hti sai. Yawng yawng laika nnan ni lu hti u ga law ...

Mani hpa sumla hkrung kadun

23 January 2009

Yu ngu jang loi sha gaw mani ya u yaw... Zai ai ngu na ma gaw hkum myit ya yaw... Ndai sumla hpe Los Banos ngu ai dakkasu sa ai shaloi professor saranum langai kaw na copy la wa ai re. :P


Jinghpaw Blog mungkan ashun mat ai lam

23 January 2009

Ndai laman hta Jinghpaw blogger mungkan hta ashun ashai loi byin mat re nga ai.

Malaysia mungdan kaw na atik anang mying gumhkawng nga ai Shanglawt blog wa a kajawng sha hkring mat ai. Jahkring mi hkring na ngu gaw ahkang hpyi mat ai. (Ahkang jaw ya sai. Kadai kun? :P) Jinghpaw blog mungkan a matu n-gun yawm mat ai zawn hkam sha ai. Raitim, jahkring mi gan n-gun awai la ai she rai na re. Shi sumtsaw hte wam hkawm ngut jang gaw blog she bai n ka na... aw chye (lu ai kun, n lu ai kun pyi n chye).

Pan Awng a journal mung yaw hpang wa sai. Shi a hkrunlam nga ai lam ni hpe ka da sai. Kadai hpe nau n kam hti shangun mayu na rai sam ai. Laika si ni gaw kachyi chyi sha law ai. Raitim, shakut na hti la sai re. Bai matut na nga ka da ai majaw matut na lu hti na lam myit mada ai.

Hkau Shanghtin gaw Obama hpe hkap tau ai lamang hta poi up galaw nga ai majaw shut na dung na aten pyi n lu ai daram kyin nga ai lam KTV kaw na chye lu ai. (KTV ngu na rai n kai Karaoke ni hkum myit dam yaw ... Kachin Television ngu tsun ai re.)

Ndai laman nta nnan galai dik jahpan kaw Wunpawng mungdan shiga dap gaw No.1 lu mat ai. No.2 gaw Lashu Shayi. No.3 gaw Hkau Shanglawt hte No.4 gaw nbwisam re. :P Ngai n lawm mat na ra ai.

Awng Lawt lam ni hti nna matsing la nga yang, kajawng kaja ga baw bai galai mat na ... bai matut na hpe la nga ai lam Hugawng blog madu hpe anhte nsen htawn dap, shi htawn dap, mahka laden kaw na shana dat ga ai.

Ndai zawn tsun yang Sara Langjaw Kyang Ying hpe dum wa sai. Manau poi galaw shagu nsen htawn dap kaw na shi a nsen n na yang myit ni ai nan n nga ai re lo!

Kade la dingda taw tim, ya na lang Obama lam n ka ai AP hpe myi jut hte yu taw sai re. Ka na kun? Ka sai kun ngu na jahkring hkring sa lagu yu ai ra nga ai. Hkau Shanghtin blog kaw na le. :D

Ndai bat a matu post of the week ngu na kun? Ndai bat a laika ngau ngu na kun? Dai kumhpa hpe Hkau Naw Dut a Udi kawp ngu ai laika hpe jaw mayu ai. Ningmu nnan ni bai lu ai majaw... (matsing; nbwisam jaw ai sha re.) :D

New Zealand bu ni, Dum nta blog hte ngam ai blogger ni gaw blog mungkan kaw loi yup nga taw ai lam shiga hkum hkum tsup tsup na lu ai.

Blog mungkan kaw hpung yawt dat, lim mat dat rai nga ai Hkau Simsa myit hpe mung myit dum nga ga ai.

Ndai laman maja wa nan member law wa na ram ram masha chye wa ai hkringdat langai gaw www.wpzupra.ning.com re. N chye shi yang loi mi sha pyi sa chyan yu dat yu u. Chyan yu nna kadawng bang jang gaw ngai lit n la ai. :P

22 January, 2009

POSTMAN

23 January 2009

Jinghpaw blog mungkan ashun mat ai lam hte matut na mara kau hkrup ai. Matut da yang nau galu ai majaw, daw mi garan na laga post hku na bai mara dat ai.

Ndai lam ka na ngu ai wa Jinghpaw blog mungkan lam ga sa hpaw taw ai. Kaja ka mayu ai gaw ndai she re ... (Ga hpaw wa nau galu mat re sai.)


POSTMAN ngu ai sumla hkrung yu byin ai.
Dances with wolves ngu ai mying kaba ai sumla hkrung hta hkrang shala wa ai wa re. Shi mying gaw Kevin Costner re. Shi nan director galaw wa ai.

www.imdb.com


Myit mada lam n nga ai ten ni hpe myit mada lam nga nga ai lam madun ai.
Kadai mung mungkan ga a daw chyen mi rai nna akyu rawng ai masha re ngu hkam la wa hkra galaw ai.

Laklai hkra shai ai sumla gaw n raitim, jahtum du hkra dung ai kaw na n rawt ai sha yu mat ai. Ya na aten zawn American gumsan magam Barrack Obama grai gumhkawng nga ai ten, ndai sumla hkrung yu dat yang grau namchyim rawng na re. (AP mung grai kabu na sai.) :D

Ram ram galu ai sumla re. Hkying hkum masum daram galu ai. 2:57:37 ting galu ai.

Aten lu jaw yang, lama na n yu shi yang ... yu ga le i?

Bonus snr kumhpa shajang; Dances with wolves ngu ai sumla hpe n yu ga shi yang laika buk shawng hti ai re. Lai wa sai 7 ning daram kaw rai sam sai. Myen ga gale da ai laika buk hti ai re. Ya she n myit mada ai sha dai sumla hkrung mu hkrup na mari la nhtawm yu sai re.

Dai sumla hkrung gaw America de shan hpraw masha ni du shang wa ai ten chyauman buga masha Red Indian ngu ai ni hte gasat ai lam re. Dai buga masha ni kaw mung Jinghpaw ni zawn amyu lakung ni nga ma ai. Ga shadawn; Apache, Cherokee zawn re ni re. Apache ni gaw hpyen gasat grai ningtawn ma ai.

Shanhte ni hpe atsai awai shamyit kau ai marang e, htawm hpang na ni myit malai lu ai hte myit dum masat hku nna Apache ngu shamying ai Hpyen gasat Helicopter (Chopper) ni galaw shapraw wa sai re.

Dai hte rau Miwa mung, Jinghpaw mung hkan na ni nkau chye na re. Cherokee jeep ngu ai hpe... Dai Jeep gaw bum lung na i? gara nam de ganaw hkawm na... Peking jeep hta pyi grau ja ai re. Dai ma maren, Cherokee amyu ni hpe myit dum masat hku nna shamying shapraw da ai re.

Ya kalang bai, Malaysia kaw yu wa ai (Hpa gaw n seng tim, shakawng ai hku) Australia sumla hkrung gaw buga masha ni hpe roi rip gasat shamyit nyet masha jahpan kaw na ginhka da ai lam ni dem da ai re. Mungdan a hkringman daju ni nan hpyinem da ma ai. Nicole Kidman hkrang shala da ai. Lawan she yu manu. N yu shi yang. Dai Nicole Kidman wa nau nan chye hkrang shala nga ai. Stepford wives sumla hkrung hta grau pyi ningtawn ai.

Chye... bungli mung n galaw, sumla hkrung hkrai hkrai yu nga ai lam masha ni chye ma sai law ... gaya kahpa ...

19 January, 2009

Chyeju kaba sai yaw ...

19 January 2009

Sumtsan kaw na shayi sha langai hpe chyeju dum let ...
1. Labu kadun langai
2. Myiman katsut hpajet
3. Gwi shinglet
Sumla hta nbwisam hka n shin shi ai majaw loi chyang ai zawn rai taw ai. Dai hpe gaw n yu ga. Kumhpa hpe sha yu ga ngu ga saw dat nngai law ... :P
Manu mana kabu nga ai wa ...

Buga

19 January 2009

 
Buga

17 January, 2009

Buga kata na hpaji lam III

17 January 2009

Kawng Ra mare hta du ai shani gaw laban shani re majaw jawngma ni hte n lu hkrum shaga da sai. Jawng gaw hpri tsut jawng re. Hpyen asuya hpaw da ai jawng re.

Ting Kawk kaw na jawng gaw Hugawng pa hta hpyen asuya ni hpaw tawn ai jawng kaw na ram ram hkrak ai jawng re. Lapran tsawn jawng rai nna jawng up saranum gaw lawu ga na re. Rip kawp tara ma grai nga ai hte jawngma ni a hkan nang hkan sa ai lam mung grai hkrak nga ai.
Dai jawng hta 99% ram gaw Jinghpaw Wunpawng ni rai nna hpyenla kasha loi li gaw maigan amyu ni re majaw Jinghpaw ga hte ma mai matut mahkai nga ai.

(Ndau ai gaw n re. Raitim, chye ging ai shadu ai majaw ndai lam hpe ma ka na nngai.)
Dai mare hta, shayi sha langai mi hpe mu wa ai. Shi mying gaw Ze Nyoi re. Tangbau kasha re. Shi gaw, kaji ai aten hta lagaw machyi mat ai. Kanu Kawa ni atsawm gawn lajang ai lam n nga ai majaw lagaw gaw loi kaji mat na lam n mai hkawm mat ai. Dai majaw ya aten hta gaw lahput hpe lang let hkawm nga ai.

Myi hta mu hkra tsun ga nga yang, wa hkawm hkawm ai hpa hput di nna lata hte hkawm nga ai. Laika sharin ai lam hta gaw grai ningtawn ai lam chye lu ai. Asak gaw 18 rai nna Kawa machyi mat ai majaw jawng hkring kau na dai shaning she bai matut lung ai re nga chye lu ai. Kanu sha yi hkyen let shakut ya taw ai re lam chye lu ai. Tsi saranum grai byin mayu ai nga nna tsun ai. Hpaji lam hta grai sharawng ai num kasha langai re.

Ndai zawn re jawngma ni a matu anhte nan shakut na jaw ai Scholarship ni lajang ra sai. Jinghku n daw, sai n bung ai maigan ni pyi anhte hpe scholarship nga nna grai jaw ai. Anhte shada mung hpaji shakat kumhpa ni law law, tut nawng lu jaw hkra galaw sa wa ga.

Nawng Mi mare gaw shanglawt hte myen majan a majaw mying gunhkawng nga ai. Jawng langai nga ai. Lapran or Lawu tsang jawng re. Hkrismat galaw nga ai aten re majaw nyep baw baw re jawngma ni (snr) nau nna ai aten na ningbaw ningla ni hte rau shat kashun sha wa sai. (Ningmu n nga ai.)

Dumbang mare gaw mare kaba rai nhtawm htinggaw 500 hkawt du wa sai mare re. Lahta tsang jawng nga ai. Jawng up saranum gaw Jinghpaw rai nna Zi Lahpai kasha re. Tsang 10 jawngma ni hpe Nov shata ram kaw na nta kaw n yup shangun ai sha jawng kaw sha yup shangun na ni htep ai hku hte grau nna awng dang na matu sharin ya nga ai.

Raitim mung, shaning shagu a tsawn 10 awng ai jahpan gaw lak lak lai lai n jat wa shi ai lam chye lu ai. Jawngma ni gaw asak sha kaji tim, hpaji gaw n loi ai nga ai hpan re. Madu a jasat hte grai naw shakut ra ai ngu mu mada ai.

Buga kata na hpaji lam II

17 January 2009

Danai hta gaw hpyen asuya hpaw ai lahta tsang, lapran hte lawu jawng ni law law nga ai.

Makaw mare hta gaw lawu tsang jawng sha nga ai. Jawngma ni loi law ai. Jawng gaw kawa shakum hte shangu ga-lup da ai re.

Shinglung ga hta gaw lawu tsang jawng nga ai. Wut dek jawng re. Company langai mi alu jaw da ai nga ai. Htap langai sha rai nhtawm kata kaw jawng gawk garan da ai lam n nga ai. Jawng tsang ni gaw; kaman kaw na 3 du hkra re. Dai majaw gawk 4 zawn gaw n raitim, dung lahkum yan 4 hte laika ka pa kaba 4 re. Jawng saranum ni marai 3 nga ai raitim, 2 daram gaw langai mi hta shata 10 ahkang hpyi da ai.

Dai majaw saranum langai mi sha, tsang kaman kaw na 3 du hkra sharin ya nga ai. Myi kaw mu hkra nga jang, hkau soi lajang taw ai seng madu hpa le. O ra de lagat na sharin dat, ndai de lagat na sharin dat hte dau yin hkawm nga ai. Ndai kaw sharin nga jang, o ra maga de ga law hkat, htim hkat, amya hkat taw sai.

Dai hparan dat, bai sharin dat hte re nga ai. Anhte du ai aten hta, saranum hta ma langai mi lu da nna kan kata kaw langai mi gun da nga ai. Marai langai sha jawng gawk 4 (Gawk gaw n kum da tim) hpe grai shakut shaja let sharin ya nga ai re.

Laja Bum mare hta gaw lawu tsang jawng nga ai. Jawng saranum katsing hprap hprap langai mi mung mawdaw ntsa na yu rai na du wa, anhte ni mung Tarung ga kaw na lagaw lam hkawm na du wa rai nhtawm hkrum la sai. Lahta na jawng ni hte maren, hpri tsut n nga ai jawng re. Jawngma ma n law ai.

Tarung mare gaw KBC a jahtum mare re. Lapran tsang jawng nga ai. Jawng up gaw Naga amyu sha rai nna hpyen asuya hpaw da ai jawng re. Rip kawp tara hkrak ai jawng langai re. Sara/num ni hkum hkum tsup tsup re jawng re. Jawng kaw Jinghpaw ga malawng shaga ai.

Htangbra mare gaw lawu hte lahta ngu na nga ai. Mare 2 pawng yang she jawng langai nga ai. Jawng gawk mung langai sha re. Bus mawdaw langai ram pyi n kaba ai. 2006 ning shaloi gaw jawng kaw jawngma langai, saranum langai hte hpang wa ai. 2007 ning hta gaw saranum langai hte jawngma marai 6 rai wa sai. Makau grupyin hta Pat maw (Padi snr Pa-yin) pru ai majaw hte ga sau grai kaja nna hkau na galaw ai ni a majaw masha law wa ai mare re.

Namhkam (Nambyu) mare hta lapran tsang jawng langai nga ai. Jawng gaw wut dek, hpun pyen hte htap lahkawng re ai jawng re. Shanglawt ginra re majaw shanglawt ni woi awn ai jawng re. Jawng sara/num 10 jan nga ai hte jawngma ni law law gaw English ga kam brawp ma ai. Ja maw ginra re majaw jawngma ni jawng n sa ai sha, ja htu dat, sumla yu dat, kani lu dat, hpai da dat re na mung grai galaw ma ai.

Buga kata na Hpaji lam

17 January 2009

Ndai laman shana n mai yup ai. Shakut na yup tim n mai ai. Lama mi hpe bai myit taw ai majaw re.

Anhte a hpaji lam!

Hpaji lam ngu tsun yang hpaji chye ai ni pyi n law shi ai amyu re majaw gaw htum pa de na hpaji lam hpe grau myit ai. Ngai kaw na gara hku lu garum ya na hte gara zawn re ai lam ningnan ni hpaw ya lu na matu myit taw nga ai.

Dai majaw Jinghpaw mung kata de ngai du hkawm yu sai buga kahtawng ni kaw na jawng ni hpe bai sawn dinglik yu nga ai.
Ndai laika hta sharin achyin nga ai hpaji masa hte de a akyu ara lam ngu na hta sharin sara hte jawngma ni a lam hpe madung sawn yu na ka na re.

Ndai kaw ka ai jahpan chyarang (Data) ni gaw yawng tup hkrak jaw ai nrai. Shut shai ai lam ni nga yang laika ka ai wa a lit re.

Ngai du hkawm yu ai Jinghpaw mung na mare malawng hta jawng ngu ai hkrak re na nga ai mare kahtawng n nga nga ai. Ya hpang de gaw wutdek nta ni loi li hte rai wa ai gaw mu ai. Dai gaw hkrang sha rai nga. Kawp sha re ngu tsun mayu ai. Kawp gaw n ahkyak a ni, nga jang gaw kawp ma ahkyak nga ai. Shaning shagu jawng nnan bai gap na matu n htap htuk nga ai.

Kawa hte shangu ga-lup da ai jawng ni malawng rai nga ai. Rai sa, dai jawng ni hta sara/num ni kade daram nga a ta? Aten hpring jawng sara/num ni marai 2 hta lai na nga ai jawng gaw grai taw re nga ai. Htinggaw 300 ram nga ai mare kahtawng ni hkan gaw sara/num ni hkrak re na gaw lu ma ai.

Htinggaw n law ai mare kahtawng hkan gaw sara/num ni gaw tsi tai nga ai. Sara/num law law wa gaw ja gumhpraw ngu na alak mi lu la ai lam n nga ai sha, kaja nan ap nawng taw nga ai rai nga ai. (Hugawng pa ting hte Jinghpaw mung sinpraw maga na mare kahtawng nkau mi hpe lakap let tsun ai.)

Lai wa sai 2007 ning Nov-Dec aten hta Hugawng pa ting chyam hkra gala hkawm yu sai. Maji bum hta mare kahtawng 3 nga ai. Gawlun, Danai yang, Zupra ngu ai 3 hte pawng yang she htinggaw 150 jan jan sha nga ai. Danai yang kaw jawng langai nga ai. Yawng dai jawng ka sa lung ra ai.

Dai jawng hta jawng up sarama langai nga ai. Jawng sara/num yawng 6 (shut yang shut na) nga ai. Dai kaw na 2 ram gaw aten tup daram ahkang hpyi na, n nga ai law ai. Dai kaw na jawng sara langai gaw tsang shi awng da na dai kaw bai ap nawng taw ai re. Dakkasu matut lung na matu mahkrun tam nga ai. Mying gaw Tang Gun nga nna Lahtaw kasha re.

Sut Awng ngu ai mare gaw Danai hka hku yawng hkrat wa yang, Awng Lawt n du shi ai kaw na mare re. Jak li hte rai jang hkying hkum mi jan yawng hkrat ra ai. Htinggaw nau n law ai sha, bai kahkyin da ai mare re. Jawng kaji langai nga ai. Myi hta mu hkra tsun ga nga yang jawng ting gaw, mare kaba hkan na jawng gawk langai daram pyi n kaba ai. Sara kade nga n nga n san hkrup mat sai.

Awng Lawt mare gaw Hugawng pa ting hta rip kawp tara hkrak dik mare re lam chye lu ai. Lahta tsang jawng langai a hkrang hku nga nna sara/num n-gun hpring hpring hte sharin ya nga ai. Raitim, sara/num n law ai lam hte ahkang chyu hpyi shaja ai lam ni na chye lu ai. Lapran tsang jawng ngu mying shakap da ai.

Shanglawt ni hpaw da ai jawng rai nhtawm, mu ga ai shanglawt jawng yawng hta rip kawp hkrak dik ai hte zen ai jawngma law dik ai jawng ngu na masat hkrup ai.
(Awng Lawt mare kaw na shani chyen mi daram lam hkawm yang Kap Dup ngu ai ja maw de du ai. Jawngma ni a pyaw len ginra langai ma re.)

Kap Dup ja maw hta jawng gaw n nga ai. Raitim, ma shalet jawng nga ai. Sarama langai mi woi awn sharin ya nna ja htu ai masha ni a kasha ni hpe sharin achyin ya nga ai.

Salum a Shayi

17 January 2009

Salum a Shayi

Ngai kalang mung n manam yu ga ai
Na shabyi gaw ...
Gara zawn re sama re hpe ngai n chye ai

Ten shagu jum da mayu ai
na lata ni ...
Katsi mat sai kun

Atek tsun chyai na ga si ni
ya aten hta ...
salum a jut shara mi kaw zim sha hkam sha nga sai

N myit mada ai ni byin wa na
chye ai rai yang ...
hpa majaw tau n myit hkrup wa ai kun

Manu shadan ai lam ni
nga ai majaw she ...
manu dan nga ai n re i

Masha gaw muk hte sha asak hkrung ai nrai
nga tim mung ...
kalang marang dai muk sha na yak ai

Yup su yup nga rai taw nga ai
nye salum e ...

Yu u,
nampan sun kaba law pu tsawm nga ndai!

Langai mi sha gaw
di la nhtawm ...
sama hpe hkru hkra hkam sha dat yu le.

13 January, 2009

Marit marit marit la sai ...

13 January 2009

Marit ... marit
marit la sai ...
Marit shingran ...
kanang rai ta ...


Kaning re na,
kadai hpe
hpa majaw
marit ra na mung
n chye nga ai.

Ndai hpe
sinda kaman
byin taw ai ngu
tsun ra na kun?
Madu a kraw kata
asan sha byin taw,
hpa n nga taw sam ai.

San seng ai
kraw gaw
n raitim,
hpa n nga taw ai
kraw rai taw nga ai.


Ndai mahkawn madat ga sai kun?


At The Foot Of The Cross

12 January, 2009

Malaysia hkrun lam ... Daw VIII

12 January 2009

Butteworth de du sai.
Butterworth kaw na nga jang Thai de du na nau n tsan ai re.

Penang zinlawng hpe Butterworth hkran na mu lu yang

Butterworth kaw na Ferry hte Penang zinlawng de sa ra ai. Penang zinlawng gaw ram daw mi kaba nna, sut masa lam hta grai ma hkrak ai shara re. Butterworth kaw na ferry jawn jang Penang zinlawng kaw na George Town ngu ai de du ai. George Town gaw moi Englsih ni shang wa nna shanhte a colonel hpang ai shara, Dutch ni a machyang si sut masa (Spice trade) hte Meleka hka hpunggyip hpe up sha nga ai hpe gasat jahtum na matu re.

Penang ngu ai gaw moi kaw na anhte yawng na ga ai law ai. Palau Penang nga nna re. Dai Penang zinlawng hta gaw Miwa amyu sha ni nga ai law nna, myen mung na masha ni mung grai law ai lam chye lu ai. Myen mung na masha ni gaw de da ai Hpunggyi jawng ni mung nga nga ai. Mying gunhkawng ai gaw Topayo hpunggyi jawng re. Dai de gaw n du da sai.

Miwa nawku jawng langai

Penang hta gaw shara shagu Malay laika hte rau Miwa laika ni hte ma ka da ma ai. Lam matsun ai kaw na hkawt, seng mying ni, shani shagu na laika ni yawng daram re. Malawng gaw Miwa ga shaga ai amyu masha ni law na re.

Rawt jat galu kaba sai mare ngu ai hte maren wutdek nta htap tsaw ni grai law ai re. Mawdaw lam ni chyawm gaw nau n dam ai hte mare hte shingdaw yang mawdaw loi law ai ngu na mai tsun ai. Taxi shap na sa ra ai de sa na matu lajang wa ai. Raitim, taxi la wa gaw maigan masha re chye ai hte manu hpe htam 3 ram hpyi ai. Dai majaw lagaw lam hte sha adit sai hku re.

Lahta de tsun sai hte maren, traffic nau law ai, mawdaw ni gau ngwi sha shamu taw ai hpe bai mu nna lagaw lam hkawm ai pyi grai ram re sai ngu sawn la sai. Dai kaw na masha ni a galaw lu galaw sha ai lam ni loi hkan masem yu wa ai.

Lam hkawm na tsu wa sai. Kan kaw si wa ai majaw shat seng hkan tam ai shaloi Sharaw beer ngu ai signboard hte rau shat seng mu na kabu gara sa dat yang, seng hpe bai shatsawm jahtap taw ai majaw bai nhtang wa ai. Dai majaw mi yet lai wa ai lam makau kaw na seng kasha ni de bai sa yu sai.

Hpa baw muk re kun gaw n chye sa!

Hpa gaw hpa re ma re n chye sai. N mu ga ai zawn re ai ni chyu rai na gaw htet sha dat sai. Miwa hkau soi seng ni ma yep re majaw Hkau soi ma bai htet sha sai. Ram ram namchyim rawng, shinglet hkra ai majaw hkau soi poi 2 sha la ai.

Hakka Mee (Hakka Hkau soi)


Ice coffee, ice milo ni ma lu ai da. Yaw sai! Kan machyi yang machyi ... dai mung den na ngu yang kan tit mat sai majaw n lu wa sai. Ta law pan e, grai gaw mari lu ya mayu ai re wa ... (Ngai sha shi kaw na mari sha taw ai, shi gaw ngai kaw na hpa mung n mari sha ai. Hka! ngai mung hpa me n dut nga ai gaw ..) Hpa n seng tim, Jinghpaw mung hte Miwa mung lam sa myit taw ai. Jinghpaw ni gaw mari sha tik tik, ga shadawn nga yang Miwa kaw na mari ai rai nkau mi gaw lawu na hte maren ...

1. Miwa gumra ngu na Myitkyina bu ni tsun ai Mawdaw sengke
2. Shakya rai
3. Malu masha (Hkau soi htuk kaw na hkawt)
4. Maisau, Jak sau
5. Nta gap arung arai
6. Tsi mawan
7. Shani shagu lang ra ai arung arai kaji ni
8. Bu hpun palawng
9. Jak rung jak rai
10. Wanyam laknak hte ummm ... hpa ni naw nga ai kun?


Jinghpaw mung kaw na Miwa ni hpang de bai dut ya ai arung arai ni gaw ...

1. Hpun
2. Lungseng
3. Dusat dumyeng
4. Ja
5. Pat or Padi (Payin hpe tsun ai)
6. Shayi sha
7. Ummm hpa naw nga ai kun????? Nyan hpaji hte galaw shapraw na dut sha ai gaw hpa nan n nga shi nga ai ... Bai n mai lu ai arung arai ni hpe she dut sha taw ai re.


Kutkai mare na ... Dyna daru hta ... hpawt manap jau jau ... saiwan mawng nga ..
(Hpa gaw n seng tim, dai mahkawn hkawn mayu wa na re ... Aw, nye ah dwi a buga ...)
Penang jakli daru

Aga! Malaysia, Penang hkrun lam ka taw ai ngu yang she kaning re nme Jinghpaw mung lam du wa ai kun n chye sai. Naw hkring yang she ram na sai. Malaysia hkrunlam daw VIII hpe ndai kaw na hkring na. Huu... Ram ram galu mat ni ai. Kadai wa she hti sa na kun? :(

10 January, 2009

Jinghpaw Mungdaw Nhtoi Masat Akyu Hpyi Kanawn Mazum Hpawng

10 January 2009

Manila, Cavite, Antipolo hkan na Jinghpaw Wunpawng amyu sha ni hte Jinghpaw mung kaw na Hkristan hpu nau ni shang lawm ai hte Jinghpaw Mungdaw Nhtoi Masat Akyu Hpyi Kanawn Mazum Hpawng galaw la ngut sai.

PKCF ngu ai Philippines Kachin Christian Fellowship kaw na woi awn let galaw ai re. Akyu hpyi, shachyen shaga, bawngban jahta nna shat jam, jap htu hte marlar hkau soi, cake, langu si ni sha, dwi ntsin ni lu rai nhtawm kanawn mazum lamang hpe pyaw lung pyaw lang shangut la sai.

Dai ngut ai hpang gaw madu hte seng ang ai shara de yawng bai bra wa sai. Nkau gaw Manila kaw na hkying hkum 3, 4 ram mawdaw jawn ra ai shara kaw na re.

Lu hkru, sha hkru taw sai majaw myi hpyi ni mung grai li wa re sai. Sumla mara na yup sa na re.
Lamang gaw lawu na sumla ni hte maren ...


Lata lawan ra ai lu ...
(Sumla: Tangbau Hkawn Ja)

Tsun na malap kau na, du sa ai ni yawng gaw marai 13 re. Nkau gaw grai tsan hkat ai majaw n lu du sai. Zinlawng mungdan re majaw nbungli hte sa ra ai. $ grai ma ai hpan gaw re.

Ngut nna nau nna ai aten hta PKCF kaw na blog or free web langai mi galaw sa wa na lam hpe ma chye lu ai.

09 January, 2009

Philippines kaw Jinghpaw Mungdaw nhtoi masat galaw na

10 January 2009

Sumla hpe dip dat yang grau kaba ai hkrang mu lu na.


Daini 2009 ning, January shata 10 ya, bat kru ya nhtoi hta Philippines mungdan kaw na Jinghpaw Wunpawng amyu sha ni, mungdaw nhtoi masat ginlung kanawn mazum ai lam hpe galaw na lam chye lu ai.

Galaw na shara gaw -

Unit C,
Lot 10, Blk 7,
Villa EspaƱa Sub division,
Araneta Ave, Quezon City, Metro Manila, Philippines.

Galaw na aten gaw -

3:00 PM - 5:00 Pm

Ndai zawn masat nhtoi langai byin tai wa ai a hpang kaw asak, sai salat hte arang bang ai grai law wa sai. Ndai zawn byin tai wa hkra shakut shaja ya wa sai Ji woi Ji wa ni hpe chyeju dum ai.

Mungdaw hta grau tsaw ai madang du lu hkra shakut ra na gaw anhte ni a lit rai sai. Ban prat ni lai wa sai.


Sai ni hkaw wa sai ...
Lup wa kawng ni law wa sai ...
Aru arat ni pra hkawm nga ai ...
Run hkrat mat ai zawn ...
Prut pru dingyang ...

Hkala nba hkrum taw ai ...
Kataw mat ai ...
Bai rawt na re ...
Shingran ni san pra wa mayu ai ...
Karai e,
Hpaji jaw rit e law ...

Malaysia hkrun lam ... Daw VII

09 January 2009

Penang de rawt sai.

Lumut kaw lana mi yup ai. Hpang jahpawt hta Hkau Hkun Nawng gaw shi mawdaw hte sa wa na anhte yawng jahpawt shat sa sha sai. Hkau soi sa sha ai. Hkau soi hpe Mee ngu shaga ai she rai nga...

N myit mada ai sha, Hkau Hkun Nawng gaw ngai na manang na kahpu rai taw nga ai. Anhte Maji Bum Hugawng pa hpaji myit sharawt campaign hkawm ai shaloi hku hkau wa ai Manmaw kaw na manang na kahpu re. Shi gaw Lahkum Lahpai re nga majaw, ngai gaw Hkau nang Manmaw kaw na Lahkum Lahpai Ja Tawng hpe n chye ai kun? ngu san dat yang ...

Shi gaw: nye kanau rai ang ai law ... nga nna Manmaw de kalang ta phone shaga sai. Shaga dat yang .. hka! ngai na manang she rai nga ahka! Mawk kat, mungkan ga wa kaji kaji ai wa ...

Hkau Hkun Nawng, ngai na manang Ah Tar hte anhte masum jahpawt shat sha ngut ai hpang gaw madu sa ra ai de bra wa sai. Hkau Hkun Nawng hpe mung grai chyeju dum nga ai re.

Peneng de sa ai lekmat mari sai. Penang de gaw kalang ta n mai sa ai. Butterworth ngu ai mare de sa na matu lekmat mari ra ai. Lumut kaw na lani mi mawdaw 3 lang pru ai. Npu kaw gaw lamu ga hkrang sumla.

www.image.google.com

08 January, 2009

Malaysia hkrun lam ... Daw VI

08 January 2009

Hkau Prip a nta hta 3 ya tup shanu shingbyi sai. Hkau Prip hpe grai chyeju dum ai re. 28 December 2008, Laban shani hta Pudu ngu ai shara nga ai Malaysia Jinghpaw Wunpawng Hkalup Hpung de sa nna nawku lamang hta shang lawm wa sai.

Nawku n sa lawm shi yang, anhte manang 3 gaw KLCC ngu ai shara de sa ai. Twin Towers ngu ai tsaw la ai langchyi lahkawng run re na nga ai shara re. Ntsa htap ni de lung, langchyi lahkawng hpe matut da ai mahkrai du hkra sa na matu lekmat mari ai. Raitim mung anhte sa ai hpang hkrat ai da. Jahpawt jau jau sa nhtawm lekmat mari na matu la la ra ai nga ai. Kaning re nme law, anhte gaw shanghte mungdan hpe gumhpraw sa jaw ai, ndai mungdan wa mau hpa re, hpa nya nga na tsun jahta let dai kata kaw na shat seng kaw shani shat sha let nawku jawng de bai matut sai.

Shani shat mung dai Twin Towers kata kaw sha ai re majaw manu ni wa ram ram gaw laja ndai!... Dai shani shat a matu Hkau Nbyen wa hpe chyeju dum sai.

Dai laban shani hta nawku jawng kaw blogger Hkau Hugawng hte ma hkrum zup lu ai majaw grai ma kabu sai re. Dai aten hta Hkau Shanglawt wa gaw Gereja ngu ai nawku jawng kaw Camera lang let sumla ni dem ya nga ai re. Hkungran poi galaw taw ai majaw ... Dai Gereja nawku jang kaw mung Jinghpaw hku nawku ai lamang nga ai lam chye lu ai.

Malaysia hta Jinghpaw ni bat shagu hkungran ai daram re nga sagawn chye lu ai. Ya aten hta htinggaw 300 jan daram rai wa sai lam chye lu ai. Nkau gaw No. 3 mungdan de pyi htawt mat masai. Amyu sha shada mayaw htinggaw de hkat nna mayat maya wa nga ai gaw amyu a shawng lam a matu mung grai kaja nga ai.

29 December 2008, bat langai ya shani hta gaw ngai hkrai sha Lumut, Palau Pangkor, Palau Penang de sa sai. N sa shi yang Hkau Hugawng hte phone matut mahkai lu ai. Shi na manang Hkau Hkun Nawng wa mung dai Lumut kaw na re. Shi ma dai de wa na re nga ai majaw Hkau Hugawng nta hta zup nhtawm me Lumut de rawt wa sai.

Dai shani hta Hkau Hugawng daw jaw ai shani shat sha na buga de pyi grai marit kau sai. Sunhtang si ntsin re. Chyeju kaba sai yaw, Hkau Hugawng e...
Hkau Hkun Nawng hte shi a mawdaw

Lumut de du sai. Lam dingyang Malaysia a lam hpe Hkau Hkun Nawng kaw na tsun dan wa ai. Lumut du ai shana hta lu na sha na, yup na shara kaw na hkawt Hkau Hkun Nawng garum jaw wa sai. Hkau Hkun Nawng hpe chyeju dum ai hte Karai Kasang a shaman chyeju hpe ma shakawn ai.
Lumut mare
Palau Pangkor zinlawng hpe Lumut kaw na mu lu yang ...

Lumut ngu ai mare gaw grai tsawm ai mare she rai nga. Jak li hte panglai hpe rap dat yang gaw Palau Pangkor ngu ai de du ai. Lahta kaw na sumla kaw mu lu ai zinlawng gaw Palau Pangkor ngu ai re. Palau ngu ai gaw Malay ga hku zinlawng hpe tsun ai re.

07 January, 2009

Malaysia hkrun lam ... Daw V

07 January 2009

Port Dickson hta nga ai shaloi Singapore kaw na manang Hkau Nbyen wa, Thai kaw na Hkau Dashi wa hte anhte masum gawk pat hkyen sharin achyin lai wa sai. Miwa ni gaw lungpu kata kaw chyinghka yawng pat na jau hkyen shaman ai hpa le ...

Anhte masum mung, daini na Jinghpaw Wunpawg amyu sha msa hte Nawku hpung ni a lam hpe jahta wa sai. Zuphpawng langai zawn jahta ai n re sha, wang lu wang lang jahta ai re majaw ga baw ni gaw o ra de du dat, ndai de du dat nga tim, yawng gaw amyu sha ni rawt jat wa na Hpaji lam hpe madung let jahta wa ai re. Shan lahkawng kaw na mung hpaji grai lu la wa sai.

Port Dickson kaw nga ai shaloi OKCK ngu ai zuphpawng ma shang lawm da sai. OKCK ngu ai gaw Oversea Kachin Christian Koinonia ngu ai lachyum rai nga ai. Koinonia ngu ai hpe n chye ai majaw, Hkau Nbyen hpe san yang, Greek gasi rai nhtawm myit hkrum let hkrum zup ai nga ai hpan lachyum re lam chye lu ai. (Ngai tup hkrak n matsing ai majaw shut yang ma shut na.)

OKCK ni gaw ya aten KBC shingwang hta na asak 70 jan sai hpung up sara kaba ni hpe laning mi kalang madi shadaw kumhpa jaw ai ginlam hpe galaw nga ai re. Mungdan kata na jahpan hta la nna dai hpung up sara kaba ni hpe chyeju dum kumhpa shagrau sha-a ai lam galaw nga ai.

Ngai na ningmu gaw; Anhte chyeju n chye malap ai hte chyeju chye htang ai amyu byin tai wa lu na magam hta grau ngang kang wa lu na lagaw lahkam ni rai nga ai.

Port Dickson Manau
Port Dickson Manau, Malaysia. 26 December, 2008
Port Dickson hta hpa ni galaw wa ai, gara hku re ai hpe Hkau Shanglawt a blog hta sa mai hti ai re.

Port Dickson kaw na bai wa ai hkrun lam hta mawdaw kata dung lahkum n lu ai. Mau mau re na tsap nga let, lit nga ai wa hpe shara n lu shi ai ngu tsun shana yang mawdaw gau ai wa a makau kaw na dung lahkum kaji kaw shara lu ai. Shawng kaw na view hpe asan sha mu lu ai majaw grai ma kabu mat ai. Raitim, yup nga wa ai shaloi shamyet na shara n nga ai hte, shawng de pyen bun mat na hpe sha maja let Kuala Lumpur de atsawm sha bai wa lu sai.

Mawdaw jawn nga let, makau grupyin ni hpe yu yang ngai na matu mau hpa hte sharin la hpa ni grai law nga ai. Malaysia kaw gaw lam madun ai signboard ni yawng hpe Malaysia Bahasa laika hte sha ka da ai hpe mu lu ai. English hku mung n madun da nga ai.

Ngut nna lam dingyang hta yu mat yang lam makau hkan hka lwi na shara galaw da ai hkrang ni, lakang zawn re ai ni, nlung shakum hkan du hkra pipe ni bang let hka shapraw ai hkrang ni hpe yu na mau nga ai.

Kuala Lumpur de bai du sai. Bukit Bintang ngu ai shara, Pizza hut seng makau kaw na Malaysia du Jinghpaw ni shaga ga re ai Ginra ngu ai shara kaw bai du sai. Yawng mayawng gaw seng ang ai de bai rawt mat ma sai.

Ngai hte rau Singapore de na sa wa ai manang Hkau Nbyen, Thai kaw na ni nkau sha ngam ai. Thai kaw na ni gaw shanhte manam ai shara de bai rawt mat masai. An lahkawng gaw gara kaw yup na hpe naw bawng taw nga ai. Dai kaw she Hkau Nbyen a majaw shi a manang Hkau Prip a nta de sa lu manam sai.

Ngai na yup shara hte seng na grai garum ya ai gaw, hkyak hkyak sha baw kaw na shangu nsam galai da ai Hkau Shanglawt wa re. Shi gaw Hkrismat n sa shi ai shani hta urgent kara hpe nsam nnan galai dat na nbung ntsa poi hkawm ai samwi zawn she zet let nga ai. Shi nta kaw yup na matu grai saw lajin wa sai raitim, shayi sha ni grai law ai hte agam ai majaw n sa yup ai sha, jahpawt myi mu ai hte shanhte nta du, shani shagu mung gaya n chye sa du ai lam sha galaw wa sai re. :P

Hkau Prip ma gaw grai myit kaja nna grai garum ya wa sai. Shi a nta kaw 3 ya yup la sai re. Shi woi sa, shachyen ya ai majaw shara nnan ni law law mung du ga, manang ni ma lu wa sai re. Prip ngu ai htinggaw mying gaw Kayun Du, Lahpai kasha rai nga ai. Ndai hta lakap na gaw Lahpai shayi ni ram ram hta lai hkra tsawm ai lam ta tut sa mu da ni ai. :D

05 January, 2009

Malaysia hkrun lam ... Daw IV

05 Jan 2009

Malaysia hkrunlam daw IV hpe matut mara na ngu myit ai. N myit mada ai sha, blog kaw virus kap mat ai majaw mood ni mung hten run mat ai. Mood hten ai ngu madu hkum madu sakse jaw let yup sha lani mi di dat ai. Bai rawt na, n byin ai law... Mood hten na n galaw ga nga yang Shanglawt ai mungdan hkum tsun, masha amun pyi tu wa na n re ngu na bai rawt na amu galaw sai re.

Port Dickson ngu ai shara gaw Kuala Lumpur mare kaw na hkying hkum 2 jan ram jawn yang du ai shara re. Anhte jawn ai Bus mawdaw ni hta wifi jaw da ai ngu chye lu ai. Jinghpaw ahkying gaw mara kaba ai re majaw masat da ai aten 10:00 AM hta grai hpang hkrat na she rawt ai re. Ngai gaw mawdaw ntsa du ai hte yup pyaw mat ai. Makau kaw dung nga ai Hkau Shanglawt gaw James Bond a sumla hkrung yu nga ai.

 Ngai bai hprang na aten hpe yu dat yang hkying 11:15 AM rai taw sai. Gara de wa du taw sai kun? ngu na grupyin de yu dat yang gaw mi na shara kaw nan nan sha naw rai nga ahka! Tsun yang galu ai law. Swi - Tawm ngu ai speed hte Port Dickson de du mat sai ngu sa ga.

Port Dickson de du sai.
Kadai gaw kadai re ma re n chye ai. Gara shara de sa ra na re hpe mung n chye ai. San ga nga yang mung lit nga ai yawng mayawng mung grai ahkyak ai hku kyin nga ai chyu rai taw ai. Hkau Shanglawt wa tsun ai hku, o ra de sa dat, ndai de sit dat hte jahtum gaw hkik hkam ai shara langai lu saga ai. Ga ntsa kaw chyahtai sha nep rai na shingma taleng na shara lu sai. Bunghkum, nba ngu ai gaw gara de kun n chye sai. Aircon gaw ram ram katsi ai. Chyum laika buk, laika buk ni hpe bunghkum galaw, labu palawng nkau hpe nba shatai let 2 na yup 3 ya ngu ai port dickson hkrunlam hpe lai wa saga ai.

04 January, 2009

Blog kaw Virus kap ai lam

Hkau n bwi wa n dai zawng rai na dem da ai sumla hpe kadai hpe hkum madung nga sa ya ai she ngai kadai hpe n madun ai blog kaw   sha  mara da ya sai hku re :P :D
I found no problem with virus :)
 .......Takecare.....


Lahta na lam hpe gaw hkau Shanghtin ka da ya ai re.

Malaysia hkrun lam hte seng na laika ka na ngu yang she, blog gaw n mai hpaw taw ai. Lawu de na sumla hte maren pru wa ai. Hkau Shanglawt yen Shanghtin a hpaji jaw ga ni hte bai lu galaw la sai re. Lahkawng yen hpe chyeju kaba sai. Chyeju dum ai masat masa hku na num tsawm tsawm lu na matu akyu hpyi dat ya ai. :)

 
  
Daina tup gaw, ya jahpawt du ai ten du hkra dai virus hte amu kyin mat sai re. Aw .. virus galaw ai wa hte man hkrum ga shaga mayu ai law ...
Ngai na blog de sa chyai ai myitsu ni ma madu a jak hta antivirus lamang atsawm bang da na she sa na matu saw shaga dat ga ai. Hpa majaw byin ai hpe gaw n chye shi ai. Google de gaw laika naw sa na san na re.
Dai hte n myit mada ai sha, yup mung n lu mat ai. N lu yup ai a majaw gaw mahkawn madat dat, laika buk galam dat, masha ni a blog de hkan chyan yu dat re hte aten hpe jahtum nga nngai. 
Blog post nnan a matu mood gaw naw lakawn la ra nga ndai!!!

Yawng Ngwi Pyaw Nga Mu Ga Law...

02 January, 2009

12Voip, yup tung hte Hkau Shanghtin

3.Jan.2009

2.Jan.2009 jahpawt 5am hta Manila bai du ai. Hkau Shanglawt na blog ni hti, shi hte chat, chyeju dum ai lam ni tsun ngut na Malaysia hkrun lam a lam bai matut ka na hkyen nga yang ...

Karai Kasang gaw ... lamu ntsa na shaman chyeju ru jaw bun ya sai.

Kadun daw tsun ga nga yang, gtalk kaw na Hkau Shanghitn hte hkrum, shi kaw na VOIP lang na shachyen ya ai.

Dai hte rau, mahkawn shayi sha ni hpe sumtsaw ga tsun, aw chye ... shaga na matu account kaw 1 Euro bang ya ai. Dai hte phone kaw na number ni ja ji tam abram na shaga sai goi ...

Shaga tik tik... shaga dingyang... shaga ai... shaga ai... aten ni lai ai... lai ai... ya chyawm gaw manang ni mung bai shaga ai...

Malaysia hkrun lam daw IV hpe ka na ngu she, ya gaw yup tung lai, u pyi goi wa sai majaw ... daina she ... ka sa na ngu let ...

Hkau Shanghtin hpe grai chyeju kaba sai. Nang jaw ya ai new year kumhpa a majaw grai ma kabu ai hte chyeju dum ai lam tsun mayu ai. :)