29 September, 2009

Shata mung htum, Gumhpraw mung ???

29 September 2009

Aga! shata mung htum, lata kaw gumhpraw ngu na gaw .. um hummm ...

Raitim, le ya shata htum yang gaw shata shabrai lu na rai nga ai. Mana law, shata mi hta 24 ya ram amu galaw tim, masha ni mung hta lani mi galaw rai ram pyi n lu ai prat wa ...

N byin sai. Mungdan nnan she lawan gaw de ra sai. :P

Ya gaw kahti gari ngam ai gumhpraw lap achyap hte n lu blog yang n mai nga, kaji galim nga wa ai majaw sa blog dat sa.

Dai hpawt rawt ai shaloi baw nau n machyi na naw tsa mai ai.

Hpa majaw nga yang, hpa da aw? Ballentines nga kun? Scotch whiskey loi lu dat na. Maigan manam 2 hte mana tup ga shaga taw ai. N kam lu ai nga tim, kachyi mi gaw lu ra ia nga majaw, loi lu dat ai.

Tsa n lu ai majaw, grai myit su ai gaw hkum shadu yaw. Beer gaw lu ai le. :P

Chye machye, yes, no, OK, ngu ai English ga ni yawng shaga kau ngut ai hpang hkying 11 PM jan hta nta wa, soup sha, yup ra de shang ganaw yup, rawt, hka shin, blog ka, ya gaw.. Waimaw hkran de sa sa na.

25 September, 2009

Jan jawng gup ai nhtoi

25 September 2009

24.9.'09 shani kaang 1:00 PM ram hta lamu de grai nan laklai hkra htoi taw ai law... ngu sawn taw hkrup sai. Dai aten manang wa gaw, "E hkau, sa yu u... Aga! grai mau hpa re. Manu mana htoi taw ai. Jan jawng gup ai she rai nga ai." nga tsun ai.

Kaja nan lak lak lai lai grai nan htoi tu kabrim taw ai re. Ngai mung kalang ta, sumla dem la dat ai.


Ndai zawn ...



Ndai zawn ...



Grai kaba wa ai re.

Masha kaba ni gaw hkaw hkam lai na re ai kumla law, hpa law tsun taw nga ma ai. Nkau gaw n chye ai law. Grai kahtet wa na kumla rai nga ai ni mung tsun nga ai.

Hpa mi rai rai, ngai na matu gaw mau hpa langai rai mat ai. Kalang mung n mu ga ai majaw re.

23 September, 2009

Geis Gawdin hpung (Mare Hpung)

23 September 2009
Shanhte htawng taw nga ma ai. Gawdin hpe ...


Ja ji ja gang n-gun jaw nga ai Geis buga hpung masha ni...


Awng padang hte bai wa sai.

 
Geis Tsawm shayi ni ...



Awng padang lusha poi. Sut Du Dawshi Yaw Ba daw ai re. Myiset hte gaw anhte a sara kaba
Rev. Gunhtang La Myen re. Baw chyawp hte gaw Sut Du Dawshi Yaw Ba re.

 
Ndai awn... Maisak Wang kaw na Tsin Awng Lusha seng kaw ...



Ndai zawn ahkru sha dat sai. Dai chyaw lwidwi nsam gaw Nga Chyu jahkri re. Yogurt le. :D
Nbwisam mung grai lu sha ai jahpan kaw lawm ai. She rai goi. Geis ramma she re me. :D



Geis Gawdin Hpung

Ban Dawng hkrun lam kaw na sumla nkau

23 September 2009

Ban Dawng sa ai shaloi na sumla nkau mara dat ai. Mau hpa looo.. Karai a shaman chyeju hte daina chyawm me gaw sumla upload mai galaw nga ai. yahooooooooo


U Rawng Kawng mare



Hpa nampan kun n chye ai. Ban Dawng kaw na Slg. Nhkum Yaw nta kaw na re. Ngai gayet, ngai ra ai sumla ni. :D



Dem ai shara ni loi mi ra mat sam ai law. Nampan hpe hpring tup la kau yang grau kaja na zawn re ai re wa!



Yinam ta hta re majaw hkum pa panglai kaw hkawm sa ra ai. Dai Sengke hpe hkying hkum mi chyen kashin kau ra ai. 1500/s ks ang ai. Namsan Yang kaw re.



Namsan Yang mare kaw na ja maw. (Shingdu kaw na bum mayan na shara mi hta Du Jawng hpe mu lu na.)

Hkrun lam hkan na sumla nkau re. Htenza ai ni, pu tsawm ai ni mung tut e byin nga dingyang re. Madu lu ai masin hte madu hkam sha yu na matu yaw shada let ...

22 September, 2009

Ramma ni lang taw nga ai gasi nnan ni

22 September 2009

Ya na Ramma ni lang taw ai gasi nnan ni nkau re. Shara shagu lang ai kun gaw n chye ai. Dap Kawng Ramma ni, Geis Ramma ni gaw grai lang ma ai.

TTMY - Tawk To Mae Ya ေတာက္တိုမယ္ရ
WWDD -  Wam Wam Dam Dam
Studio - Si Htu Di Yu (Shat gawk shang, shat shadu ang ai hpe tsun ai re.)

Ndai kaw naw ram na. Ndai bat hta gasi nnan ni bai sharin da nna blog kaw bai mara ya na re.

21 September, 2009

2009 MKA Ginwang Gawdin Ninghkring Geis (Myitkyina Mare Hkalup Hpung)

21 September 2009

Daina maga hkying 4 PM n du shi ai kaw na kaju galim rai taw sai. Shi hpe gaw sa shaga ra ai hte... gawdin poi de gaw rau sa yu mayu ai hte.. raitim, shi gaw aten dep jawng kaw na n lu du wa ai majaw, ngai hkrai shingtai rai mat sai.

Shang wa ai chyinghka ntsa kaw na galoi ten wa shang wa kun? ngu masem yu let gawdin ginsup taw ai hpe pyi myit ai re n lawm kau sai. Raitim le, mahtai gaw ...

Geis 6 : 1 Emanuela (Gawdin Ninggang hpe Geis ni bai lu sai.) Maisak Wang kaw na Tsin Awng seng kaw ahkru sa sha la sai.

Shawng nnan numdaw hta gaw lahkawng maga atsam htum hkra shakut shaja wa sai. Geis ni shawng Goal 1 bang dat ai. Nau nna yang Emanuela ni bai Goal 1 bang dat ai. De hpang gaw Geis bai Goal 1 htawng bang dat ai. Dai kaw na gaw matut manoi Geis ni Goal htawng bang wa ai wa 6 kaw she hkring mat ai.

Ginsup nga ai lapran Emanuela ni hku nna Goal mai lu na masa grai pru wa sai raitim, ahkaw ahkang hpe n lu magra ai hte, gawdin hpe aten na na jum da ai a marang e mung grai sum machyi mat ai re.

Ya, daining hta gaw Geis gawdin hpung gaw sum ai lam kalang mung n nga ai sha Final de du wa ai hte poi shagu hta Goal 6 bang da ai re. Jam Ga hte poi shaloi Goal 5, Man Hkring hte Semi-final shaloi Goal 7 hta lai nna ngam ai poi yawng gaw Goal 6 ting bang da ai re.

Jahtum shiga;

Daina gawdin poi rai n ngut shi yang, Shi du wa nna sa yu lawm ai lam hpe mi yet sha phone set na chye lu sai. Arrr... Tsawm ra mi kabu sai. Hpa majaw nga yang, daini tup Shi hpe phone shaga shagu, Shi Kawa (Tsa) hte sha hkrum katut taw ai majaw re.

Chye ai n re i? Ah Ba Di a mahkawn le, " Na Wa a ta latup hpe mung hkrit ai" ...

Mayan de kahprup katup hkrun lam

21 September 2009

"Tsa chyaru grai lu ai ni hpe TSA YA ngu tsun yang ...
Tsaw ra myit hte grai chye ginsup hkau chyap ai ni hpe gaw TSAW YA ngu tsun ra na kun?"

Shana shat sha na matu hkoi ze hpe sha naw hta lang dat yang, phone ngoi pru wa ai. Manang langai shaga wa ai re. Shi hta grai nan ahkyak ai lam byin pru wa ai majaw, Mayan de chyeju hte naw hkan garum rit nga tsun ai.

Masa hpe maram yu yang gaw; shi a tsawra nja wa gaw dai Mayan kaw gin chyum chyat taw ai majaw re da. Nta de nhtang wa na mung yak, yup na matu mung nta de n tsun kau da. Kanu yen Kawa grai pawt na hpe mung dik hkra tsang taw sai re da. Dai majaw ...

125 Sengke kaw sau hpring hkra bang, sengke baw chyawp hta chyawp re nna rawt sai. Ngai na hkyep din gaw Japan hkyep din dingsa re majaw naw galai na nga tim, manang gaw rai sa nu ga law hkau e, nga nna rawt wa sai.

Nbung loi gaw yawm ai zawn nga tim, shana 7:18 PM ram rai taw sai majaw, mai na re law ngu na rawt wa sai.

Shaten ai looo... shaten ai ...

Ya, Myitkyina - Mogawng lam gaw moi na hte ram ram gaw shai mat sai. Grai gaw n rai tim le... Mahkrai nnan ni htam da ai majaw, moi na kattaya lam dingsa hku she shaten mat yang gaw hka de pyen shang mat na zawn she re.

Masat kumla (Sign) ni ma n madun da ai. Dai majaw shani kaang hkan n sa ga ai ni, shana hkawm yang gaw loi jamjau na masa nga ai. Lam galaw ai ni, ahkaw ahkang lu ai ni, hpa majaw ndai zawn re ai hpe sha pyi n galaw ya ai kun? ngu sawn hkrup ai. (Gai wa, ngai gaw hpa baw wa lu galaw ai zawn zawn!)

Ngu sa ga! Dai hku hte shaten bang mat yang ... Hka La Ya 260 ngu ai Gat shang yang loi lai re ai kaw sengke leng nbung yawm mat sai gaw. Tube baw mat sam ai. Dai kaw myit ru sai yaw. Shana gaw hkying 8:30 PM jan taw sai. Masa n hkrak ai aten rai yang she ...

Raitim, mile 5 ram sha re majaw, lagaw lam hte tim anut ga ngu nna "Myu hte Mungdan" a matu ma n raitim, Tsaw a matu (Ngai na gaw n re yaw.) yaw shada let lagaw lam hte bai anut wa sai re. Kawng ni, kadawng ni mung lagat lung kau ai. Sengke hpe gaw jak jasu da nna ganawng let le...

Dai hku hte jahtum e gaw, Mayan de du sai re.

Du yang she Stage Show rai taw ai. Pawt mayu si sai. Dai shayi sha (Manang wa a sumtsaw) mung pyaw lung pyaw lang nga taw ai she rai nga ai. Myit ru, pawt mayu, matsan dum, ka-un, Mau mahka...

Shan tsawra nja lahkawng mung dai kaw anyim anyam, tsit tsit tsawk tsawk, chyik chyik chyawk chyawk nga nna jahta hkat taw sai majaw ngai gaw headset sha shakap da, mahkawn sha hpaw da rai nhtawm ...

Karai Kasang a chyeju majaw, Yungwi ninghkring Labang Doi Wawm hte hkrum, shi hte shi kanau Sara Labang Htung Sau lajang ya ai majaw, yupra bunghkum machyu na matu n tsang ra mat ai. Atsawm sha yup hkring sa la nna dai hpawt 5 AM hta Myitkyina de bai lung wa ai. 6 AM jan kaw atsawm sha bai du sai. Praise the Lord.

PS(Du ai hte shi hpe phone shaga dat ai.)

19 September, 2009

Kabu ai nhtoi !!!

19 September 2009

Dai hpawt kaw na daini shani kaang hkying 2 jan du hkra, shi hte rau nga ai. Kabu ai. Grai kabu ai.

Jahpawt coffee hte muk, shani shat ma sha ai.

Grai kabu dik ai nhtoi re. Ndai zawn re ai nhtoi a matu Karai Kasang hpe grai chyeju dum dik sai.

Grai kabu ai.

18 September, 2009

Shagun laika hte seng nna hpyi nem ai lam

18 September 2009

Shawng na post hta Shagun laika ngu ai gabaw hte ngai na sara langai shagun dat ai laika hpe nye a blog hta mara dat ai.

Dai hte seng nna hpyi nem mayu ai hku re. Raitim mung, mying ni hpe gaw n shadan na sai.

Mabyin gaw ndai hku: ndai laika hpe ka ai wa gaw Sara langai re. Ndai laika hpe ngai hpang de sa ya ai wa gaw Sara langai re. Raitim mung, ngai gaw ahkang n hpyi ai sha nye a blog hta mara dat ai. Dai gaw shut kaba rai mat ai.

Dai shagun laika hpe ka ai wa gaw Thai kaw jawng lung nga ai Sara langai re. Dai laika hpe ngai hpang de email wa ai Sara gaw Yangung kaw na re. Dai hpe ngai gaw blog kaw mara dat ai.

Ngai hku nna mung hkan nang hkan sa ra ai rip kawp ni, tara ni hpe nyet kau ai zawn rai mat ai. Dai majaw, grai hpyi nem mayu nngai.

Ngai gaw ndai Virtual World hpe n gawn n sawn n galaw byin hkra grai sadi wa ai. Raitim, shut shai ra rawng ai lam ni mung nga wa ga sai.

Masha shada n mu hkat ai ngu nna kam mara galaw ai rai jang, Real world de mung akyang ni kap nang wa chye ai. Dai majaw, sadi ai.

Ngut nna, ya, anhte a ban prat hta gaw hpaji ni hparat ni chye ai ram daw law wa sai re. Ndai masha ni, ndai ban prat kaw na she Amyu kaba tai wa na lailen ni, htung tara ni, nga sat nga sa ni hpe n galaw da yang ... ??? Htawm hpang de na nang, ngai, anhte, Jinghpaw Wunpawng Amyu gaw gara madang kaw sa tsap taw na kun? ngu ma sawn hkrup ai.

Ya na zawn shadum ya ai Thai kaw na Sara hpe ma grai chyeju dum sai.

Ndai lam ni gaw lani mi hta anhte ni byin hkrum hkra wa na lam ni sha re. Tau chye na hkra shakut hkaja da ging nga ai.

Ndai laika gaw hkum tsup ai n re. Nye a laika ka ai madang n kung kyang shi ai majaw ra rawng ai ni nga yang mara raw ya rit. Anhte ni yawng ma Ethics hte seng nna mung chye hkra, hkawn hkra hkaja da ga ngu...

Grai hpyi nem ai myit hte ...

Nbwisam

11 September, 2009

Shagun laika ...

11 September 2009

Ndai laika gaw ngai na Sara mung rai, Kahpu zawn mung rai re ai wa shagun dat ai laika re. Ngai hkrai ngai hti yu, sumru yu, hkam sha yu nga ai.

Lai wa sai aten ni hta, Sara hte rau ngai ma dai zawn re grai hkrum sha lai wa sai. Shat kan manghkang ni, bus fare n nga na lagaw lam Computer training sa ai lam ni, shat sha na n nga ai majaw, Awng Myae Thar Zi housing kaw na Bahan shanglawt nta de lagaw lam hkawm let shat sa sha ai lam ni ... (ngut jang gaw Shanglawt hpung hpe bai shatan!)

Aw ... Mali hka makau hta, ga shagawp ni rau hti chyai, gawp chyai wa ai lam ni ... ni ...

Myu a matu, Mung a matu ngu na ja ji ja gang bawng ban jahta wa ai lam ni ...

Laika buk sha mari na ngu dawdan let, Myitkyina shana gat kaw na dumsu shan soup hte shat makai sha let, shalai kau ai nhtoi ni...

Geis (Myitkyina Mare Hkalup Hpung) hta laika dum byin tai wa hkra aging shakut wa sai lam ni ...

Lam shagu hta, sharin achyin ya, lam madun ya, myi jahpaw ya ai sara hpe grai chyeju dum ai law.

Hpa mi raitim, kaning ma byin byin, lani mi na aten hta MUNGDAN ngu ai shingran pra wa lu na matu ngai mung hkawm nga dingyang re, sara e... ... ...

Lawu de na gaw Sara shagun dat ai hku copy paste galaw da ai re.

..................................................................

De,
kanau ni hpang de

Dai hpawt gaw jau jau rawt ai. jahpawt jau jau gaw nshung sama ni mung lu sai.
nshung pyi manga lang rai wa nga sai. grai wa mayu sai. Buga de..shangut ra ai bungli ni lawan lu shangut mayu sai.
prat a aten ladaw langai hpe YG ga kaw ramdaw wa mi nga kau sai hku rai sai.
ndai nshung sama ni hte u kasha ni chyip e chyap e nga ngoi ai hpe na dat ai hte ngai Yangon ga nga ai grai na mat sai hpe dum ai.

ndai gaw hkam sha lam amyu mi bai yaw
nye a hkum hkrang hta organ wa tai ai ni hpe mugn kalang lang gaw matsan dum ai


shat kan mung e lani mi hta kajawg kaja kalang mi sha nachying hte bang dat ya

nye a sin mung e ngai lu bang dat ai tsa hte beer hpe glucose shadu ba taw na masai

nye a myi mung e ngai hti mayu ai ni law ai majaw she ntsu dum taw sana. kaja ai lam hpe sha mu mayu ai rai tim baw nu wa n-hkap la nga ai

nye a sinwawp gaw wanhkut ni hpe nbung shadu taw sai da yaw

nye a wukam ni mung ja la ai kunti ni tsawmra kawa mani ra ai majaw htum ai baw she rai taw gaw...

nye a na mung masha ni nye a lam hpe Na, Mu, Chye ai daram hpe Kaba la n-na tsun ai hkrai na mat sai
malawng na ai gasi ga ngau ni mung ali ahti hkrai nga ai baw law ai majaw process galaw ai ten bawnu hpe tau nshana gwi ai ten ni grai law mat na sai

nye a bawnu chyawm me matut nna grai naw processing galaw na matu shajin nga a dawng

nye a ta layung ni mung computer keyboard wa shanhte a sumtsaw zawn nga taw na masai

nye a lagaw hte hkum chyawm me shanhte shamawt ging ai daram nlu shamawt ai majaw ngai hpe she n matsa nga ma dawng

nye a shinglet mung ngai kaji ai ten sha wa ai malu masha ni hpe marit dik la masai da

nye a salum mung masha ni a n-tsa law law chye na ya na lam sha aten shagu shadum nga sai
bai masha kaga n-tsa jam jau n-jaw ai baw tsaw ra myit she hkrang shapraw nga masai..


Raitim
Kyu hpyi shagu gaw God ngai hpe hpa ra sharawng ai hpe sha ngai hpyi nga sai....
Hpu Gun
..................................................................

09 September, 2009

N-gu buk lahkawng hte law na i?

9 September 2009

N-gu buk lahkawng rai jang masha marai 5 kade ya lu sha na ta?

Ndai zawn sawn taw ai dinghku ni kade wa law na ta? Yawng she n rai na. Htawt ai ni gaw htawt. Hprawng ai ni gaw hprawng. Sit ai ni gaw sit.

Hkrum katut ga sai ni yawng gaw n kam sai. Raitim le, gara hku me n chye di nga ai gaw!

Zim mat zam mat ai wa akajang akaja wa re. N-gu manu ni grai lung mat ai.

Shinggan kaw na ni mung, maru marang wu chyu wu na malai gaw, akyu rawng ai lam de shakut ya ai grau kaja ai. Hpaji jaw ai gaw kachyi mi, kam mara tsun bun ai gaw law law.

Gai, sa ya marit le. Tsi mawan ni, lusha ni, arung arai ni, gumhpraw ni???

E le, hpa mi n lu garum tim, akyu gaw hpyi garum ya marit le.

Umm.. N-gu buk lahkawng hte law na kun? Lama na, byin wa yang le ... ???

05 September, 2009

Majan + Mabyin = Mahtai

5 September 2009

Aten ni hpe lawan ai hku shalai kau mayu ai.
Mahtai langai hpe ala dingda taw ai wa, grai pu taw sai.

Apu apa atsu atsa re ai.
Nshu nshang kaju galim ayak ahkak hkam sha taw ai.

Hpa mi byin byin, Karai Kasang e, anhte hpe hkum kabai da et!

Nang Wa lata da hkrum sai Jinghpaw Wunpawng amyu sha ni hpe matsan dum rit.

Mungdan ngu ai shaman chyeju, tut nawng ngang grin ai sali wunli jaw ya rit. Mungkan ntsa Nang Wa hpung shingkang dan dawng wa na lam hta anhte Myu Wunpawng sha ni hpe mung jai lang rit.

Gasat ai majan shagu mung, Nang Wa bau sin makawp maga ya rit. Padang dip lu ai amyu tai shangun rit.

Wa Karai e, Jinghpaw Wunpawng amyu sha ni hpe roi rip ai, dagam dala ai, zingri zingrat ai amyu ni, manu mana bai roi rip hkrum u ga, dagam dala hkrum u ga, zingri zingrat hkrum u ga.

04 September, 2009

Salum na sai ni rawt ai.

4 September 2009

Salum sai ni rawt ai.

Dai shiga na ai,
salum sai ni rawt ai.

Dai nsen na ai,
salum sai ni rawt ai.

Dai sumla ni mu ai,
salum sai ni rawt ai.

Sat, nat, gap, zingri
shiga ni na ai.
Salum sai ni rawt ai.

Yawn hkyen nsen,
Kabu aw law nsen,
ung ang ai nsen ni na ai.
Salum sai ni rawt ai.

Shingnoi hta ju hpun ni bang let
angwi sha hkawm wa ai Ah Dwi ni hpe mu ai.
Ma kasha ni hpe mu ai.
Salum sai ni rawt ai.

Tsi jawng n lung tim,
Tsi atsawm chye htu ai ni hpe mu ai.
Salum sai ni rawt ai.

Manu dara ai nsen ni na ai.
Mani sumsai, ahtik ahtawk
ha ha hi hi nsen ni na ai.
Salum sai ni rawt ai.

Ningbaw kata ai.
Lasha kase ai.
Myit ni grit ai.
Salum sai ni rawt ai.

Hkrit tsang samwi ni galoi she hkoi na.
Gawngkya laru ni galoi zim na.

Magrau grang ai lam ni kalang bai paw pru na kun?
Hpaji hte da da ai Jinghpaw maka galoi dan hkung na?
Sut hte wunli bungshi ni galoi sa apup na?

Salum sai ni rawt ai.
Nye Salum sai ni rawt ai.

01 September, 2009

Ah Ba Di, Jan Pan VCD Pru sai

2 Sept 2009

Ah Ba Di hte Jan Pan (Blast) ni a VCD pru sai re.

Ab Ba Di VCD hpe gaw nye kanau mari sai majaw ngai gaw Jan Pan mari dat ai.

Gayet da ai lam ni gaw nau wa myit dik na zawn n hkam sha ai. Raitim, shi hte shi gaw hkrak nga ai.

Jan Pan a Bum Tsaw Shayi hta gaw Shayi Sabaw Hkawn Ja Awng hkrang shala da ai re. Aga ga! Dai mahkawn hte dai tsawm shayi sha gaw ya grai mying gumhkawng taw ai.

Sumla mara mayu tim, n mai ai majaw ... Pru sai lam shana dat ga ai rai...

Katsi katsang Myitkyina VI

2 September 2009

Myitkyina gaw hkyen hkrat ai zawn katsi mat ai ... bat mi jan ting! Yawng yawng gaw hkyen ai hte, lajang ai hte ... shi hte shi gaw shuk ai shak ai...

Manu ni loi li lung ai. Laiza sa ai masha shau mat ai.

Wan jahkring hkring hten ai.

Aten shagu shiga hpe maja ra taw ai.

Mawdaw sengke accident grai byin ai. Mana gaw Post Office makau kaw, 125 hte Tina sengke hte ... Daini kaang gaw Myothit Aten shadaw (Na Yi Sin) kaw ...

Kani ya ni grai law wa ai shiga na lu ai. Tsi htu samyit ni grai garan hkawm taw ai NGO staffs ni hpe mu ai majaw re.

Bat lahkawng daram, ninghkaw jan hpe n mu mat ai. Jan pru wa ai nhtoi hta nga manga palawng hte jean labu ni hkrut dat ai wa... jahpawt 4 AM ram hta marang wa htu bun dat ya na yawng bai madi mat ai. :(

Myit shuk ai. Aten tup hkrit tsang taw ai.

Dai hta, Salum masa gaw ram daw hkrak wa ai... heehee (blind ndau ai le..)