My Knok Buk hte Shachyen ya mayu ai.

25 February 2009

Lai wa sai bat 2 jan ting gaw Davao ngu ai mare kaw sa nga ai re.

Dai Davao ngu ai mare hta nau nna shi ai aten hta gaw Jinghpaw ni grai nga lai wa nhtawm hpaji sharin la lai wa sai re. Ya aten hta gaw Jinghpaw langai sha nga taw ai lam chye lu ai. Kade nga ai kun gaw tup hkrak n chye nga ai.

Shi gaw jawng lung taw ai re. Ndai gaw shi a blog hkringdat re.

http://myknokbuk.blogspot.com

Sa chyai yu ga. Ingalik laika hte sha ka da ai re. Ngai chyawm me gaw grai shakut na hti ra ai. Ya hpang de gaw Jinghpaw hku mung ka wa na re ngu myit mada ai. Sa du shakram let, matut mahkai hkat ga ngu shachyen dat nngai.

ILBC Computer Basic Training hte Wunpawng Ninggawn Hkumra Manau Poi Kaba ... Daw II

25 February 2009

Bonus: Sumla hta grai ngaw de ai nbwisam hpe mu lu na.

"Hey, Ma Awng, dai hkra de laika hti dat yu! hkra de, hkra maga de ! "

Lagaw leng sin masha ra ai.
Matut mahkai na hkringdat;
*** ****** Company
No ***, Hpyi ai dik gawkngu makau
Njang kawng, Myitkyina.
Ph; 074-*****

Anhte gaw gard htu ngu shaga ai maisau pa htat htat re kaw adan aleng ka shakap da nga ai. Hpu Doi gaw atsawm sha sa matsing la taw ai.

"Saw... dai de sa yu ga"
"Hpa sa di na ma law ..."

"Bungli sa san yu ga le..."
"N kam ai law ... gaya kahpa ..."

"Gai law ... sha hkan nang ya rit ..."
"E taw ..."

***** ***** *****

Hkringdat hte maren tam dat yang ramma ni loi chyawm re taw ai wut dek nta htap lahkawng re hpe mu sai. Loi mi san sagawn dat yang gaw shanhte ni ma lagaw leng sin na matu amu sa shawk ai re lam chye lu ai. Malawng gaw Shatapru kaw na ramma ni law ai. Pammati hte Sam mare hkan na Sam ni, Yanggyi Awng hkan na Myen nkau ma lawm ai.

Raitim mung, dai shani hta amu n mai shawk ai. Amu shawk na nhtoi masat da ya ai re. Dai nta shawng kaw gaw saboi langai mi hte sang lang dan nga ai company a mugun masha nkau dung nga ma ai.

Hpu Doi gaw nden ja ai shadang sha langai re majaw shawng de sit nhtawm "ndai lagaw leng sin na hte seng na san mayu na re."

"Aw ... lagaw leng sin na matu rai jang gaw bat masum ya shani bai sa rit yaw. Dai shaloi hkap la na re." sumsai myiman hte tsawm htap ai shayi sha langai mi htai ya ai. Jawng num rai nhtawm dai aten hta mying kaba ai tsawm shayi langai re lam chye lu ai. Hpang de matut chye ai gaw, dai aten hta tsang 9 jawng num sha naw re lam ma chye lu ai.

"Amu galaw ai shabrai gaw kade jaw na re kun?"
"Ya aten hta, lap 20,000 ngu masat da ai re ... Hkau wa ..." rau dung nga ai ramma shadang sha langai gaw tsun ai.
"Bungli shawk na rai jang bat masum ya shani bai sa wa rit yaw ..." ngu nna shi sha bai kahtap tsun ai.

***** ***** *****

"Gara hku law ... Ma Awng ..."
"Hpa ma"

"Bungli shawk na matu le ..."
"Lagaw leng sin na matu i? N kam ai law ... gaya kahpa ..."

"Hpa gaya ra ai ma law e, masha arai lagu lagut ai amu mung n rai ..."
" N kam ai law ... ngai n wam ai."

"Atsawm myit yu u lu. Lap 20,000 re. 8 ya amu galaw ai hte lu na. Dai gumhpraw lu jang nang lung mayu ai Computer hpaji mung mai sharin na rai nga ai le..."
"Arrr... n gwi ai law ... ngai gaya ai..."

Bai matut na ...

Dung nga ai wa

25 February 2009

Azim sha dung nga ai wa ...
Ga shaga let dung nga ai wa ...

Myi le le hte dung nga ai wa ...
Yup nga let dung nga ai wa ...

Laika hti let dung nga ai wa ...
Sumla yu let dung nga ai wa ...

Sawn dinglik let dung nga ai wa ...
Amu galaw let dung nga ai wa ...

Shatan let dung nga ai wa ...
Bawngban let dung nga ai wa ...

Beer lu let dung nga ai wa ...
Hpang gara let dung nga ai wa ...

Dung nga ai masha grai law ai ...
Dung ai bung tim, n bung nga ndai !

Manila bai wa ai hkrun lam hte Shangri La Hotel

24 February 2009

 

Sumla: google images search

Davao mare kaw na shana maga hkying 5 ram kaw rai yawng baw, gawk jep joi na matu zaw ap na, yawng ngut ai hte nbungli pa de yawng wa sai. (Yawng ngu ai gaw sa wa ai hpe tsun ai. Sam mung ga na ni gaw n lang sam ai. Jinghpaw mung kaw na ni she lang sam ai.)

Moi gaw nbungli ngu ai lu jawn na matu yak yak dik ai wa ... ndai zinlawng mungdan kaw gaw nbungli hte sha hkawm sa ra mat sai.  Mying kaba ai hte manu hkyem sa ai gaw Cebu Pacific re.

Nbungli ntsa kaw hkuwat makau kaw shara hpyi da ai majaw lu ai. Dai kaw dung nga yang makau kaw ma, o ra hkran de ma gaw tsawm htum shayi ni sa dung ma ai. Tsawm htum shayi ngu ai gaw tsawm ai htum mat ai hpe tsun ai.

Asak gaw 60 ning jan hkrai, make up gaw manu mana htap la ai. Kadai wa kun Durian si la wa ai majaw loi manam taw ai. Dai majaw nye makau na dinggai gaw manam pyaw ai sama ni arut nhtawm tissue hte ladi hpe pat let aten tup ga shaga nga ai.

Jahtum gaw Metro Manila ngu ai masha wan 15 daram (2008 estimate census) shanu nga ai mare de du wa sai. Buhkawm masha ni yawng yu mat sai. Tsawm htum shayi ni gaw masha chyat ai majaw jahkring la na shaga ga ai wa ... ngai hpe pyi n yen ya hkra hkra ...

Makau kaw na tsawm htum shayi wa din da ai hkyepdin masen (dok hpyen din) mung nye a magyi de jahkring hkring sa a hkret !

Shanhte yen ya yang she ngai mung lu pru ni ai. Kadai n nga sai. Nbungli kaw na jahtum yu ai gaw ngai sha rai sa. Raitim le, tsawm shayi pyen li shayi wa a sumsai nsam hte rau, aten loi na hkra shaga nsen ni hte rau gaw ... huu ... ka-un mayu ai ni yawng hkoi mat ni ai. :P

Nbungli daru shinggan kaw dung, sa tau ai mawdaw gaw bai n du. Tsun da ai aten hta minute 20 jan hpang hkrat na du wa ai. Nta bai du sa. Du ai hte Myitkyina kaw na manang wa, Manila du taw ai nga phone shang wa ai.

Shi manam ai gaw Manila hta grai hkik hkam ai manam jarawp, Shangri La hotel !
Aga ! sa jahkrum rit nga na sa sai. kalang ta jang yup na hkyen kau nu ai.

 

Sumla: google images search

Nu wei ! Asha dan madang hte gaw ram ram manu laja ai she rai nga ... Lana mi matu $ 220 ting jaw ra ai. Raitim le... ya chyawm me gaw o ra hta jum dat, ndai hkra yu dat hte nbwisam langai mau kabu taw nga ai lam ...

(Hpawtde chyawm me gaw rung bai sa ra sai. :( ... )

Valkyrie

22 February 2009

Sumla hpe ndai kaw na la ai. Link

Daina gaw sumla hkrung sa yu ai.
Germany mungdan hta 1944 September shata hta mungdan a daju Adlof Hitler hpe mayun sat nhtawm mungdan a masa hpe galai shai na matu shakut wa ai, teng sha byin wa ai mabyin hpe mahta let dem da ai sumla hkrung re.

Magam bungli kaba galaw yang masha gaw n bung hkat ai majaw - ung ang ai lam ni, n dawdan gwi ai lam ni hte myit lawm hpa labau leng langai hpe mu mada lu nga ai.

Tom Cruise shanglawm hkrang shala da ai sumla hkrung re.

VALKYRIE nga ai. Ndai operation hpe yu hkrup ai hte rau, hpyen masa doctrine hpring chyat taw ai nye bawnu hte amyu sha shinlam matu mung myit yu sawn yu hkrup nga ai.

Tara rap ra ai, shanglawt ai mungdan lu na matu asak ap nawng mat ai mung shawa, hpyen num, hpyen la ni yawng hpe mung tut dum shakawn nga ai.

Nsen gara hku pru ai re hpe atsawm n chye sai. Kam ai hku tim pru manu law ... German mungdan hta du nga ai Jinghpaw ni gaw she n chye pru na.

Aten lu yang gaw yu ging ai sumla hkrung langai re lam shana dat mayu ai.

Mindanao zinlawng

18 February 2009

 

Sumla: Google Earth

Hti pyaw na gaw n shadu ai. Ayai aya re majaw ...
Mindanao zinlawng gaw Philippines mungdan hta Luzon zinlawng ngut jang kaba dik ai zinlawng re. Mindanao zinlawng hpe Mindanaw ngu ma shaga ai.

Asha dan a lusha ka tawng ngu na shakawn lai wa sai zinlawng re. Food basket of Asia ngu tsun wa ma sai. Ndai zinlawng hta nhprang sut rai yawng hkum ai. Lamu ga sau kaja ai. Matut mahkai na matu hkrak ai. Lam shagu hta grai htuk manu ai masa nga ai.

Asha dan hta Ja (gold) hpe lu tam dik ai shara langai re. Ja htu ai majaw lamu ga grai hten za taw nga ai shara ma re.Maisak grai law wa ai shara re. Ya gaw tsam mari tam yu na pyi n nga mat ai daram rai mat sai. Philippines a tsaw dik ai bum Mount Apo nga ai.

IP ngu ai Indigenous People amyu hpan 110 nga ai. Masha jahpan hku rai jang gaw Philippines mungdan ting hta wan 11 ram nga ai. Mindanao hta gaw kade nga ai kun n chye ai.

Dai IP ngu ai hpe Lumad ngu ma shaga ai. Lumad ni hta Buga hta hkan na Duwa ni nga ai. Shanhte a Duwa hpe Datu ngu shaga ai. Tsun shaga ai ga ni gaw buga hta hkan na loi li shai ai. Nkau gaw ni htep na chye na tim, tsan gang ai ni gaw n chye na hkat ma ai.

Ya chyawm gaw yawng a zinwa ga hku na (Visayan) ga hpe lang ai.

 Mindanao zinlawng a sinna daw hte dingda daw de gaw Moro ngu ai amyu sha ni nga ai law ai. Shanhte a ningbaw hpe gaw Sultan ngu shamying ai. Hpang de gaw Buga Jauman masha IP ni hpe hkan nna Datu ngu na mung shamying wa ma ai.

Ya aten hta, Mindanao zinlawng gaw shara chyen mi daram majan pa rai taw ai. Majan gaw jahkring mi bai hkring mat sai.

Mindanao zinlawng hta ya aten nga taw ai laknak lang hpung ni ...

MNLF - Moro National Libration Front (Shawng nna GRP hpe rawt malan ai wuhpung re. 1996 hta gap hkat jahkring na saboi ntsa kaw bawngban taw ai. MOA-AD in 1996)

MILF - Moro Islamic Libration Front (MNLF kaw na garan pru let gap hkat taw ai wa re. Ya aten hta jahkring gan jahkring da ma ai.)

NPA - New People Army (Communist Party Philippines na hpyen dap re). Ya aten hta RPMM zawn re ai garan pru ai ni ma nga tim, NPA ram n-gun n ja ai.

AFP - Arm Forces Philippines (GRP ngu ai Government of Republic of the Philippines a hpyen dap)

Abu Sayyaf - Maigan masha ni hpe rim na gumhpraw hpyi sha ai wuhpung re. Kaja nga yang gaw ndai wuhpung hpe CIA ni gaw de da ya ai re nga ai. Hpa baw majaw hpe gaw tup hkrak ngai n chye ai. Ya aten gaw dai wuhpung kata hta mung garan taw nna kam ai dap kaw na kam ai hku masha rim, gumhpraw hpyi rai nga ma ai.

Laksan shiga;
Dingdung sinpraw de gaw Miwa company ni mining (ja maw ni, magri maw ni) aging galaw ai re. Ya hpang de gaw lamu ga hte nawng sanghpaw cargo kaw bang let Miwa mung de she htaw mat ai. Miwa mung kaw she ja tam, magri tam ai lam galaw ma ai.

Philippines asuya hpe gaw lamu ga manu hkanse (tax) sha jaw na la mat ai re. Dai majaw "nang daina yup na jahpawt rawt jang Hong Kong mare hpe mau hpa mu lu na re ngu" mani hpa shachyoi ma ai. Asuya gaw hpa n galaw ai i? ngu san hpa re. Dai gaw Gumsan magam Arroyo a majaw rai nga ai.

Mining a majaw lamu ga grai hten za ai hte Mercury ni nau lang na buga masha ni grai jamjau nga ma ai.

Ndai kaw gan hkring na.

Bukidnon hkrunlam

16 February 2009

Bukidnon ngu ai de du da ai. Mindanao zinlawng kaw na gaiwang langai re. Ngut nna ndai zinlawng gaw manghkang grai byin taw ai shara re. Labau gaw grai sung ai.

Moro ngu ai Muslim ni, Lumad ngu ai buga masha ni hte Settlers ngu ai buhtawt wa ai Hkristan (Roman Catholic) ni lapran na manghkang re. Dai mabyin nkau hpe hkaja lu na hte hpaji jaw lu na matu ndai hkrunlam byin pru wa ai re.

Ndai gaw San Nicolas ngu ai mare grupyin de hkawm ai shaloi re. Nta ni gaw kachyi sha law ai ginsum ni sha re.  Hpa majaw ta? Lamu ga dai ram kaba ninglen, hpun kawa ni she kran n htum hkra law ninglen, nta ni gaw kachyi sha law...

Mabyin gaw ndai masha ni gaw IDPs ngu ai ni rai nga ai. Ndai shara ni gaw nau nna shi ai aten du hkra majan pa ni re.

Nta kasha ndai kaw masha 6 yup ai. Nta kata kaw hpa baw nga ai? M-16, sinat kadun nkau hte hpyen arung arai ni, nhtu ni, di hkawan nkau nga ma ai.

Sinuda ngu ai mare de bai sa ai shaloi gaw dai mare kaw na Datu ni yawng hte hkrum shaga lu sai. Nkau gaw English ga chye shaga ma ai. Datu ngu ai gaw Duwa hpe tsun mayu ai. Sinuda mare shingwang gaw hectare 1002000334 kaba ai mare re.

Ndai gaw kaba dik ai Datu a asak sin masha re.

 

M-16 ngu ai hpe ya she myi hte chyaw mu ga sai. Shanhte na sinat yawng gaw laisin nga ai ni hkrai re.  Baw chyawp n chyawp da ai wa gaw dakkasu jawngma re. Jawng hpaw ten mare kaba de sa na jawng sa lung ai. Shi a sinat hta lens lawm ai. Sniper training ni ngut da ai wa re.

Ndai kaw naw hkring na. Hpang na post hta gaw Mindanao ngu ai zinlawng lam loi lu ka hkra shakut na re.

ILBC Computer Basic Training hte Wupawng Ninggawn Hkumra Manau Poi kaba

 13 February 2009

(Myit dum shingran daw chyen ni...)

Nyek nyek nga na sau atsawm n bang da ai lagaw leng chain sumri nsen hte rau "gat gat gat gat" nga na lakap ginsup ai zawn lawu hte lahta na wa shada gayet hkat taw ai la kasha langai!

Wuyang lagaw leng ahkyeng, Jinghpaw nhpye hte rau n-gun shadat na gabye let shi myi kaw mun hta sa noi taw ai nshung numri ni hpe lata hte a lawan katsut kau dat ai. Garu kachyi nsen ni hte Shatapru manau wang hpe shingdu tawn let, dum nta de wa taw ai re.

Aten gaw 2:45 AM, December 29, 2001 ning

***** ***** *****

Mogawng kaw na kahpu Doi ang ai wa Gumsan Awng a nta de du wa ai.
"Hey, Ma Awng, ILBC kaw Computer Basic training hpaw na da." Hpu Doi gaw Gumsan Awng hpe Ma Awng ngu shaga ga re ai.
"Re i? Shata shabrai gaw kade re da?" Myit grai lawm let, san dat ai.

"15000 da. Shata 2 sharin na re da. January shata ka-ang kaw na hpang na da."
"Aga! ngai grai lung mayu sai law. Ah Nu hpe gara hku tsun na kun?"

"E le, 15000 ting ting re majaw ngai ma tsun na n wam taw nga ai." Hpu Doi gaw nsen nya nya hte tsun ai.
"Hey, saw law... Shatapru de sa na Manau poi hkyen lajang taw ai ni sa yu ga." Hpu Doi sha kahtap tsun ai.

"Gaw mai na i? Dai Shatapru kaw na ni gaw masha hkan adup na sha chye ai gaw. Moi ya ma nye manang hpe hkap jahkring na tsa jahpu atik anang hpyi ai re."
"Raitim, ya gaw masha grai law ai gaw! Poi galaw na ma she re me... Saw, sa yu ga."

***** ***** *****

Kalang mung n mu ga ai Manau wang zawn rai mat ai. Mawn sumli taw ai ni gaw kaja nan hkik hkam nga ai.
Teng sha nga yang Gumsan Awng gaw Malinmai zup pyi n du ga shi ai re. Tsang shi awng mat sat raitim. Karing Naw Sa-ra de gaw kalang du ga ai.

Mawdaw nau n mu ga wa ai majaw mawdaw jawn shagu madawn ai re. Gara de sa shagu, kade ma ni kahtep tim mawdaw ntsa kaw rai jang gaw madawn na matu plastic ngu ai sawk sawk soi hpe shawng tam da ra ai.

Manau wang kata lam hkawm let yu chyai nga yang ...
"Hey! Awng Doi, gara kaw na dam pru wa ai." Hpu Doi a manang Htu Ra gaw an lahkawng shawng kaw sa tsap let shaga wa ai.

"Akoi, nang gara hku du wa ai ma?" Hpu Doi gaw san ai. Htu Ra hte Hpu Doi gaw Mogawng de na re.
"Anhte Mogawng Nat Kyi Kung ni kaw na gat sa dut ai le. Shat, hkausoi, shanju, katsi hpa, beer yawng re. Sa mari n-gun jaw u yaw. Anhta Htingnai shada da, laga de hkum sa sha law. Nye ta latup katut sha na."

(Bai matut na ...)

Computer hte Sinat ... Jahtum daw

12 February 2009

 

Sumla: Ryan Libre

Shana tup manang ni hpe laika ka ai. Manang ni ngu ai gaw Myen mung ting na re. Gumsan Awng hta kanawn manang wa nau n law tim, laika manang (Pen friend or Panpal) ngu ai manang ni gaw grai law nga ai. Shani shagu laika sa ai rung de du ai re. Laika sa ai rung kaw na num ni pyi, nang gaw wut dek nta pyi mai shachyawm sai yaw nga shala ma ai. Shi Kanu mung dai zawn tsun ai. Laika langai sa yang dazik shakap ra ai gaw lap 7 re majaw, gumhpraw hku gaw lap 10 ang ai.

Shana tup n lu yup ai. Yupra ntsa o ra de gayin, ndai de sit re hte rai taw ai. Wan hkret hkret na wan shadaw nan dat, laika hti dat, bai galeng dat hte n ji n mu rai bu nga ai. Shana shagu dai zawn hte bat mi daram shalai kau sai. N lu dawdan hkraw ai.

Dai bat mi laman, shani hta gaw Tu hte rau gat shang yang, namti, nbrawyang, mayan, nawng nang ni hte laga shara law law wa sa na jahpan sa la ai.


*****    ******    ******

N mai yup ai. Myit ai. Myit ai. Sumru ai. Laika pa kaw ka jahkrat ai.
"Ngai si na hkrit ai i?" Ngai Du jawng sa yang kaja na i?
Dai de sa na hpa baw lu galaw na? Shinggan kaw nga na hpa baw lu galaw na?
Nu hte kanau hpe mung yu ra nga ai.
Nang myu hpe n tsaw ai i?
Dai hta myu tsaw myit ngu ai hpa ta?
Majan poi gasat jang she myu hpe tsaw ra makawp maga ai i?
Ngai shanglawt de shang mat jang Nu hte kanau hpe kadai yu na?
Shadang sha alat ngai langai sha nga ai.

Myit sumru ai lam ni yawng gaw mahtai atsawm n pru ai sha nhtoi de chyu du mat ai shana law law rai nga ai.

Jahtum de gaw, ndai ga san lahkawng hpe sha Gumsan Awng laika pa kaw ka jahkrat na madu hkum madu san sai re.

SINAT HPAI LET MYU TSAW NA I?
COMPUTER HTE MYU TSAW NA I?

*****    ******    ******

"Awng, nang ya gara hku myit da sai rai?"
"Ngai daina naw myit na re Ah Nu." Gumsan Awng Kanu hpe bai tsun let, hkrut ra ai palawng ni hpe sha sawp bawp hte anut kashin nga ai.

Labu Palawng ni hpe baw taw let, jawng lung ten dem da ai sumla ni hpe marit maroi bai yu nga ai. Dum ai. Grau nna gaw dakkasu jawng de hpaw ai ten kaw na arau sa ai manang 3 hpe ma grau dum ai. Grau nna gaw shayi sha langai hpe rai nga ai.

Gumsan Awng a shingran hta na shayi sha re. Salum a shayi ma rai nga ai.

Dai hte rau, Wara Bum ntsa hta lamu she chying hkra ngoi kadu nga ai Jawngma ni a nsen hpe ma bai shingran mu wa ai. Ningpawt ninghpang hpyen hpaji hte ramma ni chye ging ai lam, shanglawt a masa mung gat hkai let hpaw ai lamang rai nga ai. Amyu sha lamyan hpe ma sharin ya ai majaw grai akyu rawng nga ai. EEDY ngu ai mying hte re. 45 ya sharin ai lamang hta 20 ya daram hpang hkrat tim, Gumsan Awng hpaji grai lu la ai shara rai nga ai.

Kalang ta mung, nam mare kahtawng shara shagu hkan na Jinghpaw ma ni hpe Computer sharin ya taw ai Gumsan Awng a shingran hpe ma mu wa ai. Computer ngu ai Type writer hte TV ginchyum da ai re ngu na myi hta mu hkra tsun sang lang ra ai mung mayak amyu mi rai nga ai.

Gumsan Awng a salum hpe hkra ai mahkawn langai ngoi pru wa ai. Kanau hpaw dat sam ai. Ah Tang ka ai "Ngai Jawng sara" ngu ai mahkawn re.
N dawdan gwi, ung ang taw ai masin hpe n-gun da ting nhtawm, Gumsan Awng langai dawdan dat sai.

***** ***** *****

"Tu, Ngai nang hte rau Woi chyai bum de ya n lu hkan sai. Lani mi na aten masa htuk jang gaw dai de sa wa na re. Sa chyai ai mi rai rai, sa du shang lawm ai mi rai rai, ngai sa wa na."
"Aw..." Mau mat ai myiman hte Tu gaw bai htan ai.

"Ngai hpawtde Mungywa de janmau sa la sa na. Dai ngut jang Yangung de yu na Computer sa sharin na re."

Jahkring mi daram yawng zim mat nga ai.

"Ngai nang hpe grai myit mada let sa shaga wa ai. Ahkang lu ai 14 ya kaw na 11 ya ting ram nang hpe sha shani shagu sa shaga ai." "Ya nang grau kaja na matu dawdan ai re ngu kam ai."

"Tu e, jai lang ai ladat hte hkawm sa ai hkrunlam n bung tim, pandung bung ai majaw nau nna ai aten hta bai hkrum na re ngu kam ai."

***** ***** *****

Pru na matu ri ri rai sai Santawda wangleng taw marawn hkrai marawn!
Yawng hpe shakram kau da let, janmau sa la na Mungywa de yu hkrat wa sai.

Buga hpe shakram kau tim, Buga hpe tsawra ai mung tsaw myu tsaw myi ni hpe gaw Gumsan Awng a salum hta atsawm zing let la mat ai.

Gumsan Awng a kraw kata hta...

Mung tsaw, myu tsaw myit hte Jinghpaw ngu ai kumla hpe nang hpe shakram let shingdu tawn kau da na n re. Ngai gara de mi sa sa nye salum hta bang mat ai lam chye na ya rit.

Mungdan e... ... ...

(Ndai laika hti pyaw na ngu n shadu ai. Hti ngut ya sai myit su hpe chyeju kaba sai.)

Computer hte Sinat ... Daw II

8 February 2009

Sumla: Ryan Libre

"Awng Chan kaw gaw 70,000 sha jaw ai. Hin Ta gaw 90,000 jaw ai. Hin Ta kaw dut wa ai ..." ngu tsun let gumhpraw hpe Kanu hpang de ap dat ai.

"e e ... na manang du taw ai. Na gawk kaw re." Ah Nu tsun ai. Shi gawk gaw nta hpang de rai nhtawm kawa ginsum hte galaw da ai gawk 4 kaw na lapran gawk langai re. Yupku hte saboi hte rai jang shara yawng hpring mat sai. Gawk ting mung ayai aya re. Laika buk ni, journal ni hte amyaw amya re. Grai hkau ai manang ni hta lai na manang kadai nau n shang chyai ma ai.

Manang! Manang nga nna atsawm sawn yang lata layung daw mai nga ai. Gumsan Awng hte atsawm hku hkau let kanawn mazum ai manang ni gaw nau n law ai. Shi manang ni gaw shi hta grau lusu ai ni rai nna lam shagu hta grai garum ya ma ai. Lauban kasha mung n re me, manang law law kaning re lu na ma? ngu madu hkum madu myit shadik ra nga ai. Madu nan mung langai hkrai nga ai hpe grau ra nga ai.

Shi gawk de du yang, manang gaw laika hti let la taw nga ai. Tu rai nga ai. Tu gaw laiza kaw na sa wa na shi hpe hpyen du jawng lung na matu sa shaga nga ai wa re.
"oi, Tu gara kaw na gayin wa ai."
"e, nang hpang de dasang sa wa ai re. Daini waimaw hkran de masha loi sa shaga ra nga ai. Nang ma hkan nang rit."
"Mai ai le, ndai bat ting rau nga ai."
Buga hta bungli n nga ai ramma ni re majaw aten law law gaw grai rau taw nga ma ai re. Gumsan Awng mung dai kaw na langai rai nga ai.

Waimaw hkran de du na dakkasu jawngma hte tsang shi awng sai jawngma nta nkau de sa ai. Tau hkrau shana da sai re majaw hkap hkalum la ma ai. Htinggaw 10 jan sa du yu ai hta, htinggaw 7 na kanu kawa ni gaw shanhte nan grai sharawng ma ai. Daini jang she woi mat na matu pyi tsun ai. Dai zawn tsun ai majaw kasha gaw grai n hkru ai i? nga jang, n re. Nawku hpung kaw ramma ningbaw madang shamu shamawt nga ai wa re.

Nkau dum nta ni hta gaw kasha shabrang ni she grai myit rawt na sa na matu hkyen ai re. Kanu ni gaw nau n hkraw ma ai. Kawa ni law law gaw alak mi hpa n tsun ai.

***** ****** ******

Waimaw kaw na bai wa na Mali hka makau na Sumtsaw lam (Chittu lan) ngu ai hpalap gayau seng kaw bai dung let, Tu hte Gumsan Awng bai jahta sai.
"Nang dawdan sai i?"
"Tu e, ngai grai myit yak nga ai law..."
"Ngai gaw nang hpe grai myit mada da ai. Nang zawn re ramma ni shang lawm yang anhte amyu a matu grai amu lu galaw wa na re ngu kam let Myitkyina du ai hte na nta de shawng sa wa ai."
"Ngai gaw hpa n re law."

Gumsan Awng hpa kahtap n tsun ai sha hpahka sha gawut lu taw sai. Tu gaw shaga, shi gaw hpalap gayau hpe sha sha tik tik rai nga ai. Jawng lung ai shaloi mung tsa lu shagu, tsa mai nau sha na manang ni jahkring hkring pawt ai re.
"Tsa gaw n lu, tsa mai gaw sha chyu sha, gawdin gaw n htawng - tan paya si gaw sha" nga na grai tsun katut ai re.

"Hey, Tu, nang sumtsaw lu sai i?"
"Aga! nau law na pyi yak nga ai law..."
"ha ha, nang na maga na kun?"
"Nang zawn wa shadu taw ai i? Nang zawn myit yaw shada dat yang masha hpang lawm mat ai wa shadu taw ai i?"
"Gai law gai law, sakse sakgan hte she madun rit."
"Ya du na bat nawku jawng kaw madun na."
"OK. OK."
"Saw, nta wa sa ga. Nang atsawm sha bai myit u yaw."
" E law."

Computer hte Sinat

7 February 2009

Sumla: Ryan Libre. Link

(Jinghpaw Ramma langai galaw gun hpai mayu wa ai magam bungli lahkawng)

"Sa ga law ... 2 ning na ai hpang gaw na Kanu hpe mung bai lu yu sana rai nga le..."

Mali hka gaw n kam tim aput angun n nga ai sha lwi nga ai. Mali hka makau kaw na hpalap gayau seng kaw dung nga ai ramma 4 a saboi kaw na pru wa ai nsen re.

Yawng a myiman ni gaw lama ma hpe sung sung sumru taw ai nsam hte!

Gumsan Awng a myit hta grai ung ang mat ai. Nau nna ai aten hta Mungywa Sut Dakkasu jawng hta sut masa janmau sa gup la na re. Dai ngut jang Yangung de yu nhtawm Computer hpaji sa sharin la na matu re. Yangung yu na hte seng na jawng lung manang 3 hte rau bawngban taw ai bat mi jan sai.

Dai aten hta n myit mada ai sha dakkasu rau lung manang langai Laiza kaw na Myitkyina de du wa ai. Shi du ai hte rau Gumsan Awng hpe sa tam let nau nna yang hpaw hpang masat yan (2) Hpyen Du Jawng sa lung na matu sa saw shaga ai re. Shi gaw bat lahkawng (14) ya sha aten lu ai lam chye lu ai. Dai hte seng nna Mali hka makau kaw hpahka lu let dung jahta nga ai re.

Gumsan Awng a myi hta Kanu hte kanau hpe shingran mu wa ai. Dakkasu ngut kre la sai hte Computer hpaji sharin let bungli shang galaw na hku masing jahkrat da ai re. Maigan de jawng matut lung mayu tim, shingran hta sha bai hkoi mat mat re nga ai. Kanu a maga na "mayu" ni hpe mung chyeju htang ra nga ai. Kawa n nga mat ai kaw na Gumsan Awng ni a nta hpe lanu lahku yu lakawn wa ai re. Mayu ni bau ai ngu pyi mai tsun sai.

"huuu" ... nsa kaba shaw let katsi taw sai hpahka hpe gut di na lu kau dat ai. "E law... ngai hpe myit na matu aten naw jaw rit." "Mai ai. Nang bat mi ram sawn yu u." "E law ... ya gaw ngai mung kalang ta mahtai n chye jaw nga ai. Nye Nu hte mung naw bawng ban yu na."

Dai hpang gaw dakkasu lung ai ten hta na Jinghpaw jawngma ni a lam ni, mani hpa ni, maigan amyu ni hte gali galaw gayet hkat ai lam ni bai shingran tsun chyai ai. Mungkan hta byin nga masa ni mung madu chye ai daram garan kachyan hkat ai.

***** ***** *****

"Nu, ngai shanglawt hpyen du jawng sa lung yang kaja na kun i?"
Ah Nu mung loi mi gaw mau mat ai nsam hte jahkring mi zim mat ai.
"E, Awng e... nang mung asak 18 ning jan sai. Gara gaw kaning re ai hpe chye sawn sumru yu na aten rai wa sai."

"Ah Nu, ya ngai janmau sa la yang nang ma hkan na n re i?" Loi mi nyip mat ai Nu a myiman hpe yu let mahtai hpe la nga ai.
"Ya nang hkrai sha janmau sa la na matu pyi Nu myit ru nga ai ... Nu a ta hta lap 40,000 sha nga ai."
"Dai rai yang mung, ngai sumtsan kaw na sha la sa na le Nu! Sumla sa dem la na ram she re me."
"Raitim, Ah Nu gaw nang hpe janmau sa la shangun mayu ai le..."

"E le, Ah Ba mung ayak ahkak re jawng shangut la na janmau n sa la yang gaw .." nga nna a katsi zim dung madat nga ai kanau gaw tsun ai. Dai aten Kanu gaw gawk shi gawk de shang mat wa na, rai langai la wa ai.

"Maw, ndai hpe Hin Ta ngu ai miwa seng kaw sa dut wa rit. Na-ga (Bren) laika buk seng makau kaw na re. Awng Chan seng kaw ma naw san yu u yaw. Manu grau jaw ai seng kaw dut wa rit." nga nna arai langai jaw wa ai. Packing tsawm tsawm hte re. Laika hti yu dat yang gaw BLUE LABEL. Manu laja ai hpan tsa chyaru re.

"Lai wa sai bat na Katsa nta sa ai shaloi kumhpa hku na lu wa ai re ..." nga nna Kanu gaw kahtap tsun ai.


bai matut na ...

Davao de bai hkawm na.

4 January 2009

Dingdung Philippines de hkawm ai. Grai mau hpa ni mu wa ai zawn hpaji la hpa ni grai law mu wa ai. Blog kaw ka na mung, aten nau n law ai hte bawnu grai shuk taw ai majaw n lu ka shi ai. 2 January 2009 hta Manila bai du ai.

Hpawtde 5 ya January hta gaw Davao ngu ai de bai hkawm na. Davao gaw dingda Philippines na mare kaba re.

Aten lu ai hte gaw blog kaw laika bai ka na.

Buga hpe dum ai. Hpawtde gaw February 5 ya rai nga ai.

1961 ning February 5 ya hta gaw ... ngu ai mahkawn gaw nye kraw hta angwi sha lwi shang mat wa nga ai. 2003 ning dakkasu lung ai aten hta she Shanglawt hpyen dap ngu ai na ga ai ngai ... hpa majaw Shanglawt ngu ai hpe dai daram wa myit lawm bu si nga a ta?

Matsing: Shanglawt hte Shanglawt hpyen dap hte ga si lachyum n bung ai.

Hundred Islands (Zinlawng latsa (jan))

3 January 2009


Alaminos city ngu ai mare kaw na mai sa ai. Dai mare kaw na jak li shap nhtawm zinlawng latsa nga ai shara de sa ai re. Zinlawng latsa jan ayai aya rai taw ai shara re. Zinlawng 6 kaw sha masha ni hpe sa na, hka shin na ahkang jaw ai re. Laga zinlawng law law hpe gaw shingra tara matu laksan tawn da ai re.

Dai zinlawng latsa de sa ai ni yawng hkan sa ra ai gaw, zaibru kaw na hkawt, panglai nga hpyi ni, arung arai ni tsep kawp n la shangun ai re.

Dai zinlawng ni de sa ai aten hka hpungla loi ja wa ai majaw angwi ngwi gau na sa ra ai. Jakli gau ai ni gaw zinlawng 3 de langai hpang langai hkan sa ya ai. Dai kaw na kaba dik ai Quezon island kaw gaw hka shin ai.

Dai ngut ai hpang gaw zinlawng ni yawng daram hpe jakli hte woi shinggrup dan nhtawm Alaminos mare de bai nhtang wa sai. Nhtang wa ai hkrun lam kaw hka hpungla ni grai ja ai majaw kalang lang gaw jakli wa da gup mat na zawn pyi san ai.

Raitim mung, Karai Kasang a chyeju majaw hpa dingbai dingna n byin ai sha atsawm akawm bai lu du wa sai. Alamonis kaw na zinlawng de jakli hte rai jang minutes 40 daram na ai re.

Dai kaw hka ni shin la, shat sha ngut ai hpang gaw katsi pyaw la ai Baguio mare de bai matut lung wa sai.