Geis (Mare Hpung) Ramma ni a atsawm madun poi

31 May 2009

Daini gaw Geis (Mare Hpung) Ramma ni a atsam madun poi galaw ai. Ramma atsam madun poi mung moi prat na hta n lai shi nga ai.

Prat dep kahkrang hte, htunghking kahkrang hte sha naw rai re nga ai.

Anhte Ramma ni a atsam madun poi ngu ai gaw dai hpe tsun ai i? Nau gaw n chye na wa sai. Anhte a atsam gaw ka na matu sha rai sam sai.

Arrangement ni ra rawng ai majaw, mahkawn ni gaw n hpaw shi, masha gaw stage ntsa kaw tsap taw sai. Hpaw dat na, ka na hkyen yang mahkawn gaw shut taw!

Nawku jawng kaw mai madun ai atsam ni ngu ai gaw hpa rai?
Hpa ni ta?
Ka dan ai sha i?

Umm, galai shai ra ai lam ni lawan galaw ra nga ai.

Dai hta, ndai bat kaw na gaw Myitkyina kaw marang grai htu wa sai.

Katsi katsang Myitkyina III

29 May 2009

Daini Tsaw hte tsan ai mungkan ngu ai Jinghpaw ga shaga, Myen laika subtitle hte re ai sumla hkrung hpe madun hpang sai. Maning ram kaw na Jinghpaw ga shaga, myen laika madun ai sumla ni grai law wa ai lam chye lu ai.

Nkau gaw ram ram hkrak nhtawm (myen sumla ni hte shingdaw yang) shawa masha ni ra sharawng let n-gun jaw ma ai lam chye lu ai. Sumla madun ai City lite hte Eyar 2 yen kaw mung Gala amyu ni shawng shara la da masai.

Myitkyina mare hta mawdaw sengke ni law law ai wa... lam she hpring na daram. Mali hka lam makau kaw na ga ni yawng gyi wa ai majaw, ya she tin shapun nlung shakum kum taw nga masai.

Buga wan gaw lu ai. Nta ni lang na matu gaw 160= 1 unit, seng hpaw da ai ni a matu gaw 300 = 1 unit. Anhte zawn seng kaji hpaw da ai ni a matu gaw grai law ai manu re. Loi sha gaw shayawm ya na n myit ai kun?

Majan byin yang magam dap ma, makan dap ma yawng bai gap ra na re hte Tau Dap Awn Daju mung bai shatsam da sai majaw, shara shagu hta grai shamu shamawt taw ai nsen ni na taw ai.

Nkau gaw n-gu ni sa mari da masai. Chye ... hpa byin yang byin ... madu lata la sai re majaw, masat da ai aten ladaw langai du hkra gaw nye Buga hta ngai nga na. Nye Nji Nwoi ni jun da ai lamu ga hpe ngai gaw prat tup sit kau na n rai! Lama ma a majaw sit kau ra mat ai ni hpe mung, lani mi na aten hta bai lu madu hkra galaw na re.

Myitkyina mare a lamu ga mung lani hte lani grai dam wa nga ai. Manam ni grai du shang wa nga ai.

Myit ni shazim taw nga ai.

28 May 2009

Byin mat ai aten gaw hkrit na lam, kajawng na lam n myit byin ai. Raitim, ya bai myit yu yang gaw grau kajawng taw nga ai.

Myit mung grau n pyaw ai.

Shingran ni mu taw nga ai.

Mani hpa sumla ni yu na myit ni loi bran hkra galaw nga ai. Mabyin langai re ngu hkap la lu tim, aloi ali gaw n lu shazim nga ai.

Huu... hpawtde gaw Nmawk de bai rawt yang rawt na.

Karai a matsan dum myit a majaw she rai sai.

Ngai hpe hpa galaw shangun mayu ai i? Karai Kasang e, chye shangun rit. Nye a myit hte gaw n dang dap lu ga ai.

Karai Kasang hkye la hkrum ai Nbwisam

27 May 2009

Myi hta ya du hkra naw mu taw ai.
Lam nmaw ntsa
ayai taw nga ai
shan hkyep ni,
bawnu ni,

Aw...
Dum nta de du na
mahka kaw she byin mat ai i?

Nta kaw na
kasha marai 5 gaw
ala dingda nga na sai...

Mani sha
ma kasha ni hpe
jawng sa ap ya ai le ...

Chyeju pyi gwi gwi
n shakawn gwi nga ai law ...

(Lisu hpawmi, ma 5 a chyinghkai kanu)

Daihpawt Nmawk (Moe Mawk) de bungli hte seng na rawt wa sai.
Sengke hte re. Raitim, Waimaw kaw n myit mada ai sha mawdaw bai galai jawn dat ai. N-gu htaw da ai mawdaw re. Nye manang gaw shawng na mawdaw kaw jawn, ngai gaw lapran kaw na mawdaw kaw jawn ai.

Waimaw lai ai kaw rai bang wa sai.
Mawdaw langai hpe yen ai kaw shawng kaw na sa ai sengke hte lagaw leng hte adawt na hkyen ai. Ja ji lahkra maga de bai yen ai shaloi lagaw leng langai hpe bai adawt hkyen ai.

Raitim, n lu hkang mat sai majaw, adawt kau sai gaw. Hpawmi langai re. Lagaw leng hte lam makau kaw na angwi sha jawn nga ai.

De hpang mawdaw gaw Hollywood hkan na zawn gayin galau mat sai gaw. Mawdaw hpang hkan (Spare) wa gaw lagaw labawp kaw na shan ni yawng ye mat ai. Nra hkrai hkrai ...

Driver gaw hpa nau n byin ai.

Ngai gaw? Lahtan kaw loi ating ai hta lai na hpa n byin ai re. Mahkret hkang pyi n hkang ai ngu mai tsun ai. Raitim, grai myit n pyaw ai hte kajawng mat ai.

Hpa mung n seng ai wa, lam makau kaw shi hkrai sa nga ai hpawmi n nga mat ai.

Byin mat ai gaw second 30 ram pyi n na ai re.

Aw... asak aprat ngu ai Karai a lata kaw sha... Myi kalang hprap/di dat ai hte grai shai mat ai she rai nga ai.

Ya, Nbwisam ... yawn nga ai. Myit n pyaw nga ai law.
Ngai hpe Karai Kasang gara hku shaga nga ai kun?
Hpa baw yaw shada ai kun?
Ngai grai chye mayu nga sai law.

Nye a myit mang ai lam hte n dang dap hkap nga ai.

Lam shagu a matu Karai a shaman chyeju hpe shakawn nngai.

Katsi katsang Myitkyina II

23 May 2009

Diesel gallon mi 2300/-
Dat si gallon mi 3500/-

Hkau soi wan mi 500/-
Star cola 400/-
Hpalap gayau 300/-
Nga chyu jahkri 700/-
Grape fruit gayau 1000/-

Mare kata sengke gaw sen mi lahta rai na re. Sengke hte seng nna, ya laman gaw manghkang ni grai byin nga ai. Lam kaw makoi nga na, hpang kaw na hkan nna nhtu hte galun sat, shingna hte adup gayet da na sengke hpe kashun ai mabyin ni, ora kaw langai, ndai kaw langai byin pru wa sai.

Lawu ga de na manam ni mung manu mana lung wa ai hpe mu lu ai. Lani mi nchyang shabrai 700 ram hte lu na sha na n law wa ai majaw, lani mi 3000 lahta lu ai Jinghpaw mung de yan lung wa ma ai re nga na san sagawn lu ai.

Mali hka makau kaw na hpalap gayau seng ni mung, maza ni hpe hka kata, hkinggau hkan maru marang, n myit n sawn kabai, ru jaw nga ma ai. Kara ni gang, na (ear) ni gang na tsun dan yang she chye na na madang rai sam ai.

Jinghpaw ramma ni gunrai seng kaji, fancy, palawng ni ra mara seng ni grai hpaw wa ai hpe mu mada ai. Masha madang gaw n dep shi tim, ya kaw na bai shakut hpang ai ngu sa ga. Anhte a prat hta she ndai zawn sut masa galaw hpang wa ai re majaw gaw aten gaw la ra na re.

Moi sinat n lang ai sha hkawm sa ai myen hpyen la ni, ya gaw sengke hte o ra le ra sa tim, sinat hpai let hkawm sa nga ai.

Internet seng langai kaw ngai na laptop hte n lu lang na bri nga ai. Updates ni mung n lu galaw nga ai.

Katsi katsang Myitkyina

22 May 2009

Myitkyina de lai sai 2 ya hta pyen wa ai. Nbungli kaw masha kaba langai lawm sam ai. MKA nbungli pa kaw du ai hte hpyen la ni hkrai hpring!

Myitkyina ting mung katsi katsang ...
Ra ra ra ra ...
mau mau mau mau rai nga ai ...

Post ka na raitim, hpa n chye ka nga ai law ...

Myit mung grai ru nga ai.

Mana, yuptung hta Buga kaw na jaw nga ai myi hprap wan si mat ai. Grai kajawng mat ai. Majan wa baw sai kun? Kapaw sai kun? ngu na re.

Connection lu na blog ka ga ngu yang mung, seng pat hkyen sai re majaw ... naw wa ra sai. Nja ai. Nta kaw internet lu mayu ai.

Mungdan e ... ... ...

17 May 2009

Ya laman gaw hkrun lam hkrai hkawm tik tik re. Mani gaw YGN bai du ai. Gara de mi hkawm hkawm, myit ni gaw Buga de chyu du taw nga ai. Gara hku she rai wa na ta? Ganing zawn dawdan na ta? Hkrit ai. Tsang ai. Kahpra ai.

Lam numbraw kaw du taw sai? Ginsup na i? Hkring na i?
Nang gara de shang lawm na?
Nye a ningmu, hkam la ai lam hku rai jang gaw, tsep kawp n mai hkap la ai.
Mungkan ntsa Jinghpaw masha langai sha nga sai raitim pyi n mai hkap la ai.

Ngai gara de hkawm na? Shi gara de hkawm na? Langai hkrai gaw gara de hkawm mat na kun?
Anhte amyu ting gara de hkawm na ngu ai gaw, langai hkrai gara de myiman yawng wa ai hta madung ang ai.

Akyu hpyi ga. Grau nna akyu hpyi ga.
Gumhpraw mahkawng da ga. Nang mahkawng ai gumhpraw nkau gaw, mungdan nnan a tsi gawk, laknak, dakkasu, lam, gawgap na matu akyu ranwg yang, rawng wa na.

Shing n rai, dip sha hkrum, myit mada lam n nga ai amyu sha ni hpe myi jahpaw, hpaji sharin ya ai lam hta akyu rawng wa na. Mungdan ngu ai hte ging dan ai amyu tai hkra shakut ai lam hta n-gun kaba rai wa na.

Hpa mi nga tim, ngai daw dan sai.
Nye Buga de bai wa na.

Ndai bat laman rai na re. Ngai bai wa sa na. Galaw ra ai amu grai nga ai. Galaw lu ai atsam gaw hpa nau n nga shi ai. Garum shingtau ya na hpe ma grai ra ahkyak ai.

Myi di chyip hta gaw loi lai sai.
Raitim, Jinghpaw ngu ai gaw aloi ali asum jaw ai amyu me n re gaw!

Oh ... Buga e ...
Mungdan e ... ... ...

Tawnggyi ... InnLay ... Nay Pyi Daw ... YGN hkrun lam

15 May 2009

Tawnggyi kaw lana mi sa yup la ai. Hpang jahpawt gaw InnLay de hkawm ai. Tawnggyi kaw na Nyawng Shwe de shawng mawdaw jawn ra ai. Mawdaw manu gaw Lap 700 re. Dai kaw na she Jak li bai jawn na InnLay nawng kata de sa ai re.

Ngai gaw myen ga hpe ram daw gaw chye ai re. Raitim mung, dai kaw ngai shaga ai hpe nau n chye na ma ai.

De a majaw, myit mung loi htum wa nhtawm ... Myen ga nau n chye ai ngu sha tsun dat ai. Dai masha nkau gaw English hku bai shaga wa ai. Ngai myen hku htan tim, English hku chyu chyu ... Shanhte group hte rau InnLay de hkawm sa sai.

Hpun ni hpe majoi kran, kam mara di ai marang e, grupyin na bum ni kaw na ga sau ni Hka nawng kata de shaning shagu lwi shang wa ai. Dai madang gaw laning hte laning jat wa nhtawm Hka Nawng mung laning hte laning grau grau kaji wa ai.

InnLay kaw na Tawnggyi de du ai hte kahprup katup manam jarawp de wa, mawdaw daru de lagat sai. Pa-O ya da na ngu ai mawdaw hte Nay Pyi Daw ngu ai de bai rawt wa sai.

Shana tup jawn kau na jahpawt jau jau Nay Pyi Daw ngu ai de du ai. Kalang ta YGN mawdaw jawn na ngu myit tim, Nay Pyi Daw ngu ai hpe naw shinggrup da mayu ai majaw, shana daw de rawt ai mawdaw lekmat mari la na sengke shap let wam hkawm sai.

Aga ga ga ! gaw gap taw ai ni wa manu mana law ai she rai nga ai.
Hkawhkam Hkaw zawn san ai hpe mung mu ai. Ram ram kaba dik ai.
Ngu sa ga le. Mare gaw kaba ai. Nta ni gap da ai ma tsawm ai. Lam ni gaw cement (bi lat) hte nep da ai. Jan gaw ja, kahtet gaw kahtet, nga nan n pyaw ai mare gaw re.

Hpa mi nga tim grai tsawm htap hkra gaw galaw da nu ai.

Shana daw de gaw YGN bai yu wa sai.
Yey Tar Shae ngu ai mare kaw shat sha na bai rawt wa jang, anhte shawng kaw Nan Htaik San ngu ai YGN de yu wa ai Express mawdaw hte gunrai htaw ai Truck adawt hkat ai hpe mu ai. Nu wei... hkrit nan san ai lo.

Express mawdaw a shawng daw gaw yawng agrawp mat ai daram re. Laparan de gaw hpa n byin ai. Tim, hpang jahtum de gaw bai ayai mat ai. Prat hta ndai lang sha naw mu ga yu ai. Gara hku she rai taw sai kun? Myit n pyaw hpa re ...

Anhte a mawdaw chyawm nga-leng pyi lai na daram lanyen let gau wa ai hte YGN de dai hpawt atsawm bai du shang wa sai re.

Loi Kaw ... Hopung ... Tawnggyi hkrunlam

12 May 2009

Mana tup yuk n pyaw ai. Karenni mung na Ramma ni a prat mung n loi ai. Buga kata n sim n sa ai kaw na ashung let hkawm sa nga ra ai. LoiKaw mare daju a shinggan deng 10 ram kaw na gaw hpyen majan byin taw ai zawn sha re. Hpyenla ni hkrai hkrai ...

Daihpawt hkying 7 AM na mawdaw hte Tawnggyi de rawt wa ai. Lam dingyang, hpyenla ni ora kaw loi mi, ndai kaw loi mi, lam hkawm let kachyi mi mu wa ai. Hpa majaw nga jang, nau nna shi ai aten hta Loikaw mare hta bawm sa kapaw da ya ai majaw re.

Loikaw hte Tawnggyi lapran na BanYin ngu ai mare makau kaw ma Pa-O hte Kayin ni jawm nna myen dap chyen mi hpe shakrip kau ai majaw re. Masha 12 si mat ai. Dai chyen nawng si mat ai re.

LoiKaw hte Tawnggyi lam gaw nau n hkrak ai. Loikaw kaw na Si Seng (Si Sai) ngu ai mare du hkra gaw nlung lam re. N tsawm la ai. Kaji dik ai. Gau ngwi sha gau ra ai. Dai hte maren, Si Seng kaw na Hopung, Tawnggyi kaw du hkra mung lam kachyi sha law re. Raitim, kat ta ya lam re majaw loi manu mat ai.

Hopung mare n du shi ai lapran mare kahtawng kaji ni law law lai di wa ai. Malawng gaw "hka" grai taw ai. Lu na, shin na, jai lang na "hka" a matu yinam ta, marang htu ai aten hta hkalawng hta mahkawng da na, ginhtawng ta ting a matu hkyen da ra ai.

Lu na sha na, grai yak ai mare grai law ai. Hka ni len la na mai tim, ja gumhpraw n lu hkan ai. Hpaji gaw bai n chye .. huu ... myit ba hpa re.

Hopung de du ai shaloi gaw nta malawng gaw wukdek nta ni re. Wut gaw, anhte Jinghpaw mung na zawn wan hte ju ai wut n re. Lata hte gayet ai wut tawng ni re.

Hopung hte Tawnggyi gaw deng 12 tsan ai. Raitim, bum ni, kawng ni lung ai majaw loi aten na mat ai.

Tawnggyi du sai. Mare shinggrup ai mawdaw hte nawm nhtawm, TJH de sa ai. Tawnggyi Jinghpaw Wunpawng Hkalup Hpung re.

Ya gaw, myi hpyi ni li wa sai. Manam jarawp mung pat hkyen sai. Hpang shani she matut sa na.

Hpawtde jau jau gaw InnLay de sa na re. Ngwi pyaw nga u ga.

LoiKaw, De Maw So

11 May 2009

LoiKaw hte De Maw So gaw deng 10 daram sha tsan ai re.
De Maw So makau kaw gaw anhte yawng chye ai hte maren, gumhpraw bum (Ngwe Tawng) ngu ai nga ai. Hka nawng kaba rai nga ai.

De Maw So de sa na nga tim mung, ya laman shiga kahtet ai majaw n lu sa mat sai. Lam lapran kaw mung gate ni jep hkrai jep taw ai re nga chye lu ai. LoiKaw mare kata kaw mung grai san jep sagawn taw nga ma ai.

Ndai Karenni mung hta rawt malan hpung ni 6 daram nga ai. 2 ram gaw loi kaba nhtawm, ngam ai ni gaw wuhpung kaji ni re. Nkau gaw laknak ni pyi ap sa na re nga shiga na lu ai.

LoiKaw mare gaw nau gaw n kaba nga ai. Myitkyina hte shingdaw yang gaw htam 3 kaw na htam mi daram sha nga na re. Dai hta pyi grau kaji yang kaji na.

Buga masha ni gaw Kayah, Kayan, Kayaw, Manaw, Sam, Kayin, Myen, Pa-O ni law ma ai.

Moi anhte ni Padawng (Padaung) ngu na shaga ai amyu gaw Kayan she re. Padawng ngu n mai shaga ai da. Shanhte n ra ma ai hte, dai zawn shaga ai gaw n kaja ai nga tsun ai. Shanhte gaw Kayan re nga ai.

Kayah amyu yawng 9 nga ai. Nkau gaw 8 sha re nga ai. Raitim, nau nna shi ai aten hta La Hta ngu ai amyu hpe mung masat sai nga chye lu ai. Dai ni gaw;

1. Kayah
2. Kayan
3. Kayaw
4. Gey Hko
5. Gey Ba
6. Manaw
7. Yin Ta Le
8. Yin Baw
9. La Hta ni rai ma ai.

Shanhte hta laili laika hpan 3 nga ai.

1. Catholic ni gyin shalat da ai Roman Alphabet hte galaw da ai hpe lang ai.

2. Karenni amyu sha ting hkap la ai, masat da ai gaw Thai laika zawn font hte galaw da ai hpe ma lang ai. Dai hpe gaw Myen mung hta pat shingdang da ai. Dai laika hpe madung gaw Karenni amyu sharawt jat party ngu ai (Karenni National Progressive Party) ni madung lang ai.

3. Myen laika font zawn, Kayin laika zawn re laika hpe myen mung hta tara shang lang ai. Dai gaw na 1965 ning hta gyin shalat wa ai. 1970 ram aten hta ngut ai. Kalang ta Asuya masat masa galaw ya ai.

Daini na aten hta Karenni amyu sha ni mung, matsan ai, hpaji n chye ai, masha n law ai, dip sha hkrum ai lam amyu myu hpe anhte hte maren hkrum sha nga ai re.

Ya chye ai, mu ai, san sagawn yu ai, hti la ai lam gaw ndai ram sha naw re. Sumla ni mara mayu tim, tools ni nang mat taw ai law. Hpa majaw re kun?

Hpawtde gaw Tawnggyi de rawt na re.

Loi Kaw hkrun lam

10 May 2009

9 May 2009, Jahpawt maga hkying 7 AM kaw na jawn ai mawdaw ... shani tup, shana tup, ajin aban jawn ngut ai hpang gaw Loi Kaw ngu ai de du wa ni ai. Aten gaw jahpawt hkying 2:15 AM !

Jahpawt kaw na jawn hpang ai mawdaw gaw kahtet la ai ninghkaw jan npu e, angwi ngwi hte lai di nhtawm, Nay Pyi Daw ngu ai hpe kanoi noi lai hkyen ai. Tim, Key Tu ma Ti ngu ai de gale pru mat ai. Kalaw Bum n lung shi dingsa gaw, kahtet htet ai wa, tsun hpa n nga sai.

Kalaw bum de lung wa ai lam hta chyawm gaw, katsi wa sai. Numhpu hkrai hkrai, lam gaw kaji. Bum ntsa de du ai hte masha mung, woi zawn zawn, n-grau zawn zawn rai mat ni ai. N hkring sai sha kalang ta, Moe Bye ngu ai mare de gau sai. De hpang gaw Loi Kaw de ...

Kalaw de shang wa mahka, dum dum re ai langai mi gaw ... Yin Mar Pin ngu ai mare re. Dai kaw na Cherry Man ngu sai kun? Dai seng hta lai wa sai 2003 ning hta shat kalang sha ga ai. Kachin family kun? Shan family kun hkrunlam hkawm ai shaloi re.

Dai aten ni hpe bai dum ai hte asak mung 6 ning ram kaji mat ai zawn hkam sha ai. Ngai dakkasu nnan du ai aten hta gaw 16 ning jan re. 2nd semester hta gaw 17 ning rai sai. Dai aten Tawnggyi, Inlay de hkawm sa yu ai re.

Moi na hta wa shan n sha ai makam amyu ni grau law jat wa ai zawn mu ai. Shara shagu shanhte chyu ngu na daram re. Anhte Jinghpaw mung kaw mung dai zawn mabyin ni hpang wa sai hpe mu lu ai. Mare kaji ni hkan de dai amyu masha ni shang wa nhtawm, buga masha ni hte hkungran ai lam ni nga wa sai.

Dai gaw amyu ting a matu, sawn sumru yu ra na lam kaba mung rai nga ai. Anhte manu shadan ai gaw hpa rai? Madu a yaw shada ai lam de dingyang sa nga ai i? Yakhkak ai lam ni hpe n lu hkam jan ai i? nga nna mung sawn dinglik ra wa nga ai.

Hpa mi nga tim le, ya gaw Loi Kaw kaw du sai. Mare gaw nau n kaba ai. Catholic nawku htingnu kaba law mu ai. Mana chyawm me gaw, manam jarawp kaw lu yup na matu aging agang tsun kau ra sai. Yuptung lai sai majaw n gwi hkap la ai nga tsun ai. Jep jen ai lam ni nau law ai re majaw da.

Raitim le, Karai Kasang a shaman chyeju hte lam shagu manu mat sai re.

Ndai Loi Kaw de gaw amu hte seng nna sa ai. Ndai ngut jang gaw Tawnggyi de lu sa na ngu tak ai. Dai chyawm me gaw, dasang hkawm chyai yu ai ga rai sai.

Hkrunlam kade pu ba tim, buga de chyu marit nga ndai law...

Aw ... daini gaw Kanu nhtoi she rai nga ai.

Nu myit pyaw nga u ga.

Ga jarit sin hpyen dap !

7 May 2009

Yawng na sai hte maren, laknak lang wuhpung ni nkau hpe ga jarit sin hpyen dap hkrang galai na matu tsun wa sai re. Dai jahpan hta Shanglawt ma lawm nga ai. Shanglawt gaw anhte wunpawng sha ni yawng kaw kaba dik ai laknak lang hpung ma rai nga ai.

Dai hte seng na ginjaw salang ni gaw gara hku bawng nga ma ai hpe anhte n lu chye ga ai. Dai hte maren, online ntsa kaw na, maigan du wunpawng myu sha ni mung gara hku she bawng taw, myit taw nga ma ai kun?

Anhte shawa masha ni mung, ga jarit sin hpyen dap gaw hpa baw rai? Hpa galaw ra ai hpan re hpe mung atsawm n chye nga ai. Dai gaw kaja ai rai na kun? N kaja ai rai na kun? mung n chye ai.

Ga jarit sin hpyen dat byin tai wa na matu shaning law law du daw sai hkaw wa ai gaw n rai na re ngu ai hpe ma myit masin hta sung sung nan hkap la kamsham ai.

Shinggan kaw nga taw nga ai Jinghpaw Wunpawng sha ni e, nanhte a nsen ni n na nga ai le. Nanhte a nsen ni n na nga ai le !

Buga kata de Sai daw sai chyen ni grai naw bri nga ma ai. Abu aye, maru marang she re. Aten ahking yawng hpe n jaw ra ai. Nanhte a aten ahking loi li hpe Buga kata na Myu Sha ni matu naw jaw ya rit. Myit lawm ya rit. GARUM RIT.

Langai hte langai tsun jahpyek taw na gaw tsep kawp lachyum n pru ai. Ningmu n bung, myit ai lam n bung tim, Amu Bungli hpe jawm n mai galaw a ni?

Masha tai shakut nga ai hte maren, Jinghpaw mung naw tai shakut ya marit law...

MYIT SHUK AI !

5 May 2009

Myit shuk ai... (Kaba law ka mayu tim, tools ni n nga taw ai.)

Messenger ni, transmitter ni kachyi mi magyi magaw di dat ai hte sang lang ra, bawng ban ra, tsun shaga ra ai lam ni grai law la ndai !

Dai majaw,

1. Pawt mayu ai.
2. Myit shuk ai.
3. Mahtai tam nga ai.

Bai wa rit ...

5 May 2009

Grai Tsaw ra ai
Salum a shara mi hta nga taw nga ai
Dai gasi mali hpe

Tsun na n gwi nga ai
Salum i?
Bawnu i?
Ngai hpe ahkang n jaw ai ...
Ngai hpe hkrap shangun ai

Mungkan e,
nang jin sai i?
Ngai rawt sa na ...

Yak ai hta grau yak ai ...
Manu shadan ai majaw re law ...

Lachyum htai na dai ram yak ai i?

Hkum sa mat
hkum hprawng mat u law

bai wa rit
bai wa rit yaw

N chye ai
n mu lu ai
jut shara mi kaw na
azim sha nga taw nga ai ...

Sustainable hte Ga san nkau

4 May 2009

Myit lu ai ga san nkau san dat mayu nngai. Hpa majaw san ai hte nye a ningmu ni hpe post langai san san bai mara mayu ai.


Sustainable ngu na anhte Jinghpaw ni tsun taw ai loi na wa sai.

1. Ap nawng ai gaw Sustainable byin ai i?

2. Ap nawng ai jasat gaw Shinggyim wuhpung wuhpawng (Jinghpaw mungkan) a rawt jat lam hte galu kaba lam hpe sustainable byin shangun na kun?

3. Ap nawng ai jasat hpe bai dinglik yu ra sai.

Kahtet la ai Yangung hte pyen poi nga ai myit ni

3 May 2009

Kahtet ai. Mala shala nan kahtet ai. Lam hkawm nga tim wan ntsa hkawm taw ai zawn... Bus kata kaw mung, muk ni kabaw taw ai zawn nan hkam sha ai. Korea ni zawn salat shapraw gawk ngu ai gaw n sa ra sa! Hkam ja lam hkrak dik ai she rai nga ai.

Wan gaw n sa. Gawk kasha kaw na Panka (fan) sha pyi hpaw na ngu she, huu! Aircon nga ai gawk lahkawng hpe gaw Maigan la lahkawng langai hpra la da sai. Shan lahkawng hte sa pawng yup ra na i? Shan hpe mahtang, gawt shale kau ra na i? :O

Nau ajin aban nga nna Taxi jawn dat ai majaw mung, shat sha na matu pyi ganoi shamat... Gumhpraw mung ma hkyen sai. Shata gaw htum, shata shabrai gaw n lu shi...

Dai hta Beer seng de manang ni hte bai sa. 6000 ma mat ai. Mungdan up na masing ni sa jahkrat ai mung aten ladaw na wa sai. Mungdan gaw n lu up shi ai. Beer nau lu na kan gaw pru wa sai. Beer seng madu Miwa la mung mawdaw pyi nnan mari wa sai.

Laika buk ni manu mana maka laja mat ai. Laika hti mayu ai myit ni gaw n lu sharang... mari u le.. nga tim, aga ga! Oh My God she ngu ra mat sai. Ga gale laika buk ni gaw 5000 lahta hkrai hkrai... myit ru ai lam ni hta ndai mung lawm ai.

Bus jawn yang ayoi gaw bai n htang ya... 100 je, 200 je, ni ngu ai gaw lang nan pyi n san ai. Tape hte mawn sumli da ai lam gaw tsawm htap ai ngu sha myit la ra sai. Mau a! mau a ! Mau beee!

Aircon ni she lawm ai Shat seng ni mung, manu gaw lamu de du nga ai. Katsi ntsin kawk mi sha pyi hkying lam jan mat sai. Nu wei ...!!! Gwi pyi n gwi kahtep sai.

Shi laika ni hkan gaw 2010 ra lata poi lam soi sam ka wa ma sai. Anhte gaw hpa ni hkyen da ma sai kun? Bai myit yu hkrup ai. Ning hkap i? Shang lawm i? Mau mau sha kun?

Nta grai wa mayu sai. Yangung kaw grai kahtet ai. Shat mung sha n mu. Chye gaw n chye shadu ... Hkausoi hkrai sha ... masha mung hkausoi zawn zawn ... anoi abya.. abu aye ... maru marang hte lata kaw ngam ai hkanghkyi loi mi hte gari gawa rai taw sai.

2 ya ram shat jaw sha na masha paw pru wa yang kaja ai law ... Beer mung jaw lu yang kaja na re wa... Chye ... jaw pyi n jaw sha shi yang Beer lam bai tsun taw sai. Loi hking shat pyi n katut mat na... N tsun sa na re.

Aw ... shani shagu na lusha ... Kan kata jahpring na ra taw ai zawn ... Salum kata ... Bawnu kata de jahpring na mung ra ahkyak nga ai law ...

Yangung ... Mandalay ... Myitkyina lam

2 May 2009


Moi, ngai naw kaji ten hta, Myitung Tang Nau a mahkawn langai grai madat ga sai. Dai gaw ...

Yangung ... Mandalay ... Myitkyina lam ... ngai nga n mai ... nga nna hpang ai mahkawn re. Ya ngai hkawm sa nga sai... Ngai nga n mai nga ai le ... Nji n mu hkam sha ai.

Bangkok kaw na Chiang Mai de sa chyai ai. Yangung de bai wa ai. Myitkyina de wa ai.

Buga de wa ai hkam sha lam gaw aten shagu nnan re. Laning mi jan tsan gang mat ai Buga gaw katsi katsang gaw n hkap tau kau daw ngu sawn hkrup ai.

Myitkyina kaw hkrum shaga ai, garan kachyan ai lamang ni galaw ngut ai hpang Myitkyina kata wam hkawm yu ai. Manaw manang nkau gaw, nang n du yu ai shara ni de woi sa na! nga nna anhte hkawm yu sai.

Myitsu wa! Nang Myitkyinaw kaw na rai jang Myitkyina du ga ai i? Ndai zawn san yang hpa wa ta? ngu myit wa na. Myitkyina kata kaw na tsi du (Doctor) ni sumpum ai shara, majaw ai shara, Tsapyi seng ni, laika dum (Teng sha rawt jat lam matu shakut nga ai) ni, Oh! hkum sumhpa she re. Dai majaw ngai Myitkyina du ga mat ni ai.

Myitkyina ngu ai gaw Geis, Jaw Bum, Chittu lan (Sumtsaw lam), Manau wang daram sha n re. Shadu da ai hta grau dam lada nga ai. Mungkan kaw na mungkan law law ni ...

Hka jaw poi hta gaw Jinghpaw ni a Awng Mai company hte NDA(K) a hkajaw pinra gaw kaba dik hte masha law dik re. Myen ni gaw Asuya gumhpraw dum makau kaw langai sha galaw ai. Shawoi Gat kaba kaw pyi n galaw mat sai.

Hkajaw poi ngut ai hte Laiza de sa ai. Jinghpaw DSA de du da ai. Jinghpaw Pentagon ni hpe sa yu la ai. Gat hkai ra ai, lanu lahku ra ai, garan ya ra ai, bye dauyin da ra ai, tsawra myit madun ra ai, gawt shale kau ra ai, gawde ra ai, run kau ra ai lam ni, ni, ni, ni ... lani hte lani grau law wa ai.

Sara Bawk La a laika ni loi sumru yu byin ai.

JINGHPAW TAI SHUT NIT NI?