Nbwisam Hpaji shakat fund jaw na!!!

27 August 2009

Gabaw hpe hti yu na grai ahtang hkum kaba mat yaw. Lawu de na laika naw hti yu u. :D

Hpaji shakat fund ni lu jaw hkra shakut na ngu myit yu ai.

Kade wa gaw n re law. English sharin na matu ja gumhpraw n nga ai ramma ni, kaja nan mung sharawng awng let shakut mayu ai ramma nkau a matu yaw shada ai re.

Ya, jaw na matu sawn da ai gaw 5000, 10000 ram sha naw re. Hpa majaw nga yang, ngai mung ja gumhpraw grai law law n lu shi ai majaw re. Ngai shata mi shang ai gumhpraw a htam shi hpe hpaji shakat fund hku na jaw na masing re. Shang gumhpraw law yang law ai hku, grau dam lada ai hku galaw wa na myit ai. Myit sumru ding yang naw re.

Shang gumhpraw law na matu gaw Maigan de she sa ra na kun? Ndai gaw shangun ma sha naw galaw taw ai majaw gaw shang gumhpraw gaw tau chye chyalu rai taw ai. Limited rai taw ai. haha... raitim le, ya kaga bungli ni ma naw galaw yu na re.

Aten galu lu jaw na kun? Kade ram wa lu jaw ya na kun? Akyu gaw rawng na kun? Hpa hpa nya nya... ngu ai lam ni sawn taw ai.

5000, 10000, nga nna hkum gaw mani haha ya yaw. Myitkyina hte Waimaw hkan 4000, 5000, ram sha shabrai la nhtawm, English sharin ya taw ai sara ni, wuhpung ni nga ai.

Raitim, dai $ 5 ram ngu na Kyats 5000 hpe pyi n dang di ai Ramma ni sumpum sumpang nga taw ai re. Dai ramma ni a matu yaw shada ai.

Hpa gaw n re law. Nsa naw sa taw ai aten, asak naw hkrung taw ai aten hta sha pyi, madu a amyu, mungdan hte mungkan ka a matu akyu rawng ai lam loi li galaw da mayu ai majaw re.

Majan byin wa yang ...

26 August 2009

Daini manang langai hte hkrum nna o ra le ra jahta byin ai.

Lama na...
Majan bai byin wa yang ... hpa galaw ra na ta?
Gara de sa ra na ta? ngu ai gasan hpe masha law law hpe san yu ai.

Dai manang wa hpe mung san dat ai.

N chye ai. N hkyen da ai. N lajang da ai. N sawn sumru da ai ni grai law nga ai.

Magam bungli hta mung, mahkyen ni hta mung tau hkyen da ai lam n nga!
Shi hkrai rai wa na re ngu ai jasat hpe matut jai lang taw ai masha law ai Jinghpaw Wunpawng amyu a shawng lam gaw gara de ta?

Amyu langai zawn, masha langai zawn lu tsap na matu ...

Geis 6 : 0 Jan Mai Kawng

25 August 2009

Daina maga hkying 4 PM kaw na ginsup hpang ai Myitkyina ginwang gawdin poi hta Geis gawdin hpung gaw Jan Mai Kawng gawdin hpung ni hpe 6 : 0 hte dang la sai re.

Shawng nnan minutes 45 hta, 1:0 hte Geis ni ning shawng taw nhtawm, second half hta gaw goal 5 bai kahtap htawng bang dat ai re.

First half hta; goal bar hkra mat ai ni, shadaw hkra mat ai ni wa, lama na goal she shang yang gaw 10:0 ram rai mat na re.

Ginsup hpang ai hte minutes 15 daram Geis ni a penalty area makau kaw sha gawdin gaw aten tup rai taw ai. Jan Mai Kawng ni aging kamyet na goal lu na matu shakut ma ai. Raitim, dai minutes 15 lai ai hte gaw Geis ni shawng nna gawdin lu nhtawm dai hpe Counter hkrang hte goal langai lu hkra htawng bai dat sai rai.

Ya laman, grai ningtawn ai ngu shiga pru taw ai gawdin hpung ni gaw:

1. Du mare
2. Shatapru
3. Jam Ga ni rai ma ai.

Myitkyina Ginwang Gawdin Shingjawng Poi hpang sai.

25 August 2009

Myitkyina ginwang kata na nawku hpung ni shang lawm ai gawdin ninggang kashun ai poi hpang sai re.

17 August 2009 shaloi gaw, hpaw poi lamang re. Dap Kawng hte Jam Ga hte shingjawng ginsup ma ai. Dap Kawng 2 : 5 Jam Ga mahtai hte Jam Ga ni dang mat sai re.

24 August 2009 hta gaw Du mare hte Man Hkring ginsup ai hta Du mare ni 3:1 hte dang la sai re.

Daini, 25 ya shani hta gaw Geis (Mare Hpung) hte Jan Mai Kawng ni shingjawng na re. Ya; hkying 3:11 PM rai sai. 4 PM hta ginsup na re. Dai majaw, daina maga de she kadai dang ai hte, gawdin lamang ni hpe matut blog sa na.

2:30 PM kaw na blog na matu net hpaw taw ai wa, ya she lu ka ai. Myit she ba mat sai. Huuu...

Wa Karai Kasang e, Anhte Geis gawdin hpung ni awng padang lu u ga. :D

Myitkyina Ginwang Gawdin Shingjawng Poi hpang sai.

25 August 2009

Myitkyina ginwang kata na nawku hpung ni shang lawm ai gawdin ninggang kashun ai poi hpang sai re.

17 August 2009 shaloi gaw, hpaw poi lamang re. Dap Kawng hte Jam Ga hte shingjawng ginsup ma ai. Dap Kawng 2 : 5 Jam Ga mahtai hte Jam Ga ni dang mat sai re.

24 August 2009 hta gaw Du mare hte Man Hkring ginsup ai hta Du mare ni 3:1 hte dang la sai re.

Daini, 25 ya shani hta gaw Geis (Mare Hpung) hte Jan Mai Kawng ni shingjawng na re. Ya; hkying 3:11 PM rai sai. 4 PM hta ginsup na re. Dai majaw, daina maga de she kadai dang ai hte, gawdin lamang ni hpe matut blog sa na.

2:30 PM kaw na blog na matu net hpaw taw ai wa, ya she lu ka ai. Myit she ba mat sai. Huuu...

Wa Karai Kasang e, Anhte Geis gawdin hpung ni awng padang lu u ga. :D

Hkrun lam bai hkawm na.

20 August 2009

Lana mi yup, lahkawng ya na ai hkrun lam langai hkawm na.
Gara de re ngu gaw n tsun sai.
:D

Du na shata hta gaw Putao shing n rai Danai de bai hkawm na re.

Ya gaw n chye shi ai.

Bai du yang, hkrun lam hkawm ai mahkrun madup ni bai ka na re.

Buga shiga i? Grai kahtet nga ai. Dai sha lu tsun sai. Hpa tim mai byin ai.

Katsi Katsang Myitkyina V

17 August 2009

Myitkyina ...
Mying nnan laklai ai zawn!!!

Ndai laman kahtet dik, tsun masha law dik ai lam gaw asak 17 ning sha naw re ai shayi sha Mary Htoi San hpe maigan kaw na buhtawt nna Jinghpaw mung hta sa shanu shingbyi machyu let kan bau bungli galaw sha let nga taw ai Miwa la ni sat kau ai lam re.

Shiga na ai ni yawng mung myit n pyaw ai hte, Shanglawt ni sa nna dai Miwa ni hpe tawk sat kau yang kaja na re ngu na mung tsun jahtau taw nga ma ai. Hpa majaw byin ai ngu ai lam madung hpe gaw atsawm n lu chye shi nga ai.

Hpan amyu myu tsun taw nga ma ai. Maigan kaw daju ai Jinghpaw shiga dap hkan mung amyu mi, buga kata kaw mung amyu hpan sum pum tsun taw nga ma ai.

Marang grai htu ai. Ninghkaw jan hpe n mu lu ai bat mi jan wa sai. Tsam mari hkrut nna lam da ai palawng ni mung marang bai madit mat wa na grai yawn sai.

Sut masa gaw grau she yak wa ai zawn zawn re ai. Raitim, KENBO ngu ai miwa 125 sengke nnan mari jawn ai gaw n yawm nga ai. Chit Thu Lan ngu ai anhte a asak sai lam Mali hka nu makau kaw na muk seng ni, hpalap kayau seng ni hkan gaw masha chyat tik tik...

Ya laman, Myitkyina kaw nam kaw na dusat dumyeng ni grai mu lu nga ai.

Mana shawng shana hta, nye a manang hte ngai TV games seng kaw na pru wa yang, Pu Noi (Za Pa Gyi) lapu ram daw kaba ai hpe mu lu ai. An lahkawng gaw ganoi she rin kau ai. Kattaya lam ntsa hkawm taw ai kaw na, anhte nau garu, sengke wan hte mung nan da ai majaw ... lam makau kaw na tsingdu pa de bai shang mat ai.

Dai Pu Noi hpe mu ai shara gaw Dap Kawng, KBC ni hpaw da ai Shamari tsi jaw gawk a shawng na lam o ra hkran de re. Nkau gaw sat kau ga nga tim, nkau gaw masha hpe ma n htim yang n mai sat ai hpan re nga tsun ai.

Myitkyina hta Yungwi shadang Maran Seng Naw hpaw ai Do Can Do ngu ai Coffe hte Thai lusha seng de ya lamn jahkring hkring sa dung byin ai. Master Brown ngu ai Coffee seng kaba mung hpaw ai.

Raitim, anhte manang ni gaw Coffee lu mayu shagu Maran Seng Naw hpaw da ai Do Can Do seng de sa dung ai. Do Can Do means freedom... ngu ka da malu ai.

Dai nnan hpaw ai Master Brown ngu ai seng a hkringdat gaw C - 1 & 2, Sumpra bum lam, Eya re. Dai seng madu gaw Pan Cha Pi (Panjap) rai nhtawm moi ya sha Mary Htoi San ngu ai shayi sha sat hkrum ai Shwe Myo Daw (Golden City) hotel, lusha seng a madu mung re lam chye lu ai.

Myitkyina gaw katsi nga ai ... katsang nga ai law ...

Chying hkrang, N-gan, Dum Gan, Lung ga zup ni de hkawm na

10 August 2009

Hpawtde kaw na gaw Chying hkrang, N-gan, Dum Gan, Lung ga zup ni de hkawm na re. Mungkan malu masha hpung kaw na mu gun masha ni hte rau bungli hte seng na sa du na re.

Masa she htuk yang gaw ya gap gap hkyen taw nga ai Mali hka madim a shara hte bungli daw chyen ni hpe mung she n mu lu na...

Anhte a asak sai lam Mali hka nu kaw madim dim yang gaw Jinghpaw ni yawng grai jamjau na lam ni rai nga ai.

Lu la na amyat ni hta sum machyi na lam gaw grau law nga ndai!

Dai hta, ya laman gaw Myitkyina kaw shara shagu zim zim zam zam she re. Hpa wa mi she byin wa na kun? Hkying hpun ai ni, tsit nsam hpun ai ni mung grai mu lu nga ai.

Prague kaw na wa ai Shayi sha langai hte hkrum ai.

8 August 2009

Daini gaw grai nan kabu hpa nhtoi re. Hpa majaw nga jang, Prague kaw na dai hpawt jang jang katsing hprap hprap du wa ai Shayi sha langai mi hte hkrum shaga lu ai majaw re.

Shi gaw Sut masa hte mung masa lam hpe madung hkaja nga ai wa re.

Hpawtde gaw anhte Myitkyina kaw na Ramma nkau shi hte hkrum shaga na re. Hpaji wa daw la na hku re. :D

Kaja nan law ... Anhte Jinghpaw ni a matu hpaji sharin na Buga de bai wa, hpaji lam hta arang bang na galaw shakut wa na masha ni grai ra nga ai.

Dai Shayi sha zawn re ai Jinghpaw shayi ni mung law law ra nga ai. Shakawn ging ai.

Ngai mung, dai Czech mungdan, Prague hkan mung grai hkawm chyai mayu ai law. German mung de mung du mayu dik ai. Oh! tsun yang pyi n htum wa sa na. Maigan de hpaji bai matut lu sharin na matu shawng shakut yu na re.

Scholarship she n lu jang gaw, madu gumhpraw hte madu gaw mai byin na lam n tai ai.

Hpa mi nga tim, mungdan 60 a lahta de gaw sa du, hkawm chyai mayu dik ai.

Gasi lachyum sang lang ai lam

6 August 2009

Lai wa sai post hta myen rim bang ai, sharaw rim ai nga ai gasi ni lawm ai. Dai hpe Lashu shayi gaw n sang lang ai majaw, comment kaw na san wa ai.

Dai gasi ni gaw ya anhte ramma ni jai lang taw ai gasi ni re.

Myen rim bang ai ngu ai gaw, Myanmar beer lu ai hpe tsun ai re.
Sharaw rim ga ngu ai gaw, Tiger beer lu ai hpe tsun ai re.
A A E E E hti ga ngu ai gaw, ABC beer lu ga ngu ai ga re lam sang lang dat ga ai.

:D

Shuk mat ai majaw hpyi nem dat ai. :D
Buga shiga langai lu hti ai hku sha sawn la ya marit. :D

Jinghpaw lak chyoi laika shing n rai Kachin Encyclopedia

4 August 2009

Mana de, sara langai hte kan kata myen (lu ai hpan ntsin) rim bang let jahta byin ai.
O ra le ra lam jahta let, ya na myen laika hku lak chyoi laika ni galaw shajang taw sai lam ni ma lawm ai. Myanmar wiki hpe garum rit ngu ai logo hte pyi blog nkau hkan mu yu sai.

Dai zawn, anhte Jinghpaw ni kaw na ma hkrang loi shai ai ladat hte htawm hpang de na kashu kashu aru arat ni yawng akyu rawng na, mahta na, reference galaw na, sharin hkaja lu na matu magam bungli langai hpe galaw hpang wa na matu jahkrup ai.

Dai hpe Online kaw na mung shang lawm mai na matu anhte ladat shaw nga ga ai.

Ndai gaw Jinghpaw lak chyoi laika byin wa na matu Chyinghkrang tum langai rai wa na re ngu myit mada da ai.

Dai hpa rai? ngu ai hpe gaw ... Chyeju hte naw ala dingda ya marit. Hkyen lajang taw ai lam gaw shata mi hte shata kru daram na na re.

Myen rim bang ai ngu ai gaw, kan kata de lu bang ai hpan ntsin langai mi re lam kahtap sang lang dat ga ai. :P

Blog post ni mara mayu ai na sai. Connection wa le, ahkang n jaw taw ai yaw ...