21 March, 2010

Ginhtawng Shingni ... Yungwi Sumpyi

2010 ning March shata 21 ya

Mana March 20, hta gaw Dap Kawng nawku jawng kaw Ginhtawng Shingni ... Yungwi Sumpyi ngu ai Nu Num ni a mahkawn shingjawng poi de sa ai. Stage hpe hkrang shala da ai gaw grai tsawm ai re. Nbwisam gaw grai ra mat ai.

Kawa hpe waw nhtawm me, kata kaw wan pu ni bang da na galaw da ai. Made in Kachin jet jet nan rai sai law. Gara hpan re ngu gaw lawu de na sumla hte maren re.

Jahtum na sumla gaw nbwisam dung ai shara re majaw kachyi sha law galaw da na re. Dai kaw yu ai hte gaw hpa galaw ai re hpe soi sam mu lu sa na re. Shanwg nnan galaw ga ai re majaw, hkrak n hkrak pyi n chye shi ai. Myit mung loi kahpra taw ai le.

Dap Kawng Buga Hkalup hpung hta hpung lawk 10 nga ai. Dai hpung lawk langai kaw na Nu Num langai hku nna shang shingjawng ai re.

Hpawng hpaw akyu hpyi ngut ai hpang gaw lawu de na yungwi ninghkring ni gaw mahkawn buk 2 hpra mahkawn ma ai. Kalang ta gaw n re. Shingjawng poi lapran hkan matep na shangwi shapyaw ya ai re.

Bawm Win
Kareng Kai Din
Hkapra Hkun Awng gaw buk 3 mahkawn nu ai.
Nahpaw Htu San
Minzai Lum Naw
Dinghkang Lu Awn
Jumzang Hkawng Naw

Mahkawn shingjawng ai hta gaw Lawk 8 kaw na Kanu kana jan gaw No. 1 lu mat ai re.

Jinghpaw ni a yungwi generation gaw du na ban 3 ram du hkra gaw tsep kawp n tsang ra sai.
Raitim mung, hpaji hte seng ai lam ni hte masha atsam shaw let galaw ai amu bungli ni hkan e gaw grai naw shakut ra ai lam mu lu ai.

Happy birthday Lumimage

2010 ning March shata 21 ya

Shangai nhtoi kalang bai gu ai Lumimage a matu!
Lumimage hpe nnan hku hkau ai ten hta shi na mying hpe n chye hti ai majaw ( Lu mi ma ge ) ngu nhtawm me hti yu lai wa sai. :P Dai majaw chyam yu ga. Ndai blog post sa hti ai myitsu ni mung LUMIMAGE hpe gara hku hti (nsen pru) ai lam ka da ya rit.

Lumimage a shangai nhtoi gaw March 23, 2010 she re. Raitim mung dai aten hta nbwisam gaw net hte tsan ai shara kaw du yang du taw na re majaw tau hkrau kumhpa sa dat ai re. :) Lumimage mung blogger langai rai nna lawu kaw na LUMIMAGE hpe dip dat yang shi a blog de du na re.


Kadai gaw kadai hpe invite galaw na hku hkau wa ai?
Malap sai.

Raitim ... ... ...

Hkuhkau ai lam ni
Garum shingtau ya ai lam ni
Madat garum ya ai lam ni
Hkam sha garum ai lam ni
Hpaji jaw lam madun ai ni
N-gun jaw ai lam ni
lam law law a matu Grai chyeju dum dik sai.

Yesu ram kaba ai lam n raitim
Ngai zawn re ai
Jinghpaw ngaw-de nkau a matu
Lam langai mi lu tai u ga!

Grau nna
Ngai zawn re ai
Jinghpaw angawk nkau a matu
Hpaji lam hta dawhpum dawnu tai u ga!

Lamyan ni hpe mung n malap ai sha
Ngai zawn re ai
Jinghpaw anya nkau a matu
Amyu sha lamyan hta lunghkrung tai u ga!

Matut ... ... ...

Ramma ni a myit hpe chye na ya ai hte
Ngai zawn re ai
Jinghpaw Ramma myit rawt nkau a matu
Mai kaja lam de shanang lawm ya rit.

Anhte Ramma ni Pawt ja ai, Myit katu ai.
Ga shaga n chye ai.
Lagawn ai. Aput anun ai.
Maru marang re ai.
Raitim, shanhte hta e
Amyu hte Mungdan a matu
Shingran kaja ni ...
Hkrang shapraw galaw nga ai lam ni ...
Lawt lam a matu shakut shaja nga ai masing ni ...
Kun dinghku ting a lit hpe gun da ai bungli lam ni ...
Asak n ap, aprat hpe ap da ni Myu tsaw hpyen la ni (Tatut a gasi re)
grai law nga ai.
Chye na ya rit.
Garum ya rit.


Jahtum ... ... ...

Bai wa rit.
Bai gawgap ga.
Bai pawn ba ga.
Rawt u, nyip mat u.
Rawt ga, bai run kau ga.
nga nhtawm me n kaja ai de
Grai shakut shaja taw ai Ramma ni hte
Ta gindun lam woi arau shakut let ...

Rawt u, Htoi tu u.
Rawt ga, bai gawgap ga, ngu ai de woi awn shang lawm ya rit. (Chyeju hte)


P.S. Sumtsaw sumra lam ni mung garum lawm na gaw alak mi n tsun sai yaw. :D
Akyu hpyi ga gaw hkum tsup ai nrai. Ra rawng ai lam ni nga  yang mung mara raw ya rit.
Nbwisam

17 March, 2010

Shadawn Sharam Jai Lang Ra Sai

2010 ning, March shata 17 ya


Shadawn sharam jai lang ra sai ngu ai mahkawn album langai hpe mara dat ai. Blog a htum pa de sa nhtawm me Play dip jang mai madat sai.

Matsing: Mahkawn madu ni hpe ahkang n hpyi da ai sha mara da ai re. Jinghpaw mahkawn ni grai madat mayu ai nga manang nkau tsun ai majaw mara da ai. N ra sharawng ai rai yang gaw kalang ta yen ya na re.

Shadawn Sharam Jai Lang Ra Sai

Ah Ba Di - Myit Yu
Ting Luk - Shadawn Sharam Jai Lang Ra Sai 
Tangbau Nan Nan - Nu Hkrap Nga Ai
Dabang Ah Ze - Maroi N Ni Ai
Nding Ah Ja, Lagwi Yaw Myaw, Zau Mun Awng, Kareng Ah Roi Awng - Maka
Minzai Lum Naw - Grin Nga Na Lam
Awng Lar (SOUL) - Madu Myit Hte Myit Ga
Maru Zau Hpan - Anhte Lit
Nchyang Hka Ra - Grupyin hte Htunghking
Maran Seng Naw - Shingnip
Lagyawm Bawm Win - N Jaw Lu Ai
Kareng Kai Din - Hpa Galaw Na Ta?

N mai madat yang bai shana ya rit oi!!!

14 March, 2010

Jinghpaw

2010 ning March shata 14 ya,

Nam Nawn mare de sa chyai ai shaloi dem wa ai sumla nkau. Ledo lam makau kaw re. Namti kaw na nga jang minutes 30 daram hte du ai. Ndai sumla a gabaw hpe gaw Jinghpaw ngu jaw dat sai. Sumla hpe yu magang, Jinghpaw hte bung magang!!!


12 March, 2010

Lahta na post hpe sharai ai lam

2010 ning, March shata 12 ya

Laiwa sai post hta ka da ai lam ta Ga Jarit sin hpyen dap kaw na masha kaba langai a kasha jawng yu sam ai ngu ai gaw shut nga ai.

Kaja nga yang gaw; Ga Jarit sin hpyen dap kaw na Du langai mi 25 ning hpring masat hpung magam gun sai lam shagrau sha-a hkam la ai re nga chye lu ai. Dai Ga jarit sin hpyen dap kaw na shagrau sha-a hkam la ai Duwa gaw lai sai ten ni hta Hpung up magam mung gun hpai lai wa sai Hpung Up sara langai re lam mung na chye lu ai.

KTC de mung alu sen 20 daram jaw bang da ai lam n-gup ga hte na chye lu ai. (Teng n teng gaw hkrak n lu chye ai. Dai majaw ndai ga hpe gaw reference n mai galaw na re)

Lahta na post hte ngai ka da ai hta ra rawng mat ai re.

08 March, 2010

Ga jarit sin (NDA K) hpyen ma nkau a Lai Kyang

2010 ning March shata 8 ya

KTC a 60 lang na Chyum jawng yu poi de sa ai. Jawng yu poi galaw ai AD 2000 masat gawk nu de ngai sa wa ai. Gawknu makau kaw KSR ngu ai dazik hte mawdaw ni law law tsap da ma ai. Mawdaw langai gaw Jak sinat shakap da ai hpan re. Sinat sha n lawm ai.

Ga jarit sin hpyen dap kaw na nkau gaw hpyen hking hte re. Sinat mung nkau lawm sam ai. Tsun mayu ai gaw Chyum Jawng yu poi le. Dai daram gaw n mai ai gaw! KTC ni saw shaga da ai mung n rai. Ga jarit sin hpyen dap kaw na masha kaba langai a kasha kun mung jawng yu na re lam chye lu ai.

Tsun mayu ai lam gaw, salik (malut-hkayawm) aging lu taw ai lam re. Shara shagu re. Grau nna gaw, Sara kaba ni dung taw ai tingnyang a lahta de (nbung wa ai maga) de mung shanhte ni salik aging lu taw ai. Ala!

Kaning re nme law, dai Sara kaba ni gaw anhte a dawhpum dawnu ni, Myu hte Mungdan a matu grai ahkyak ai shara kaw tsap ai ni re le.

Wan hkungga jaw ai zawn she re. Gara hku nan n chye myit, n chye sawn ai masha ni she rai nga ai. Hpung hte seng ai wang kata kaw ndai zawn hpyen hking hte salik lu ti na, dai zawn re galaw ai ni gaw ....

Shawa masha nkau nga jang, tsawm ra mi pyi matsa bun ya ai re. Ngai na ningmu, nye a hkam sha lam hta mung dai zawn lai kyang galaw ai hpyen ma ni, dai zawn hpyen ma ni law ai hpyen dap gaw yi hku wan zawn she rai na re.

Makam mung n nga, hkungga ra ai hpe mung n chye hkungga ai ni a shawng lam gaw gara hku she rai na ta? Amyu sha ni hpe gara hku lam woi na ta? Shanhte a myu tsaw myit gaw gara hpan myu tsaw myit ta? Shanhte a hpaji lam n tsa myit lawm madang gaw kade ta?

Hpung shawa ni kaw nna Kam hpa hkungga ai myit tsep kawp n lu la ai ni gaw ga jarit sin hpyen dap ni rai mat sai. Grau nna gaw dai KTC jawng yu poi a hpang!

Pawt taw ai. Ka-un taw ai myit hte ... Nbwi SAM

60 Lang na KTC jawng yu poi mahkyen

2010 ning, March shata 7 ya


2010 ning, March shata praw 6 ya nhtoi hta Jinghpaw Wunpawng Chyum Hkaw Lik a 60 lang na jawng yu poi de sa du shang lawm ai.

Jawngma yawng 101 jawng yu ai re. Sara kaba Maran Ja Gun hpe Doctor janmau jaw ma ai.


Lamang ni gaw lahta na sumla ni hte maren re. Shawa masha ni mung law law sa ma ai.

05 March, 2010

Myi hprap wan shock byin ai.

2010 ning March shata 5 ya,

Mau sa. Mau sa. Mau sai.

Mana, March 4 ya hta ngai chyinghka pat dat ai shaloi hpri hte hkra ai hte myi hprap wan shock byin ai. Grai kajawng mat ai. Dai majaw, rau dung taw ai manang hpe mung dai chyinghka pat shangun ai. Shi gaw hpa n byin ai.

Dai ngut ai hte USB stick hpe computer kaw anyaw dat ai. Dai shaloi mung myi hprap wan shock bai byin sa. Wan nan kabrim wa ai. Lekma 2 jan daram pyi wan tu wa ai. Manang mung mu ai. Shi mung mau lawm sa.

De hpang lakang yu wa ai shaloi, lakang makau kaw na hpri hpe hkra dat ai shaloi mung, hkum she gari hkra shock byin mat ai.

Aga! mau sa. Hpa majaw kun?

04 March, 2010

Machyi ai. Jahkru ai.

March shata 4 ya, 2010 ning

Dai hpawt gaw grai jau ai aten hta e yup rawt ai. Rawt ai hte ngai na yup ra kaw n re law! ngu myit sawn yu taw yang gaw masha ni na yup ra kaw she atsawm sha shara la na yup taw ai rai re nga ai. Bai sawn yu yang, mana hkying 6 PM ram kaw na lu da ai tsi a majaw yup pyaw mat ai she rai nga ai.

humm ... report ni, budget plan ni, zuphpawng ni, lawan she shangut mayu sai. Baw sin ai hte hkum nau n pyaw ai majaw hpa mi galaw law myit loi kadun nga ai. Ya mung, jahpawt jau jau email hpaw dat ai hte laika gaw sumpum du taw sai.

Gang garawt la, hti yu, jep yu, bai jat bang, bai sa, bai tang madun! hummm... Putao de she bai mi daram wam hkawm mayu sai.

01 March, 2010

Miwa mung Manau poi sa ai JLH jawngma ni a mawdaw dagup

2010 ning, March 1 ya

PKCF email kaw na FWD lu la ai shiga re.
Dai gaw lawu na hte maren re.
Gara nhtoi re hpe gaw hkrak n chye lu shi ai.
Mi yet sha chye lu ai gaw, anhte nta htingbu kaw na jinghku kasha langai mung dai mawdaw dagup ai kaw lawm ai lam chye lu ai.

Tsawra ai manang ni yawng  miwa gumsan mung dan mang shi manau poi sa ai myitkyina dakasu na jawng ma ni jawn ai mawdaw langai gaw Yinjang hte Mangshi lam lapran hta hkaraw de daina de  galau shang mat ai lam na chye lu ai  laja lana hkala hkrum ai masha nga ai lam na chye lu ai, si ai gaw n nga ai da ya yang Leng Hou tsi rung kaw yawng tsi tsi hkam la ai lam. Chye lu ai yawng jawm akyu hpyi ya ga ngu!