Nnang nawn shing n rai earthquake

27.9.2008

Nbwisam langai yup mang tsawm tsawm hte yup pyaw nna rawt sms shang ai majaw rawt wa ai. Jahkring sha naw rai shi yang, ashun sai lo... ashun ai lo ... nu wei ..

4 lang kun? 5 lang kun? ashun ngut nna hkring mat ai. Rau nga ai manang gaw foxnews yu nga let, kajawng taw ai. Huu... praise the Lord.

N zim shi ai. Bai ashun ai. 4 lang. Nga ai nta gaw htap 4 kaw re.
Ya she nta npu de lagat yu mat wa na zawn, hpa she n chye hta jum mat ai.

Dai ashun ngut ai hpang gaw myit yu ai. Anhte ni mung shingra tara tsinyam hte seng nna hkaja da ra sai ngu sawn hkrup ai. Ya yawng na sai hte maren, Myitkyina de du hkra nan nnang nawn ai gaw htep wa sai.

Hka madim galaw nga ai majaw, hka mawru byin wa yang gara hku galaw na, hpa ni lajin da ra na lam ni hpe sharin hkaja ra sai.

Galaw gaw galaw ngut nna madu n chye ai ngu n mai tsun sai. Kran ai ni gaw kran ngut sai. Htu ai ni gaw htu ngut sai. Anhte n galaw ai lo. Anhte n lawm ai lo ngu na n mai marawn taw sai.

Anhte Buga madu ni ma galaw tim, n galaw tim, byin wa ai yawng hpe hkam sha ra na gaw anhte she re. Myit htum myit daw ai lam ni n rai ai sha, shawng de myiman yawng nna madu a kashu kasha ni prat hta mai kaja ai grupyin jaw da ya lu hkra shakut ga.

A ga, mungga zawn zawn, shiga zawn zawn rai mat sai. E le... loi myit yu na matu le.

Buga shakawn mahkawn ni hpe madat na n mai yup taw sai. Dai Buga shakawn mahkawn zawn byin tai hkra anhkau ni shakut yang she ngu nna ... ... aw chye anhkri ni ma lawm ai yaw ...

Gara hku shakut ra na ngu gaw hkum san nu yaw. Anhkau ni beer lu ai zawn shakut ai hta grau grau nna shakut ra na re.

KNG n mai hpaw taw ai.

26.9.2008

De,

Manang ni,

KNG n mai hpaw taw nga ai le. Kade na tim n pru wa ai. Gara hku byin ai ta?
Naw she tsun dan yu marit, chye yang ...

KNG website wa hkring mat sai kun? Gara hku ta? Jinghpaw shiga website nau n law ai she ngu yang ...

Typhoon shang, marang htu, computer n mai lang ...

25.9.2008

Keyboard n kaja na gram da ai computer ngut sai nga ai majaw kabu gara sa la sai. N myit mada ai sha, OS gaw bungli n galaw mat ai.

Product key hpyi chyu hpyi taw ai. A ga ... dai jak mung n chye na dik ai... Ngai pyi $ n lu shi na manang wa a Vista Home Basic bang da ai ngu yang she ... atik anang ... :(

Shinggan pru na loi se hkawm na re ngu yang she, nbung bung ai loi ja wa na, marang htu sai gaw e ... Mawdaw lam ting, hka ni hte hpring mat ai.

Rau nga ai manang wa gaw ... Oh God! The road is flooding... flooding ... ngu na marawn let shinggan pru na masing masa hpe dawm kau nhtawm ....
Ushan, yangyi, majap katsing kaba law, shakau hkyeng, jum, sau ni hte shana shat hpe mu mu mai mai shadu sha na abung alang re ai masha lahkawng yen kan sha masawp let, 2nd Avenue yu dat, FOX news yu dat, Jack yu dat, ga shaga dat, Obama hte Maccain hpe shatan dat re nga taw ai gaw mi yet du hkra re.

Hkying 10 du mahka gaw hkum kaw na gaya gayoi nga wa na, mawdaw lam nmaw de hka yawm wa sai majaw ma ... internet seng de lagat nna sa wa ai re. Ya gaw ... mu ai hte maren, aw chye ... hti taw ai hte maren ... Hkau Shanglawt wa blog kaw na Pawn Naw Awn a mahkawn ni madat let Wunpawng Fighter (Hkau Shanghtin a ga shap lang dat sai.) ni a blog shagu de sa chyai taw ai re. Kadai n saw shaga tim!

Adaw achyen nga da ai laika ngau ni mung yawng computer kata kaw re majaw ya aten hta n lu mara shi ai. Jinghpaw wunpawng ramma lam ni, Jinghpaw num hte la lam ni, blog lam ni ma grai bawngban mayu ai.

N myit mada ai sha, Singapore Lee Kwan Yu Policy jawng kaw lung nga ai shadang sha langai hte shaga byin ai. Shi tsun na she, Meritocracy ngu ai gasi hte hkau mat ai. Dai hpe myit lawm na loi tam hti yu yang ...
kadun daw gaw ... ningtawn ai wa hpe shawa kaw na shakawn nna aya jaw da ai lam ngu ga gale ra na kun n chye sai. Wiki kaw na hti mayu yang gaw ndai kaw Link

Kan mung bai kaw si wa sai. Daina na shana shat jau jau sha da na. Hkying 6 pyi n rai shi yang sha da ai le.

A ga ga ... Blog ai mung gumhpraw grai ma ra ai she rai nga  ai ...

ARA!!!

24.9.2008

Chye ai hte maren ... aw gara kaw na chye na ma i?

Nbwisam gaw loi shinglet galu ai re. Loi chye na ya marit.

Hkau Shanglawt a blog hta ndau da sai re. Raitim, shi tsun ai hte maren bai ndau shabra ya sai.

Gai gai, tsun taw yang na ai. Dip dat sa nu.

www.kachindictionary.com

Yawng jawm shakut ga.

Sara kaba Rev. Dr. Ola Hanson galaw da ya ai gaw Jinghpaw laika chyum laika ... nga ai hte maren !!!

Ya yu mu le, ndai nbwisam shinglet grai galu ai ngu sai.

Tara kasa Nangzing La a laika buk

23.9.2009

Laika buk

Tara kasa Nangzing La ka da ai laika buk hpe KTG ni ndau da ai.
Sara Nangzing La a hkyuk htawng kata na mahkrun madup ni hpe ka da ai laika re ngu KTG kawn chye lu ai.

Ngai mung bai ndau na.

Ndai kaw mai mari ai re. Ngai chyawm credit card mung n lu ai majaw n lu mari shi ai. Kumhpa jaw yang gaw kabu gara hkap la na re lam ma ndau dat ai.

Jinghpaw Num hte Jinghpaw La ... Daw lahkawng

23.9.2009

Ndai laika hte seng nna, Jinghpaw La, Jinghpaw num, mahtai tam ngu ai gabaw masum hte ka na.

Jinghpaw La

Jinghpaw la ni maka nan n kap ai.
Jinghapw la ni kani ya, tsa ya grai law ai.
Jinghpaw la ni grai lagawn ai.
Jinghapw la ni ...
Jinghpaw la ni ...
Jinghpaw la ni ...
Jinghpaw la ni n chye tsawra ai.

Hpa majaw ndai ga ni ngai na taw ai kun?
Daini byin nga ai masa hta hkan na ndai ga ni pru wa ai ngu sawn la ai.

Jinghpaw mung a sinpraw sinna de hkawm sa yu ai shaloi Jinghpaw num ni gaw lahta na nsen ni grai tsun pru wa ai. Grau nna gaw Jinghpaw mung a sinpraw hkran de re. Tsun ai ga hpe madat yu yang, Jinghpaw la ni gaw tara maigan amyu sha ni zawn magam bungli langai hpe mangan nga hkra n galaw ai.

Bungli loi galaw ngut jang hkring sa la ai aten grau law ai. Dai hta tsa chyaru hte len ai. Grau sawng ai ni gaw ka-ni, ya hpyen ni hte madu hkum madu jahten nga ai. (Ya hpyen = Miwa ga rai ang ai. Namhpam tsi langai re. Sub-state na ramma ni grai lang ai.)

Mau hpa ngu gaw n kam tsun ai. Hkrit tsang hpa langai gaw sinpraw hkran de hkawm sa ai aten hta, shayi sha nkau gaw Miwa la kaw she wa na ngu tsun ai law ai. Myen la ni, Sam la ni kaw wa ai ma nga ai. Ndai lam hte seng nna gaw ningmu grai law na re. Gashadawn, shinggyim masha re majaw madu a prat shimlam hpe myit mada ai. Tsawra myit ai majaw. Ni htep ai majaw. Majaw a majaw grai law na re.

Sinna hkran de sa yu ai shaloi gaw, Jinghpaw num ni ma Jinghpaw la ni hta n shayawm ai sha amu galaw nga ai hpe mu lu ai. Maigan amyu nau n nga ai majaw shada da mayaw htinggaw de ai sha law ai. Ya hpang de gaw myen ni hte htinggaw de ai ma law wa nga ai.

Jinghpaw mung a gara jut kaw na Jinghpaw la rai rai ... myutsaw myit n rawng ai n nga ai. Kadai tim amyu hpe tsaw ma ai. Dai wa me, hpa majaw anhte ni wa hkrat sum ai maga de, grau yawm ai maga de myiman yawng wa a ta?

Anhte a myutsaw myit, anhte chye na hkap la nna hkan shatup nga ai myutsaw myit wa shut nga sai kun? Langai hte langai chye na ai myutsaw myit gaw n bung hkat na re. Ngai chye na ai myutsaw myit gaw ...

Myutsaw myit rawng ai wa gaw madu hkum madu hpe ma tsaw ra ai. Hpa majaw nga yang madu nan mung Jinghpaw amyu rai taw ai le. Myutsaw myit rawng ai wa gaw madu a amyu hkrat sum na de man yawng let hkaraw de n ganawng bang ai. Myutsaw myit rawng ai wa gaw amyu hpe pawn ba na matu myit ai. Myutsaw myit rawng ai wa gaw madu hpa re, madu amyu hpa re ngu ai hpe galoi n malap ai.

Madu hkum madu n tsawra ai sha ka-ni, namhpam hte jahten sharun kau ai majaw Jinghpaw amyu ting hpe jahten ai hte bung ai. Dai zawn jahten ai Jinghpaw la law wa yang Jinghpaw amyu ting mat mat ai kaw kre na re.

Jinghpaw la ni lagawn ai i? Shinggyim masha re majaw lagawn ai ni gaw lagawn na, zet tsang ai ni gaw grai zet tsang ai ngu mu ai.

Jinghpaw la ni n chye tsawra ai i? Ngai mung dai gaw n chye ai. Chye chyang ai ni nga yang htai ya marit.

Jinghpaw la ni nkau gaw htenza nga ai. Nkau gaw shakut nga ai. Amyu ting a shawng lam hpe dawdan ya na mabyin hta Jinghpaw la ni gara hku shang lawm nga ai kun? Ndai gasan hpe shayi sha ni na mahtai ra ai.

Bai matut na ...
Ndai laika gaw hkum tsup ai n rai ... myit yu sawn yu na loi li pru wa na matu ...

Ndau laika

Daina de laika bai matut ka na ngu she, n myit mada ai magam bungli le wa na n ka byin sai.

Hpawtde she matut ka sa na re.

Jinghpaw Num hte Jinghpaw La ... Daw Langai

23.9.2008

Nanhte Jinghpaw la ni hpa lu galaw ya ai ma?

Jinghpaw num ni hpe lu makawp maga ya ai i?

Ya ngai hpe Jinghpaw la ni n ra nga ai gaw!!! Ngai hpe tsawra ai maigan wa de she wa na rai nga le ...


Manang langai hte shaga ai shaloi shi tsun wa ai ga.
Shi hte shaga ngut ai hpang ningmu ni ... sumpum sumpam ...

Bai matut na ...
Daina jang bai ka matut na re ...