Hpyen Du shalat jawng laika dum a matu madi shadaw garum ga @ Hpaji bunghku ngang kang u ga !!!

2012 ning February 14 ya

Ndai laika hpe ngai dinghkrai mu mada ai hte maren, ka nhtawm blog kaw mara ai re.

 Hkahpawk Camp (Sumla: Nbwi SAM)

Jinghpaw Wunpawng Gumrawng Gumtsa Mungdan a Hpyen Du shalat jawng hpe 2005 ning kaw nna hpaw hpang wa ai lam chye lu ai. 2005 ning masat yan (1) kaw na, daini masat yan (5) du hkra rai sai re.

Hpyen Du shalat jawng hpe Woi Chyai bum ntsa hta gawde da ai.

Ndai lang hta Hpyen Du shalat jawng kaw amyu shayi ni mung sharing hkam la hkyen ai lam chye lu ai.

Ya aten hta, Hpyen Du shalat jawng kaw laika dum grak lagra n nga shi ai re. Ya aten hta, Laika dum hkrak hkrak re ai nga ra sai raitim, Laika buk ni mahkawng da magang let, laika dum nta hkrak hkrak galaw na shajin nga ai lam mung matut chye lu ai.

 Mawhke hka (Sumla: Nbwi SAM)

Manang ni e,

Mungkan hta hpyen dap kaw na woi awn let, hpyen du ni woi awn let mungdan hpe sha-ngang shaking gawgap sa ai lam ni nga ai zawn, mungdan hpe hten bya zang ayai hkra galaw sa ai lam ni mung nga ai.

Mungdan hpe hten bya zang ayai dip up ai lai ladat ni galaw ai ga shadawn hpe, Munghpawm Myen mungdan hpe yu maram nhtawm chye lu ai.

Manang ni e,

Mungdan shagu hta Hpyen dap ngu ai Institution gaw ngam da n mai ai, grai ahkyak ai, sha-ngang shakang ra ai re. Hpyen la, Hpye Du ni yawng shi a dinghkrai machye machyang grau hpring magang, shi a matu, shi dinghku a matu, Amyu, Mungdan hta rawt jat, mai kaja ai lam ni grau byin pru wa na re ngu, mu mada ai.

Ndai shingran hpe marit ai.

Hpyen Du ngu ai gaw Awn ai atsang hta tsap wa ra ai hta n-ga, shi a magam lit rai nga ai, Amyu, Mungdan hpe makawp maga let, anhte a shinggyim wuhpawng a ngang kang ai lam de sa ai hta daw chyen mi shanglawm ra nga ai re.

 Asak apnawng mat ai ni a matu masat dingsat (Sumla: Nbwi SAM)

Manang ni e,

2006 ning hta, Hpyen Du shalat jawng lung nga ai manang langai hpe laika buk langai shagun ya ga ai. Shi bai shana wa ai lam gaw; dai laika buk du ai hte marai 7 ram jawm kashun ai majaw, galoi je mat ai. Shi pyi kalang ta n lu hti ai. (5) ya la nna she hti ra mat ai lam shana wa ai.

Jinghpaw Wunpawng Mungdan a Hpyen Dap ni hte Hpyen Du shalat jawng ma ni, sharing sara ni …

Laika kut nga ma ai.

Laika kut ai ngu ai gaw kani/ya-hpyen kut zawn sha hkam sha yak ai.

Grau nna gaw hpyen hte seng ai laika buk ni, zai ladat hte seng ai laika buk ni, sut masa, mung masa hte seng ai laika buk ni madi shadaw lu hkra shakut sa wa na matu saw lajin mayu ai.

Ya hkyak hkyak gaw, English laika hte sha ka da ai laika buk ni hpe yawng lu hti na matu n jin shi na re majaw, Myen laika, Jinghpaw laika hte ka da ai laika buk ni she grau manu na re.

Manang ni e,

Anhte gaw tinang a Hpyen Du shalat jawng hpe West Point hpyen dakkasu zawn shingran ga ai rai yang, lai di ra ai aten, mahkrum madup law law re. 

Cadet Library Link

 Hpyen Du Shalat Jawng (Sumla: Nbwi SAM)

Manang ni e,

Anhte a Hpyen dap, Hpyen Du shalat jawng hte sharin sara ni laika kut nga ai hpe hparan lawm ga! 

Anhte a Hpyen dap, Hpyen magam gun ai ni yawng a machye machyang htau li htau la grau jat wa hkra, madi shadaw garum ga!

Daini, hpawtni, htawm hpang, prat dingsa Karai jaw da ai anhte a Mungdan hpe makawp ai bunghku hpe grau ngang-kang hkra gawde ga!!!

Nlung bunghku mung shachyaw ga!
Makam bunghku mung grin u ga!
Hpaji bunghku mung ngang kang u ga!

 Dinghkrai ladat hte mung laika buk ni garum ga.
 Gara mungdan kaw na raitim, Laika buk, Alu gumhpraw jaw garum mayu ai ni nga yang nbwisam@yahoo.com de matut mahkai mai ai.
Lit ang ai ni hpe matut mahkai, shalai jaw nhtawm, nau nna ai aten hta, alu jaw ai ni hte hkap la ai ni ading tawk matut mahkai lu na mahkrun (panel) hpaw lu hkra lajang la ga.

Nbwi SAM

Lamyang mare hte Ramma ni a hpaji shingran

2010 ning January 28 ya

Lamyang mare kaw na ma kasha ni hte Ramma ni a hpaji shingran....
Laika hpe gaw gau ngwi she mara sa na. Sumla hpe madung yu ya marit.

Ngai dem da ai ndai sumla ni kaw na htum pa kaw na sumla hpe grau ra ai. Shi wa, dai ma kasha wa ... yawng shinggan pru mat na ginsup na ri ri rai taw tim, a katsi zim mau dat, dung dat, ora lang dat, ndai lang dat hte ... hpa majaw kun? Ma kasha e ... ... ...

Sumla yawng daram ra ai law. Lahta kaw na sumla langai hta, ma kasha gaw anhte jaw sha ai "dwi tawng" (Candy) hpe n-gup de kabai kang taw ai ten re. :D

Nbwisam Hpaji shakat fund jaw na!!!

27 August 2009

Gabaw hpe hti yu na grai ahtang hkum kaba mat yaw. Lawu de na laika naw hti yu u. :D

Hpaji shakat fund ni lu jaw hkra shakut na ngu myit yu ai.

Kade wa gaw n re law. English sharin na matu ja gumhpraw n nga ai ramma ni, kaja nan mung sharawng awng let shakut mayu ai ramma nkau a matu yaw shada ai re.

Ya, jaw na matu sawn da ai gaw 5000, 10000 ram sha naw re. Hpa majaw nga yang, ngai mung ja gumhpraw grai law law n lu shi ai majaw re. Ngai shata mi shang ai gumhpraw a htam shi hpe hpaji shakat fund hku na jaw na masing re. Shang gumhpraw law yang law ai hku, grau dam lada ai hku galaw wa na myit ai. Myit sumru ding yang naw re.

Shang gumhpraw law na matu gaw Maigan de she sa ra na kun? Ndai gaw shangun ma sha naw galaw taw ai majaw gaw shang gumhpraw gaw tau chye chyalu rai taw ai. Limited rai taw ai. haha... raitim le, ya kaga bungli ni ma naw galaw yu na re.

Aten galu lu jaw na kun? Kade ram wa lu jaw ya na kun? Akyu gaw rawng na kun? Hpa hpa nya nya... ngu ai lam ni sawn taw ai.

5000, 10000, nga nna hkum gaw mani haha ya yaw. Myitkyina hte Waimaw hkan 4000, 5000, ram sha shabrai la nhtawm, English sharin ya taw ai sara ni, wuhpung ni nga ai.

Raitim, dai $ 5 ram ngu na Kyats 5000 hpe pyi n dang di ai Ramma ni sumpum sumpang nga taw ai re. Dai ramma ni a matu yaw shada ai.

Hpa gaw n re law. Nsa naw sa taw ai aten, asak naw hkrung taw ai aten hta sha pyi, madu a amyu, mungdan hte mungkan ka a matu akyu rawng ai lam loi li galaw da mayu ai majaw re.

Shakut na re.

26 July 2009

Lai wa sai shani hkan gaw internet connection wa, lapawp hta pyi grau ai majaw daini she blog post lu mara sai.

Cbox kaw Hkau Hugawng ka da ai hte maren, anhte myu sha ni a matu Chyum jawng n re ai jawng gaw lani mi lu nan lu hpaw wa na re.

Myu sha ni hte seng ai, Chyum jawng n re ai jawng ni pru wa na re. Dai zawn byin pru wa hkra mung Ramma ni, hpaji chye sai ni yawng jawm shakut ra na re. Buga kata kaw na ni shakut ra ai zawn, maigan kaw du nga sai ni mung hpaji lam, ja gumhpraw lam ni arang jawm bang ra na re.

Jinghpaw mung na mare kaba shagu hta Jinghpaw Dakkasu nga wa hkra jawm shakut ga.

Manang ni gaw tsun ai. Mai byin na lam grai yawm ai da. OK !

Ya naw yu yu ga le. N shakut yu shi ai kaw na me, n mai byin na lam chyu tsun taw nga ai amyu gaw masha a mayam chyu prat tup tai, nchyang tai na mat na re.

Jinghpaw Ramma ni jum tek da ra ai gat lawk langai

9 July 2009

Jinghpaw mung a daju gaw Myitkyina.

Ndai shaning laman Myitkyina hta machyu nga ai masha gaw sen 3 hte de a lahta de pyi du wa na zawn ... Buga masha ni hte, manam ni ma rai nga ai. Maigan amyu Miwa hte Gala ni mung lawm ai zawn, Russia hte Thai ni hpe mung n dum shami mu hkrup wa sai.

Myitkyina a gat lawk ni hpe yu yu yang...

Gunrai hte bu hpun palawng, ja gumhpraw, hpai da ai amu bungli ni hpe gaw Miwa ni ka-up da nga ai.

Hpri, Tsi, gunrai jahkraw, lawu tsang amu, seng kaji hpaw sha ai lam hta gaw Kala ni jum da ai.

Myen gaw shara shagu hta shang lawm ai.

Jinghpaw ni gaw? Nye a ningmu hta hpa gat lawk ngu na hpe mung atsawm n lu nga ai. Jinghpaw ni grai lu ai Ka-ni nanghpam hpe pyi maigan amyu ni she jum da nga ai.

Dai majaw ...

Anhte ni hpa hpe lu jum tek na ta? Langai sha nga ai.

HPAJI re. Hpaji hte seng ai gat lawk, magam bungli ni yawng hpe anhte lu jum tek da lu hkra shakut nan shakut ra ai. Dai gaw anhte a myit mada shara, myit shingran ni a matu nan rai sai.

Hpaji hte seng ai service ni hpe jaw na. Dai kaw na jawng kaji, institution madang ni kaw na Dakkasu kaba lahkam de ... (Shingran gaw grai hkrak nga sai. :D )

Ndai shaning hkan grau mu mada ai. Maigan amyu ni gaw hpaji hte seng ai lam hta grau arang bang wa nga ai. Raitim, malawng gaw lahta tsang madang hpe grau n-gun dat ma ai. Madung gaw Tsang 10.

Hpaji hte seng na n-gun grai dat ra ai lam gaw shapau na n kam ka sai. Hpa majaw nga jang, ndai laika hpe sa hti na malawng gaw ngai hta hpaji chye ai hkrai re. Maigan ga na ni malawng ai.

Buga kata hpaji lam hta arang grai lu bang hkra shakut yu ga law. Hpaji arang, ja gumhpraw arang ni grai bang ra na re.

Ya aten, mungdan kata hpaji gat lawk gaw kaba dik ai SUT MASA gat lawk mung rai nga ai.

Chyum mungga hte maren, hpaji hpaga ga ai gaw ja lungseng hpaga ga ai hta grau nga ai.

I Believe, King-Obama tribute and R. Kelly

25 January 2009





Ndai post n hti shi yang, lapai maga de mara da ai I Believe ngu ai mahkawn (langai hpang langai) hpe shawng hpaw, madat let hti ga. Raiyang she, myi hte bawnu sha bungli galaw ai n re sha, na hte salum a hkam sha lam ni mung bungli galaw na re.

Yupmang langai nga ai ngu na Martin Luther King Jr. gaw tsun wa ai.

Daini ...
Ya jang jang nang yu dat yang ...
Kaja nan shi yup mang ni hkrang shala taw nga sai.

Yupmang ngu ai gaw n mai si ai ... Mai kaja ai lam de madun nga ai, mungkan hpe rawt jat shangun ai yupmang ni hpe atsawm lanu lahku ra ai.

Daini na ten, shi mu wa ai yupmang hte maren ... ndai mungdan hta shan hpraw, shan chyang ni yawng saboi langai hta shat rau sha taw sai. Grau dan dawng nga ai gaw ya dai mungdan hta kaba dik ai magam lit, mungkan ting hta ahkyak ai magam lit hpe gun hpai taw sai wa mung shan chyang rai nga ai.

Shingran yupmang!

Jiwoi Jiwa ni shingran yupmang nga wa ai hte de a matu gasat wa ai. Shakut wa ya sai re. Dai hte maren prut pru nga ai ramma ni, ban hte ban shakut wa ai. Shakut wa ai marang e, ya daini hkai ai hte maren nsi naisi ni lu di sha sai re.

Ndai gaw Amerika mung kaw na shan chyang ni a hkrunlam kadun mi rai nga ai.

Jinghpaw ni gaw taw?
Ngai ka yang hkum tsup na n re. Madu a ningmu hte hkap la hkan sa ai lam hta hkan na sawn dinglik yu ga law ...

Anhte a Jiwoi Jiwa ni a yupmang shingran ni hpe ma sawn yu ga.

Masha law law chye ai yupmang ni nga ai zawn ni nawn ai grupyin sha chye ai yupmang ni ma nga na re.

Masha law law chye ai yupmang ngu ai gaw, ga shadawn; shalawt ya na matu shanglawt hpung hpaw ninghtan let gasat wa ai. Mungdan bai gaw gap na matu shakut wa ai/ nga ai.

Raitim mung, anhte amyu sha ni gaw dai yupmang langai hte sha n mai myit dik nga ai. Shingran yupmang ni law law nga ra nga ai. Lam shagu hta hpang hkrat taw ai majaw re.

Nkau gaw shanglawt shingran mu wa sai. Nkau hkan shatup shakut nga ai. Dai hte rau, nkau gaw media yupmang mung mu ra nga ai. Nkau gaw prat dep hpaji a matu shingran nga ra nga ai. Nkau gaw mungkan gawdin ninggang kashun poi hta Jinghpaw ni awng padang lu na yupmang mu ra nga ai. Kachyi sha law ai amu kaw na, kaba dik ai magam du hkra yupmang mu ra nga ai.

Yupmang mu ai hte sha n-ga, tatut hkrang shala yang she htawm hpang de masan sa na re. Ya aten shakut shaja taw nga ai Kachinland shiga dap ni ... nau nna ai aten hta CNN ni zawn tai wa hkra shingran mu ra nga ai. Shingran mu let galaw ai ma rai na re. Hkai ai hte maren lu dan hkra shakut ra nga ai. (Akoi... hpaji ni sa jaw hkrup sai. Shalai na she hti dat nu yaw.)

Naw hkring na re. Matut ka yang Hkau Shanghtin ni, AP ni mung lawm wa sa na. Dai zawn rai sai, ngai na post ni gaw gara de mung n jau jau re mat ai. Sa hti nna myit tsu, myit ru mat jang mung grai hpyi nem sai law.

Link: http://www.speedyshare.com/708501797.html
Link: http://www.6lyrics.com/music/r_kelly/lyrics/i_believe_obama_tribute.aspx
Photos: www.images.google.com kaw na tam la ai.

Buga kata na hpaji lam III

17 January 2009

Kawng Ra mare hta du ai shani gaw laban shani re majaw jawngma ni hte n lu hkrum shaga da sai. Jawng gaw hpri tsut jawng re. Hpyen asuya hpaw da ai jawng re.

Ting Kawk kaw na jawng gaw Hugawng pa hta hpyen asuya ni hpaw tawn ai jawng kaw na ram ram hkrak ai jawng re. Lapran tsawn jawng rai nna jawng up saranum gaw lawu ga na re. Rip kawp tara ma grai nga ai hte jawngma ni a hkan nang hkan sa ai lam mung grai hkrak nga ai.
Dai jawng hta 99% ram gaw Jinghpaw Wunpawng ni rai nna hpyenla kasha loi li gaw maigan amyu ni re majaw Jinghpaw ga hte ma mai matut mahkai nga ai.

(Ndau ai gaw n re. Raitim, chye ging ai shadu ai majaw ndai lam hpe ma ka na nngai.)
Dai mare hta, shayi sha langai mi hpe mu wa ai. Shi mying gaw Ze Nyoi re. Tangbau kasha re. Shi gaw, kaji ai aten hta lagaw machyi mat ai. Kanu Kawa ni atsawm gawn lajang ai lam n nga ai majaw lagaw gaw loi kaji mat na lam n mai hkawm mat ai. Dai majaw ya aten hta gaw lahput hpe lang let hkawm nga ai.

Myi hta mu hkra tsun ga nga yang, wa hkawm hkawm ai hpa hput di nna lata hte hkawm nga ai. Laika sharin ai lam hta gaw grai ningtawn ai lam chye lu ai. Asak gaw 18 rai nna Kawa machyi mat ai majaw jawng hkring kau na dai shaning she bai matut lung ai re nga chye lu ai. Kanu sha yi hkyen let shakut ya taw ai re lam chye lu ai. Tsi saranum grai byin mayu ai nga nna tsun ai. Hpaji lam hta grai sharawng ai num kasha langai re.

Ndai zawn re jawngma ni a matu anhte nan shakut na jaw ai Scholarship ni lajang ra sai. Jinghku n daw, sai n bung ai maigan ni pyi anhte hpe scholarship nga nna grai jaw ai. Anhte shada mung hpaji shakat kumhpa ni law law, tut nawng lu jaw hkra galaw sa wa ga.

Nawng Mi mare gaw shanglawt hte myen majan a majaw mying gunhkawng nga ai. Jawng langai nga ai. Lapran or Lawu tsang jawng re. Hkrismat galaw nga ai aten re majaw nyep baw baw re jawngma ni (snr) nau nna ai aten na ningbaw ningla ni hte rau shat kashun sha wa sai. (Ningmu n nga ai.)

Dumbang mare gaw mare kaba rai nhtawm htinggaw 500 hkawt du wa sai mare re. Lahta tsang jawng nga ai. Jawng up saranum gaw Jinghpaw rai nna Zi Lahpai kasha re. Tsang 10 jawngma ni hpe Nov shata ram kaw na nta kaw n yup shangun ai sha jawng kaw sha yup shangun na ni htep ai hku hte grau nna awng dang na matu sharin ya nga ai.

Raitim mung, shaning shagu a tsawn 10 awng ai jahpan gaw lak lak lai lai n jat wa shi ai lam chye lu ai. Jawngma ni gaw asak sha kaji tim, hpaji gaw n loi ai nga ai hpan re. Madu a jasat hte grai naw shakut ra ai ngu mu mada ai.

Buga kata na hpaji lam II

17 January 2009

Danai hta gaw hpyen asuya hpaw ai lahta tsang, lapran hte lawu jawng ni law law nga ai.

Makaw mare hta gaw lawu tsang jawng sha nga ai. Jawngma ni loi law ai. Jawng gaw kawa shakum hte shangu ga-lup da ai re.

Shinglung ga hta gaw lawu tsang jawng nga ai. Wut dek jawng re. Company langai mi alu jaw da ai nga ai. Htap langai sha rai nhtawm kata kaw jawng gawk garan da ai lam n nga ai. Jawng tsang ni gaw; kaman kaw na 3 du hkra re. Dai majaw gawk 4 zawn gaw n raitim, dung lahkum yan 4 hte laika ka pa kaba 4 re. Jawng saranum ni marai 3 nga ai raitim, 2 daram gaw langai mi hta shata 10 ahkang hpyi da ai.

Dai majaw saranum langai mi sha, tsang kaman kaw na 3 du hkra sharin ya nga ai. Myi kaw mu hkra nga jang, hkau soi lajang taw ai seng madu hpa le. O ra de lagat na sharin dat, ndai de lagat na sharin dat hte dau yin hkawm nga ai. Ndai kaw sharin nga jang, o ra maga de ga law hkat, htim hkat, amya hkat taw sai.

Dai hparan dat, bai sharin dat hte re nga ai. Anhte du ai aten hta, saranum hta ma langai mi lu da nna kan kata kaw langai mi gun da nga ai. Marai langai sha jawng gawk 4 (Gawk gaw n kum da tim) hpe grai shakut shaja let sharin ya nga ai re.

Laja Bum mare hta gaw lawu tsang jawng nga ai. Jawng saranum katsing hprap hprap langai mi mung mawdaw ntsa na yu rai na du wa, anhte ni mung Tarung ga kaw na lagaw lam hkawm na du wa rai nhtawm hkrum la sai. Lahta na jawng ni hte maren, hpri tsut n nga ai jawng re. Jawngma ma n law ai.

Tarung mare gaw KBC a jahtum mare re. Lapran tsang jawng nga ai. Jawng up gaw Naga amyu sha rai nna hpyen asuya hpaw da ai jawng re. Rip kawp tara hkrak ai jawng langai re. Sara/num ni hkum hkum tsup tsup re jawng re. Jawng kaw Jinghpaw ga malawng shaga ai.

Htangbra mare gaw lawu hte lahta ngu na nga ai. Mare 2 pawng yang she jawng langai nga ai. Jawng gawk mung langai sha re. Bus mawdaw langai ram pyi n kaba ai. 2006 ning shaloi gaw jawng kaw jawngma langai, saranum langai hte hpang wa ai. 2007 ning hta gaw saranum langai hte jawngma marai 6 rai wa sai. Makau grupyin hta Pat maw (Padi snr Pa-yin) pru ai majaw hte ga sau grai kaja nna hkau na galaw ai ni a majaw masha law wa ai mare re.

Namhkam (Nambyu) mare hta lapran tsang jawng langai nga ai. Jawng gaw wut dek, hpun pyen hte htap lahkawng re ai jawng re. Shanglawt ginra re majaw shanglawt ni woi awn ai jawng re. Jawng sara/num 10 jan nga ai hte jawngma ni law law gaw English ga kam brawp ma ai. Ja maw ginra re majaw jawngma ni jawng n sa ai sha, ja htu dat, sumla yu dat, kani lu dat, hpai da dat re na mung grai galaw ma ai.

Buga kata na Hpaji lam

17 January 2009

Ndai laman shana n mai yup ai. Shakut na yup tim n mai ai. Lama mi hpe bai myit taw ai majaw re.

Anhte a hpaji lam!

Hpaji lam ngu tsun yang hpaji chye ai ni pyi n law shi ai amyu re majaw gaw htum pa de na hpaji lam hpe grau myit ai. Ngai kaw na gara hku lu garum ya na hte gara zawn re ai lam ningnan ni hpaw ya lu na matu myit taw nga ai.

Dai majaw Jinghpaw mung kata de ngai du hkawm yu sai buga kahtawng ni kaw na jawng ni hpe bai sawn dinglik yu nga ai.
Ndai laika hta sharin achyin nga ai hpaji masa hte de a akyu ara lam ngu na hta sharin sara hte jawngma ni a lam hpe madung sawn yu na ka na re.

Ndai kaw ka ai jahpan chyarang (Data) ni gaw yawng tup hkrak jaw ai nrai. Shut shai ai lam ni nga yang laika ka ai wa a lit re.

Ngai du hkawm yu ai Jinghpaw mung na mare malawng hta jawng ngu ai hkrak re na nga ai mare kahtawng n nga nga ai. Ya hpang de gaw wutdek nta ni loi li hte rai wa ai gaw mu ai. Dai gaw hkrang sha rai nga. Kawp sha re ngu tsun mayu ai. Kawp gaw n ahkyak a ni, nga jang gaw kawp ma ahkyak nga ai. Shaning shagu jawng nnan bai gap na matu n htap htuk nga ai.

Kawa hte shangu ga-lup da ai jawng ni malawng rai nga ai. Rai sa, dai jawng ni hta sara/num ni kade daram nga a ta? Aten hpring jawng sara/num ni marai 2 hta lai na nga ai jawng gaw grai taw re nga ai. Htinggaw 300 ram nga ai mare kahtawng ni hkan gaw sara/num ni hkrak re na gaw lu ma ai.

Htinggaw n law ai mare kahtawng hkan gaw sara/num ni gaw tsi tai nga ai. Sara/num law law wa gaw ja gumhpraw ngu na alak mi lu la ai lam n nga ai sha, kaja nan ap nawng taw nga ai rai nga ai. (Hugawng pa ting hte Jinghpaw mung sinpraw maga na mare kahtawng nkau mi hpe lakap let tsun ai.)

Lai wa sai 2007 ning Nov-Dec aten hta Hugawng pa ting chyam hkra gala hkawm yu sai. Maji bum hta mare kahtawng 3 nga ai. Gawlun, Danai yang, Zupra ngu ai 3 hte pawng yang she htinggaw 150 jan jan sha nga ai. Danai yang kaw jawng langai nga ai. Yawng dai jawng ka sa lung ra ai.

Dai jawng hta jawng up sarama langai nga ai. Jawng sara/num yawng 6 (shut yang shut na) nga ai. Dai kaw na 2 ram gaw aten tup daram ahkang hpyi na, n nga ai law ai. Dai kaw na jawng sara langai gaw tsang shi awng da na dai kaw bai ap nawng taw ai re. Dakkasu matut lung na matu mahkrun tam nga ai. Mying gaw Tang Gun nga nna Lahtaw kasha re.

Sut Awng ngu ai mare gaw Danai hka hku yawng hkrat wa yang, Awng Lawt n du shi ai kaw na mare re. Jak li hte rai jang hkying hkum mi jan yawng hkrat ra ai. Htinggaw nau n law ai sha, bai kahkyin da ai mare re. Jawng kaji langai nga ai. Myi hta mu hkra tsun ga nga yang jawng ting gaw, mare kaba hkan na jawng gawk langai daram pyi n kaba ai. Sara kade nga n nga n san hkrup mat sai.

Awng Lawt mare gaw Hugawng pa ting hta rip kawp tara hkrak dik mare re lam chye lu ai. Lahta tsang jawng langai a hkrang hku nga nna sara/num n-gun hpring hpring hte sharin ya nga ai. Raitim, sara/num n law ai lam hte ahkang chyu hpyi shaja ai lam ni na chye lu ai. Lapran tsang jawng ngu mying shakap da ai.

Shanglawt ni hpaw da ai jawng rai nhtawm, mu ga ai shanglawt jawng yawng hta rip kawp hkrak dik ai hte zen ai jawngma law dik ai jawng ngu na masat hkrup ai.
(Awng Lawt mare kaw na shani chyen mi daram lam hkawm yang Kap Dup ngu ai ja maw de du ai. Jawngma ni a pyaw len ginra langai ma re.)

Kap Dup ja maw hta jawng gaw n nga ai. Raitim, ma shalet jawng nga ai. Sarama langai mi woi awn sharin ya nna ja htu ai masha ni a kasha ni hpe sharin achyin ya nga ai.

Cultural Nationalism hte Political Nationalism

4.12.2008

Anhte nga pra taw nga ai ndai mungkan hta lamu ga jarit ni masat let uphkang grin nga ai mungdan law law nga ai. Mungdan ni hta uphkang masa gaw n bung nga ma ai. Nkau mungdan kaw gaw shawa lata uphkang masa (Democracy) lang ai. Nkau hta gaw hkawhkam uphkang masa, Communist, Socialist, hpyendap, ... hkum sumhpa re. Uphkang masa gaw hpa re ngu tsun sanglang dan n mai ai uphkang masa hte uphkang taw nga ai mungdan nkau mung nga nga ai.

Mungdan ngu ai hpa hpe tsun a ni? Mungdan ngu ai ... masat masa nga ai hte madu tawn da ai lamu ga, shaga ai aga, jai lang ai hunghking, dai aga hte htung hpe jai lang ai wuhpawng hpe tsun ai. (Ntsa lam re. ndai lachyum she jaw ai n rai.)

Dai rai yang mungdan hpe gara hku hpawng chyawm wa a ta? Tsun shaga ai aga bung ai, htunghking bung ai shada kahkyin gumdin la nhtawm madu hte htuk manu ai uphkang masa hte gaw shachyaw wa ma ai. Ndai gaw ntsa lam na mungdan law law paw pru wa ai lam re.

Dai mungdan ni hpe gaw htunghking masa mungdan (Cultural nationalism) ngu na ma shaga ma ai. Ga shadawn; Germany, Miwa hte Taiwan, Korea. Ya aten Miwa ni garan taw ai, Korea ni laksan rai taw tim tsun shaga ai ga, htunghking ni gaw bung pre nga ai. Masha nsam mung bung pre nga ai majaw lani mi na aten hta langai sha bai mai byin ai. Germany gaw mungdan langai sha bai rai mat sai. Ndai gaw htunghking masa mungdan ngu tsun mayu ai.

Political nationalism hpe Jinghpaw hku gara hku ka na atsawm n chye ai. Ndai ga si hpe nau ma n jai lang ma ai. Masa hkan ai mungdan ngu tsun yang mung loi dawng dawng nga ai.

Moi gaw Slav amyu lakung lama ni Soviet Russia (USSR), Yugoslavia ngu ai zawn re paw pru wa sai. Dai mungdan ni gaw mung masa hte ru jung na gawde wa ai mungdan ni rai nga ai.Ya chyawm me, yawng zang ayai mat nhtawm, laksan mungdan hku nna daini mungkan hta tsap taw nga masai.

Dai hta n-gun ja ai wa gaw n-gun kya ai wa hpe dang sha mayu ai ni naw byin nga ai. Russia Vs Georgia majan, shata man 8, 2008.

Ngu sa ga. Ndai masa hte gaw de da ai Asha dan (Asia) mungdan hpe tsun ga nga yang, adan aleng mu lu ai gaw Munghpawn Myen mungdan re. Munghpawn ngu ai gaw Union nga ai lachyum re.

Ndai munghpawn mungdan hta amyu rusai law law hte gaw de da ai re. Hpa majaw ndai zawn gawde wa ai labau hpe gawn yu yang, mung masa a marang e ya na zawn munghpawn hku nna nga pra sa wa na ngu yaw shada let rai nga ai.

Bai matut na ...

Ndai laika ngau a matu website hkan na, hti ga ai laika hkan na mahta let nye a ningmu hte kapyawn na ka ai.