Hkyen bum ni ...

2013 ning November shata 22, bat manga ya

Ngai sharawng awng ai hkyen bum ni ...

 

Maga Yang hpyen-yen dabang

2011 ning September 14 ya

Maga Yang hpyen-yen dabang sumla nkau

July 31 ya shani du shang wa ai hpyen-yen ni

Sumla (S. Htai Htai)

 Hpyen-yen tim, hpaji hpe n tat

Sumla (S. Htai Htai)

 Jinghpaw laika sharin ya nga yang

Sumla (S. Htai Htai)

Ahkyak ai namdum hte jut dum\

Sumla (S. Htai Htai)

Ballantine's (Bangkok)

2011 ning July shata 3 ya

Bangkok (July 01, 2011)

July shata langai ya, 2011 ning

Hkying hkum (4) ram mawdaw jawn ngut ai hpang Bangkok mare kata de kalang mi bai shang wa lu sai. Ra lata poi a majaw palawng ahkyeng hte palawng ahtoi ni ja ji ja gang shakut nga ma ai.
Mawdaw ni lam ntsa hpring chyat!

Bungli hte hkaja lam, kalang bai hpang sai rai.

Blog mung bai mai lang sai rai!

Hong Kong Nbungli Pa

2010 ning December shata 9 ya


Hotel kaw na Nbungli pa de Free Shuttle Bus service nga ai. Gumhpraw tsep kawp n jaw ra ai. Hotel kaw manam ai ni a matu re. Hotel kaw na tinang hkawm na nhtoi n du shi yang 2 ya ram kaw na tau hkrau tsun da yang kaja ai. Tinang jawn na Airlines hta hkan nna gara Terminal re ngu ai hpe shanhte sa sa ya ai re.

Nbungli pa kaw gaw Immigration lai ngut ai hpang gaw wanleng hte bai sa ra ai. Lakang kaw ka da ai gaw Relax! Train will arrive in every 2 minutes nga kun re.

Check-in galaw ai shaloi hkan mung arung arai ni anoi abya rai taw yang shanhte paper box jaw ai. Service jaw ra ai ni yawng hpe maren mara jaw ya ai gaw grai hkrak nga ai. Yangung nbungli pa kaw na zawn ora jep, ndai san, power madun ai lam mung n nga ai.
Thai kaw na zawn Myen mung passport lang da ai majaw laksan kanawn mazum yu kaji ai lam ma n nga ai.

Nbungli pa kata kaw gaw grai hkum tsup re nga ai. Nye matu gaw! Free Internet Services ni, Wi-fi ni, tsawm ra gaw hkrak nga ai. Hkrak na rai nga ai le. British ni atsawm ngang ngang kang kang galaw da nga ai gaw...

Hkying 3 hta gaw BKK de pyen sa na re. Ya gaw 2 PM ram rai wa sai. Off sai.

Food Terrorist

2010 ning December shata 9 ya

Mana de gaw lusha seng langai kaw sa sha ai.
Anhte a Jinghpaw bum ga de nau n mu ga ai lusha ni aging htim shapyen kau sai.
German sara gaw shi lusha grai law la sha sha re ai majaw ngai wa Food Terrorist rai taw sai kun ngu mani hpa galaw taw ai.

Um...Terrorist hpe Jinghpaw hku gara hku tsun ra ai hpan kun? Chye ai ni naw ka da ya marit.

Geis ramma ni a ningtawn ai lam gaw shakap ginsup ai lam re nga ai hte maren aging ginsup kau sai re.
Shakap ginsup =  Sha ai hte Shatan ai. ;)

Canton Lam ntsa na gat seng ni

2010 December shata 6 ya

Canton Road

 Taukawk ni

Taukawk ni

Daini ka-ang gaw shat sha ngut ai hpang Canton lam nmaw kaw na gat seng ni hpe hkan yu ai.
Nga ni, Katsu, Jahkan, Shell, Oyster, namsi namsaw, namlap, mati, Taukawk, Shu, hpa gaw hpa re n chye ai dusat ni, hkum sumhpa hpe mu ai.

Mari ai, dut ai masha hte hpring taw nga ai.
Chyau lachyan Pyada langai mi hte rau sumla naw dem dat ai.

Nta ni hpe yu yang gaw htap 30 jan ai chyu law nna du pyi tsu ai.
Nam masha rai na kun gaw n chye ai, Grai garu gaji ai zawn hkam sha ai.
Lam ni gaw kaji, masha gaw law, mawdaw gaw chyat, raitim, nga pyaw na zawn san ai ginra gaw re.

Camera nnan hte Bangkok Nbungli pa

2010 ning December shata 5 ya


Daini mari dat ai SONY camera nnan hte Bangkok nbungli pa hta dem da ai sumla nkau mi.
Daini gaw Thai Hkawhkam a shangai nhtoi ladu hkrum ai shani mung rai nga ai.
Jinghpaw ni hpe garum madi shadaw ya ai lam ni na lu ai majaw kabu chyeju dum ga ai.

Hong Kong du sai.

2010 ning December shata 5 ya

Hong Kong de du sai.

Passport, Visa, D-Form mayak ni grai law tim Karai Kasang a shaman chyeju a majaw atsawm sha du lu sai re. Visa hpe gaw Dec 3 ya shani lu ai. Passport hpe gaw Dec 3 ya shana she lu ai majaw D-form hpe Passport dingsa hte she galaw da lu ai.

Kajawng kaja poi-zar ni ap, gumhpraw 35000/- jaw na ap! Raitim, Karai Kasang a shaman chyeju a majaw nbungli pa na lit nga ai ni gaw hpa mung n tsun ai sha ahkang jaw ya ai. Raitim, hpang na lang gaw passport nnan hte sha D-form galaw na matu tsun ai.

Ndai hkrun lam gaw Karai Kasang lajang ya ai nan re. N mai byin sa na. N loi ai ngu rai taw ai masa kaw na ya gaw Hong Kong lamu ga hpe atsawm lu kabye taw sai.

Karai Kasang a chyeju hpe nachying wa shakawn nngai.


7Eleven de sa na lu na matu Hka sa mari let, Heineken Beer hpe mu nna lama mi myit lu ai majaw mari wa ai. Dai gaw moi Hpakant an ai prat hta Jinghpaw Sut du ni manu mana lu lai wa sai Beer re.
Raitim, daini na aten hta gaw Lungseng gat lawk kaba gaw Hong Kong hkan she rai taw ai. Hong Kong kaw na ni she Heineken Beer hpe matut manoi lu taw nga ai.

Laiza de sa nna bai wa ai.

2010 ning April shata 18 ya

Shana maga hkying 4 chyen daram hta Myitkyina kaw na rawt wa ai. Gara Yang du ai ten hta gaw hkying 5 chyen taw sai. Gara yang kaw jahkring hkring, senke jak loi katsi ai hte hkrun lam hpe bai matut sai. Namsan Yang du ai ten hta gaw hkying 6 pyi chyen mat sai.

Nansam Yang kaw na bai rawt ai ten gaw hkying 6 minute 45. Namsan Hka mahkrai lai, Lailong Lisaw mare lai ai kaw na gaw hpang wa sai. Hpa rai nga yang gaw...

Ka-bun ngu ai wan tu ai de ganaw shang ai hpan. Ka-bun ni wa lam nmaw ntsa e, sen sen wan wan daram nga taw ai. Jit ji na matu sengke jahkring hkring dat ai pyi n mai ai. Hkum ting htim gasat wa ai. Sengke wan pat kau tim n lu ai.

Jahtum me gaw jan shingkang makawp myiset achyang hpe sha set let, shana nsin e sengke hpe manu mana sadi let gau wa ai. Lam ding yang ka-bun hkrai hkrai htep re. Myiman, Na, lata, sinda, du, lahtan, shara shagu nan htim wa ma ai. (Lap 4000/- dan myiset a akyu majaw :D )

Hpa baw hte bung ai i nga yang, zaibru jang hta nbung bung wa ai majaw zaibru ni poi wa ai hte bung ai. Laiza Muklum de shang wa ai Shanglawt gate lai yang she ka-bun ni hkoi mat ai. Dai kaw na gaw tsep kawp n nga sai. Grai mau mat ai. Dai hte ani sha re ai myen gate nga ai Laja Yang du hkra ka-bun ni grai sawng ai re.


Laiza

Grai hkraw mat ai hpe mu lu ai. Masha mung ram ram shau mat ai.

Laiza kaw na manam jarawp (Hotel) ni gaw Myitkyina hte shingdaw yang grai nan madang nga ai. Hkrak ai. Manu ma hkyem sa ai. Simsa Hotel kaw manam ai. Hkrak ai. Hka shin gawk sha loi kaji ai.

Hka shin jasan jaseng ngut ai hpang gaw hkying 9 ganoi rai sai. Dai aten du hkra shat sha la taw ai shayi sha langai hpe grai chyeju dum ai lam ndai kaw na kahtap tsun mayu ai law. Wunpawng ngu ai shat seng kaw sha ai. Lusha hpan 6 kun 7 kun malap sai. Grai law ai majaw, gara she n chye hta sha mat ai. :)

Shana shat mung jaw sha, kam ai hku lang na matu Modem mung shap ya ai majaw n dang tsun hkra chyeju dum ai law.

Manang langai mi gaw sa chyai na i? nga ai majaw, kalang mung n du yu ai Munglai hkyet de sa du yu ai. Lapran tsang jawng de sa du yu ai.

Bai matut na...

Yangung hkrun lam

2010 ning April shata 4 ya



N myit mada ai sha ahkyak ai lam langai mi pru wa ai majaw Yangung mare de sa ra mat ai. March 25 ya jahpawt sa mat ai. Shani ka-ang kaw du ai. Aw... Shat ban pyen li hpe grai chyeju kaba ra mat sai.

Hkrun lam hta e blog kaw ka mara na zawn re ai ni grai gaw mu hkrum wa ai. Laika hte hkrai rai jang gaw lagawn lamawn tai na tsang ai majaw sumla hte hpawn ... lawu de na zawn ...



YJH nawku jawng hpe ntsa kaw na mu lu yang ...



Maza mala sumpum sumpam hte Shwe Pi Aye lam ...


Nbwisam sa manam ai nta kaw na zaw; ndai zawn n mai hpaw mat ai. Hkying hkum hku rai wa ai majaw hpa n chye galaw ti na sumla gan dem da ai re. Akyu gaw grai hpyi sai le. ;)
Nta kata kaw lusha hte seng na gaw hkyep mi pyi n nga ai.


Jahtum me, Nta de sa chyai ai manang wa gaw, o anyaw le anyaw galaw taw let lu hpaw mat ai. Zaw gram ai gala la wa du wa ai hte chyinghka mung hpaw da ai majaw mau mahka nga ai. Shi a hpaji hte zaw hpe bai mai matut na kun? ngu yu taw yang ...

Ding Jang Yang mare

December 16 ya, 2009 ning

Ding Jang Yang mare!

Wa Shawng mare kaw na loi mi matut sa nhtawm Gawset yang n du shi yang lapai de magaw na deng 4 hkawt sa ra ai re. Ya aten hta gaw Lasang Awng Wa hpung a gaiwang kata kaw re lam chye lu ai.

Yi nam ta rai jang hkrun lam grai yak hkak ai. Lagaw lam hte sha anut ra ai re. Mare hta htinggaw 200 jan nga ai hta chyen mi daram gaw Lisu amyu sha ni re. Ngam ai gaw Lawng Waw ni rai nhtawm me Jinghpaw htinggaw gaw 30 ram nga ai.

Nnan de gaw dai ram wa n tak da ai. Raitim, Ding Jang Yang mare de ai gaw grai na sai rai nga ai. 1920 ning hta Lisu amyu ni shawng de hpang ai re majaw ya gaw ganoi 90 ning rai sai re. 2020 ning hta gaw mare de 100 ning hpring na re.

Lawu tsang jawng nga ai.
Nawku jawng 4 nga ai.
Mare hpe Lawk 1, 2, 3, 4 ngu garan da ai. Lawk 1 hte 2 gaw Lisu ni laksan nga ai. Lawk 3 gaw Jinghpaw ni nga ai. Lawk 4 hta gaw Lawng Waw ni malawng nna Jinghpaw ma loi li nga ai.

Mare masha ni malawng gaw yi, sun, hkau na ni galaw sha ma ai. Ya aten hta Company ni shang shara la ai hte Rubber, Mura hpun sau ni grai hkai taw ma ai re.

Yinam ta shagu daram machyi makaw hte asak sum mat ai mare masha ni grai law ai lam chye lu ai.

Anhte Buga kata Myu sha ni a hkam ja lam a matu masing masa hkrak hte galaw nan galaw ra sai.

Sam Pai de du da ai.

December 15 ya, 2009 ning

Daini gaw rung kaw azim sha loi hkring sa la na re she ngu yang ... rung du ai hte jahpawt kaw na shani ka-ang du hkra ala dingda taw ai ni nga taw sa hka!

Rawt ra sai.

Sam Pai de... Gara yang kaw na bai sa ra ai re. Awng Ja yang mare ni lai ... lai ... lai yang Sam Pai de du ai.

Mare kaw lwi ai hkashi mying gaw laklai ai. Japan hka da. No.II mungkan majan shaloi Japan hpyen la mang ni grai sumpum mat ai majaw Japan hka ngu shamying ai re da.

Htinggaw gaw kanoi 300 jan ai re. Moi gaw hpun dabang grai an wa sai raitim ya chyawm me gaw hpun ni mung yawng atsai awai htum mat hka rap!

Aga... daina chyawm me gaw Sam Pai mare amu madu a dum nta ni daw jaw ai shana shat grai tit hkra sha kau sai. Dumsi shan hte re. Ang sha-a wa dut ai hte mari ti na anhte hpa daw jaw ai re.

Dumsi = Hkum ting ju kap ai dusat re.

Mi yet sha bai du ai. Grai pu ba sai. Hpawtde ma matut hkawm ra ai. Raitim, grai kabu ai. Madu a Buga kata lu hkawm sa ai majaw.

Ban Dawng hkrun lam kaw na sumla nkau

23 September 2009

Ban Dawng sa ai shaloi na sumla nkau mara dat ai. Mau hpa looo.. Karai a shaman chyeju hte daina chyawm me gaw sumla upload mai galaw nga ai. yahooooooooo

U Rawng Kawng mare

Hpa nampan kun n chye ai. Ban Dawng kaw na Slg. Nhkum Yaw nta kaw na re. Ngai gayet, ngai ra ai sumla ni. :D

Dem ai shara ni loi mi ra mat sam ai law. Nampan hpe hpring tup la kau yang grau kaja na zawn re ai re wa!

Yinam ta hta re majaw hkum pa panglai kaw hkawm sa ra ai. Dai Sengke hpe hkying hkum mi chyen kashin kau ra ai. 1500/s ks ang ai. Namsan Yang kaw re.

Namsan Yang mare kaw na ja maw. (Shingdu kaw na bum mayan na shara mi hta Du Jawng hpe mu lu na.)

Hkrun lam hkan na sumla nkau re. Htenza ai ni, pu tsawm ai ni mung tut e byin nga dingyang re. Madu lu ai masin hte madu hkam sha yu na matu yaw shada let ...

Mayan de kahprup katup hkrun lam

21 September 2009

"Tsa chyaru grai lu ai ni hpe TSA YA ngu tsun yang ...
Tsaw ra myit hte grai chye ginsup hkau chyap ai ni hpe gaw TSAW YA ngu tsun ra na kun?"

Shana shat sha na matu hkoi ze hpe sha naw hta lang dat yang, phone ngoi pru wa ai. Manang langai shaga wa ai re. Shi hta grai nan ahkyak ai lam byin pru wa ai majaw, Mayan de chyeju hte naw hkan garum rit nga tsun ai.

Masa hpe maram yu yang gaw; shi a tsawra nja wa gaw dai Mayan kaw gin chyum chyat taw ai majaw re da. Nta de nhtang wa na mung yak, yup na matu mung nta de n tsun kau da. Kanu yen Kawa grai pawt na hpe mung dik hkra tsang taw sai re da. Dai majaw ...

125 Sengke kaw sau hpring hkra bang, sengke baw chyawp hta chyawp re nna rawt sai. Ngai na hkyep din gaw Japan hkyep din dingsa re majaw naw galai na nga tim, manang gaw rai sa nu ga law hkau e, nga nna rawt wa sai.

Nbung loi gaw yawm ai zawn nga tim, shana 7:18 PM ram rai taw sai majaw, mai na re law ngu na rawt wa sai.

Shaten ai looo... shaten ai ...

Ya, Myitkyina - Mogawng lam gaw moi na hte ram ram gaw shai mat sai. Grai gaw n rai tim le... Mahkrai nnan ni htam da ai majaw, moi na kattaya lam dingsa hku she shaten mat yang gaw hka de pyen shang mat na zawn she re.

Masat kumla (Sign) ni ma n madun da ai. Dai majaw shani kaang hkan n sa ga ai ni, shana hkawm yang gaw loi jamjau na masa nga ai. Lam galaw ai ni, ahkaw ahkang lu ai ni, hpa majaw ndai zawn re ai hpe sha pyi n galaw ya ai kun? ngu sawn hkrup ai. (Gai wa, ngai gaw hpa baw wa lu galaw ai zawn zawn!)

Ngu sa ga! Dai hku hte shaten bang mat yang ... Hka La Ya 260 ngu ai Gat shang yang loi lai re ai kaw sengke leng nbung yawm mat sai gaw. Tube baw mat sam ai. Dai kaw myit ru sai yaw. Shana gaw hkying 8:30 PM jan taw sai. Masa n hkrak ai aten rai yang she ...

Raitim, mile 5 ram sha re majaw, lagaw lam hte tim anut ga ngu nna "Myu hte Mungdan" a matu ma n raitim, Tsaw a matu (Ngai na gaw n re yaw.) yaw shada let lagaw lam hte bai anut wa sai re. Kawng ni, kadawng ni mung lagat lung kau ai. Sengke hpe gaw jak jasu da nna ganawng let le...

Dai hku hte jahtum e gaw, Mayan de du sai re.

Du yang she Stage Show rai taw ai. Pawt mayu si sai. Dai shayi sha (Manang wa a sumtsaw) mung pyaw lung pyaw lang nga taw ai she rai nga ai. Myit ru, pawt mayu, matsan dum, ka-un, Mau mahka...

Shan tsawra nja lahkawng mung dai kaw anyim anyam, tsit tsit tsawk tsawk, chyik chyik chyawk chyawk nga nna jahta hkat taw sai majaw ngai gaw headset sha shakap da, mahkawn sha hpaw da rai nhtawm ...

Karai Kasang a chyeju majaw, Yungwi ninghkring Labang Doi Wawm hte hkrum, shi hte shi kanau Sara Labang Htung Sau lajang ya ai majaw, yupra bunghkum machyu na matu n tsang ra mat ai. Atsawm sha yup hkring sa la nna dai hpawt 5 AM hta Myitkyina de bai lung wa ai. 6 AM jan kaw atsawm sha bai du sai. Praise the Lord.

PS(Du ai hte shi hpe phone shaga dat ai.)

Ban Dawng hkrun lam hte Buga shiga adaw achyen

26 June 2009

Grai nan shari mat sai.
Ban Dawng mare de sa ai hkrun lam hpe!

Marang htu da ai hte mawdaw kaba lai da ai majaw lam dingyang ayak ahkak hte lai ra mat ai. KENBO 125 Sengke, shawng na taya gaw Point Taya nga ai hpan n rai taw ai. Dai majaw grai kashawt ai. Ban Dawng kaw na bai Namsan yang kaw du yang, sengke kashin seng kaw kashin ai wa, hkying hkum mi chyen (1:30) ting na ai.

Hpa mi nga tim, n galau ai hte atsawm akawm MKA de bai du wa ai majaw Karai Kasang hpe chyeju shakawn ai.

Moi ya Nba Pa de sa ai shaloi mung myu tsaw mung tsaw hpyen la ni grai gawan hkawm nga ai. Ya, ndai lang hta gaw maigan amyu hpyenla ni ora de, le ra de grai hkawm sa nga ai hpe mu lu ai.

....................

Ya aten Jinghpaw mungdaw gara de mi sa sa (lai wa sai bat hta, Danai lam Dumbang, Lawa hte laga mare ni, Sinpraw hkran Namsan yang grupyin mare kahtawng law law hte Ban Dawng) ni hta grai gumhkawng nga ai mahkawn gaw Ting Luk a mahkawn ni re.

"Shingra tara majaw... nang hpe tsaw ai n rai... salum kata de na ... tsaw ra myit majaw ... Nang hpe ngai tsaw ra ai.. dai hpe nang chye na ya... kaja ai mahtai langai mi jaw rit ..." ngu ai mahkawn ni hte laga mahkawn ni ... grai grai gumhkawng nga ai.

Ting Luk
"SAMA" ngu ai mahkawn album re.

....................

Ndai laman Myitkyina-Laiza lam mayan hkan Mini Bus ngu ai (Man Lone ... myen hku hti ya rit) mawdaw ni dagup, galau ai lam ni loi loi byin nga ai re. Masha si ai, hkala ai lam ni ma byin nga ai.

Moi ya Loije de sa ai shaloi mung Sinlum lam hkan mung dai Mini Bus ni sha dagup galau, krung de shang mat ai lam ni byin ai re. Ya dai shara ni hta gaw wut shadaw jun nhtawm sadi ra na lam ni galaw da sai re ngu chye lu ai.

....................

Hkrun lam kaw grai pu ba wa ai majaw nta naw wa na shat ni sha la, hkring sa la sa na re. Ndai hkrun lam hta Ah Nu hpe phone n shaga wa ai majaw grai tsang taw ai re lam mung chye lu ai.

Sha Mo hpun hte Sut Ngai (Mai Bat)

13 June 2009

"Sha mawt dat sai kawn gaw, sen 2 ram gaw yawm dik re (Miwa gumhpraw). N shamawt shi na sha ... "
N-gun mi alu tsun taw ai gaw Sut Ngai Buga Hpung shing n rai Mai Bat kaw na Sara langai rai nga ai.

Grupyin hkan na bum shagawng ni hpe mada let sumla dem dat, ga shaga dat hte aten jahtum nga ai. Nba Pa de rawt na matu re.

Loije kaw na hkyin hkum mi daram (dai ram gaw n na ai.) sengke hte jawn yang Mai Bat de du ai. Ndai gaw marang htu na hkrun lam yak yang hpe tsun ai re.

Lam dingyang hte bum shagu ram hta kumshu sun hkrai hkrai ! Ga sau ni pyi htum mat na zawn she shadu ai. Dai chyu hkai da ma ai.

Buga kata lamu ga lu madu da ai ni gaw hkai lu hkai sha ai lam hte gumhpraw grai shang ma ai. Lamu ga n lu ai ni gaw daini galaw daini sha ngu na zawn re.

Mai Bat mare hta htinggaw gaw 300 hkawt nga nhtawm grupyin hkan na bum ni de ayai aya nga ma ai. Miwa ni ma nga ai. Miwa malawng gaw hpyenla la ma ai re.

Mai Bat mare a sinpraw de gaw Nshawn hka lwi ai. De a o ra hkran gaw Miwa mung rai mat sai.

Myihprap wan lu ai. Black area re ai da. Mare masha malawng gaw Zaiwa ga shaga ma ai. Jai lang ai gumhpraw gaw Miwa hte Myen re. Miwa hte grau manu ai re da.

Hkalup hpung, Hkahtaw lik, Nat jaw ni jawm nga ma ai. Malawng gaw Hkalup hpung re.

6 ya kalang "gat nhtoi" nga ai. Grai tsawm ai hte grai nga pyaw ai shara re. Raitim, grai kashung ai.

Buga masha ni tsun tsun re ai. "Nang ... U goi ai nsen n na ai kahtawng de nga mayu yang (Sut Ngai) Mai Bat kaw sa nga u da. Kaja nan re. U ngoi ai nsen, goi ai nsen n na hkrup wa ai.

Manmaw ... Loije ... Nba Pa hkrun lam

12 June 2009

Daina maga she Manmaw ... Sinlum ... Loije ... Nba Pa hkrun lam kaw na bai wa ai. Hkrun lam ting sumla dem dat, san sagawn dat hte amu bungli hte seng na galaw ra ai mara hkan du hkawm yu ai.

Lai wa sai bat hta blog hpe update galaw na myit makun tim, internet connection n lu mat ai marang e, ya du hkra zim mat ai re.

Yawng ngwi pyaw nga u ga law.

Tawnggyi ... InnLay ... Nay Pyi Daw ... YGN hkrun lam

15 May 2009

Tawnggyi kaw lana mi sa yup la ai. Hpang jahpawt gaw InnLay de hkawm ai. Tawnggyi kaw na Nyawng Shwe de shawng mawdaw jawn ra ai. Mawdaw manu gaw Lap 700 re. Dai kaw na she Jak li bai jawn na InnLay nawng kata de sa ai re.

Ngai gaw myen ga hpe ram daw gaw chye ai re. Raitim mung, dai kaw ngai shaga ai hpe nau n chye na ma ai.

De a majaw, myit mung loi htum wa nhtawm ... Myen ga nau n chye ai ngu sha tsun dat ai. Dai masha nkau gaw English hku bai shaga wa ai. Ngai myen hku htan tim, English hku chyu chyu ... Shanhte group hte rau InnLay de hkawm sa sai.

Hpun ni hpe majoi kran, kam mara di ai marang e, grupyin na bum ni kaw na ga sau ni Hka nawng kata de shaning shagu lwi shang wa ai. Dai madang gaw laning hte laning jat wa nhtawm Hka Nawng mung laning hte laning grau grau kaji wa ai.

InnLay kaw na Tawnggyi de du ai hte kahprup katup manam jarawp de wa, mawdaw daru de lagat sai. Pa-O ya da na ngu ai mawdaw hte Nay Pyi Daw ngu ai de bai rawt wa sai.

Shana tup jawn kau na jahpawt jau jau Nay Pyi Daw ngu ai de du ai. Kalang ta YGN mawdaw jawn na ngu myit tim, Nay Pyi Daw ngu ai hpe naw shinggrup da mayu ai majaw, shana daw de rawt ai mawdaw lekmat mari la na sengke shap let wam hkawm sai.

Aga ga ga ! gaw gap taw ai ni wa manu mana law ai she rai nga ai.
Hkawhkam Hkaw zawn san ai hpe mung mu ai. Ram ram kaba dik ai.
Ngu sa ga le. Mare gaw kaba ai. Nta ni gap da ai ma tsawm ai. Lam ni gaw cement (bi lat) hte nep da ai. Jan gaw ja, kahtet gaw kahtet, nga nan n pyaw ai mare gaw re.

Hpa mi nga tim grai tsawm htap hkra gaw galaw da nu ai.

Shana daw de gaw YGN bai yu wa sai.
Yey Tar Shae ngu ai mare kaw shat sha na bai rawt wa jang, anhte shawng kaw Nan Htaik San ngu ai YGN de yu wa ai Express mawdaw hte gunrai htaw ai Truck adawt hkat ai hpe mu ai. Nu wei... hkrit nan san ai lo.

Express mawdaw a shawng daw gaw yawng agrawp mat ai daram re. Laparan de gaw hpa n byin ai. Tim, hpang jahtum de gaw bai ayai mat ai. Prat hta ndai lang sha naw mu ga yu ai. Gara hku she rai taw sai kun? Myit n pyaw hpa re ...

Anhte a mawdaw chyawm nga-leng pyi lai na daram lanyen let gau wa ai hte YGN de dai hpawt atsawm bai du shang wa sai re.

Loi Kaw ... Hopung ... Tawnggyi hkrunlam

12 May 2009

Mana tup yuk n pyaw ai. Karenni mung na Ramma ni a prat mung n loi ai. Buga kata n sim n sa ai kaw na ashung let hkawm sa nga ra ai. LoiKaw mare daju a shinggan deng 10 ram kaw na gaw hpyen majan byin taw ai zawn sha re. Hpyenla ni hkrai hkrai ...

Daihpawt hkying 7 AM na mawdaw hte Tawnggyi de rawt wa ai. Lam dingyang, hpyenla ni ora kaw loi mi, ndai kaw loi mi, lam hkawm let kachyi mi mu wa ai. Hpa majaw nga jang, nau nna shi ai aten hta Loikaw mare hta bawm sa kapaw da ya ai majaw re.

Loikaw hte Tawnggyi lapran na BanYin ngu ai mare makau kaw ma Pa-O hte Kayin ni jawm nna myen dap chyen mi hpe shakrip kau ai majaw re. Masha 12 si mat ai. Dai chyen nawng si mat ai re.

LoiKaw hte Tawnggyi lam gaw nau n hkrak ai. Loikaw kaw na Si Seng (Si Sai) ngu ai mare du hkra gaw nlung lam re. N tsawm la ai. Kaji dik ai. Gau ngwi sha gau ra ai. Dai hte maren, Si Seng kaw na Hopung, Tawnggyi kaw du hkra mung lam kachyi sha law re. Raitim, kat ta ya lam re majaw loi manu mat ai.

Hopung mare n du shi ai lapran mare kahtawng kaji ni law law lai di wa ai. Malawng gaw "hka" grai taw ai. Lu na, shin na, jai lang na "hka" a matu yinam ta, marang htu ai aten hta hkalawng hta mahkawng da na, ginhtawng ta ting a matu hkyen da ra ai.

Lu na sha na, grai yak ai mare grai law ai. Hka ni len la na mai tim, ja gumhpraw n lu hkan ai. Hpaji gaw bai n chye .. huu ... myit ba hpa re.

Hopung de du ai shaloi gaw nta malawng gaw wukdek nta ni re. Wut gaw, anhte Jinghpaw mung na zawn wan hte ju ai wut n re. Lata hte gayet ai wut tawng ni re.

Hopung hte Tawnggyi gaw deng 12 tsan ai. Raitim, bum ni, kawng ni lung ai majaw loi aten na mat ai.

Tawnggyi du sai. Mare shinggrup ai mawdaw hte nawm nhtawm, TJH de sa ai. Tawnggyi Jinghpaw Wunpawng Hkalup Hpung re.

Ya gaw, myi hpyi ni li wa sai. Manam jarawp mung pat hkyen sai. Hpang shani she matut sa na.

Hpawtde jau jau gaw InnLay de sa na re. Ngwi pyaw nga u ga.