Nbwisam a Post 100 hpring

9.9.2008

100
Ndai blog hpe galaw hpang ai gaw 2005 ning November hta ka hpang ai re. Yangung mare kaw re. Ka da ai lam gaw kade a kasha, hte kade a kahpu ngu ka da ai re. Raitim, dai hku ka da ai marang e, tsawm htap myitsu ai kanau nga ai chye nna kahkau daw mayu ai ni grai law wa na mung tsang na ... nnan bai edit galaw dat sai ... Hti mayu yang Blog achive kaw na 2005 kaw na hti ga.

Ngut ai hpang gaw Internet ngu ai hpe nja n hpra shakram nhtawm ngai tsawra ai buga de wa mat sai.

Ndai post gaw nbwisam a 100 hpring ai post re. Ndai post hta hpa ka na kun ngu myit ai wa 2 ya ting rai mat ai. Ndai blog de myi dam na ma rai rai, ang na ma rai rai du sa ai myitsu ni hte myit n su ni a aten hpe ma akyu rawng shangun mayu dik ai. Raitim, nbwisam gaw hpa n re ai majaw ja ji gaw tam shakut sawk na akyu rawng na ni ka na myit ndai...

Nbwisam a post 100 hpring ai masat Jaw Bum hpe dum ai laika ka na re.

Jaw Masat

Myitkyina mare hte deng shi tsan ai Nawng Nang hta Jinghpaw Wunpawng amyu sha ni Jaw Poi hpe hkik hkam awnd dang ai hte galaw lai wa sai ...

Dai hta Jaw Langchyi gawgap da ai Jaw Bum hpe Bum jazai kaw na san seng ai hte sa ra shara tai hkra galaw shakut wa sai re.
Dai zawn shakut wa ai gaw dai aten na Ramma ni re. Buga shara shagu na ramma ni sa du nna galaw wa ai.

Magam bungli langai ngai (snr) mai kaja ai amu galaw yang gara mung n loi ai. Dai hte maren Jaw Bum hpe galaw wa na shaloi masha kaba ni gaw n mai byin ai. Byin na n re. Dai zawn amyu myu myit n hkrum ai hte, n kam ai, n hkraw ai ni nga lai wa sai ...

Raitim, dai aten na Ramma ni gaw byin ai. Byin hkra galaw na nga ai myit hte galaw hpang wa sai. Bum jazai kaw na tsawm htap hkra galaw wa sai re. Tatut amu galaw wa ai Sarama Dashi Hkawn Tsin gaw dai aten na Ramma hte masha kaba ni a ningdang ai lam ni, Ramma ni a htingnut ai lam n nga .. shakut shaja wa ai lam ni hpe tsun lahta na zawn tsun dan ai. Shi tsun dan ai aten hta shi myiman gaw htaw ... lai sai 1977 de bai du mat ai zawn ... garen gari nsam hte tsun dan let ... ya aten na nanhte Ramma ni mung grai shakut ra ai lam ni hpe n-gun jaw ai. (2007, November ... Hugawng pa de hpaji myit sharawt campaign n rawt shi ai shaloi)

Jaw Bum ngu yang malawng gaw du ga na re. N du ga shi ai ni hpe ma sa du yu marit ...

Ndai zawn dai aten na Ramma ni galaw shakut da ai marang e ... ya aten na Ramma ni gaw akyu lu hkam sha nga sai re. N-gun awai hpawng ni, hkring sa na matu, manaw manang ni hte sa chyai na matu, akyu hpyi na matu, Myitkyina ting hpe yu na matu ... bungshi katsi chyu na matu ...

Jaw Bum de nang du yang, bum a sinpraw maga de htap kru nga ai Jaw Langchyi hpe mu na re. Dai de lung mat wa yang tsaw dik ai htap kaw na Myitkyina pa hpe mu lu na re. Dai hte maren ... Jaw Bum Wunpawng Lupding Lupra hta e, wundoi mat wa sai kaji kawoi, sara kaba ni hte amyu sha ni a lup ni hpe ma mu lu na re.

Bum a sinna de gaw Akyu hpyi gawk ni nga ai re. Grai simsa ai re.

Bum a lapran kaw gaw Jinghpaw Wunpawng amyu sha ni a matu grai ahkyak ai labau, KBC, MBC hta n-ga Mungkan ting gara mat ai 3 ning 300 sasana (3/300) hta shang lawm ap nawng lai wa sai shayi shadang sha ni a mying ni hpe tawk ka da ai wut shadaw nga ai. Dai wut shadaw a ntsa kaw nli gat hkai taw ai sumla tawk da ai.

Lakap nna dai 3/300 hpe loi tsun mayu ai. Dai 3 ning 300 gaw Jinghpaw Wunpawng amyu sha ni hpe grai galai shai shangun ai re. Si mat sai masha hpe ma akyu hpyi let bai hkrung shangun ai.(Sub-State kaw re. Mare ga n matsing sai. Kutkai grupyin rai kun?) Dai 3 ning 300 labau laika buk hti ai shaloi gaw nshung si pyi rawng rawng she nga ai ... Du na shaning hkan gaw PDF file hku nna lu hkra galaw na re.

Dai Jaw Bum byin tai hkra galaw shakut wa ai Ramma ni gaw ya aten hta sakkung ni de gale wa sai. Yawn dik gaw 30 ning jan ... 40 ning ram du wa ma sai.

Myitsu ai, Myit n su ai Ramma manang ni e... anhte ma n lu sha tim, namsi hkai ga. Tsun mayu ai lachyum gaw anhte si mat yang hpa mung n lu la mat ai .... raitim, htawm hpang na anhte a Ramma ni a matu ngam da ya mai ai.

Moi na Jiwoi Jiwa ni ngam da ya ai majaw anhte ndai zawn lu nga ai. Tsit tsawm ai, ga sau kaja ai, tsun ga nga yang grai law ai ... Dai hte maren ya daini na ningbaw ni, masha kaba ni ngam da ya ai hpe anhte bai lu na re. Hpa ni ngam da ya na kun gaw n chye... Lamu ga jahten kun? Mungdan kun? Nam maling kun? Hpun n nga ai layang kun?

Dai zawn ... ya prat na anhte Ramma ni ma hpa baw wa ngam da ya na ta? Jinghpaw Wunpawng amyu sha ni a labau a matu hte na labau a matu ... hpa baw ngam da na ta?

Du na ban prat na Jinghpaw Wunpawng amyu sha ni a matu anhte hpa baw wa ngam da ya lu na ta? Ayai mat ai Mungdan kun? Mungdan nnan kun? Hpa baw rai ????
Nang ngai yawng a lata kaw re ...

 Labau hka ji n kap ai ni tai hkra shakut ga  ngu n chye n kaw rai nbwisam shadut mayu ai ...

Ndai post a jahtum hku nna laika yan langai ka na re. Dai hpe http://kachinland.blogspot.com/ kaw na la ai re.

WUNPAWNG MUNGDAN SHA N-GA MUNGKAN TING HPE UPHKANG NA JINGHPAW WUNPAWNG RAMMA ...