Mayan de kahprup katup hkrun lam

21 September 2009

"Tsa chyaru grai lu ai ni hpe TSA YA ngu tsun yang ...
Tsaw ra myit hte grai chye ginsup hkau chyap ai ni hpe gaw TSAW YA ngu tsun ra na kun?"

Shana shat sha na matu hkoi ze hpe sha naw hta lang dat yang, phone ngoi pru wa ai. Manang langai shaga wa ai re. Shi hta grai nan ahkyak ai lam byin pru wa ai majaw, Mayan de chyeju hte naw hkan garum rit nga tsun ai.

Masa hpe maram yu yang gaw; shi a tsawra nja wa gaw dai Mayan kaw gin chyum chyat taw ai majaw re da. Nta de nhtang wa na mung yak, yup na matu mung nta de n tsun kau da. Kanu yen Kawa grai pawt na hpe mung dik hkra tsang taw sai re da. Dai majaw ...

125 Sengke kaw sau hpring hkra bang, sengke baw chyawp hta chyawp re nna rawt sai. Ngai na hkyep din gaw Japan hkyep din dingsa re majaw naw galai na nga tim, manang gaw rai sa nu ga law hkau e, nga nna rawt wa sai.

Nbung loi gaw yawm ai zawn nga tim, shana 7:18 PM ram rai taw sai majaw, mai na re law ngu na rawt wa sai.

Shaten ai looo... shaten ai ...

Ya, Myitkyina - Mogawng lam gaw moi na hte ram ram gaw shai mat sai. Grai gaw n rai tim le... Mahkrai nnan ni htam da ai majaw, moi na kattaya lam dingsa hku she shaten mat yang gaw hka de pyen shang mat na zawn she re.

Masat kumla (Sign) ni ma n madun da ai. Dai majaw shani kaang hkan n sa ga ai ni, shana hkawm yang gaw loi jamjau na masa nga ai. Lam galaw ai ni, ahkaw ahkang lu ai ni, hpa majaw ndai zawn re ai hpe sha pyi n galaw ya ai kun? ngu sawn hkrup ai. (Gai wa, ngai gaw hpa baw wa lu galaw ai zawn zawn!)

Ngu sa ga! Dai hku hte shaten bang mat yang ... Hka La Ya 260 ngu ai Gat shang yang loi lai re ai kaw sengke leng nbung yawm mat sai gaw. Tube baw mat sam ai. Dai kaw myit ru sai yaw. Shana gaw hkying 8:30 PM jan taw sai. Masa n hkrak ai aten rai yang she ...

Raitim, mile 5 ram sha re majaw, lagaw lam hte tim anut ga ngu nna "Myu hte Mungdan" a matu ma n raitim, Tsaw a matu (Ngai na gaw n re yaw.) yaw shada let lagaw lam hte bai anut wa sai re. Kawng ni, kadawng ni mung lagat lung kau ai. Sengke hpe gaw jak jasu da nna ganawng let le...

Dai hku hte jahtum e gaw, Mayan de du sai re.

Du yang she Stage Show rai taw ai. Pawt mayu si sai. Dai shayi sha (Manang wa a sumtsaw) mung pyaw lung pyaw lang nga taw ai she rai nga ai. Myit ru, pawt mayu, matsan dum, ka-un, Mau mahka...

Shan tsawra nja lahkawng mung dai kaw anyim anyam, tsit tsit tsawk tsawk, chyik chyik chyawk chyawk nga nna jahta hkat taw sai majaw ngai gaw headset sha shakap da, mahkawn sha hpaw da rai nhtawm ...

Karai Kasang a chyeju majaw, Yungwi ninghkring Labang Doi Wawm hte hkrum, shi hte shi kanau Sara Labang Htung Sau lajang ya ai majaw, yupra bunghkum machyu na matu n tsang ra mat ai. Atsawm sha yup hkring sa la nna dai hpawt 5 AM hta Myitkyina de bai lung wa ai. 6 AM jan kaw atsawm sha bai du sai. Praise the Lord.

PS(Du ai hte shi hpe phone shaga dat ai.)