2010 January hta

January 24 ya, 2009 ning

Shaning nnan a shawng nnan na shata hta Nbwisam shang lawm lai wa ai Jinghpaw mung kata galaw ai poi lamang nkau

1. 62 ning hpring Jinghpaw Mungdaw Nhtoi Manau Poi galaw ai.
Manau poi hta Wunpawng Mungdan Shanglawt Asuya a gawng malai hku nna Ningbaw kaba Lanyaw Zawng Hra, Ningbaw Malai Dukaba Nban La Awng hte hpyen hpung nkau sa du shagrau ma ai. Naubaw hpaw poi nhtoi hta Shanglawt ningbaw ni hte shanglawt hpyen la ni sa du ai ten shawa masha ni kabu awlaw ai ni grai law ai lam chye lu ai.

Laiwa sai shaning na zawn shanglawt hpyen la ni hpe law law n mu lu ai majaw ra ra nga ai lam ni mung na chye lu ai.

Maigan mungdan law law kaw na Dat kasa ni sa du ma ai.
Great Britain, Germany, Sweden, France, Italy, Japan kaw na Dat kasa ni, gawng malai ni hte American kaw na ni, European Commission kaw na gawng malai ni sa du ma ai. Miwa Gumsan mungdan kaw na ni mung sa du ma ai.

Naga, Kadu Kanan amyu ni mung sa du shang lawm ai.


2. Uru Seng Maw ginra de Sasana du ai 50 ning hpring masat Ja Jubili galaw ai.
Jubili Nawku Hpawng hpe Hpakant nawku htingnu kaw galaw ai re. Sa du nna mungga htawn ya ai sara kaba ni gaw

1. Rev. Dr. Lahtaw Saboi Jum
2. Rev. Dr. Lahtaw Gumse
3. Rev. Dr. Maji La Ja
4. Rev. Gunhtang La Myen ni rai ma ai.

Pran Wan wuhpung ni mung sa du ai hpe mu lu ai.

Jubili nhtoi hta Uru ga na sasana labau hpe tsun na matu minutes 10 daram aten jaw rit ngu nna Sara kaba Rev. Hkaw Sau (3/300 Hpa-awn) wa ahkang hpyi tim, Jubili shabyin shatai komiti ni ahkang n jaw ai nga chye lu ai. Raitim, Jubili nawku hpawng ni ngut ai shana akyu hpyi hpawng hta gaw ahkang jaw ai. (Sara Hkaw Sau labau n tsun shi yang tsun tingnyang ntsa kaw na tsun ai re.)

Sara kaba Hkaw Sau gaw Uru Sengmaw ga na sasana labau hte 3 ning 300 ni gara hku shakut lai wa sai lam ni hte mabyin ni tsun dan ngut ai hte second 20 daram zim mat ai. Dai ngut ai hte gaw Shawa dawtsa ni a lahpawk nsen wa nawku htingnu she gara na daram re.
(Jubili shabyin shatai komiti ni wa hpa majaw Jubili nawku hpawng zawn re shawa law ai ten hta minutes 10 daram sha pyi aten n lu jaw ai hpe n chye na ai. Dai daram ram ahkyak ai lam ni hpe wa!)

Uru Sasana gaw 50 ning Jubili gaw galaw sa! Hpa masing masa ni matut galaw wa na lam ni mung n ndau ai majaw poi byin daw sha galaw ai zawn san taw ai. Shawa dawtsa hpe n tsun dan tim, masing ni mung gaw she n nga na. ;)