Jinghpaw laika hte ngai ...

2.9.2008

Sumla hpe dip dat yang grau kaba ai hku mu lu na re.

Jinghpaw laika hte ngai ngu ai ka na myit hkrup ai ...

Jinghpaw laika hpe asak 9 ning ram kaw jawng kaji lung ga ai re. Shata 2 ram sharin ai hta na bat 2 lung ngut ai hpang nbwisam gaw ningtawn masat No. 2 hte padang dip sai rai... No. 1 hpe gaw ngai na kanau lu mat ai...

Dai hpang tsang 1 lung na ngu she ... bai du ai ginhtawng hta gaw Jinghpaw laika shirin ai lam gan hkring mat ai. Hpa majaw kun gaw n chye ai. 1995 ning hta rai nga ...

Dai hpang kaw na gaw nbwisam langai Jinghpaw laika mu yang tsan tsan kaw na hprawng sai. Re le, tsawm shayi mung n rai! N kam kahtep ai ...

Dai hku nga lai wa ai wa ... 2003 ning dakkasu 2nd year du hkra manang ni gaw Jinghpaw hku tsun, nbwisam gaw myen hku htan hte grai harmony byin ai. 2003 ning ginhtawng hta Myitkyina JLH ni woi awn galaw ai Jinghpaw Laika madang tsaw class nga ai de manang langai hte lam dam na du mat ai.

Nu woi... Ngai gaw Jawng, Kawng, Hprawng, shawng, ndai gasi ni hpe pyi n chye ka ai wa... a a e e e ram sha chye ai wa gaw du mat sai. Jinghpaw hku mung n chye tsun. Loi li gaw chye ai le, n mai maw sha ai yaw ...

Sara Lazing Tu ngai na makau de htep wa yang Karai Kasang hpe akyu grai hpyi kau sai... Kadun ai hku tsun ga nga yang ... dai Kachin Literature Advance Training ngu ai shata mi jan lung ngut ai hpang gaw nbwisam langai loi chye wa sai ...

Chye wa sai ngu ai gaw Jinghpaw laika langai sha n rai! Ngai kadai rai? Ngai na laika gaw hpa rai? Loi li ngu ga le ... i?

Ndai kaw n mai malap da ai gaw Ah Dwi re... Miwa laika ma sharin ya tim, waw ai nyi ram sha lu matsing ai hku re. Ah Dwi gaw 2007 ning August hta nta wa magang mat sai...

Chyum laika hti na hkaja na matu lam madun ai gaw Nu re...

Dai hku hte nbwisam langai Jinghpaw hku sumtsaw laika chye ka ai madang du wa sai re.

Ga shadawn: Salum a shayi e ... Shaning 1000 mi hta kalang sha pu ai, mungkan ting hta na tsawm dik ai nampan pyi nang lai wa yang nyip mat nhtawm hkun hkraw mat na re. Asak wugut gu ten du hkra tsaw mat na. Nang ya kade mi tsawm tim, du na 10 ning, 20 ning rai yang gaw ndai zawn n tsawm sai. Raitim, ngai tut tsaw mat na. Ndai zawn rai tim, n raitim, loi chye brawp wa sai re. (Lahta na laika hpe copy galaw na ni nbwisam kaw ahkang hpyi rit) :)

Dai hpang gaw nbwisam langai Jinghpaw laika hkaja ai wa ... n-gaw gawk zawn galaw na mung hkaja, sumtsaw laika ka shaman ai ladat hte ma hkaja, nta de gumhpraw jat hpyi ai ladat hte mung hkaja, myen, Ingalik laika buk ni hpe Jinghpaw hku ga gale ai zawn mung hkaja, ja .. ja ... ja ... dat ai wa ... jahtum gaw ... ABC jar 3 lu lu ai madang du hkra hkaja kau sai re...

Jinghpaw laika grai chye ai sara kaba ni hte ABC lu let jahta ai majaw le ... Ngai gaw nau n ra ai re wa ... Tsa chyaru, Beer ni nga yang ... Sama pyi n lu hkam ai... dai majaw soi nawng dagrawng ai re.

Ngai hpa majaw Jinghpaw laika chye mayu ai ...

Madu a laili laika gaw chye nan chye ra ai. N chye n mai ai re majaw ...

Jinghpaw shada raitim, myen hku shaga ai hpe n kam ai majaw...

Karai Kasang jaw da ya sai Jinghpaw laika hpe prat dingsa tut nawng hkrung grin shangun mayu ai majaw ...

Lahta na ginlam 3 a majaw ngai Jinghpaw laika hpe hkaja ai re. Shana tup n yup ai, jahpawt nhtoi hkyen du mat ai shani mung nga ai.

Hpa majaw kaji ai kaw na n chye ai ...

Nbwisam nga kaba wa ai shara grupyin hta gaw Sam amyu ni grau law ai re. Dai majaw kaji ai shaloi myen ga hte, Sam ga sha chye shaga ai re. Jinghpaw ga gaw Ah Nu Bow, Ah Wa Bow, ndai ram sha chye ai re.

Dai hta n ga, kaji ai aten hta nbwisam gaw grai gumhkawng ai re. Hpa majaw ta? Hpraw dik ai Sam kasha ni a lapran, chyang tsawm nbwisam gaw grai nan dan dawng nga ai le ...

Nbwisam gaw ru ma grai ru lai wa sai ... Kaji ai shaloi, lata daw (gayaw) ai majaw Mandalay de tsi sa tsi ra ai. Mandalay kaw sa manam ai Sam nta na shayi sha, ngai hta 10 ning ram kaba ai ... dai hpe hpyi ya rit. N hpyi ya yang gaw hpa .. nya nga nna, dai nta na dunghkum ni htawng, marawn, saboi lahtum ai hte grai ja wa sai.

Jahtawng htu ai amyu re majaw htung n malap ai sha, hpyi ya rit ngu ai re. Dai nta madu ni gaw mani she mani nna, ngai hpe labu, palawng ni grai mari ya, kaba wa yang jaw sha na nga tsun ai.
Ya gaw kadai re pyi n dum sai. Myit dat shagu gaya gaya nga ai ... :)

Jinghpaw laika hte ngai ngu na ka ai re wa she, n seng ai ni ma grai lawm wa nga ai ... Hti taw nga ai myitsu wa mung myi grai tsu na sai... Shabrang rai yang gaw grupyin na shayi sha ni hpe loi mada yu dat u yaw ... Mahkawn rai yang gaw grupyin na shabrang ni hpe loi azi yu dat u. Myi n-gun kalang ta jat wa na re.

Ngai hpe Jinghpaw laika sharin ya ai ni gaw grai law ai re. Manaw manang ni, sara ni, grupyin ni hte grau nna gaw Chyoipra ai Chyum Laika re.

Matut nna ... tut grin na matu ladat shaw, sharin jahpat galaw sa wa na re. Hpaji jaw marit ngu hpyi lajin mayu ai ...

Ngai mung hkyen lajang da ai gaw nga ai. Tim, ja gumhpraw n lu shi ai hte, hpaji n hkum shi ai majaw galaw dingyang re ngu ...

Myitsu wa, ndai du hkra hti ya ai majaw grai kabu sai. Hpa majaw nga yang Jinghpaw ni gaw madu a laika sharawt na nga marawn tim, Jinghpaw laika hte rai yang n kam hti ma ai. Myen laika rai yang she hti mayu ai .. Raitim, ndai gaw shanhte a mara n re. Anhte a laika hpe sharin na, dip shapraw na, hkaja na ahkang n lu ai majaw re.

Ngut nna ndai laika ka ai hta grai myit pu ba mat ai. Ngai na computer a keyboard na (B) key gaw shi hkrai shi dip taw ai majaw re. Laika si 2, 3 ka ai hte pru wa sai. Bai delete galaw dat, ka dat hku nna shakut da ai re.

Ngut du hkra hti ya ai myitsu wa hpe hkungga ai majaw sumla langai mara dat ya ai. Gumhpraw n lu ai marang e, jahkring mi gan yup pyaw mat ai yupmang ngu ga le ...

Sumla hpe dip dat yang grau kaba ai hku mu lu na re.
(Ndai sumla hpe ka ai wa gaw Sara Zinwa Mung Seng re. Grai ram ai sara re.)

Chyeju kaba sai.

Chyinghkai Nu

26.8.2008

Chyinghkai Nu hpe dum ai laika

Lum lum re ai Hamberger langai hpe ngai sha na hkyem ai ...

Akawp hpe hpaw dat nna gawa sha hkyen ai ten ...

N-gup de n du shi yang nbung hta hkring mat ai ...

Myit shingran ...


Mu mu mai mai sha ...

Shat da shagu ngu na daram $ 5 - 15 ram dan ai sha ...


Ndai ten ...

Chyinghkai Nu gaw ...

Nawhpu hte ...

Si Taw Hpu hte ...

Chyinghkrang si ntsin hte ...

Korea sumla hkrung yu let ...

Sha taw nga na sai ...


Phone shaga ten

Maigan hte hpaji sharin sa ai

Korea sumla hkrung shadang hpe yu nna

Shi shangai chyinghkai wa ai

Kasha alat hpe

dum ai da ...


KFC kaw na ushan gaw

Nu shadu ai ushan hte yangyi ram n mu ai ...

Shakey's Pizza mung

Nu a japhtu ram shinglet n hkra ai ...

Shat da mi hpe $ 200 jan jaw ra ai Panglai lusha gaw

Nu shadu ai nai simai hpe n dep ai ...

Nu e ...

Nawhpu, bahkri si hte htu ai japhtu sha mayu ai ...

Nu e ...

Chyeju dum dik ai ...

Ngai hpe shawng nnan Karai Kasang jaw ai

Shaman chyeju gaw

Chyinghkai Nu rai sam sai ...

Myitru ai ...

24.8.2008

Myitru ai law ...

Myitru ai ...

Myitru ai loooooooooo

Um... marawn dat na loi gaw hkyem sa mat sai ...

Hti shangun mayu ai laika langai ...

22.8.2008

Chyurum shalat ngu ai Mandalay Dakkasu jawngma ni shapraw ai laika buk kaw lawm ai laika ngau re.

Ngai na myit hta mung grai sumru shangun ai laika re.

Laika ka ai wa hpe ma grai hkungga ai re.

Hka hpungla ja taw nga ai aten madu a asak hpe pyi n sawn, garum shingtau ya ai... masha ni hpe hkye la mayu ai ...

Kaji ten grai tsan ai jawng de sharaw rawngba ni hpe pyi n hkrit ai sha jawng sa ai. Madang tsaw hpaji chye tim, buga de bai wa ai ... gyit nem taw ai amyu sha ni hpe garum shingtau ai ... pawn ba ai ...

Dr. Nlam Awng

Dr. Nlam Awng ka da ai laika Wunpawng Sha ni law htam wa na matu hpe KTG kaw mai sa hti ai re...

"Awng hpe dat ya rit ... Awng hpe dat ya rit ... Munglai hka e ... ... ... "

Munglai hka e ...
Awng hpe hpa majaw n dat ya ai rai . ... .

Ya aten tsi sara tai taw ai ni, htawm hpang de tai wa na ni ma Dr. Nlam Awng a kasi la ging ai laikyang ni hpe hkan nang hkan sa yang kaja na re .. ngu ... ga saw mayu ai.

Dr. Nlam Awng a lam hpe laika ka sara Hpauwang Tang Gun ma ka lai wa sai. Myitkyina laika naura laika buk seng hkan mai mari na re. (Laika ka sara a mying shut yang mara raw ya rit...)

Du sa byin ai shara ni ...

21.8.2008

Ndai bat laman du byin ai shara ni gaw …

1.       Batangas International Terminal

2.       Manila International Container Terminal

3.       Philippines Central Bank
 
Batangas Port

Batangas sanghpaw daru gaw private re. Dai majaw manu ma grai laja ai. Dai kaw na madung gaw Mawdaw ni hpe htaw bang ai re. Mawdaw ni ngu ai gaw dinggren da ai wa … a la la .. zaw si sha gaw noi rai … ngai gaw hkum bai she kapya na nga ai.

Toyota, KIA, Ford, Mazda, Hyundai … hkum ai lo. … hkum ai  lo…

Dai sanghpaw daru de du sa ai lam gaw ndai mungdan na mying kaba dik ai jahpan kaw lawm ai shilaika kaw na shi sawk wa hte sa ai re. Dai majaw kata de mawdaw the madun hkawm ai shaloi mung, shawng kaw na pyada scott hte re. Mu n mu shimlam ni yawng hkungga jaw ai. Ha ha.. ngai mung bai jaw dat ai le…

Shanhte a control centre de ma woi sa ai. Manager hte rau sa ai majaw yawng gaw ja ji hkungga ai. Grai madang tsaw ai ladat (Technique) ni lang ai re. Yawng hpe dai kaw na mu lu ai. Panglai grai tsan ai de na hpe mung rador the yu ai majaw mu lu ai. Tsun ga nga yang yawng hpe control centre kaw na hkang taw ai re. Computer pat kaba ba law ai ni hte hpring taw ai. Sumla gaw dem wa ai. Raitim, ahkang n hpyi shi ai majaw hpang de she bang sa na.

Shani kaang de gaw shat jaw sha ai. Ushan kaba ba law ai the re. Ngai gaw hkoize hte she nyam ai masha re majaw loi gaw gaya jahta rai mat ai. Ha ha…

Ndai Batangas port de sa mayu yang Metro Manila kaw na mawdaw hte mai sa ai. Hkying hkum 3 ram gaw jawn ra na re. Lama na nbungli nga yang gaw dai hte tim mai sa ai le .. :P


Manila International Container Terminal

Ndai gaw Philippines hta kaba dik ai sanghpaw daru re. Manu mana kaba ai. Laga mungdan hkan mung lakying ni nga ai re. Japan, Miwa, Syria, Panama,South Africa, Mexico, Brazil, Ecudor, Colombia, Indonesia ni kaw ma lakying ni nga ai. Philippines kata kaw gaw lakying 5 nga ai re. Shaning shagu laksan amyat Billion kahtap na lu ai re. Maning gaw 6.7 Billions lu ai re nga annual report hta tsun ai.

Dai kaw mung grai ja ai tara hte, shimlam hte re. Container langai htaw na, mara na matu mawdaw langai sha mai shang ai. Shang ai wa gaw driver ngu ga. Grai jep ai. Ta kumla (Finger print) du hkra la ai re.

Vice chairman the general manager gaw asak naw ram ai ramma re. 30 jan sha naw re. Spain sai gayau ai. Grai ram ai hpe mu lu ai. Alum ala hkalum ya ai re.

Kalang bai shani shat hpe sandwich ngu ai hpan sha dat ai. Panglai hte grupyin hpe atsawm mu lu ai htap kaw na re. Htap 5 kun? 6 kun n chye sai. Nau gaw n hpu ai law. Marai langai $ 10 sha re. Jaw sha ai ni nga ai majaw nbwisam gaw sha tik tik re. She tit hkra sha ai. Ram ram ma lu sha ai re. (Ndai gaw ndau ai)

Lu ngut shangut sai hte maren shakram nna … myi hpe azi yu, ta hpe ja ja shakram nna Lagyam Bawm Win a mahkawn hkawn dat ya sai.

“wa ra mat sai .. hka ra mat sai … “

Dai ngut ai hpang gaw dai shani na lam loi tsun mayu ai. Ngai na lam ngu ga. Jahpawt wanleng kaw na yu nna kan kaw si ai majaw KFC de shang, Burger hte juice htet na sha taw ai. Manang sa wa nna shi dung na matu saboi hpe loi yen ya ai ngu she, juice hkaw nna palawng madi mat ai.

Nta wa na matu n mai sai. Grai tsan ai majaw T-shirt langai jang mari kau sai. Palawng nnan lu ai ga rai nga. Raitim, $ kachyi mi sha nga mat ai. Shata htum du hkra gara hku she matut na kun? N-gun mi alu mari da ai Ready made Hkau soi hte yaw ra sai.

Myit gaw n pyaw ai. Ndai ten nai simai ni, shan hkak ni, shatjam ni sa tsun ai wa gaw Hpyen re.

Central Bank de sa ai lam gaw hpang lang she ka sa na. Dai gaw loi galu ai majaw… Gumhpraw dip shapru ai hpe ya sha mu ga sai.

Daini hte Hkausoi sha ga ..

19.8.2008

Daini Lashu shayi a shangai nhtoi... Hpang hkrat na she chye ai majaw kumhpaw gaw n lu jaw sai.
Lashu shayi a blog hta hkaw tsun ai, garan gachyan ya ai mungga ni a majaw nye a jahpawt ni n-gun hpring wa ai ni law law ...

Shangai nhtoi hta ngwi pyaw nga u ga.

Gai ... Blog de myi dam nna du sa ai manaw manang ni hpe hkausoi jaw sha na. Zing da ai hkausoi htuk ni grai law nga ai. Shata htum du hkra mai sha ai.

Lashu shayi a shangai nhtoi masat hkausoi shadu sha ga... Sa wa marit...
Aten n hpang hkrat na hpe sadi ga yaw... Nanhte na aten gaw n chye ai. Ndai kaw na aten 9:00 PM yaw.
Hpang hkrat yang gaw n jaw sha ai. Wunpawng ahkying hkum sa galaw lu ... :P

..................................................................................................................................................................

Chyinghka akawk taw na hpaw ya dat yang .... a ga!!! kadai mi re kun ngu yang ... kadai re n chye ai wa she rai nga... shang wa marit ...

Kumhpa gaw lawm a ni? Lashu shayi hpe jaw na matu.... n lawm yang ya jang sa mari na bai wa u..

Htem!!! (Chyinghka pat nsen) ..

Raitim, Lashu shayi gaw myit kaja ai gaw... "n ra ai law ... kumhpa gaw ahkyak n re... gumhpraw sha ahkyak re... aw chye .. shut mat na ... tsawra myit sha ahkyak re... shang marit nga nna " Mara raw ya ai Yesu Hkristu zawn tsun ai.

Hun .. dai ni kumhpa n lawm tim yawng lu sha sai re.. Hkausoi pyi ganoi n law ...

Dai zawn sha Madu Yesu Hkristu hpe anhte hpa kumhpa n jaw ma ai. Shi tsun ai tsawra myit sha gaw madu a salum hta bang mat ga yaw ... hkau ni e ... aw ... hkri ni ma lawm ai le ... Mayu kasha ni hpe n malap gwi ai law ...

Gai... lu ngut sha ngut jang she, a ga... akyu hpyi na malap kau sai.. Yu, dai Lashu shayi mung akyu shawng n woi hpyi ai sha, hkausoi jaw sha ai le...

Gai gai ... akyu hpyi ga... Hkau Shanghtin (Dum nga nngai) kaw na akyu hpyi ya na re...

Hkau Shanghtin mung Hkausoi sha nna tit nga ai kan hpe masawp let hpyi sai ...

Lashu shayi, ngwi pyaw nga u ga. Asak galu, tsawm htap, kasi kaja lu madun ai amyu shayi rai u ga.
Amen.

Ya prat gaw IT prat hte alter re majaw grai kadun ai hku re.

Gai, yawng mung amu naw ra ai majaw ... Ngwi pyaw shangai nhtoi hpe mahkawn na bra sa ga ngu ga saw wa ai Hkau Shanglawt (Myu hte Mungdan a matu) hpe yu yang grai tin ai zawn zawn ...
Tin na nga ... shi gaw amu grai law ai gaw ...

ha ha... Daini na matu mungga gaw aw chye ... post nnan gaw ndai re...
Yawng hpe chyeju kaba sai.

Hpa re n chye ai nhtoi hte gawk kachyi sha law ai kaw na hkam sha lam

18.8.2008

Daini gaw rung pat nhtoi re majaw rau ai. Blog ni hkan hti chyai, laika ni ka na ngu ai wa ... blog ni mung n mai hpaw, myen mung hte seng ai hpa website mung n mai hpaw taw ai.

Grai nan mau mat ai. Mau ai ngu ai gaw Blog new post gaw mai galaw ai. View Blog gaw tsep kawp n mai ai re.
N chye mat sai.

Ya ka nna mara dat ai laika hpe laga mungdan na ni mai hti na kun gaw n chye ai.

Shanglawt blog kaw na shiga hti nna myit grai n pyaw ai. Jinghpaw masha langai a manu gaw lap sen 5 da i? Loi manu rawt wa sai ga rai nga. Moi gaw Sub State hkan, Jinghpaw mung shara nkau hkan roi rip nna zingri ai ... kadai mung ahkyak la ai lam n nga ai.

Ya gaw manu rawt wa sai ngu she tsun ra na kun? Shakum hte baw hte she sa adawt dat ra na kun?

Masin pawt let nga taw ra na kun?

Nye bawnu ting hpring chyat let sumru taw nga ai gaw ...

Amyu sha shimlam lu na matu ???

AMYU A SAI NI

Nanhte gaw lai magang sai ...
Labau lit hpe ngam da ai ...

Zingri zingrat hkrum ai aten

nanhte hpa hpe myit taw na rai ...

Laknak lang let asak apnawng mat sai ni ...

Hpaji sharin ya let matsan mayen jawng sara hku nna asak apnawng mat ai ni ...

Amyu a share shagan ni hpe shangai shaprat let asak apnawng mat sai Kanu, Kawa ni ...

Lam amyu myu hku nna asak apnawng mat ai ni ... yawng ... yawng ...

Nanhte ni shingran mat ai pandung

Anhte n lu shatup ya shi ai ...

Asak htum mahka Shanglawt ngu marawn let

nta wa magang mat ai ni a lam

sumru dat shagu,

myit dum dat shagu,

Nshung si rawng she nga ... nye salum hta ...

Myu tsaw myit ni grau jat wa ...

Zingri zingrat hkrum nna

maroi nni let

nta wa magang mat ai ni a lam

na hkrup, hti hkrup, hkam sha dat shagu

Nye kraw hta myiprwi panglai hte hpring ai ...

Amyu sha shada da hkrum yang

maigan aga hte chyu shaga hkat taw ai hpe mu yang

Karai jaw da ai anhte a tsawm htap ai Jinghpaw ga a shawng lam hpe

Myit tsang ai ...

Hpaji lam hta htum pa madang kaw mau dung nga ai

Amyu sha ni law ai majaw

myit n dik ai ... grau shakut n-gun dat na myit dawdan ai ...

Laning mi tup raitim,

nawku jawng hkan Amyu sha ni a hkungran poi

nau n law ai hpe mu yang

Anhte a masha jahpan hpe myit tsang ai ...

Aloi ali lu taw nga ai namhpam malu masha a majaw

Shingran katsi wa na hpe tsang ai ...

Majaw a majaw

ngai myit n pyaw ai ...

Majaw a majaw

ngai grai shakut ra ai ...

Majaw a majaw

Amyu sha lam hta

ngai shang lawm ra ai ...

Majaw a majaw

Bungli hpe htam lahkawng galaw ra ai ...

Majaw a majaw

ngai hta

Salum lahkawn nga ra mat ai ...

Majaw a majaw

ngai myit n mai daw ai ...

Majaw a majaw

Amyu hpe tsaw ai ...

Majaw a majaw n raitim

Amyu hpe tsaw ai ...

Majaw a majaw

Arawng la ai ...

Majaw a majaw

ngai hpe hkrap na ahkang jaw rit ...

Geis snr Myitkyina Mare Hpung

17.8.2008

 Hi, Sam ... will you go to church?

Bat kru ya shani nga yang san wa re ai ga. Hymn n lang ai sha nawku ai shara, masha hkying kaba kalang ta nawku ai shara, madum sumpyi hte arung arai ni grai hkum tsup ai shara, hkik hkam ai shara ...

Nawku lamang hta myit n lawm ai sha ngai gaw ...

Nbung bung ai de hkan a shun nga ai namlap ni zawn nye myit ni buga de ...

Ndai aten hta Ah Nu gaw sakkung ni dung ai shara hta dung nga na sai. Choir ten hta mahkawn shakawn taw na re.

Kanau gaw Ramma ni a shara hta dung let, shada ahtik ahtawk jahta, shala, mani nga na re. Mahkawn shakawn ten mahkawn hkawn dat, ngut jang bai shaga ai gaw Geis ramma ni re.

Myitkyina ginwang border ma ni mahkawn shakawn ngut ai hpang, Sama ginwang border ma ni bai mahkawn shakawn na sai.

Ngwi Pyaw Nga Mu Ga law ngu shawng tsun let, Amu madu Sara Rev. N-gan Awng Ban tingnyang de lung nna shana ra ai lam ni, nawku hpung hte seng ai lam ni tsun na sai.

Mying gumhkawng ai Geis ramma ni mahkawn shakawn na sai.

Sakkung ni mahkawn shakawn na sai.. Rev. Jap Gun An a Bass nsen ngoi kadu na sai.

Hpung up sara Rev. Gunhtang La Myen mungga tsun taw na sai. Shawa masha ni madat hkam la taw na sai. Ramma ni gaw jahta let, yup nga let, madat let, hkum sumhpa rai taw na sai.

Shana maga ramma hpawng nga na sam ai. Ramma ni KBC a hkrang hte maren akyu hpyi, mahkawn hkawn, nta de bai wa na sai. (Ngai chyawm dai hpe n ra ai.)

Dinghku nawku hta gaw sakkung ni malawng na sai. Shama aw chye Ramma ni gaw Amen ten du wa na sai.

Geis laika dum mung ... ngai hpe marit nga na sai.

Ngai mung, poi shat hpe marit nga sai.

Rau hkawm, rau jahta, rau bawngban, rau kabu, rau yawn, rau hparan, rau shakut wa ai manang ni hpe mung marit nga sai. Hpang de gaw rau ta gindun ai lam mung she n pru wa na.

Shatan ai hta ma n shayawm ai Geis ramma, raitim, garum shingtau ai hta gaw shawng kaw na ..

Ngai zawn anya ai ni nga ai zawn ... ninghkring ni ma sumpum ai ...

Amyu sha lam hta n shayawm ai Geis Ramma ...

Amyu hpe tsaw ai lam hta shingjawng gwi ai Geis Ramma ...

Yungwi shayi shadang ni pru ai Geis Ramma ...

Garum shingtau mayu ai law ai Geis Ramma ...

Amyu sha hpe lam woi na gaw Hpaji re ngu kam ai Geis Ramma ...

Moi ningbaw ni paw pru ga sai Geis Ramma ...

Shawng de ningbaw ningla ni matut pru na Geis Ramma ...

KBC hpe lahkawng byin hkra galaw wa ai mabyin hta hkrum lai wa sai... Geis Ramma ...

Matsan, Lu su grai law ai Geis Ramma ...

Masha amyu hkum ai Geis Ramma ...

Ngai nbwisam grai dum nga ai Geis ... hte nye a Mungdan ...

Ndai zawn Ramma ni shara shagu na buga hpung hkan nga na re. RC rai rai, Hkalup hpung rai rai, Madung ma rai rai Ramma ni, Ramma ni .... Ramma ni ...

Ndai ramm ni hte rai yang hpa na n mai byin na ...

Hpa na me n lu galaw na ...

Hpa na n lu shakut na ...

Tsun yu marit, n kam shakut mat sai i?

N lu galaw na shadu ai i?

Anhte ban prat na ramma ni grai ahkyak ai ninggam de du nga sai. Ndai ban prat hta n mai kataw sai.

Kanu Kawa prat hta majan a majaw hpaji n lu sharin mat ai. Mungdan gawgap ai lam hta hpaji nau n chye shi na ningra ai lam ni nga wa sai.

Ya anhte a prat hta, gai ... n mai kataw sai ... nang ngai yawng madu a shara kaw na dangdi ai made shakut ga.

Nang n lawm yang n mai ai ...

Hkum kau da ...

Shangai Nhtoi hta Ngwi Pyaw Nga U Ga.

15.8.2008

Nang na matu ...


Daini na aten hta shayi sha langai shangai nhtoi kalang bai gu ai.
Dai wa hte ngai n hkrum yu ga ai.
Tim, online kaw na gaw ram ram majan baw yu sai.

Nau gaw n loi ai ...
Ya hpang de gaw online ntsa na shadang sha ni hpe ma garum hpyi na re ...



Shangai nhtoi hta ngwi pyaw nga u ga.


Kalang mung n hkrum yu shi ai
Nang hte online kaw hkrumzup ai majaw kabu ai ...

Nang sumla sa ya ai majaw
na gawng shingyang hpe mu ga sai ...

Na sumla a majaw
nta na yu ni yawng hprawng mat ai zawn
Ngai ma shana nau yup n pyaw mat ai ...

Pizza ra ai nang hte
Hkausoi ra ai ngai
gara hku na hkau mat sa ta?

Laru hte rau sa du awut ai ten ni nga ai zawn
bungshi hpe woi sa ai ten ni hpe
chyeju dum ai ...

Amyu sha lamyan hta jut shara mi kaw na
daw jau nga ai nang hpe hkungga ai ...

Ga shaga yang galoi n shayawm ai zawn
window shopping mung n shayawm ai ...

Phone shaga yang gumhpraw ma na lam hpe
pawt ai nsen hte shadum ai ...

Email sa yang
God Bless You ngu na bai htang ai ...

Nang hte online kaw na ga law hkat ai ten ni hpe
ngai grai dum ai ...

Nawku jawng hta
Nampan mawn sumli ya ai ...
Hpung jawngma ni hpe sharin achyin ya ai ...

Nang na lam loi ka yu na ...

Ram ram tsawm ai ... ngai hpe ganoi dep hkyen sai ...

Myutsaw myit rawng ai ... ngai kaw na sharin la sam ai ...

Buga hpe shatsaw lu hkra shakut nga ai ... nye a jawngma ajet rai sai ...

Loi shatan ai ... Kadai kaw na sharin la da ai kun? Jinghpaw rai na rai sam ai ...

Shani tup hpa n galaw na, shana yuptung she ja ji galaw ai ... Training awng sai ...

Myit htum ai lam hta myit rawt na lam hpe myiman yawng ai ... Ngai hpe sharin ya ai ...

Mai kaja ai lam hta gwi gwi shanang ai ... Nye jawngma :) ...

Aloi ali a sum n jaw ai ... Dai she wunpawng shayi ...

Kalang marang ngai hpe lagu dum na hkrap ai ... Ngai mung dum ai yaw ...

Myit loi kadun ai ... Ngai n sharin ya ai lu ...

Nawku jawng hta yungwi hte shakawn ai ... ndai lam hta gaw ngai hta ningtawn ai ...

Nga n chye myek tim sumla hta gaw hkrang n shayawm ai ... ya hpang sharin ya na ... (Gat kaw na nga gara hku mari na hpe)

...............

Nang hpe ja ja sadi jaw ngut ai hpang she shangai nhtoi akyu hpyi ya na re ...

Ya kaw na visa n lu ai sha nye a yupmang de hkum shang!!! Ngai yup n hkru ai ... :P

Gai ...

Shayi sha ...

Ngwi pyaw ai shangai nhtoi rai u ga ...
Amyu hpe, grau nna amyu shayi ni hpe
Mai kaja ai lam de woi awn lam madun lu u ga.

Lagu myit da ai lam ni dik wa u ga ...

Grai hkrak ai akyu hpyi ga gaw n chye tsun sai.
Ndai hte ram na.

Kalang pyi n mu ga shi tim, shara law law zing da ai sumtsan ga na shangai nhtoi madu hpang de ...

Seng Hkawn Mai a mahkawn bai mara dat ai.

14.8.2008

Seng Hkawn Mai ngu ai Maisak Wang na ramma yungwi shayi a mahkawn ni hpe bai mara dat ai.

Mahkawn gabaw ni hte yawng ngu na daram malap sha kau sai.

Malap ai hte n hkru nna sha ma sha kau ai re.

Dai majaw mahkawn gabaw ni hpe gaw hpang de she ....

Gai... Blog htum pa de re. Madat hkam sha dat yu ga deng!

Jinghpaw Laika sharin hkaja bawngban hpawng

12.8.2008

Jinghpaw laika sharin hkaja bawngban hpawng hpaw poi lamang hpe hpang dat sai re.

Hpaw poi hta du sa ai ni gaw kade nga na n chye ai. Sara kaba Rev. Dr. Ola Hanson chyawm gaw kabu aw law nga na re hpe kam ai. Ya ndai lamang hta chyawm amyu hpe tsaw ai nye a masin salum, bawnu, hkung hkrang ting shang lawm sai re.

Dai majaw shachyen mungga hpe shaga na matu mung nbwisam, madat hkap la nna ta hpawk dum na mung nbwisam sha nga ai re. Amen ten hta tup hkrak du nna ra ai lam ni htet sha nna ngam ai hpe nta de la mat na ramma ni mung n nga ai re.

Shingtai garen let ... gai law... tsun taw yang aten na ai... shachyen mungga hpe hpang dat sa ga ... i !!!

Ngai na kan hpyi ni manai katut ai grai lang rai sai. Kadai manai ai i? ngu yang ngai na salum re. Ndai hku ngu ai hpe gaw chye na re law.. Nanhte Jinghpaw ni... Jinghpaw ga n chye mat sai. Myen ga kalang shaga yang kan hpyi kalang manai ya u ngu sara kaba langai tsun da ai. Matsing sumhting ai lam grai kaja ai nbwisam gaw dai sara kaba a mying hpe malap kau sai.

Lahta kaw ka ai zawn Myen ga n shaga na matu gaw n tsun mayu ai. Myen wa hte, myen ga hte matut mahkai ra yang shaga u. Ingalik wa hte, Ingalik ga hte shaga ra yang dai hku shaga u. Raitim, hpa nhten, anhte shada da gaw myen ga hte sha shaga hkat, nawku daw jau, hkat re ai gaw htuk manu ai lam n rai nga ai.

Nang ... du na shaning ni hta prat pra wa na na a kashu kasha ni hpe maigan ga chyu shaga let nga pra shangun mayu a ni?

Anhte a aga, laili laika hpe Karai Kasang jaw ya sai. Tut nawng ngan grin nna shu mashi shu masha prat dingsa ngang grin na matu hkringhtawng jaw da mayu a ni?

Nang daw dan na lam lahkawng ... (Mangkyi Hkawng Lum a mahkawn gasi hpe la lang dat sai law... )

Shachyen mungga loi galu mat ai. Mara nan ga brawp jin ai re majaw... :P

Gai, yaw dat ga. Wa shat gaw n re yaw...

Lakjet ngu mying shakap na mung ... ngai gaw sara mung bai n rai ai majaw ... mying hpe numdaw langai ngu shakap na.

NUMDAW (1)

Shawng nnan ka dan na gaw sumtsaw laika n re. Nang shingran ai mung n re. Ngai lagu ra taw ai shayi sha a lam ma n re. Ndai ram n tsun ra ai. Ngai n chye na ai mung n rai. Nang hte hpa n seng ai. Ngai tsun ai n na ai i? Hpa n galaw ai law. Tsaw ai lam hpe n gwi tsun ai. Nang n tsaw ai raitim, ngai tsaw na.

Gai hti ngut sai kun i?

Lahta kaw ahkyeng hte ka da ai n hpe mu na sai.  N ngu ai gaw ningdang ai hpe tsun mayu ai re.
Ningdang ai lam ka tim, nkau laika ni hta ndai zawn ka da ai...

Shawng nnan ka dan na gaw sumtsaw laika nre. Nang shingran ai mung nre. Ngai lagu ra taw ai shayi sha a lam ma nre. Ndai ram ntsun ra ai. Ngai nchye na ai mung nrai. Nang hte hpa nseng ai. Ngai tsun ai nna ai i? Hpa ngalaw ai law. Tsaw ai lam hpe ngwi tsun ai. Nang ntsaw ai raitim, ngai tsaw na.

Ningdang ai kumla rai yang gaw madu ka na lachyum hte gang na ka ra ai. Matut na n mai ka ai. Matut na ka yang gaw hti ai n manu ai.

Ningdang ai kumla ka ai hte seng nna sharin hkaja bawngban ga.

Ndai laika hpe ngut du hkra hti ya ai myitsu wa hpe shakawn sai. Jinghpaw malawng gaw madu a laili laika hti ra ai. Madang shatsaw ra ai. Yaw ra ai. Anut ra ai. Marawn taw nga tim, ta tut hta Jinghpaw laika grai law yang baw sin nna yup pyaw mat mat re ai.

Gai taw... ndai lang gaw ndai kaw naw hkring na. Ya shayi sha langai gtalk kaw na shaga wa sai. Ngai lawan bai n shaga dat yang htawm hpang na shingran masan n sa na tai ai.

Madu a laika n mat hkra, rawt jat galu kaba wa hkra, jut shara mi kaw na gasat nga ai nbwisam ...

PS. Sara kaba Rev. Dr. Ola Hanson a sumla hpe mara shakut yu tim, n mai mara hkraw taw ai majaw hpang de she mara sa na re.

Ndai hpe hti yu ga. Hti byin hkra hti ga.

11.8.2008

Ndai shiga hti ngut ai hte rau laika langai ka na nga tim, myit kaw na nan n pru ai re majaw lawu na link kaw dip let sa hti yu ga.

Ndai kaw dip dat u.

Alak mi gaw n tsun sai. Ndai lang sha byin ai n re majaw...

Gara hku matut galaw sa wa na... makawp maga sa wa na.... anhte hpa baw galaw ra wa sai hpe matut bawngban ga.

Myit yu ga. Kraw salum hte nan hkam sha yu ga.

Chyeju dum ai Shanghtin e ...

11.8.2008

Ndai laman woi ma-un si lu ai hpa computer nnan hte o kajam le kajam rai taw ai. Bang da ai OS gaw XP SP 3 pirate re majaw error hkrai hkrai.

Kade error law ai ngu ai gaw Shanghtin pyi ma kaba hte mau ai hku re. Jahtum me gaw OS hpe bai npawt kaw na bang dat sai.

Computer amu galaw ai lawan na hte hkang zing na lam ni hpe Shanghtin hpaji jaw ai hte maren galaw ngut ai hpang gaw ... ya du hkra 3 ya tup ram atsawm n yup shi tim n-gun hpring taw nga sai re.

Manang wa a computer amu galaw ai lawan na matu hte ra mara ni hpe Shanghtin a blog kaw sa yu nna hpaji mai la ai lam hpe mung shana dat mayu ai.

Ngai zawn computer nau n chye ai ni pyi a tsawm sha chye lang mat sai re. Shakut yu ga.

Loi shinglet galu mat ai. Tsun ra ai gaw ndai kaw ... Chyeju dum sai yaw .. Hkau Shanghtin e....

Ngwi Pyaw Nga U Ga.

Ps. Computer hte seng nna n chye yang shadang sha ni gaw Hkau Shanghtin kaw garum hpyi nhtawm, shayi sha ni gaw ngai kaw garum mai hpyi ai lam laksan lamang hku na shana dat ai.
Ngai i? Ngai mung shadang sha re majaw shayi sha ni garum hpyi wa yang Hkau Shanghtin hpe bai san na rai nga..
:P

Lagyam Bawm Win a Na makau hta

6.8.2008

Lagyam Bawm Win a Na makau hta ngu ai mahkawn album hpe mara dat ai. Mahkawn yawng gaw n lawm shi ai. 1, 2 ya nga ai hte bai jahpring na re.

Ya gaw ram ram kyin taw na internet pyi atsawm n lu lang shi ai.

Myi n-gun a matu mung grai sawk sagawn yu ra ai hte re majaw... N rai jang Shanglawt Blog zawn myi machyi na ma tsang ra ai le .. i?

Mahkawn madu hpe gaw ahkang n hpyi shi ai. Raitim, chye na ya na re kam ai. Sumtsan de du taw ai n lu madat shi ai manaw manang ni a matu re..

Blog a htum pa de re.. Madat hkam sha la ga.

Shanghtin .... Dum nga nngai ... hpe chyeju dum ai lam

6.8.2008

Bat langai ya shana hta computer kaw anti virus gara mung n mai bang taw ai. Window gaw XP SP3 re.. Original gaw n re le.. chye ai hte maren lam makau na mari na install galaw dat ai. :P

Manghkang wa she rai sai ten, n myit mada ai sha Karai Kasang gaw Shanghtin hpe dat dat ya ai. Byin taw nga ai manghkang hpe garum ya ai Shanghtin hpe chyeju dum ai lam masat mayu ai.

Beer hte gaw n rai sai. Laika hte sha... Ya mu yang bai hkrum ga.. aw chye, mu ai shaloi den ga le i? Hkau...

Beer lu ai n rai hkau?

Grai chyeju dum sai yaw.
Ya hpang de ma matut manoi garum la rit ngu tsun mayu ai.

Myit dum let....

:)

Bai ndau mayu wa sai.

4.8.2008

Loi bai ndau na re.

Lai wa sai bat kru ya 2 August 2008 hta nbwisam gaw laptop langai ting mari dat sai re.
Acer hpan re. Lawu na hte maren rai sa.

Acer Aspire 4920
Intel Centrino Core 2 Duo (1.86 Gz)
1 GB DDR2 RAM
120 GB Harddisk Drive
14.1" LCD with Web Cam
DVDRW
Bluetooth ni hte ra ma ra loi lawm ai re.

Computer n lu yang n mai ai re majaw shakut dat sai ga re.Ndai shata gaw kan loi gyit ra sa na re. Computer hte seng nna ra wa yang shanghtin zawn chye ai myitsu ni naw garum ya marit.

Shawang myit kaba ai ni muk ni sa ya mai ai. Hkausoi htuk ni, nga chyu ni nga yang grau kabu na re.Grau nna gaw Mayu kasha ni hpe garum hpyi mayu ai. Dama wa hpe naw she garum la marit.

Garum shingrau la ai Mayu kasha ni hpe (Shayi sha) chyeju htang ai hku nna ... nbwisam a tsawm sumla bai sa ya na re.Manu mana akyu rawng ai re.

Mayu kasha ni a gawk hta yu ni tsep kawp n nga mat na hpe ga sadi jaw ai. Shawoi sa chyai ai manaw manang ni yawm mat wa na hpe ma ga sadi jaw nngai.

Sumla hta gaw nbwisam hpe mu lu na matu palawng ahpraw hpe da sang hpun da ai re.

Sadi... Shadang sha ni hpe gaw TSEP KAWP n jaw ai re. Hput di na hpyi tim pyi n jaw na matu myi prwi si wai wai hte daw dan da ai re. Myit hta gaw n pyaw ai. :P