30 June, 2009

Dam hkawm nga ai Shadang sha langai

30 June 2009

"Nang n dawdan gwi ai i?" nga nna san wa ai gasan hpe htai na matu, Buga de shingran let ngai sumru yu hkrup ai. "Haaaa ... hpa hpe tim na Buga, na amyu hte shingdaw taw ai gaw... ndai prat hta masha tai na grau ahkyak ai yaw "... nga nna n-gun n lu ai nsam hte tsun wa ai Maigan shayi sha langai hpe mau yu nga ai Ngai...

Dai aten hta shingran nga ai Bum shagawng ni hpe lung na matu Ngai hta atsam nga ai ngu chye ai.
Dai ram n-gun n dat ra ai lam hta hpa majaw ung ang nga ai?

Lata la mai ai n re. Byin tai wa ai lam langai hpe Ngai tsawra ai. Ngai arawng la ai.

" Jinghpaw num rai jang she Num re ngu shadu taw ai i?" makau kaw na aput taw ai nsen ni hpe na maza wa ai. Ndai zawn aput chyu aput ai num ni hpe yu magang n tsawm la ai ngu Ngai na myit hta myit taw nga ai.

Panglai hpe lai di na ngu gaw Ngai n tsun mayu sai. Kaning re nme law, Bum ga hta Panglai n nga ai gaw...

N lu yang si na law, hpa law ... nya law ngu na mung n kam tsun ai. Tsep kawp ma n kam ai majaw...
Rai sa, dai rai jang Hpa majaw tsaw hkrup ai ngu Ngai na myit hpe Ngai bai san taw ai. Shinggyim masha she re me. Tsaw ra myit hta bunghku n nga ai ngu bai myit shadik la dat ai.

Nampan langai pu tsawm na matu aten kade la ra ai hpe ngai n chye ai.
Udi langai gara hku krawk wa ai hpe galoi n dung yu ga ai.
Maisak hpun langai mi hpe akyu mai jashawn na matu aten kade la ra ai ngu ai hpe ngai n chye ai.

Shi hpe gaw "hpawtde bai hkrum ga" ngu tsun dat ai. Shi mung shi jawng de wa mat ai.
Nta n kam wa shi ai majaw, Shopping pru na matu Mega Mall de sa wa ai.
Mega mall gaw rai mari na matu grai manu dik ai shara langai re.

27 June, 2009

Kaning di ra na?

27 June 2009

Aga! shani shana na hta hpring chyat nga ai shiga ni...
Lahpa hpye sumbu she lawan chywi da ra na zawn zawn...
N'gu she mari jahting da ra na zawn zawn...

Pru sa mu ngu ai Chyum laika hte maren, pru sa mat ra na kun?
Gara de wa pru mayu ai ta? (Nye hkum ngai bai san.)

Na nhtoi raitim, makoi nga ai Shata jan e
Shagawng shana re le, pru wa rit le taw...
N pru wa na nga jang mung, shiga sha gaw jaw da rit le.
Myit ba la sai...

Jahpawt rawt ai hte shawng nnan ngai na ai Salum htuk htak nsen gaw Myu hte Mungdan a matu raitim, Ngai hpa lu galaw ya lu na?

Jawng ni hpaw mayu ai.
Bungli ni jaw mayu ai.
Ngang grin ai laksan awm dawm mungdan langai hku tsap mayu ai.
ai ... ai ... ai ... ai...

Huuuu...

26 June, 2009

Ban Dawng hkrun lam hte Buga shiga adaw achyen

26 June 2009

Grai nan shari mat sai.
Ban Dawng mare de sa ai hkrun lam hpe!

Marang htu da ai hte mawdaw kaba lai da ai majaw lam dingyang ayak ahkak hte lai ra mat ai. KENBO 125 Sengke, shawng na taya gaw Point Taya nga ai hpan n rai taw ai. Dai majaw grai kashawt ai. Ban Dawng kaw na bai Namsan yang kaw du yang, sengke kashin seng kaw kashin ai wa, hkying hkum mi chyen (1:30) ting na ai.

Hpa mi nga tim, n galau ai hte atsawm akawm MKA de bai du wa ai majaw Karai Kasang hpe chyeju shakawn ai.

Moi ya Nba Pa de sa ai shaloi mung myu tsaw mung tsaw hpyen la ni grai gawan hkawm nga ai. Ya, ndai lang hta gaw maigan amyu hpyenla ni ora de, le ra de grai hkawm sa nga ai hpe mu lu ai.

....................

Ya aten Jinghpaw mungdaw gara de mi sa sa (lai wa sai bat hta, Danai lam Dumbang, Lawa hte laga mare ni, Sinpraw hkran Namsan yang grupyin mare kahtawng law law hte Ban Dawng) ni hta grai gumhkawng nga ai mahkawn gaw Ting Luk a mahkawn ni re.

"Shingra tara majaw... nang hpe tsaw ai n rai... salum kata de na ... tsaw ra myit majaw ... Nang hpe ngai tsaw ra ai.. dai hpe nang chye na ya... kaja ai mahtai langai mi jaw rit ..." ngu ai mahkawn ni hte laga mahkawn ni ... grai grai gumhkawng nga ai.

Ting Luk
"SAMA" ngu ai mahkawn album re.

....................

Ndai laman Myitkyina-Laiza lam mayan hkan Mini Bus ngu ai (Man Lone ... myen hku hti ya rit) mawdaw ni dagup, galau ai lam ni loi loi byin nga ai re. Masha si ai, hkala ai lam ni ma byin nga ai.

Moi ya Loije de sa ai shaloi mung Sinlum lam hkan mung dai Mini Bus ni sha dagup galau, krung de shang mat ai lam ni byin ai re. Ya dai shara ni hta gaw wut shadaw jun nhtawm sadi ra na lam ni galaw da sai re ngu chye lu ai.

....................

Hkrun lam kaw grai pu ba wa ai majaw nta naw wa na shat ni sha la, hkring sa la sa na re. Ndai hkrun lam hta Ah Nu hpe phone n shaga wa ai majaw grai tsang taw ai re lam mung chye lu ai.

22 June, 2009

Chyeju grai kaba sai yaw.

22 June 2009

Shangai nhtoi shaloi akyu hpyi ya ai ni, shaman ya ai ni yawng hpe grai chyeju dum ai lam ndai blog laika man hta na myit dum masat ka dat ga ai.

Yawng hpe grai chyeju dum nngai.

Shangai nhtoi shani gaw manang langai hte pawng nna jawm jaw sha dat sai.

Lusha jahpan

1. u shan ju
2. Ga di mee shae (Myay oh mi shay)
3. Shat jam
5. Hkausoi ga ngau
6. Lamung si ni rai ga ai. :D
Dai lusha ni hpe Buffet style hku nna ahkru sha la sai. :P

Shana maga hta gaw, laksan manam ni gaw n raitim, sara a sara ngu na zawn re ai ni, tsawm shayi ni, lagu myit da ai Nu a kanam (ngai na maga hku nna... :P) hte rau Mali hka makau kaw sa dung let, Cruise sanghpaw ntsa kaw jawn nga ai ngu myit dum shingran let sha la saga ai.

Aga! hpa tsun na n chye sai. Yawng hpe grai chyeju kaba sai law.

Moi ya kaw na ka na ngu she, internet connection gaw grai bai hten mat ai majaw re.

16 June, 2009

24 Ning de ...

16 June 2009

Ngwi pyaw ai shangai nhtoi rai u ga.
Hpa gaw n seng tim, madu hkum madu sha tsun la (wish) di dat sai.

Blog ka ai mung aten na wa, asak mung 24 gaw du wa...

Aga! hpa ngu na mung n ngam shi nga ai le taw?

Raitim, amu bungli loi li gaw lu galaw da ai majaw myit mung dik ai.
Karai e, ngai hpe shangun rit ... shangun rit.

Shangai nhtoi bai ladu hkrum sai majaw shawng nnan Karai Kasang hte Kanu Kawa hpe grai chyeju dum ai.

17 June 2009 hta asak 24 ning hpring na Nbwisam hpe Nbwisam sha akyu hpyi dat ya sai. (yu u le, kade myiman htat ai ngu gaw!)
Chye ... n rai shi ai law... Kadai wa ma kumhpa wa jaw na kun? Akyu hpyi ya na kun? naw la yu na re. Kadai n nga yang she nye hkum ngai kyu hpyi ya sa na.

:D

15 June, 2009

Katsi katsang Myitkyina IV

15 June 2009

Mana gaw Manau wang hta Rock Concert ngu ai galaw ai.
Katsi katsang re. Masha mung nau n law ai.

Shawa masha ni gaw Naw Naw, Aura Li ni hpe grau n-gun jaw ma ai.

Sa yu ai shawa masha ni mung n law ai. Dunghkum ni mung jan she jan.
Show poi galaw ai ni gaw arang pyi bai lu ai kun?

Dai re law. Katsi katsang ngu ai gaw... dai rai sa.

E, katsi ai law... katsang ai law ...

14 June, 2009

Rock Concert

14 June 2009

Daina maga hkying 6:30 hta Shatapru Manau wang, Majoi gawk nu kata e Rock Concert ngu ai hpe galaw na ma ai.

Njang Kawng, Masat 11 lawu tsang jawng alu hku nna galaw na re da.

Extreme Band:
Drum- Seng Awng
Bass- Nja Tang
Guitar- Kyang Nu
Keyboard- Zau Hkun ni dum na re.

KNG dancer group ni ka hkrang shala na re da!

Yungwi shayi shadang sha ni gaw:

Naw Naw
Aura Li
Ah Ba Di
Chit Thu Wai
Yadana ni rai ma ai.

Lekmat manu gaw: 10000/- 8000/- 6000/- hte 3000/- (Tsap let yu na matu) re.

Marang htu ai ten re majaw masha law law gaw nyau nyau rai taw tim, show ni gaw galaw dingyang re. :P

13 June, 2009

Sha Mo hpun hte Sut Ngai (Mai Bat)

13 June 2009

"Sha mawt dat sai kawn gaw, sen 2 ram gaw yawm dik re (Miwa gumhpraw). N shamawt shi na sha ... "
N-gun mi alu tsun taw ai gaw Sut Ngai Buga Hpung shing n rai Mai Bat kaw na Sara langai rai nga ai.

Grupyin hkan na bum shagawng ni hpe mada let sumla dem dat, ga shaga dat hte aten jahtum nga ai. Nba Pa de rawt na matu re.

Loije kaw na hkyin hkum mi daram (dai ram gaw n na ai.) sengke hte jawn yang Mai Bat de du ai. Ndai gaw marang htu na hkrun lam yak yang hpe tsun ai re.

Lam dingyang hte bum shagu ram hta kumshu sun hkrai hkrai ! Ga sau ni pyi htum mat na zawn she shadu ai. Dai chyu hkai da ma ai.

Buga kata lamu ga lu madu da ai ni gaw hkai lu hkai sha ai lam hte gumhpraw grai shang ma ai. Lamu ga n lu ai ni gaw daini galaw daini sha ngu na zawn re.

Mai Bat mare hta htinggaw gaw 300 hkawt nga nhtawm grupyin hkan na bum ni de ayai aya nga ma ai. Miwa ni ma nga ai. Miwa malawng gaw hpyenla la ma ai re.

Mai Bat mare a sinpraw de gaw Nshawn hka lwi ai. De a o ra hkran gaw Miwa mung rai mat sai.

Myihprap wan lu ai. Black area re ai da. Mare masha malawng gaw Zaiwa ga shaga ma ai. Jai lang ai gumhpraw gaw Miwa hte Myen re. Miwa hte grau manu ai re da.

Hkalup hpung, Hkahtaw lik, Nat jaw ni jawm nga ma ai. Malawng gaw Hkalup hpung re.

6 ya kalang "gat nhtoi" nga ai. Grai tsawm ai hte grai nga pyaw ai shara re. Raitim, grai kashung ai.

Buga masha ni tsun tsun re ai. "Nang ... U goi ai nsen n na ai kahtawng de nga mayu yang (Sut Ngai) Mai Bat kaw sa nga u da. Kaja nan re. U ngoi ai nsen, goi ai nsen n na hkrup wa ai.

12 June, 2009

Manmaw ... Loije ... Nba Pa hkrun lam

12 June 2009

Daina maga she Manmaw ... Sinlum ... Loije ... Nba Pa hkrun lam kaw na bai wa ai. Hkrun lam ting sumla dem dat, san sagawn dat hte amu bungli hte seng na galaw ra ai mara hkan du hkawm yu ai.

Lai wa sai bat hta blog hpe update galaw na myit makun tim, internet connection n lu mat ai marang e, ya du hkra zim mat ai re.

Yawng ngwi pyaw nga u ga law.

02 June, 2009

Hpaji jaw shut ai.

2 June 2009

Hpaji mung n chye jaw.
Jaw hkrup yang mung bai nhtang matsa katut.
Tsun mayu ai gaw laga.
Tsun hkrup ai gaw laga rai taw sam sai.

She re gaw... Maigan kaw nga ai ni she grau chye chyang ma ai.

Nta sin ai ni gaw kyip kyip sha raitim, sin tik tik !

01 June, 2009

Nye a Myitkyina

1 June 2009

Katsi katsang Myitkyina ngu ai gabaw hte gaw shiga zawn san ai ni hte chye ging ai lam ni ka na re.

Nye a Myitkyina ngu ai gabaw hte gaw Myitkyina a lam hpe ka mat na re.

Myitkyina ngu ai lam kaw na shawng ka hpang na re. Ndai laika ni gaw ngai langai hkrai a, hti ga ai, na ga ai, mu ga ai hpe mahta na ka na re majaw shut shai ai lam ni nga jang sharai ya marit.

Myitkyina ngu ai mying gara hku byin wa ai hte seng nna mahtai amyu myu nga ai.

1. Moi Miwa hte Gala ni gunrai shalai dut ai shaloi zup nna Miwa hte hkrum ai shara - Meet China ngu ai kaw na pru wa ai re ngu mung tsun ai. Dai aten hta China hpe (Chaing Nar) ngu n pru ai. Chi- Nar ngu pru ai re majaw re.

2. Mali hka kaba makau kaw nga ai majaw myen hku Myit Kyi Na (Mali hka kaba makau) ngu shamying ai mung nga ai.

3. Ake na nga ai kaw na galai shai wa ai re ngu mung tsun ai.

Ndai hpe tsun ai nkau mung naw nga na re. Ngai n chye sai majaw ndai ram sha.

Myitkyina kaw lawk 24 nga ai. Ya chyawm gaw bai jat ai ni nga sai. Raitim, lawk nnan ngu sha malawng shamying ma ai.

1. Myothit
2. Myoma
3. Minyat
4. Eyar (Rung lawk)
5. Yan gyi awng
6. Yuzana
7. Shan zu dingdung
8. Shan zu dingda
9. Jinghpaw wang
10. Maisak wang (Kyun Pin Thar)
11. Le Kone
12. Ziun
13. Khe Mar Thi Ri
14. Thida
15. Dap Kawng
16. Njang Dung
17. Shatapru
18. Mye Myint
19. Myothit Gyi
20. Rampu
21. Du Kahtawng
22. Jan Mai Kawng
23. Aye Mya Thar Yar
24. San Pya

Ndai hkan Manhkring, Shwezet ni hpe n shalawm da ai. Dai gaw mare kahtawng bai rai mat sai majaw.

Bai matut na ...