09 December, 2010

Hong Kong Nbungli Pa

2010 ning December shata 9 ya


Hotel kaw na Nbungli pa de Free Shuttle Bus service nga ai. Gumhpraw tsep kawp n jaw ra ai. Hotel kaw manam ai ni a matu re. Hotel kaw na tinang hkawm na nhtoi n du shi yang 2 ya ram kaw na tau hkrau tsun da yang kaja ai. Tinang jawn na Airlines hta hkan nna gara Terminal re ngu ai hpe shanhte sa sa ya ai re.

Nbungli pa kaw gaw Immigration lai ngut ai hpang gaw wanleng hte bai sa ra ai. Lakang kaw ka da ai gaw Relax! Train will arrive in every 2 minutes nga kun re.

Check-in galaw ai shaloi hkan mung arung arai ni anoi abya rai taw yang shanhte paper box jaw ai. Service jaw ra ai ni yawng hpe maren mara jaw ya ai gaw grai hkrak nga ai. Yangung nbungli pa kaw na zawn ora jep, ndai san, power madun ai lam mung n nga ai.
Thai kaw na zawn Myen mung passport lang da ai majaw laksan kanawn mazum yu kaji ai lam ma n nga ai.

Nbungli pa kata kaw gaw grai hkum tsup re nga ai. Nye matu gaw! Free Internet Services ni, Wi-fi ni, tsawm ra gaw hkrak nga ai. Hkrak na rai nga ai le. British ni atsawm ngang ngang kang kang galaw da nga ai gaw...

Hkying 3 hta gaw BKK de pyen sa na re. Ya gaw 2 PM ram rai wa sai. Off sai.

Food Terrorist

2010 ning December shata 9 ya

Mana de gaw lusha seng langai kaw sa sha ai.
Anhte a Jinghpaw bum ga de nau n mu ga ai lusha ni aging htim shapyen kau sai.
German sara gaw shi lusha grai law la sha sha re ai majaw ngai wa Food Terrorist rai taw sai kun ngu mani hpa galaw taw ai.



Um...Terrorist hpe Jinghpaw hku gara hku tsun ra ai hpan kun? Chye ai ni naw ka da ya marit.

Geis ramma ni a ningtawn ai lam gaw shakap ginsup ai lam re nga ai hte maren aging ginsup kau sai re.
Shakap ginsup =  Sha ai hte Shatan ai. ;)

06 December, 2010

Canton Lam ntsa na gat seng ni

2010 December shata 6 ya

Canton Road

 Taukawk ni
Taukawk ni

Daini ka-ang gaw shat sha ngut ai hpang Canton lam nmaw kaw na gat seng ni hpe hkan yu ai.
Nga ni, Katsu, Jahkan, Shell, Oyster, namsi namsaw, namlap, mati, Taukawk, Shu, hpa gaw hpa re n chye ai dusat ni, hkum sumhpa hpe mu ai.

Mari ai, dut ai masha hte hpring taw nga ai.
Chyau lachyan Pyada langai mi hte rau sumla naw dem dat ai.

Nta ni hpe yu yang gaw htap 30 jan ai chyu law nna du pyi tsu ai.
Nam masha rai na kun gaw n chye ai, Grai garu gaji ai zawn hkam sha ai.
Lam ni gaw kaji, masha gaw law, mawdaw gaw chyat, raitim, nga pyaw na zawn san ai ginra gaw re.

05 December, 2010

Camera nnan hte Bangkok Nbungli pa

2010 ning December shata 5 ya


Daini mari dat ai SONY camera nnan hte Bangkok nbungli pa hta dem da ai sumla nkau mi.
Daini gaw Thai Hkawhkam a shangai nhtoi ladu hkrum ai shani mung rai nga ai.
Jinghpaw ni hpe garum madi shadaw ya ai lam ni na lu ai majaw kabu chyeju dum ga ai.








Hong Kong du sai.

2010 ning December shata 5 ya


Hong Kong de du sai.

Passport, Visa, D-Form mayak ni grai law tim Karai Kasang a shaman chyeju a majaw atsawm sha du lu sai re. Visa hpe gaw Dec 3 ya shani lu ai. Passport hpe gaw Dec 3 ya shana she lu ai majaw D-form hpe Passport dingsa hte she galaw da lu ai.

Kajawng kaja poi-zar ni ap, gumhpraw 35000/- jaw na ap! Raitim, Karai Kasang a shaman chyeju a majaw nbungli pa na lit nga ai ni gaw hpa mung n tsun ai sha ahkang jaw ya ai. Raitim, hpang na lang gaw passport nnan hte sha D-form galaw na matu tsun ai.

Ndai hkrun lam gaw Karai Kasang lajang ya ai nan re. N mai byin sa na. N loi ai ngu rai taw ai masa kaw na ya gaw Hong Kong lamu ga hpe atsawm lu kabye taw sai.

Karai Kasang a chyeju hpe nachying wa shakawn nngai.


7Eleven de sa na lu na matu Hka sa mari let, Heineken Beer hpe mu nna lama mi myit lu ai majaw mari wa ai. Dai gaw moi Hpakant an ai prat hta Jinghpaw Sut du ni manu mana lu lai wa sai Beer re.
Raitim, daini na aten hta gaw Lungseng gat lawk kaba gaw Hong Kong hkan she rai taw ai. Hong Kong kaw na ni she Heineken Beer hpe matut manoi lu taw nga ai.

26 August, 2010

Gmail kaw na phone shaga ga.

2010 ning August shata 26 ya

Gmail hpaw ai hte shawoi n mu ga ai Phone shaga na matu kumla mu wa ai.
Hpa wa mi kun ngu na install galaw ngut ai hpang madu a phone de bai shaga yu ai wa, mai ai oi.
Gumhpraw gara hku jaw ra ai re gaw n chye sa.
US hte Canada gaw 2010 ning na matu FREE da.
Shaga yu, madu na phone ngoi pru wa yang kabu rai nhtawm nga taw ai. ;)

Miwa phone, myen phone gaw chyam yu sai.
Jinghpaw phone sha n lu chyam shi ai re. :)

22 August, 2010

http://namkawn.blogspot.com

2010 ning August shata 23 ya

Blog langai mi shachyen ya mayu ai.

Dai blog hta nam kawn hte seng ai lam ni madung ka ai blog re.
Anhte a buga ginra lam ni, hpun maling hte seng ai lam ni hpe ka ai blog re.

Myit lawm hpa re hta n-ga anhte ni yawng hti nan hti yu ging ai blog re.
Matut manoi ka na matu blog madu hpe mung hpyi shawn mayu ai.
Anhte Jinghpaw Blogger wuhpawng kaw na mung kabu gara hkap tau la ga law.


http://namkawn.blogspot.com

Sa du shachyen la ga law.

http://namkawn.blogspot.com

2010 ning August shata 23 ya

Blog langai mi shachyen ya mayu ai.

Dai blog hta nam kawn hte seng ai lam ni madung ka ai blog re.
Anhte a buga ginra lam ni, hpun maling hte seng ai lam ni hpe ka ai blog re.

Myit lawm hpa re hta n-ga anhte ni yawng hti nan hti yu ging ai blog re.
Matut manoi ka na matu blog madu hpe mung hpyi shawn mayu ai.
Anhte Jinghpaw Blogger wuhpawng kaw na mung kabu gara hkap tau la ga law.


http://namkawn.blogspot.com

Sa du shachyen la ga law.

17 August, 2010

Marang si ni a npu e gumhtawn nga ai salum lahkawng

2010 ning August shata 16 ya

Marang kapya taw ai kaw na marang si ni grai kaba wa ai.
rung rung rang rang htu bang wa ai marang si ni a npu e ...

Nye salum aging agang gumhtawn taw ai le
Ja hta manu dan ai shi a mahtai gasi

Pru hkyen zim hkyen
kahpra hkyen kabu hkyen

Mahkrum madup n nga ai masha lahkawng i?
Mahkrum madup law sai masha lahkawng i?

A dip a rip roi sha hkrum ai kaw na kaba wa ai ma kasha re majaw kun?
Aru ara matsan shayen hkrung grin gan-ga wa ai ma kasha re majaw kun?

Ngai ala nga ai ... la nga ai ...

Shi a salun na pru wa ai gasi ...
Ngai mung tsawra ai le ...

Karai e, grai chyeju dum ai, Chyeju dum dik sai.

Hkawn e,
Nang hpe mung grai chyeju dum ai.

Hkawn e,
Nang hpe mung ngai grai tsawra nngai.

03 August, 2010

Ngwi pyaw ai shangai nhtoi rai u ga MPA

2010 ning August shata 3 ya


MPA gun hkawm nga ai.


Dai nampan langai
shi a myiman hta
di hkyen hkrat hkyen noi nga ...
hkrat hkyen yang bai shalun
di hkyen yang bai matut
sumsai nampan
shi gun hkawm ai.

Dai myit masin langai
shi a kraw hta
run hkyen hkrat hkyen
run hkyen yang bai awai
hkrat hkyen yang bai shaja
marai rawng ai myit
shi gun hkawm ai.

Dai laikyang langai
shi a shamu shamawt lam hta
malap hkyen shalai hkyen
malap hkyen yang bai shadum
shalai hkyen yang bai shahprang
kup tsup ai lai kyang
shi gun hkawm nga ai.

Dai myit langai
shi a salum hta
kadun hkyen n chye masu su hkyen
kadun hkyen yang bai gang shaw
n chye masu su hkyen yang shi hkum shi bai shadum
shi a dinghkrai galu ai myit
shi gun hkawm nga ai.

Dai yaw shada ai lam langai
shi a bawnu hta
mat hkyen si hkyen
mat hkyen yang bai sawk
si hkyen yang bai asak matut
Myu hte Mungdan a matu
shi gun hkawm nga ai.

17 July, 2010

Laiza de sa ai.

2010 ning July shata 17 ya


July 16 ya shana maga de Laiza de sa ai. Myitkyina Ba-la-min-htin mahkrai lai ai hte ngai na myi hta mu lu ai gaw ... Lamu ga sha re.

Re, Lamu ga ni.

LAMU GA !

Jinghpaw mung hta lamu ga ni grai nga ai looooo !
Wunpawng myu sha ni e,
Madu la marit. Madu la marit. Nanhte n nga yang kadai madu na?

11 July, 2010

Dum ai.

2010 ning July shata 11 ya

Hkum hkrang gaw bai du wa ai.
Salum gaw ngam da sai.

Sichuan simai ni
jap ai, hawm ai.
Machyang si law ai. Majap law ai.

Na sumsai myiman ni
salum sai ni hkring ai.
Nsa sa shut ai.
Shawng lam a matu myit n-gun jaw nga ai.

Dwi sau pyaw ngawn ai na a nsen
yup rawt ai hte shawng nnan na mayu ai.

Dum ai.
Dum ai.
Dum ai yaw.

10 July, 2010

Hpa baw ka ra na kun?

Blog ka na shakut ai.

Proxy ni, btunnel ni kaw na shalai ai.

Hpaw sai. Lu hpaw sai.
Sign in galaw ai. Connection hten mat ai.

Bai shakut! Sign in galaw., ka dat sai, Publish galaw ai.
N lu ai.

Ka sai,. ka ai.

N mai mara ai.

Myit htum ai. hpa baw ka ra na pyi n chye mat sai.

25 June, 2010

Shangai nhtoi kumhpa ga shagawp by MPA

2010 ning June shata 25 ya

 MPA a shangai nhtoi kumhpa ga shagawp re. Grai chyeju kaba sai. Myit adum sha re masat masa ka ya ai majaw... :)

Mahkrum madup law law hpe hkam mana chye hkra sharin ya ai,
Myit marai shaja ya ai ,
Tengman ai hpe gwi gwi galaw chye ai ,


Laika buk ni hpe tsawra ai ,
Sumla hkrung yu nlagawn ai ,
...Kalang lang myit loi kadun ai ,


Gasi gangau , hpyan hpyan pa pa chye ai,
Nga si mai , nai hte Nu a japhtu hpe marit chye ai,
Gumra baw kata palawng hpe myitdik let hpun chye ai,


Jinghpaw htawngpa hpe manu shadan let hpye ai,
Kanau hte Kanu hpe shadawn ndang hkra tau ya chye ai ,
Manang ni hpe dum let kumhpa sa ya chye ai,


" Hpyi nem ai "hte "chyeju kaba sai " ngu ai ga hpe
lang shagu nre tim law law lang tsun chye ai,
Hpraw ai salum hte amut nsam hpe madu da ai ,


Nang ..Nbwi gam ,
shangai nhtoi ladu bai hkrung sai..


Ngwi pyaw u ga !
Hkamja u ga !
Simsa u ga!


Karai Kasang shaman ya u ga !
Myit da ai ..mang da ai lam ni tatut byin wa u ga !
Sumtsan manang , Ngai , Maran Kaw
Kyuhpyi dum dat n-ngai oi !

17 June, 2010

25 ning !!!

2010 ning June shata 17 ya

Daini gaw nye a asak 25 ning hpring ai nhtoi rai nga ai.

Shawng nnan Karai Kasang a shaman chyeju ni hpe n dang tsun hkra kabu shakawn nngai.

Jahpawt jau jau nta kaw Chyinghkai Nu gaw hkausoi shadu jaw ai. Grai sha mu ai. Namchyim rawng ai. Grai chyeju kaba sai Ah Nu.

Manaw manang ni mung shangai nhtoi masat wish ni galaw ya ai majaw mung grai chyeju kaba sai.

Um... 25 ning hpring sai.

Karai Kasang a shaman chyeju, Kanu Kawa a bau maka wa ai hte Jinghku Jingyu ni a garum shingtau la ya ai lam ni a majaw she 25 ning hkrun lam kaw atsawm sha lu lahkam taw ai rai nga ai.

Sara, Sarama ni a sharin achyin ai lam ni hpe mung n mai malap nga ai.

Ngai n kaji sai she rai nga ai.
Ya du hkra ma kasha zawn re ai laikyang ni sharai ra sai.

Hpa baw amu bungli ni galaw ngut sa ta?
Dai kaw na gaw hpa baw gaw akyu rawng a ta?

Myit yu sumru yu... sawn chyu sawn... tatut gaw hpa n lu galaw shi !


Sara langai mi a shangai nhtoi masat ga shagawp kumhpa hpe kabu gara mara dat ga ai.



25 Ning Hpring Sai
SAM a Matu Birthday Kumhpa

Hkamja asak galu, Sutsu nga mu,
Shangai nhtoi ladu hkrum ai akyu.
Kanu Kawa ga madat,
Kani Katsa hpe mung hkum gasat.

Sumru ai lam shi hpe chyu,
Prat tup machyu na mung shi hte chyu.
Ndai gaw na a shingran,
Tatut gaw naw tsan ai lu yaw..

Raitim,…

Shakut ai ni she,
Tsi gut lu ai me.
Shi a matu tsaw myit hkum shataw,
Kaga masha ni hpe mung hkum achyaw.

Tinang hkawm ai lam hpe shagreng,
Hkalem hkalau ai de mung hkum n gyeng.

Ja Bum hpe gaw sin ai baw,
San seng ai hpe myit masin hta dagraw,
Doi hpe gaw galoi mung manoi ai baw re lu oi…
Seng bum hta grau ai mung shi,
Awng dang na lam de du lu na ningli,
Mai byin wa na gaw SHI hte sha re lu yaw…

Panlawng (MZ)

16 June, 2010

2010 ning June shata 16 ya

Internet connection lanyen ai.
Hpa n mai hpaw yu ai.

Gmail lu hpaw na matu yak ai. Ya gaw loi lu sai. Facebook hpaw yak ai. F5 jin hkra dip ra ai. Shana nsin hkan she loi lawan ai.

Hkau Kachinbee jaw da ai IP hkringdat ni mung amu n galaw mat sai. Bai jaw ya rit yaw.

Htu ai. Marang htu ai. N hkring n sa htu ai. Rung e rang e htu dat, kapya dat, zim masu na shinggan pru yang bai htu bun dat hte Myitkyina marang wa ! Nye a yup gawk hpang kaw na 'shu' ni ngoi ngoi ai wa... yup pyi n lu ai. Nsen gaw loudspeaker 5 ram shakap da ai zawn nan ngoi ai.

Mungkan gawdin 2010 ! yu ai. Yu ma ai. Nta hkan mung yu ai. Shinggan de mung yu ai. Ngai gaw hkayawm sama n dang hkam ai majaw nta kaw sha yu sai. Raitim, ram ram hkrak ai lamang ni gaw n lu yu nga ai. 1 AM re majaw. Umm... TV langai dang gaw mari nan mari ra sai. Gawdin shingjawng poi yu na matu.

Hkau Kachinbee jaw ai Utlra surf hte mung ganoi noi gaw lu yu sai re wa. Connection failed to server chyu rai mat na n chye mat ni ai. Yangung hkan gaw facebook ni, Usurf ni yawng mai ai nga chye lu ai.

Myitkyina kaw she n lu sam ai.

18 May, 2010

Jinghpaw Simai

2010 ning April shata 18 ya

Lu ga. Sha ga. Kalang mung n lang yu ga ai Camera hte dem da ai re.





Laiza de sa nna bai wa ai.

2010 ning April shata 18 ya

Shana maga hkying 4 chyen daram hta Myitkyina kaw na rawt wa ai. Gara Yang du ai ten hta gaw hkying 5 chyen taw sai. Gara yang kaw jahkring hkring, senke jak loi katsi ai hte hkrun lam hpe bai matut sai. Namsan Yang du ai ten hta gaw hkying 6 pyi chyen mat sai.

Nansam Yang kaw na bai rawt ai ten gaw hkying 6 minute 45. Namsan Hka mahkrai lai, Lailong Lisaw mare lai ai kaw na gaw hpang wa sai. Hpa rai nga yang gaw...

Ka-bun ngu ai wan tu ai de ganaw shang ai hpan. Ka-bun ni wa lam nmaw ntsa e, sen sen wan wan daram nga taw ai. Jit ji na matu sengke jahkring hkring dat ai pyi n mai ai. Hkum ting htim gasat wa ai. Sengke wan pat kau tim n lu ai.

Jahtum me gaw jan shingkang makawp myiset achyang hpe sha set let, shana nsin e sengke hpe manu mana sadi let gau wa ai. Lam ding yang ka-bun hkrai hkrai htep re. Myiman, Na, lata, sinda, du, lahtan, shara shagu nan htim wa ma ai. (Lap 4000/- dan myiset a akyu majaw :D )

Hpa baw hte bung ai i nga yang, zaibru jang hta nbung bung wa ai majaw zaibru ni poi wa ai hte bung ai. Laiza Muklum de shang wa ai Shanglawt gate lai yang she ka-bun ni hkoi mat ai. Dai kaw na gaw tsep kawp n nga sai. Grai mau mat ai. Dai hte ani sha re ai myen gate nga ai Laja Yang du hkra ka-bun ni grai sawng ai re.


Laiza

Grai hkraw mat ai hpe mu lu ai. Masha mung ram ram shau mat ai.

Laiza kaw na manam jarawp (Hotel) ni gaw Myitkyina hte shingdaw yang grai nan madang nga ai. Hkrak ai. Manu ma hkyem sa ai. Simsa Hotel kaw manam ai. Hkrak ai. Hka shin gawk sha loi kaji ai.

Hka shin jasan jaseng ngut ai hpang gaw hkying 9 ganoi rai sai. Dai aten du hkra shat sha la taw ai shayi sha langai hpe grai chyeju dum ai lam ndai kaw na kahtap tsun mayu ai law. Wunpawng ngu ai shat seng kaw sha ai. Lusha hpan 6 kun 7 kun malap sai. Grai law ai majaw, gara she n chye hta sha mat ai. :)

Shana shat mung jaw sha, kam ai hku lang na matu Modem mung shap ya ai majaw n dang tsun hkra chyeju dum ai law.

Manang langai mi gaw sa chyai na i? nga ai majaw, kalang mung n du yu ai Munglai hkyet de sa du yu ai. Lapran tsang jawng de sa du yu ai.

Bai matut na...

05 May, 2010

Online ntsa kaw na lagut ... daw II

2010 ning April shata 26 ya

Copyrights ni hte seng nna hti yu ging ai laika link nkau hpe lawu de mara dat ai. Dai laika ni yawng gaw Myen laika hte ka da ai re. Dai Blog madu Pandora hpe ahkang hpyi ti na link galaw da ai re.

Dai kaw ka da ai zawn tsep kawp hkan shatup ra ai, hkan nang ra ai ngu mayu ai gaw n re. Raitim chye da ging ai hte hkan nang yang kaja ai lam ni hpe mu lu na re.

Copyrights ni hte seng nna
http://pandora-and-pandora.blogspot.com/2008/11/blog-post.html

Copyrights, Creative Commons License ni amu galaw ai lam
http://pandora-and-pandora.blogspot.com/2008/11/creative-commons.html

Creative Commons License ni bungli galaw ai lam
http://pandora-and-pandora.blogspot.com/2008/11/creative-commons_03.html

Ya garan kachyan, shawng lam hpe hkrang shala
http://pandora-and-pandora.blogspot.com/2008/11/blog-post_03.html

Masha ni kaw na mung hkum lagu, tinang na mung hkum lagu shangun
http://pandora-and-pandora.blogspot.com/2008/11/blog-post_29.html

23 April, 2010

Online ntsa kaw na lagut

2010 ning April shata 22 ya


Ndai laika hpe ka mayu taw ai gaw na sai. Hkrak re n chye ka ai hte tsun shut shaga shut na mung tsang ai majaw re. Raitim, ya na zawn re aten gaw htuk manu dik ai aten re majaw ka dat sai.

Email kaw na du wa ai laika langai hpe ngai na blog hta mara dat ai. Dai email hpe hti nhtawm me blog ntsa de mara ya ging ai ngu sawn hkrup ai majaw mara dat sai. Masha law law, grau nna gaw Jinghpaw ni law law chye ging ai. Dai majaw dai email laika hpe mara dat ai.

Blog de sa du yu ai ni gaw chye na sai. Dai gaw KNG shiga dap kaw nna tinang na n re ai sumla hpe tinang she gayet na mara da ai zawn galaw da ai re. Grau sawng ai gaw dai sumla madu hpe credit n jaw da ai lam re. Dai hta grau sawng ai bai gaw sumla madu hpe ahkang n hpyi da ai, shana ai lam pyi n nga ai re. Dai lam hpe gaw lawu de na www.kachinnews.com de ngu ai post kaw mai hti ai re.

Dai lam hte seng nhtawm me blogger ni, blog de sa du ai ni, online user ni kadai mung comment n jaw ma ai. N jaw shi ma ai ngu she tsun ra na sam ai.

Dai laika hpe KNG de mung sa ngut sai lam Sumla madu hpe lakap let chye lu ai. Ya du hkra KNG gaw dai sumla ni hpe yen kau ai lam, sumla:KNG ngu ka da ai hpe dawm kau ai lam, sumla madu hpe masat masa credit jaw ai lam ni tsep kawp n mu lu shi ai. Dai gaw masha ni galaw shakut da ai hpe masat masa n kam galaw ai hte tinang shut ai/ra rawng ai lam hpe gwi gwi n tsun gwi ai ngu mu mada ai.

Dai zawn galaw ai gaw manu mana n hkrak ai amu bungli rai nga ai. Masha ni shadu kachyawng da ai hpe aloi ali dung htit rai nna alu tsu sha mayu ai myit jasat hte bung ai.

Online ntsa kaw na lagut ... daw II hpe bai matut na

20 April, 2010

www.kachinnews.com de ...

2010 ning April shata 19 ya

Ndai laika gaw; Hkau Tarung Brang shagun wa ai laika re. Blog kaw mara ya rit nga ai majaw mara ya dat ai re. Shi ka ai hte maren blog kaw mara dat ai re.


De.
www.kachin news .com.

Myitrum ai kachin news ni hpe sha dum mayu ai lam nga ai.

Dai gaw 19/April hta kachinnews hpe ngai Tarung Brang hpaw hti ai shaloi ngai shakut da ai shi sumla ni hpe KNG mying hte lang da ai hpe mu ai. Dai majaw myitrum ni hpa majaw ngai na ahkang n lu ai sumla hpe nanhte a mying hte lang ai kun?

Myitrum ni e, mang wa ahkang n lu ai lang ai gaw masha hpe n kaw ai rai kun?(sh) hpa zawn n nawn ai rai kun? Amyu kaba ai myu ni she re ai wa hpa majaw ahkang n hpyi ai rai.Ahkang n hpyi ai lang ai majaw ngai tarung brang n ra ai.

www.kachintodayusa.org ni mung ahkang n hpyi ai sha shanhte a website hta mara da ai raitim photo credit jaw da ai majaw grai wa gaw n kam tsun sai.

Anhte Jinghpaw ni "shada da re" nga ti na madu myit ra ai hku n mai galaw na re. Masha shada n mu lu ai "Virtual world" nga tim shada hkungga lara nga ra ai. Ngai gaw Ja Gumhpraw Dollar $ sha di na galaw ai wa n re. Amyu sha lamyan langai hku na yawng hpe chye shangun mayu ai majaw Madu myit hte galaw ging ai hpe galaw taw ai re. Dai hpe amyat htuk ai gaw n hkrak na re.

Dai re majaw laman lawan dik ai hku dawm kau ya rit.Ahkang n hpyi yang sumla ni hpe n lang lu na. Amyu kaji mayam myit n lang ga.

N ra sharawng ai hte,

Tarung Brang

KNG ni upload di da ai sumla link

N ra sharawng ai nga yang mai matut mahkai ai. Sang lang hkat ga.
Hkringdat: tarungbrang@gmail.com

17 April, 2010

Mali zup maga de bawm kapaw

2010 ning, April shata 17 ya

Dai hpawt jau jau Mali Nmai zup hka madin gawgap nga ai Asia World company ni a construction site ni hkan e bawm kapaw ai lam na chye lu ai.

Teng n teng gaw hkrak re n chye shi ai. Na lu ai shiga hku nga yang gaw Mawdaw ni ma hten mat ai lam chye lu ai. N-gup aga sha naw re majaw, hkrak gaw n chye ai.

AIT kaw hkai da ai Hpun

2010 ning April shata 17 ya

2008 ning May shata hta manaw manang ni hte rau htawm masat hku na hkai tawn da ai hpun, ya gaw tsawm ra mi kaba wa nga sai. Masat masa a matu lama ma galaw ga ngu myit ai ten, hpun langai mi dang hkai ga ngu! anhte group ni tang shawn dat ai.

Myen mung na TV ni hkan e, ningbaw ni hpun hkai hkai re ai hpe dum dat ai majaw, group discussion hta hpun hkai ga ngu tsun dat ai shaloi manang ni mung myit hkrum lawm ai hte tang shawn dat sai.

De hpang gaw AIT jawng uphkang ai lit hkam ni hte jahkrup nhtawm hpun langai mi jawm hkai tawn da sai re. Ndai hpun tu kaba wa ai zawn, lani mi na nhtoi hta anhte ni mung seng ang ai mungdan hkan ningbaw kaba ni, shinggyim wuhpawng hpe akyu lu jaw ai ni tai wa u ga ngu yaw shada wa ai.

Ndai gaw 2008 May shata hta hkai da ai hpun hpe 2009 March shata 25 ya shani, laning mi daram na ai hpang mu lu ai hkrang ...

Photo credit to Dr. Joydhan Tanchangya


2010 April shata 10 shani bai dem da ai sumla


Photo credit to Hkun Myat

16 April, 2010

Nbung laru, Marang si kaba hte Myitkyina

2010 ning April shata 16 ya

Daina maga hkying 3:35 PM ram kaw na gaw nbung laru kaba bung wa sai. Hpun hkyep ni daw, num hpu ni mawng, namlap ni run re nan hka jaw poi mung ayai aya rai mat sai.

 Nbung bung ai kaw na minute 30 daram kaw na gaw marang kapya wa sai. Jahkring jang marang si kaba ni hte htu wa sai. Shana maga hkying 4 PM jan jan sha naw raitim, nsin sin mat ai zawn she nga ai.

Hkying 6:15 PM ram kaw na she marang hpawng mat ai.

Lama na, mani wan hkru ai ten hta ndai zawn nbung bung yang Myitkyina bu ni gaw manu mana shoi chyum sai re. Mani wan hkru ai aten hta, daini nbung bung ai aten gaw hpa n shai nga ai.

15 April, 2010

Myitkyina kaw wan hkru

2010 ning April shata 15 ya

Myitkyina kaw wan hkru ai. Daini hkying 4 jan hta.
Shara gaw Myoma lawk, KBZ bank hpang maga de, sau seng kaw na hkru hpang ai re da.
Shwe Mate Set seng de arung arai sa hpai garum ai ten hta, Pa-dong-mar miwa seng hkru hpang taw sai. Wan n-gun ram ram ja ai. Ya gaw yawm mat magang sai.

Wan hkru ai kaw sa garum ngut na net lang dat ai hte manang ni kalang ta tsun dan ai gaw Yangung kaw bawm kapaw ai nga ai.

Maram masam ai ni tsun taw ma ai gaw ... daining myen ni namik kumla n hkrak sai. Lucky n kaja sai. Myen ni hpa galaw law sum na, hten na re da.

13 April, 2010

Jay Chou a mahkawn ni

2010 ning April shata 13 ya

Ndai mahkawn ni hpe 2008 ning shaloi grai madat sai.
Ya kalang bai shani tup daram madat taw ai.

video


video

09 April, 2010

Hkam sha ...

2010 ning April shata 9 ya

Sumla nkau mara dat ai.
Htuk manu ai hku hkam sha yu ga ... ;)















sumla: nbwisam
shara: summer house lusha seng, shata pru

Lu ga. Sha ga!

2010 ning April shata 9 ya

Manang ni hte lusha seng sa ai shaloi ...

Nga shan ju wa, loi lai hkra hkat mat re nga ai.


:)

Sumla: nbwisam
shara: River View

07 April, 2010

Shat sha ga le...

2010 ning April shata 7 ya

Gai gai gai ... blog de sa ai manaw manang ni, myit su ni yawng ... shat sha ga le.
Grai mu ai re lu...

Majap htu


Kang Kong gangau


Ang Nam gayau


Sha ga yaw... Hkum agam!


Nu weiii.... namchyim namta rawng ai lo.. Mu dik ai. Shaga yaw..
Shadu jaw ai tsawm shayi ni hpe mung grai chyeju kaba sai. :)

Buga Shiga (Kani)

2010 ning April shata 7 ya

Sumla hpe dip dat yang grau kaba ai hkrang hte mu lu na.

Anhte a shawnglam gaw ndai i?
Anhte a prat gaw ndai zawn sha rai sa na i?

Myit n pyaw, myit machyi ...

Raitim, dai hte sha n ngut ai majaw ... gara ladat hpe jai lang let sa wa na hpe maigan du myu sha ni mung hpaji jaw marit.

Ga shadawn; Norway ni, Holland ni hkan e Kani ya ni hpe kanawn mazum ai, galaw ya ai social service ni hpe ma garan kachyan ya marit.

sumla: nbwisam
shara: La Hpa jakli daru
aten: 2008 ning, April shata 13 ya, 4:06 PM
(Sumla hpe tinggyeng a matu jai lang na rai yang ahkang hpyi ra na re.)

06 April, 2010

Flickr

2010 ning April shata 5 ya



Flickr

www.Flickr.com ngu ai site gaw sumla hte sumla hkrung ni upload mai galaw ai shara re. Dai site hta e upload galaw na matu gaw yahoo account nga ra ai. Dai yahoo account nga jang gaw flickr hpe mung mai lang sai re.

Flickr hte 2008 ning kaw na she chye lang hpang ai. Flickr hta Free user rai yang gaw shata mi hta e 100 MB upload galaw na ahkang nga ai. Dai hpring mat jang gaw hpang na shata du hkra bai la ra sai.

Pro Account rai jang gaw unlimited re. Kam ai daram upload galaw sa nu. Mai sai.
Pro Account gaw laning mi na matu rai yang;

1 year = 24.95 $
2 year = 47.99 $ ang na re.

Dai hpe madu a account a matu mari la tim mai ai. Shing n rai, madu a manaw manang ni hpe kumhpa jaw mayu ai nga tim mai ai re. Dai account ni mari na rai jang gaw Credit card nga ra na re.

Ya daina, Czech mungdan Prague kaw na manang langai, grau nna gaw shayi sha langai a shawang myit kaba hte garum ya ai majaw Flickr Pro Account langai hpe laning mi tup n hkring n sa upload galaw mai sai re. Kabu mung grai kabu ai. N-gup she ganoi pat na yak ai daram re!

umhumm! ya chyawm me gaw rau shagu dem da ai sumla ni, movie clip ni, mara na matu Jin grim!

Grai chyeju kaba sai yaw. Charles University kaw hpaji hparat shakut shaja hkaja nga ai Wunpawng Shayi sha e ... Kaja nan chyeju dum dik sai. Nang hpe Karai Kasang gaw tut nawng bau sin makawp maga ya nga u ga.

Du dep na aten ni hta na htai ra ai sanpoi ni hpe mung tsaw dip ai madang hte awng padang dip lu u ga yaw.

04 April, 2010

Yangung hkrun lam


2010 ning April shata 4 ya



N myit mada ai sha ahkyak ai lam langai mi pru wa ai majaw Yangung mare de sa ra mat ai. March 25 ya jahpawt sa mat ai. Shani ka-ang kaw du ai. Aw... Shat ban pyen li hpe grai chyeju kaba ra mat sai.

Hkrun lam hta e blog kaw ka mara na zawn re ai ni grai gaw mu hkrum wa ai. Laika hte hkrai rai jang gaw lagawn lamawn tai na tsang ai majaw sumla hte hpawn ... lawu de na zawn ...



YJH nawku jawng hpe ntsa kaw na mu lu yang ...



Maza mala sumpum sumpam hte Shwe Pi Aye lam ...


Nbwisam sa manam ai nta kaw na zaw; ndai zawn n mai hpaw mat ai. Hkying hkum hku rai wa ai majaw hpa n chye galaw ti na sumla gan dem da ai re. Akyu gaw grai hpyi sai le. ;)
Nta kata kaw lusha hte seng na gaw hkyep mi pyi n nga ai.


Jahtum me, Nta de sa chyai ai manang wa gaw, o anyaw le anyaw galaw taw let lu hpaw mat ai. Zaw gram ai gala la wa du wa ai hte chyinghka mung hpaw da ai majaw mau mahka nga ai. Shi a hpaji hte zaw hpe bai mai matut na kun? ngu yu taw yang ...

21 March, 2010

Ginhtawng Shingni ... Yungwi Sumpyi

2010 ning March shata 21 ya

Mana March 20, hta gaw Dap Kawng nawku jawng kaw Ginhtawng Shingni ... Yungwi Sumpyi ngu ai Nu Num ni a mahkawn shingjawng poi de sa ai. Stage hpe hkrang shala da ai gaw grai tsawm ai re. Nbwisam gaw grai ra mat ai.

Kawa hpe waw nhtawm me, kata kaw wan pu ni bang da na galaw da ai. Made in Kachin jet jet nan rai sai law. Gara hpan re ngu gaw lawu de na sumla hte maren re.

Jahtum na sumla gaw nbwisam dung ai shara re majaw kachyi sha law galaw da na re. Dai kaw yu ai hte gaw hpa galaw ai re hpe soi sam mu lu sa na re. Shanwg nnan galaw ga ai re majaw, hkrak n hkrak pyi n chye shi ai. Myit mung loi kahpra taw ai le.

Dap Kawng Buga Hkalup hpung hta hpung lawk 10 nga ai. Dai hpung lawk langai kaw na Nu Num langai hku nna shang shingjawng ai re.

Hpawng hpaw akyu hpyi ngut ai hpang gaw lawu de na yungwi ninghkring ni gaw mahkawn buk 2 hpra mahkawn ma ai. Kalang ta gaw n re. Shingjawng poi lapran hkan matep na shangwi shapyaw ya ai re.

Bawm Win
Kareng Kai Din
Hkapra Hkun Awng gaw buk 3 mahkawn nu ai.
Nahpaw Htu San
Minzai Lum Naw
Dinghkang Lu Awn
Jumzang Hkawng Naw

Mahkawn shingjawng ai hta gaw Lawk 8 kaw na Kanu kana jan gaw No. 1 lu mat ai re.

Jinghpaw ni a yungwi generation gaw du na ban 3 ram du hkra gaw tsep kawp n tsang ra sai.
Raitim mung, hpaji hte seng ai lam ni hte masha atsam shaw let galaw ai amu bungli ni hkan e gaw grai naw shakut ra ai lam mu lu ai.