Hkahku hkrun lam sumla nkau

 December 20 ya, 2009 ning

Sumla
1. Rau sa ai manaw manang ni
2. Layan jak li daru
3. Dam kahtawng kaw na ma kasha ni. (Jawng n sa shi yang, jakli hpe 500 kyats jaw na jawn, Layan ja maw de namlaw namlap ni sa dut, Dam kahtawng de bai wa, jawng sa ai ni re.)
4. Maza sumpum hte Bai nam ni
5. Hkyet wa nga sai Mali hka

Mali hka (2)

December 19 ya, 2009 ning

Mali Hka

December 19 ya, 2009 ning

Ding Jang Yang mare

December 16 ya, 2009 ning

Ding Jang Yang mare!

Wa Shawng mare kaw na loi mi matut sa nhtawm Gawset yang n du shi yang lapai de magaw na deng 4 hkawt sa ra ai re. Ya aten hta gaw Lasang Awng Wa hpung a gaiwang kata kaw re lam chye lu ai.

Yi nam ta rai jang hkrun lam grai yak hkak ai. Lagaw lam hte sha anut ra ai re. Mare hta htinggaw 200 jan nga ai hta chyen mi daram gaw Lisu amyu sha ni re. Ngam ai gaw Lawng Waw ni rai nhtawm me Jinghpaw htinggaw gaw 30 ram nga ai.

Nnan de gaw dai ram wa n tak da ai. Raitim, Ding Jang Yang mare de ai gaw grai na sai rai nga ai. 1920 ning hta Lisu amyu ni shawng de hpang ai re majaw ya gaw ganoi 90 ning rai sai re. 2020 ning hta gaw mare de 100 ning hpring na re.

Lawu tsang jawng nga ai.
Nawku jawng 4 nga ai.
Mare hpe Lawk 1, 2, 3, 4 ngu garan da ai. Lawk 1 hte 2 gaw Lisu ni laksan nga ai. Lawk 3 gaw Jinghpaw ni nga ai. Lawk 4 hta gaw Lawng Waw ni malawng nna Jinghpaw ma loi li nga ai.

Mare masha ni malawng gaw yi, sun, hkau na ni galaw sha ma ai. Ya aten hta Company ni shang shara la ai hte Rubber, Mura hpun sau ni grai hkai taw ma ai re.

Yinam ta shagu daram machyi makaw hte asak sum mat ai mare masha ni grai law ai lam chye lu ai.

Anhte Buga kata Myu sha ni a hkam ja lam a matu masing masa hkrak hte galaw nan galaw ra sai.

Sam Pai de du da ai.

December 15 ya, 2009 ning

Daini gaw rung kaw azim sha loi hkring sa la na re she ngu yang ... rung du ai hte jahpawt kaw na shani ka-ang du hkra ala dingda taw ai ni nga taw sa hka!

Rawt ra sai.

Sam Pai de... Gara yang kaw na bai sa ra ai re. Awng Ja yang mare ni lai ... lai ... lai yang Sam Pai de du ai.

Mare kaw lwi ai hkashi mying gaw laklai ai. Japan hka da. No.II mungkan majan shaloi Japan hpyen la mang ni grai sumpum mat ai majaw Japan hka ngu shamying ai re da.

Htinggaw gaw kanoi 300 jan ai re. Moi gaw hpun dabang grai an wa sai raitim ya chyawm me gaw hpun ni mung yawng atsai awai htum mat hka rap!

Aga... daina chyawm me gaw Sam Pai mare amu madu a dum nta ni daw jaw ai shana shat grai tit hkra sha kau sai. Dumsi shan hte re. Ang sha-a wa dut ai hte mari ti na anhte hpa daw jaw ai re.

Dumsi = Hkum ting ju kap ai dusat re.

Mi yet sha bai du ai. Grai pu ba sai. Hpawtde ma matut hkawm ra ai. Raitim, grai kabu ai. Madu a Buga kata lu hkawm sa ai majaw.

Hkahku hkrun lam

December 14 ya, 2009 ning

Sumpra bum de sa na nga tsun da ti na gaw, kaja sa ai shaloi gaw n lu sa mat ai. Mawdaw lam hku rai jang gaw Hka garan yang na npu Namhkam hka mare du hkra sha du da ai. Hka (jak li) hte gaw Dam kahtawng du hkra sha du da ai re.

Nye a hkrun lam hpe loi tsun dan mayu ai. (Nye a hkrun lam ngu ai gasi gaw BARS jawngma ni shapraw ai laika buk kaw na re.)

Du da ai shara nkau mi ...

Tiyang zup
Lai wang yang
Sup Hka (Gurhkra mying re. Lachyum gaw, hpa mung n nga ai ... kata ai shara re da.)
Lai Sai (Mare hten mat sai.)
Namhkam hka
Wudang
Ushi zup
Layen
Dam ...

Mare kahtawng ni law malawng gaw, machyi makaw hte malu masha yak hkak ai hpe mu lu ai.

Hkarang yi galaw ai raitim, yu ni sha kau ya ai majaw hten za mat ai.
Mying atsawm re n chye tsun ai (pyen chye ai) dusat a majaw nli ni n kaja mat ai. Mam mu na ten (mam dan na ten) du yang mam ni atsawm n pru mat ai.

Acre mi hta nli dang mi gat yang dang 16 ram sha law dik bai lu ai majaw laning hte laning grai yak hkak wa ai re. Dai hta, kan hkyeng a majaw yi nam ta hkan e mare masha nkau gaw si htum mat wa ai.

Hpaji lam hta gaw lawu tsang jawng ni nga ma ai. Raitim, jawng sara/num yak hkak ai hte Kanu Kawa ni nan mung grai wa awng sharawng hkra n re ai hpe mu lu ai. Hpa majaw nga jang gaw ja htu ai maw ni nga ai majaw hte dum nta hta yak hkak ai majaw re.

Raitim mung, Shanglawt ginra hkan e gaw laika sharin jawng ni hpe matut hpaw da nhtawm Kanu Kawa ni mung a sharawng re jawng de dat nna hpaji sharin shangun ai lam ni hpe mu lu ai. Dai langai mi gaw loi laklai ai.

Garum kahtau grai ra ai.
Prat tup matu garum ya na matu tsun mayu ai gaw n re.
Raitim mung, dai mare kahtawng ni atsawm bai tsap wa lu hkra, bawngring rawt jat wa hkra yawm dik 5 ning ram gaw garum ntum ni law law ra nga ai.

Ngai langai hkrai hku nna gaw, laga lam hta mi n lu garum tim, hpaji lam hta grai garum mayu dik ai. Raitim, ngai kade wa dang di na ta?

Dam kahtawng a dingdung daw na kawng ntsa kaw gawgap da ai lawu tsang jawng kaw na jawngma ni a laika marawn hti ai nsen ni... nye na hta ngoi kadu nga ai. Wunpawng mungdan shanglawt dawnghkawn gaw nbung ntsa hta o de wut dat, ndai de nawt dat ... pyen nga let ...

Jinghpaw Buga gaw Hpaji hte woi awn na Myu Tsaw Ningbaw ni hpe Ningma hkang hte ala dingda nga ai zawn ... Mali hka she ga chye shaga yang ...

Blogger Hta Hkrup machyi nga ai.

November 7 ya, 2009

Hkungga ai mungkan ting na Jinghpaw blogger ni hte, blog sa hti hti re ai myu sha ni yawng hpe hpyi lajin mayu ai.

Anhte a myit rum manang blogger Hta Hkrup gaw ya aten machyi makaw hkrum taw ai re. Kalang lang madawn ma madawn ai ngu chye lu ai.

Dai majaw, blogger Hta Hkrup lawan ngwi pyaw hkam kaja wa na matu akyu jawm hpyi garum rit. Karai Kasang kaw na ngwi pyaw hkam kaja ai chyeju akyu ara hkam la lu nhtawm shi matut galaw ra ai amu bungli ni hpe bai gun hpai lu u ga.

Sumpra Bum de rawt na.

November 7 ya, 2009

Bat mi daram shana shagu n lu yup ai. Amu kyin taw ai majaw.
Hotel gawk la ai.
YMCA kaw manam ai.
Pantsun kaw manam ai.
Tsep kawp n lu yup ai.
Galaw ai. Design galaw ai. Edit galaw ai.
Myit shuk ai.

Yup mayu ai.
Laika gayet ai.

Ga shagawp ka ai.

Jahpawt 3:45 AM hta shi hpe naw sa tau ai. (Chyau lachyan) Shawa lam hkawm poi de sa sa ya ai.

Myit pu ai ni yawm wa ai.
5th December shana, yup hkru hkra yup la sai.
Poi daw pyi n lu sa sha ai. (Lagawn dik ai ngai.)

Laban shani Workshop lung na sa shaga ai.
N sa ai.

Daini gaw sa ai. Hpawtni din Sumpra Bum lung na.
Mali Zup hta lai na kachyi pyi n ganip ga ai. Ya gaw Nbwisam rawt sai. Nye a mungdan ting she chyam hkra ajawt hkawm na.