27 March, 2009

Yangung de bai rawt sai.

27 March 2009

AIT, Dom N kaw Internet lang nga ai.
Taxi la nga ai.
Rai baw ngut na kabu ai.

Myit hta n ja ai.
Chiang Mai de sha dum nga ai.

Raitim, wa ra mat sai.

Lani mi bai hkrumzup lu hkra
shakut nga ai.
Bai hkrum ga.

26 March, 2009

Bangkok de bai wa sa na.

26 March 2009

 
Tsawm shayi hte nampan


Daina hkying 9 PM mawdaw hte Bangkok de bai wa sa na re. Chiang Mai mare hpe nja tim, wa ra mat sai... hka ra mat sai ...

Chiang Mai mare de du da ai majaw grai pyaw sai re. Online manang, shinggan manang ni hte ma hkrumzup lu ai majaw grai kabu ai.

Chiang Mai de du ai aten hta garum ya ai manang ni (mying gaw n dan sa na) yawng hpe grai chyeju dum ai lam tsun mayu ai. Lam madun woi hkawm ai, Thai ga hte tsun shaga ya ai manang ni yawng hpe grai chyeju kaba sai law. Galaw nga ai magam bungli ni masan sa wa u ga.

Sumla ni mara shakut yu tim, grai lanyan taw ai majaw Bangkok kaw na mahtang bai mara yu na re. Ndai zawn hkawm sa lu ai majaw Karai Kasang hpe ma grai chyeju dum ai.

Yawng ngwi pyaw nga mu ga.

24 March, 2009

Chiang Mai de du sai...

24 March 2009

Chiang Mai de du sai. Daihpawt du ai.
Mana gaw AIT kaw na Morchit ngu ai Bus station de sa. Dai kaw lekmat mari ai wa VIP sha nga mat sai majaw marai langai mi Baht 806 ting ang ai. Shana tup jawn ngut ai hpang jahpawt hta gaw atsawm akawm du sai.

Du ai hte rau sa tau ya ai manang ni nga ai majaw grai kabu let chyeju shakawn sai.

Online kaw sha mu ga ai manang hte mung hkrum zup lu ai majaw Salum ni htuk htak taw nga ai. Ya aten hta gaw n sha ga ai, n mu ga ai ni sha hkrup, yu hkrup let mau mahka nga ga ai.

Daini tup grai ngwi pyaw simsa ai Hue Tin Tot ngu ai Nawng Ing hkinggau hta sa hkring sa la ai. Lusha ni langai hpang langai sa dut ai. Ra ai lusha lawm jang htet sha let, kan she tit mat ni ai.

Myen mung hta pyi hkyem sa ai manu hte re. Ram ram hkyem sa ai ngu mai tsun ai.

Ya chyawm pu ba let, jahkring hkring sa la nhtawm daina gaw Mu Ka Hta ngu ai "Wa shan Buffet" sa sha na re.

Yawng ngwi pyaw nga mu ga.

21 March, 2009

Maru marang

21 March 2009

Baw gaw sin
myi gaw jap
nyep gaw lwi
yup gaw mayu
Jahpawt hkying 2 AM

Bai sa jasu
aw ...
phone shaga taw ai hpe pyi
she malap hkra
yup pyaw mat ai ...

Rawt wa jang
phone gaw tam n mu
maru marang tam
labu gaw ayai aya

Gawk na phone gaw ngoi wa
yup gaw n hkru
baw gaw sin
nyep gaw lwi
huu...

Mic magra ai ni
sumpum ai zuphpawng
mani dat, mau dat, pawt mayu dat ...

Shani shat sha ten
lawan she du wa nga ai...

20 March, 2009

Bangkok hte Internet

20 March 2009

Bangkok de dai hpawt pyen wa ai. Shani kaang ram hta du ai. Du ai hte sa tau ai ni nga ai kun? ngu na ja ji masem yu tim, kadai n nga ai. :P Myit hta gaw Thai shayi langai ngai wa sa tau kun ngu ai wa she ...

Taxi hte manam na shara de sa ai. Rai ni kabai bang ngut ai hte rau Filipino manang hte shat tam sha sai. TESCO Lotus ngu ai Shopping Mall kata kaw, marit maroi Tom Yum Kung ngu ai hte htim dat sai.

Ngut jang gaw hpang sai gaw... Gumhpraw galai na nga jang mung kadai bai English hku n lu shaga. Lata hkrang hte international ga hte shaga tim n mai. Internet seng mu sa. Wifi hpe mung n chye na. Aga ga ! N loi ai. N loi ai. Policy ni wa... Madu a aga hpe sha lang wa hkra galaw da ai masa ni wa ...

Hpa mi nga tim, tsi lu na naw yup la na re. Mani kaw na machyi taw ai. Waw mung shang taw ai. Blog bai lu hpaw ai majaw mung grai kabu ai.

Yawng ngwi pyaw nga mu ga.

19 March, 2009

20 ya shani Bangkok de sa na.

19 March 2009

Token numbat gaw 90! Masha gaw law she law. Jan gaw chying re ja ai npu kaw tsap dat, dung dat hte Thai visa lu na matu shawk la sai. Hpawtde hkying 1-3 sa shaw la rit nga ai majaw passport hpe ngam da let nta wa sai.

20 ya shani Thai de sa na. Bangkok de re.
21-22 gaw amu hte seng na re. Dai hpang 23-26 gaw Chiang Mai de sa na matu yaw shada da ai. Hkrunlam a matu gaw hpa n lajang shi ai. Raitim, Bangkok kaw mawdaw lekmat ni aloi ali lu mari na ngu kam nga ai.

Blog hpaw yak ai. Lang taw nga ai internet gaw telephone hte matut da ai re majaw loi lanyen ai.

10 March, 2009

Mu yang bai hkrum ga

10 March 2009

Tau shana da ai n re sha
Hkrumzup wa ai

N sharam ai sha
wa  mat nu yaw

Mu yang gaw
Bai hkrum ga le ...

06 March, 2009

Daini hte myit sumru yu ai lam ni

6 March 2009

Daini gaw munghpawn myen kyit hkai rung de sa ai. Bungli n galaw ai madi shadaw laika sa hpyi ai re. San ai, jep ai gaw ram ram law ai. Lit ang masha hpe la ra ai mung aten grai jaw ra ai. Nkau gaw Ingalik ga pyi nau n lu shaga ai lam mung na chye lu ai.

Daini gaw manang langai hte Max's ngu ai seng kaw shat sa sha ai. U shan sa sha ai ngu yang grau teng na. Spring chicken ngu ai sa sha ai. Ya gaw kan she tit mat sai.

Daini gaw shiga ram ram hti ai. Hti ai shiga hte laika ni hpe lawu de na zawn link galaw dat yang ...

1. India mung Arunacha Pradesh kaw na sai daw sai chyen Jinghpaw amyu sha ni hte seng ai lam - Hkri dun
(NZ Kachin kaw mung mara da sai re.)
2. Washington Times shi laika kaw na kalang bai mara dai ai Shanglawt hte Jingphaw lam laika - Hkri dun

Daini gaw laika buk ni sa hkan tam mari ai. Hti mayu ai laika buk ni n nga ai hpe myit n pyaw hpa mu lu ai. Shopping Mall kaba 3 kaw na laika seng kaba ni kaw san hkawm ai. N lu ai.

Daini gaw grai ba ai. India mung kaw nga ai myu sha ni hpe Jinghpaw laika sharin na matu sa mat ai ni gara hku she re kun? hpe sawn hkrup taw ai. Laili laika hpe tut nawng lwi ai hka zawn asak jahkrung yang she anhte amyu ting a shingma n daw mat na.

Maigan du ai myu sha ni mung lani hte lani grau grau jat wa ai. Dai masha ni hte shanhte a kashu kasha ni gaw Jinghpaw laika hpe gara hku matut lang wa na re kun? ngu ai hpe ma grai myit lawm nga ai. Ya, maigan du mat ai Jinghpaw ni yawng, madu a Jinghpaw laika hpe madu nan n sharin, jai lang ai lam n nga yang ... hpang na shi kasha ban prat hta gaw ... wa sai hugawng pa byin mat sa na.

Tsep kawp n nga mat ai kaw na bai gaw sharawt la na nga jang ram ram yak na re. Ya aten hta maigan du amyu sha ni madu shada mung, Jinghpaw laika, shi laika, journal ni shapraw... dai hpe mung mari hti let matut manoi gan ga wa hkra galaw yang she du na ban prat hta raitim, anhte a kashu kasha ni gaw Jinghpaw ga hte laika hpe chye na, lu hti, lu shaga na re ngu sawn hkrup ai. Kam ai hku dip shapraw na, ka na ahkang nga taw sai re majaw grau awng dang na re.

Madu nan mung nyau nyau, nyau nyau nga let n dum shami aten shalai nga yang gaw ... Myitsu wa e, nang mung labau hka kap na lu !

Htawm hpang prat na kashu kasha ni mara shagun ai kaw hkrup sha na ra ai. Anhte a kaji kawa ni n sharin, lam n madun, n woi shaga, n woi hti wa ai majaw Jinghpaw laika n chye mat ai nga nna mara shagun katut ai kaw kre na ra ai.

Matsing: Hkri dun ngu ai gasi hpe Shanglawt blog kaw na la lang ai. Dai gasi hpe kadai grin shalat da ai hpe n chye ai. Ngai she n shut yang Hkau Shanglawt wa she rai sam ai. Arawng la ga ai.

05 March, 2009

Blog hte Website

5 March 2009

Ngai gaw blog ka ai hpe grai myit lawm ai. Blog ka ai ngu ai gaw nye a shani shagu na mazing, nye a ningmu hte hkam sha lam hpe mahkawng ai laika dum langai hku na hkam la da ai.

N myit mada ai sha, manang langai gaw tsun wa ai. Shi gaw Myitkyina kaw na re.

Nang na blog gaw n mai hpaw ai gaw. Anhte gara hku hpaw yu na !
Chye ai hte maren Buga kata hta Internet ngu ai gaw grai yak hkak ai, dai ning laman she Myitkyina hta Internet seng ni law wa ai re. Lai sai ten du hkra gaw MCC ngu ai langai sha nga ai.

Ngai mung shi hpe ... o ra hku gumtsat, ndai hku gayin u ngu na proxy site ni jaw let hpaw yu shangun ai. Shi mung grai kam yu ai majaw, shakut shaja tim, connection gaw grai lanyen taw ai hte yak hkak taw nga ai re.

Ya ...

Blog mungkan hpe yu yang, Blogger ni malawng gaw Maigan kaw na rai nga ai. Malawng nga tim, marai 20 pyi n jan shi nga ai.

Jinghpaw ni Internet chye lang ai masha gaw, 5000-7000 lapran ram sha nga na re ngu sawn mayu ai. Dai hta Blog ka ai ni gaw marai 20 daram. Blog sa hti ai ni gaw marai 100 n pu sha rai na re.

Dai pyi aten shagu sa hti ai ni gaw kade nga na?

KNG gaw ya aten hta Jinghpaw malawng hpaw yu ai website rai nga ai. Dai website de shang yu ai mung lani mi masha 1000 n du ai lam na chye lu ai. Dai masha 1000 hta Jinghpaw gaw kade lawm na hpe ma myit yu hkrup ai.

Jinghpaw ni hpe blog law law ka shangun mayu ai. Jinghpaw blogger ni grai law wa yang grai kaja na re. Laili laika gaw, lwi ai hka zawn sak hkrung taw nhtawm grau galu kaba ai laili laika langai tai na lam de myiman yawng wa na re.

Jinghpaw blogger ni mung, madu a blog hta ka taw ai madang hta grau jat na ka shakut ga. Manaw manang ni hpe mung blog galaw na n-gun jaw ga. Ningmu htai lai mai ai, shiga ni lawan ladan chye lu ai hte n-ga, laili laika rawt jat lam hta mung n-gun kaba rai wa na ra ai.

Blogger ni kaw na mung laika ka n lagawn na hte laika hti n lagawn na mung grai ahkyak nga ai.

Raitim ...

Buga kata na manang ni gaw Website rai jang she anhte mai hpaw yu ai nga ai majaw ... website ni mung gawgap let media mungkan de mung majan je sa wa ga.
Buga kata na ni mung Jinghpaw shiga website kachyi mi sha nga ai re majaw grai myit n-gun n lu nga ma ai.
Maigan du sai, chye chyang sai myu sha ni kaw na shakut ya ra na re.

03 March, 2009

Bu hkawm brang ngai ... wa na ten du sai ...

3 March 2009

 


"Hka bra wa na ten ni du sai... brang a tsawra nja ... hkum hkrap yaw ... ... ... hka bra wa na ten ni hta ... myit dum shingran ni mu nga na ... shana shagu brang hpe yupmang ni bai jaw rit yaw ... "

Moi ... dakkasu lung ai ten, hpyen training la ai ten, nawku jawng hkan camp ni ngut ai ten ... dai aten ni hta grai mahkawn lai wa sai mahkawn re. Ya gaw laika si ni pyi yawng n lu matsing mat sai. Kadai hkawn ai hpe mung n chye mat sai. Aw ... asak aprat mung kaba wa na rai sam sai.

Ya mung, blog mungkan kaw grai hkawm chyai da ni ai. Ngai gaw ga shaga yang bai li bai la, ndi nda re majaw ngai sa du hkawm let Cbox hkan, comment hkan ka shut, tsun shut ai ni nga yang .. dai blog madu ni hpe hpyi nem dat sai. Yawng chye na ya marit ngu ...

11 March hta pyen na matu lekmat mari dat sai. Buga de n wa shi yang zuphpawng shing n rai magum bu hpe Bangkok de naw sa lung ra na gaw tai ai. Dai shaloi blog post ni loi gaw bai lu mara na sam ai.

Jinghpaw blogger ni mung moi na hta law wa nga ai. Mying gaw n tsun na sai. Yawng hpe gumhpawn na tsun sa na. Jinghpaw blog ni de sa chyai ai marang e, hpaji, ningmu, shiga, Chyum mungga kaw na hkawt lu la ai akyu rawng ai ni grai nga ai. Ndai zawn garan kachyan ya ai majaw ma chyeju dum ai.

Yawm mat ai hpan n re majaw, matut manoi mung lu garan kachyan u ga, garan ya marit ngu saw lajin mayu ai.

Sinat laknak hpai na gasat yang she rawt malan ai n re ! ngu hkam la ai majaw nye a shingran hte ngai matut rawt malan na matu numdaw mi hku na Buga de naw wa na sai. 
Hpaji matut lu sharin na ahkaw ahkang lu wa ai shani gaw kalang bai maigan lu pru na re ngu kam nga ai.
Ndai zawn maigan lu du ai mung nye a matu shaman chyeju rai nga ai.

01 March, 2009

Philippine Kachin Christian Fellowship hpe chyeju kaba sai

1 March 2009


Philippine Kachin Christian Fellowship kaw nna nta buga de wa hkyen ai NBWISAM hpe htawm masat kumhpa jaw ai re.

Philippines hta Jinghpaw Wunpawng sha ni yawng gaw 30-40 ram nga na re lam sagawn chye lu ai. Lai sai 2 ning ram hta gaw 50 lahta nga ai re lam chye lu ai. Jawng lung taw ai ni law ai zawn, Catholic Jau tai na matu sa lung ai ni mung nga nga ai.

Law dik ai maigan amyu sha ni lapran madu a ga, htunghking hte kanawn mazum lu ai majaw ma kabu nga ai. N law n la re tim manu dan nga ai ... nga ai hte maren ndai zawn htawm masat kumhpa jaw ya ai PKCF hpe grai chyeju dum kaba aw law ai lam ndai blog kaw na tsun dat mayu ai.

Chyeju kaba sai.

Ngwi pyaw ai shangai nhtoi yaw ... Naw Mu Mu Oliver hte Tangbau Seng Pan @ Ah Sa Mi

1 March 2009


Naw Mu Mu Oliver hte Tangbau Seng Pan @ Ah Sa Mi yan gaw shangai nhtoi masat akyu hpyi chyeju shakawn ma ai. Dai hta shangai nhtoi shani gaw yawng n rau nhtau re majaw mani bat kru ya shani she yawng zup let galaw wa sai re.

Dai hta nkau gaw jawng san poi ni majaw n lu sa du mat nga ai.

Akyu hpyi, malu masha ni sha ngut ai hpang shana maga hta gaw sara/ma nkau gaw wa magang sai. Matut manoi lamang hku nna ramma ni hte ramma sara ni gaw shan ju ju sha ma ai re. Ang sha-a hkau Shanghtin mung sa mu hkrup mat re nga ai. Raitim, shi gaw nbungli hpang hkrat mat ai majaw n lu sa du mat sai re. :P

Sumla dem ai sara hte sarama lahkawng n lawm ai sha ngam ai ni re.
Magam bungli hte jawng laika majaw nkau gaw nta jau jau wa ra mat ai.
Sumla dem ai wa mung nau n chye shi na jahtuk na she yu la sa nu law.
Sumla: nbwisam

Bonus: Sumla dem ai sara hte sarama yen a ...