Ndai post n hti shi yang, lapai maga de mara da ai I Believe ngu ai mahkawn (langai hpang langai) hpe shawng hpaw, madat let hti ga. Raiyang she, myi hte bawnu sha bungli galaw ai n re sha, na hte salum a hkam sha lam ni mung bungli galaw na re.
Yupmang langai nga ai ngu na Martin Luther King Jr. gaw tsun wa ai.
Daini ...
Ya jang jang nang yu dat yang ...
Kaja nan shi yup mang ni hkrang shala taw nga sai.
Yupmang ngu ai gaw n mai si ai ... Mai kaja ai lam de madun nga ai, mungkan hpe rawt jat shangun ai yupmang ni hpe atsawm lanu lahku ra ai.
Daini na ten, shi mu wa ai yupmang hte maren ... ndai mungdan hta shan hpraw, shan chyang ni yawng saboi langai hta shat rau sha taw sai. Grau dan dawng nga ai gaw ya dai mungdan hta kaba dik ai magam lit, mungkan ting hta ahkyak ai magam lit hpe gun hpai taw sai wa mung shan chyang rai nga ai.
Shingran yupmang!
Jiwoi Jiwa ni shingran yupmang nga wa ai hte de a matu gasat wa ai. Shakut wa ya sai re. Dai hte maren prut pru nga ai ramma ni, ban hte ban shakut wa ai. Shakut wa ai marang e, ya daini hkai ai hte maren nsi naisi ni lu di sha sai re.
Ndai gaw Amerika mung kaw na shan chyang ni a hkrunlam kadun mi rai nga ai.
Jinghpaw ni gaw taw?
Ngai ka yang hkum tsup na n re. Madu a ningmu hte hkap la hkan sa ai lam hta hkan na sawn dinglik yu ga law ...
Anhte a Jiwoi Jiwa ni a yupmang shingran ni hpe ma sawn yu ga.
Masha law law chye ai yupmang ni nga ai zawn ni nawn ai grupyin sha chye ai yupmang ni ma nga na re.
Masha law law chye ai yupmang ngu ai gaw, ga shadawn; shalawt ya na matu shanglawt hpung hpaw ninghtan let gasat wa ai. Mungdan bai gaw gap na matu shakut wa ai/ nga ai.
Raitim mung, anhte amyu sha ni gaw dai yupmang langai hte sha n mai myit dik nga ai. Shingran yupmang ni law law nga ra nga ai. Lam shagu hta hpang hkrat taw ai majaw re.
Nkau gaw shanglawt shingran mu wa sai. Nkau hkan shatup shakut nga ai. Dai hte rau, nkau gaw media yupmang mung mu ra nga ai. Nkau gaw prat dep hpaji a matu shingran nga ra nga ai. Nkau gaw mungkan gawdin ninggang kashun poi hta Jinghpaw ni awng padang lu na yupmang mu ra nga ai. Kachyi sha law ai amu kaw na, kaba dik ai magam du hkra yupmang mu ra nga ai.
Yupmang mu ai hte sha n-ga, tatut hkrang shala yang she htawm hpang de masan sa na re. Ya aten shakut shaja taw nga ai Kachinland shiga dap ni ... nau nna ai aten hta CNN ni zawn tai wa hkra shingran mu ra nga ai. Shingran mu let galaw ai ma rai na re. Hkai ai hte maren lu dan hkra shakut ra nga ai. (Akoi... hpaji ni sa jaw hkrup sai. Shalai na she hti dat nu yaw.)
Naw hkring na re. Matut ka yang Hkau Shanghtin ni, AP ni mung lawm wa sa na. Dai zawn rai sai, ngai na post ni gaw gara de mung n jau jau re mat ai. Sa hti nna myit tsu, myit ru mat jang mung grai hpyi nem sai law.
Link: http://www.speedyshare.com/708501797.html
Link: http://www.6lyrics.com/music/r_kelly/lyrics/i_believe_obama_tribute.aspx
Photos: www.images.google.com kaw na tam la ai.
1 comments:
Na a post hpe hti na, n dai laman nye myit masin hta byin pru nga ai lam ni hpe loi karan hpaw madun dan mayu ai law. Ah hte W.P myu sha ni gaw, madu a mung dan shang lawt lu na matu yup mang mu let ji woi ni shakut hpang da sai re. Dai ngu ai hta, W.P mung dang yawng hpe ngu na she yup mang, shing ran tawng da lai wa sai re. Raitim, ya byin nga ai mabyin hpe myit yu, sawn yu dat yang, myit n roi n ni byin nga ai re. Moi lai wa sai ten ni hta, du daw, sai hkaw, yawn madai hkrum lai wa sai, W.P myu sha ni a sai, myi pwi, jam jau lam ni gaw, ya ten na, ning baw n kau mi a n'ta hting ra, rung hting ra langai mi a matu sha re kun! Matin Luther King ni tsun ai yup mang gaw, pat da ai kawn htu baw pru let, rau jawm rawt wa ai hpe tsun mayu ai raitim, W.P myu sha ni a yup mang gaw, hting ra langai, lamu ga gachyawk mi a matu sha rai nga ai kun ngu le. La jang yawng la, yawng n jaw yang, langai mung hkum la, ngu na, myit sha ja na nga jang she, moi ji woi,ji wa ni a shakut ai lam ni gaw tang du na kun ngu le. Nye ning mu ni shut yang mung shut nga na re, raitim myit hta byin taw ai lam ni hpe, n dai post hti yu na tang madun dat ai sha re law.
Post a Comment