18 September, 2008

Bunghku ni run sa na kun?

20.9.2008





Ndai laika n hti shi yang ... hkra maga na RFA Jinghpaw nsen hpe dip na madat let hti u. Laksan lamang hpe madat shangun mayu ai.

September 15 ya shani na RFA Jinghpaw nsen hpe madat ngut ai hpang myit sawn hpa grai law ngam da ai. Dai hta laksan lamang kaw Shayi Nu Pan hte Nogmung kaw na salang langai san htai galaw da ai.

Dai salang wa gaw Nogmung kaw sha nga ai kun? Laga mare hkan mung nga ai kun gaw n chye ai.
Dai salang wa shaga ai hpe madat yu yang, a ga hpan masum lawm ai hpe mu lu ai. Jinghpaw ga, English ga, Myen ga ni re.

Dai hte seng nna ngai na ningmu gaw ... Anhte mungdan a jut shara shagu myen ga hpe grai lang wa ai. English ga ka-up ai gaw ngu sa ga.

Myen n raitim, Jinghpaw ga n kam shaga ai majaw myen ga hpe lapran ga hku na lang ai. Shani shagu shaga ai majaw akyang lawm mat ai ngu sawn la ai. Hpa majaw nga yang shaga ai nsen ni hpe madat yu yang Jinghpaw gasi mai lang ai raitim, myen ga hpe sha lang mat ai.

Ndai hku ka ai majaw nbwisam gaw ga shaga yang laga amyu ga n lawm ai i? ngu san na. Lawm ai. Grai nan lawm lai wa sai.Raitim, madu amyu shada shaga ai hta gaw tinang a ga hte sha shaga byin hkra shaman ai. Maigan wa hte shaga yang gaw shi chye na na ga hte matut mahkai ai.

Madu amyu shada da matut mahkai ai ga gaw, tinang a aga n rai taw yang ??? Anhte a aga a shang lam hpe myit tsang ai. Shani shagu media hkan, TV ni, mu n-mu, na n-na yawng gaw tara maigan wa ai laika ni, ga ni chyu rai taw ai mung Jinghpaw ga hte laika hpe hkaraw de ganawng bang nga ai.

Maigan amyu ga kade ma lu shaga tim, Jinghpaw shada da gaw madu a aga hte shaga hkat yang grau kaja ai ngu mu ai. Ndum shami re majaw, chyan yu ai kaw kadawng bang ai mabyin hta lawm mat sa na kun? English ga nau shaga ai majaw mat wa ai African ga nkau zawn anhte ma lawm sa na kun?

English ga pyi nau tsan re nga ai. Kalang mi hti ga ai laika kaw na, Myenhpaw, Jinglish ni shaga ai galaw shale ya ai grupyin tai wa ai.

Lam shagu kaw na gamyep nga ai n-gun kya ngu na i? Samwi n-gun ngu na i? Soft power hpe le ... Gai, ya ngai mung dai hpe Jinghpaw hku n chye sai. Gara hku gyin shalat la na kun? Ngu sa ga, dai samwi n-gun gaw aten tup anhte hpe adawt nga ai.

Madu a aga hte laili laika hpe tut grin hkra, n nga shi ai laika si ni, mying ni grin shalat ai n rai ai sha maigan wa a ga hpe chyu hkan shaga lawm taw yang gaw Jinghpaw laika hte ga hpe lup na matu nawng nang wunpawng lupdin lupra kaw lamu ga shara tau la da ra sai.

Bunghku ni run sa na kun?
Bunghku nnan bai gawgap lu na kun?

Bunghku =  Wall (Great Wall zawn re mungdan hpe makawp ai shakum kaba hpe tsun ai.)
Anhte shada laika si ni a lachyum n chye na yang san hkat ga.

Wanglu wanglang brang brang lang lang ningmu shai hkat mai ai. Bawngban mayu ai. Comment jaw da ya rit. Myit lawm yang ...

Ndai laika gaw hkum tsup ai n rai... Laika ka ai wa a n law n la re ai bawnu hte makan da ai.

6 comments:

Hpaji Ningli said...

Rai sa! ndai ga ngau hpe hti dat ai hte ngun mi a lu nga ai.san mayu yang brang lang mai san ai nga majaw, langai san na yaw, comment jaw ai nga hpe Jinghpaw hku gara hku tsun na ta? chye mayu na san ai sha re yaw, myu mi gaw hkum sha du rit.

shanglawt said...

Nbwisam ka ai post ni kaw na, n-dai post gaw ra sha dik htum re.. Jinghpaw Laika mat n-mai ai.. N-mat hkra, makawp maga na matu gaw, dai ni na anhte a lit re ngu hkam la ai. Matut n-na, n-chye ai hpe, brang brang lang lang san hkat ga.. Ngai mung n-chye ai grai naw law shi ai.. Ga shadawn tsun ga nga yang, news langai ka yang, hpyen du ni a arawng aya hte' seng n-na, n-chye ai. Prime minister zawn re ni, Lt-Gen zawn re ni hpe jinghpaw hku gara hku byen la na n-chye ai.. n-chye ai grai naw law ai.. grai naw hka ja ra ai.

NBWISAM said...

Ja shagan wa hpe chyeju kaba sai. Dai comment hpe ngai ma myit taw ai. Sawn dinglik sanglang ai ngu na i? Raitim, Hkau shanglawt ka da ai zawn Ningmu ngu yang ma mai na nhten. Ngai gaw ra ai.

Nang mung n chye na san ai. Ngai mung n chye yang bai san na. Hpa mung myu mi n shadu ai law ... Majoi she kabu ai. Madu a laili laika hpe sharawt na myit lawm ai re ngu kam ai majaw ...

Shanglawt wa, hpyen arawng aya hte seng nna ngai loi gaw hkaja da ai. Raitim, n hkum tsup shi ai. Ya aten gaw masha malawng gaw Du Jum a lahta rai jang Dukaba ngu sha shaga ma ai.

Dai gaw n hkrak ai. Gasi ni shalat da ra ai. Htawm hpang na matu, Jinghpaw hpyendap gaw ya byin pru, loi hkring mat mat wa na hpan me n re gaw ... Tut nawng grin ai de she man yawng ai re.

Ngai na computer gram da ai. Dai lu yang hpyendap arawng aya hte seng nna laika ka na. Bawngban jahta ga. Ngai mung hkaja taw ai sha re majaw ...

Shanghtin said...

comment hte seng na ngai loi kyen shalat da ai gaw nga ai, rai tim ngai hkrai sha chye na ngai hkrai sha lang taw ai le :) " Ga Masat" ka da ya marit ngu jang hpa rai nga san jang she bai tsung dan ai le..ngai mung law..jinghpaw laika hpe myitlawm hkum lawm hti wa ka wa ai gaw 2 ning byi n hpring shi na , Jashagan,shanglawt,Nbwi ni hpe gaw shara hku she tang shawng sa na..sharin hkat ga,sharai hkat ga, Democrazy ladat hku le."
D=Dai
E=English (hte)
M=myen
O=ok sai
C=chyu
R=rum
A=ai
Z= zaiwa(wp)
Y=Yawng ( wp laika hpe bai sharawt ga) :P :D

JINGHPAW WUNPAWNG said...

Jinghpaw laika gaw ya kaw na ma hkaja, moi kaw na ma hkaja, tut nawng lang mat na de she man yawng ga.

Hkau shanghtin, gara hku she tang shawn sa na ngu gaw hkum tsun le. Ngai pyi nang ram n chye ai gaw.

Jawm shakut, madu a laili laika hpe matut lang ma ga.

NBWISAM said...

Gai gai, kadai wa chye ai, n chye ai ni n tsun taw nga sa ga.

Chye ai ni gaw n chye ai ni hpe garan, n chye ai ni gaw chye ai ni kaw na hkaja la ga.

Grau kaja ai shawnglam de myiman yawng let ...