Ndai laika hte seng nna, Jinghpaw La, Jinghpaw num, mahtai tam ngu ai gabaw masum hte ka na.
Jinghpaw La
Jinghpaw la ni maka nan n kap ai.
Jinghapw la ni kani ya, tsa ya grai law ai.
Jinghpaw la ni grai lagawn ai.
Jinghapw la ni ...
Jinghpaw la ni ...
Jinghpaw la ni ...
Jinghpaw la ni n chye tsawra ai.
Hpa majaw ndai ga ni ngai na taw ai kun?
Daini byin nga ai masa hta hkan na ndai ga ni pru wa ai ngu sawn la ai.
Jinghpaw mung a sinpraw sinna de hkawm sa yu ai shaloi Jinghpaw num ni gaw lahta na nsen ni grai tsun pru wa ai. Grau nna gaw Jinghpaw mung a sinpraw hkran de re. Tsun ai ga hpe madat yu yang, Jinghpaw la ni gaw tara maigan amyu sha ni zawn magam bungli langai hpe mangan nga hkra n galaw ai.
Bungli loi galaw ngut jang hkring sa la ai aten grau law ai. Dai hta tsa chyaru hte len ai. Grau sawng ai ni gaw ka-ni, ya hpyen ni hte madu hkum madu jahten nga ai. (Ya hpyen = Miwa ga rai ang ai. Namhpam tsi langai re. Sub-state na ramma ni grai lang ai.)
Mau hpa ngu gaw n kam tsun ai. Hkrit tsang hpa langai gaw sinpraw hkran de hkawm sa ai aten hta, shayi sha nkau gaw Miwa la kaw she wa na ngu tsun ai law ai. Myen la ni, Sam la ni kaw wa ai ma nga ai. Ndai lam hte seng nna gaw ningmu grai law na re. Gashadawn, shinggyim masha re majaw madu a prat shimlam hpe myit mada ai. Tsawra myit ai majaw. Ni htep ai majaw. Majaw a majaw grai law na re.
Sinna hkran de sa yu ai shaloi gaw, Jinghpaw num ni ma Jinghpaw la ni hta n shayawm ai sha amu galaw nga ai hpe mu lu ai. Maigan amyu nau n nga ai majaw shada da mayaw htinggaw de ai sha law ai. Ya hpang de gaw myen ni hte htinggaw de ai ma law wa nga ai.
Jinghpaw mung a gara jut kaw na Jinghpaw la rai rai ... myutsaw myit n rawng ai n nga ai. Kadai tim amyu hpe tsaw ma ai. Dai wa me, hpa majaw anhte ni wa hkrat sum ai maga de, grau yawm ai maga de myiman yawng wa a ta?
Anhte a myutsaw myit, anhte chye na hkap la nna hkan shatup nga ai myutsaw myit wa shut nga sai kun? Langai hte langai chye na ai myutsaw myit gaw n bung hkat na re. Ngai chye na ai myutsaw myit gaw ...
Myutsaw myit rawng ai wa gaw madu hkum madu hpe ma tsaw ra ai. Hpa majaw nga yang madu nan mung Jinghpaw amyu rai taw ai le. Myutsaw myit rawng ai wa gaw madu a amyu hkrat sum na de man yawng let hkaraw de n ganawng bang ai. Myutsaw myit rawng ai wa gaw amyu hpe pawn ba na matu myit ai. Myutsaw myit rawng ai wa gaw madu hpa re, madu amyu hpa re ngu ai hpe galoi n malap ai.
Madu hkum madu n tsawra ai sha ka-ni, namhpam hte jahten sharun kau ai majaw Jinghpaw amyu ting hpe jahten ai hte bung ai. Dai zawn jahten ai Jinghpaw la law wa yang Jinghpaw amyu ting mat mat ai kaw kre na re.
Jinghpaw la ni lagawn ai i? Shinggyim masha re majaw lagawn ai ni gaw lagawn na, zet tsang ai ni gaw grai zet tsang ai ngu mu ai.
Jinghpaw la ni n chye tsawra ai i? Ngai mung dai gaw n chye ai. Chye chyang ai ni nga yang htai ya marit.
Jinghpaw la ni nkau gaw htenza nga ai. Nkau gaw shakut nga ai. Amyu ting a shawng lam hpe dawdan ya na mabyin hta Jinghpaw la ni gara hku shang lawm nga ai kun? Ndai gasan hpe shayi sha ni na mahtai ra ai.
Bai matut na ...
Ndai laika gaw hkum tsup ai n rai ... myit yu sawn yu na loi li pru wa na matu ...
8 comments:
Grai hkrak ai.. Ti nang hkum ti nang pyi n lu ma kawp ma ga ai sha Myu tsaw lam ni ja hta yang nam nak n rawng ga si ni sha rai na re. Ding hku langai hpe gaw de na matu a hkyak dik gaw shada da chye na ai hte tsaw ra myit rai na re. Gara mai gan hte wa ai ngu ai hta ti nang tsap nga ai sha ra kaw ra a myu a matu gara sha ra kaw tsap ai ngu ai gaw grau a hkyak na nhten. Ga sha dawn Ester hkaw hkam jan ja sam kaw wa tim a myu lawt lam galaw zawn.. NBwi Sam a ning mung ni hpe matut madat mayu ai. KK sha man u ga.
Apprenticeship hpe chyeju kaba sai.
Jinghpaw la hte Jinghpaw num a ratio gaw grai kaba ai majaw maigan masha kaw wa ai shayi sha ni mung nga wa chyalu re. Dai hpe nbwisam gaw mara n mu ai. Yawn gaw yawn ai ngu ga le ...
Hpa majaw nga yang Jinghpaw la ni kaw ma ra rawng ai ni nga ai. Ya shayi sha malawng tsun taw ai hpa, Ka-ni lu na Jinghpaw la ni si htum mat ai zawn le.
Masha amyu nkau gaw, shayi sha rai rai, shadang sha rai rai, maigan wa hte htinggaw de tim, madu amyu a matu galaw shakut ai gaw myutsaw myit ngu marawn let, tsa sha lu, magam bungli gaw n galaw ai ni hta grau hkik hkam nga ai.
Jinghpaw la ni chyu ra rawng ai gaw n re. Jinghpaw num ni ma ra rawng ai nga ai. Kaja ai hte n kaja ai gaw kapyawn chya lu re. N re ni?
e...ngai hkrai na W.P shadang ni a ntsa ning mu hte seng na ka na hkyen taw yang nang na post hti ku ai re..nang tsun mat ai ni yawng gaw jaw ai daram mung jaw sai...tim..ngai naw kahtap ka mayu ai gaw.....
re...W.P la ni gaw ( malawng ) PRIDE rawng taw ai (shanhte a myit hta)
bai....myit mung nau nchye galu ma ai....( ra shagaw ra , marit sha gaw marit )
nang tsun ai jaw ai..Num kasha ni mung ra rawng ai lam nga ai..she nga le...tim...W.P la ni hpe ngun nlu ai gaw teng sha re...
Maigan la ni kaw num wa ai lam hte seng na gaw langai hkrai a hkam la ai hte she seng na re ngu mu mada ai....
e le...W.P la shagu mung hten za taw ai nrai tim...myi hte mu mada ai malawng gaw lam amyu amyu hku hten za taw ai( physical, moral ,spiritual ...) ...shayi sha ni mung lawm ai le..
ngai tsun mayu ai gaw tinang a hkam la ai lam ,tinang nga kaba wa ai dinghku,makau grupyin ni gaw tinang a asak hkrung lam kaw influence byin mat ai re ngu mu mada ai....
dai majaw , hpa lam hta tim Karai masa (Mungga) hte sha nrai yang hten za na matu grau loi na re..
Shagrit shanyem hkat ai lam n-nga yang gaw, majan langai galoi mung htum chye na n-re. Htawm hpang prat na, anhte Jinghpaw Wunpawng Myu Sha ni, grau galu gaba, nga prat nga sa wa lu na matu gaw, n-dai majan hpe, anhte ni dang hkra gasat ra na re.
Masha a myu ni hte' la hkat yang, anhte a myu ni le' hte le', htum mat, mat mat wa chye nga ai. Dai majaw, langai hte' langai shagirt shanyem hkat let, jaw kaja ai mahtai langai hpe lu tam ai shaloi gaw, "n-htum n-mat ai tsaw ra myit ni" byin pru wa na re hpe kam let...
ah ga hkau n bwi ka jang she ngai wp shadang wa mung loi lawm sha mat sai hku rai nga ai, :) wp la sha ni hte seng na gaw ram ram jaw ai law ..tsung na gaw loi gaya ai law..hee...ahhkau ni beer lu ai kaw na hkawt le i? n tsung yang mung masu ai tai nga ai gaw,(rai tim ahyen n lu ai) hpa majaw lu sha ai ngu ai n pawt hpe sagawng yu yang she grau htap htuk na n hten? $ grai lu na lu ai mung n re? madu hkum madu n tsawra na mung n re? kadung ai hku tsung ga nga yang shawng lam na matu myit dat shagu mitip chyip rai taw taw rai nga ai gaw? ngai byi kalang lang lu na zawng nga wa ai : hpa na nga yang, myit ru na manghkang hkang galaw taw jang mung rim katut na n re ni taw? ??????? rai na grai law ai law....Dai majaw law malawng ngai na manang ni gaw bungli n lu ai majaw lu hpang wa ma ai, hpa majaw bungli n nga ai i? hkauna mai htu sha ai le ngu tsung mayu na re? hkum htu sha mayu ya prat madu buga madu nammaling ni mung madu na n rai mat sai. galaw sha ai n rai sai. galaw jaw ra ai de she rai ma wa sai,(ngai nang tatut re majaw lu tsung dan ai re) dip lu dip sha ai wa le. gara kaw du mat sai kung,..dai zawng le i? law law rai nga ai...wp shadang/shayi kadai mung n ra ai. lu sha na, n lu sha na, tsawra myit rawng na, n rawng na, madu myit kaw na sha hpang ra na re ngu mu ai, (myen Sa Wa ni hte ganawng na n kaja ai ahkyen lailen ni kap la ai she rai na re ngu kam ai) wp myu sha ni mungkan ga n tsa sak hkrung nga din yang Hpang hkrat ai ngu gaw n nga na re ngu kam ai, Nang ngai Dai ni Kaw na Dum la jang, kashu kasha ni prat dai zawng re ni yawm mat na re ngu mu mada ai hku re ...grai galu mat sai...sry..ngai post ka taw ai she shadu kau na :) yawng hpe hkung ga ai....;)
Desire: Hpaji jaw ai majaw chyeju kaba sai. Nang tsun ai jaw nga ai. Shading sharai la hkat ga.
Shanglawt: Hkau e, nang tsun ai zawn re. Shada da mayaw htinggaw n de yang ma Jinghpaw wunpawng amyu gaw madun gawk kaw madun sha ai hpan tai mat na re.
Rsj: Na ningmu wa mung kadun sha law me. Gara kaw galu ai ma. Hti ai pyi n hkru. Re, hkau nang tsun ai mabyin ni hpe ngai hugawng pa sa ai shaloi hkrum mu ga sai. Hkam sha ga sai.
Madu a hkauna zing la katut, mare kaba de lung na amu galaw sha na mung yak. Dai maigan wa a company kaw nchyang galaw ra mat ai. Jabri jabrai gaw lani mi galaw lani mi sha ai pyi n law ai.
Prat dep hpaji mung bai n chye, myitru yang gaw tsa lu let, yawn madai nga ai ni grai nga ai.
Raitim, myit n htum ga. Jinghpaw she re gaw... lata sharawt asum jaw ai ngu ai hpe kabai kau ga. Anhte kade yak hkak tim, npawt kaw na bai shakut ga.
Ningmu ni ka da ya ai majaw grai chyeju kaba sai. Ningmu ni hti nna mung grai hpaji lu ai re.
Shayi sha hte shadang sha shada shading sharai ya hkat ga.
Anhte gawng kya ai shadang sha ni hpe ma hkum kau da ya oi ...
Shayi sha ni gaw masha jahpan ma, tsawra myit ma grau ja ai le.
Shayi sha ni e, nanhte n lawm yang n mai ai. Gu brang ni hpe hkum kau da yaw ...
umm reasons ni hpe ja hpai nnna ti nang hkum ti nang hten sa hkra galaw ai gaw n-gun n jaw ai. Loi lam tam ai hta shawng lam hpe mu chye ai ni rai ra n hten. N-kau jing hpaw la ni naw tsun chye ai.. hpaji lam de hkan taw ai jing hpaw num ni gaw "kawa e dai galaw dat u" "Ngai bung li grai law ai shat naw shadu u" ngu na sha ngun sha na re da. Gaja wa nga ayang shatsha du sha ai hte mawoi ai ni yawng gaw shang gum hpraw tam ai hta n yawm ai sha ding hku a matu a hkyak ai re. Ngai mu mada ai ram nga yang.....myit sawn ya chye ai (open-minded) byin ai gaw grai a hkyak na re.
Dai zawn sha da n chye na lakawn yang gaw Jing hpaw num ni shan hte hpe chye na lakawn ai ni hte rai mat yang mung "myu tsaw myit n rawng ai" nga gabaw bai dat ma ai. Gaja wa nga yang sai hpaw dat yang yawng hkyeng ai sha re.
Ningmu ni grai kaja ai ... ka da ya ai majaw grai chyeju kaba sai.
Post a Comment