Daini grai myit dik ai.

11 July 2009

Daini grai myit dik ai.
Hpa majaw ta?

Gwi tsip, wa tsip zawn rai taw ai nye a gawk kaji hpe seng nga let, n myit mada ai sha moi na diary dingsa ni hpe hti hkrup ai. Ha ha... Mungywa dakkasu de jawng nnan sa lung ai aten na hkam sha lam ni, myit mang lam ni hpe ka da ai re.

Myen laika hku re. Dai aten hta gaw Jinghpaw laika n chye shi ai majaw ... :D

Daini hti let, moi na lam ni bai dum shingran byin ai.

Kalang ta, zing da ai laika ni (mail ni) hpe bai hpren dat, hpaw yu dat galaw byin ai. Myen mung ting na Penpal ngu na i? Pen Friend ni ngu na kun? Dai manang ni kaw na laika ni le.. Grai law ai. Tsa kaba lam re. :D

Dai laika ni hti dat, mani dat, yawn dat, pawt dat hte daini tup aten shama kau ni ai. Masha n mu ga hkat tim, laika hte hku hkau ai manang ni grai law ai. Ngai manu shadan ai. Laika hte sha manang tai tim le. Shinggan kaw kaja mu ga hkat, shaga hkat ai zawn mung hkam sha ai.

Sumla ni galai hkat, laika ni sa hkat, kumhpa ni, shangai nhtoi akyu hpyi ai lam ni galaw hkat re grai gaw pyaw lai wa sai re.

Ya ya gaw? dai PF manaw manang ni hte mung matut mahkai n lu mat sai. Laika maisau kaw ka na mung lagawn ai zawn zawn. Ta hte ka yang laika si ni hti pyi n mai wa ai majaw rai sam ai.

Email wa n pru wa yang gaw, huuu...

Manang ni e, nanhte ngwi pyaw nga u ga. Nanhte hte hku hkau wa ai aten hta Jinghpaw n nga, myen n nga, Karen n nga ai. Manang ngu ai myit san san hte sha rai nga ai. Ya aten dai myit ni ngai hta nau n rawng mat sai. Amyu n bung yang, grai chye jen mat sai majaw ...
kalang bai akyu hpyi ya dat mayu ai.

Manang ni e, ngwi pyaw hkam kaja let shaman chyeju ni grai lu u ga law. Daini grai myit dik mat ni ai.