Dam hkawm nga ai shadang sha langai IV

11 July 2009

Victoria Court de du yang gara gawk la na rai? ngu san wa ai. Economy, Deluxe, ..., ...., Platinum ngu ai mying ni hpe hti dan taw ai la wa gaw ngai hpe n tsen ai zawn zawn yu nga ai. Raitim, hpa n san shi ai.

Ngai mung Deluxe gawk langai la dat na pu ba tsa-up ai hte gawk kata shang wa ai. Gawk kata de du yang she, grai mau mat ni ai. Hpa majaw nga jang yupku mung n nga ai. Chyinhkyen ntsa kaw she yup ra ai hpan rai taw na re.

Hka shin gawk kata kaw mung, dung let shin na hkrang ni, mau nan san ai hkrang ni galaw da ai hpe mu lu ai. TV hpe hpaw yu dat ai. CNN hpe yu let, jahkring mi gan yup malap mat ai.

Shana hkying 10 ram hta hprang wa ai. Kan kata kaw loi kaw si ai zawn hkam sha ai majaw lusha seng tam na pru wa ai. Mi yet, ngai hpe n tsen ai zawn yu ai la wa gaw "Myitsu wa, pru n ra ai gaw. gawk kaw na htet sha mai ai le. ngai madun ya na ngu nna ngai hpe gara hku htet sha ra ai lam madun ya ai.

Ngai mung beer soi mi hte yangyi gangau ni htet dat ai. Dai htet taw ai ten, phone makau kaw na laika buk kasha gaw mau hpa re ngu hpaw yu dat yang, condom ni, yupra lam hta lang ai arung arai ni hpe ndau da ai laika buk rai taw nga ai.

Lusha ni sa sa ai ten hta, dai bungli galaw masha gaw ngai hpe lama mi tsun ai.
"Nang n pawt yang lama mi san na yaw. Manang n lawm ai i?"
" N lawm ai. Ngai hkrai sha re." Shi grai mau mat ai nsam hte "Ndai Motel kaw langai hkrai sa yup ai gaw nang shawng re." nga na pru mat wa ai.

Dai aten she, ngai signboard hpe sa yu hkrup ai. Myihprap wan htoi dik ai hte tu kabrim taw ai signboard gaw ...

"VICTORIA COURT MOTEL" ...