Dam hkawm nga ai shadang sha langai II

1 July 2009

Mega mall kata de shang na Spirit dazik Jean labu dut ai seng de shawng sa wa ai. Dai gaw nye a ra dik ai brand rai nga ai. "Morning Sinyaw" ngu hkap shakram ai tsawm shayi hpe sumsai nampan langai kabai jaw da let Jean labu ni hpe hkan yu nga ai.

Raitim, n myit mada ai sha manu(price) ni wa grai laja taw ai. Langai mi hpe $ 100 jan rai taw ai. Haaaa.. myit ru sai. Dai gaw nye matu grai laja nga ai. Yangung kaw rai jang gaw Miwa kaw na shang ai Spirit Jean labu hpe $ 20 ram hte lu ai.

E le, quality gaw shai na rai nga ai ngu madu hkum madu tsun let bai pru wa ai. Guess seng de sa na kun? ngu bai myit sawn taw ai. Kan kata kaw kru kru nga ngoi wa ai majaw kan shawng tsi na re ngu na KFC de man yawng wa ai.

N myit mada ai sha Nadine hte hkrum ai. Gara sa na? Hpa sa galaw ai? san hkat let shat rau wa sha na hku sa hpaw yu ai. Shigaw anhte Asha dan na Hkausoi n sha ga ai nga ai majaw, Vietnam seng de rau sa wa ai. Dai Vietnam seng na Hkausoi gaw Myitkyina na zawn namchyim n rawng tim, Hkausoi hpe grai marit yang ngai sa sha sha re ai seng re.

Yu u le, manu mung n yawm ai gaw. Hkausoi wan mi yawm dik $ 8 she re me. Shani shagu sha taw ai KFC kaw na burger ni hpe mung jin wa jang sa sha ai re.